2 Corintios 3 - Triqui de San Juan Copala

Ase vaa ꞌo̱ yanj cartá quiꞌyaj Cristó vaa nij síí noco̱ꞌ man Cristó ya̱nj chumanꞌ Corinto a

¹ Dan me se ga̱a aꞌmii núj nana̱ nihánj me se uun cheꞌe̱ uún núj aꞌmii núj cheꞌé maꞌa̱n núj, rá soj naꞌ. Taj maꞌ. Dan me se ase vaa yanj cartá vaa nu̱ꞌ níꞌ si̱j noco̱ꞌ man Cristó ado̱nj. Dan me se né cheꞌe̱ se nucuiꞌ rá núj aꞌmii núj da̱nj maꞌ. ꞌO̱ se veé da̱nj vaa ya̱ na̱nj á. Nda̱a me rá soj ti̱haa̱n núj yanj cartá aꞌmii sa̱ꞌ cheꞌé núj xa̱ꞌ. Nda̱a me rá soj cachi̱nj núj yanj cartá aꞌmii sa̱ꞌ cheꞌé núj rihaan soj xa̱ꞌ. Taj maꞌ. ꞌO̱ se a̱j neꞌen soj man núj á.

² ꞌO̱ se ase vaa yanj cartá aꞌmii cheꞌé núj vaa maꞌa̱n soj ado̱nj. Dan me se a̱j neꞌen cunuda̱nj yuvii̱ da̱j natuná Yaꞌanj nimán soj, ne̱ cheꞌé dan xcaj nij yuvii̱ cuentá da̱j ꞌyaj núj se‑su̱u̱n Yaꞌanj ado̱nj.

³ Dan me se neꞌen ya̱ ya̱ níꞌ adi̱ꞌ se vaa yanj cartá quiꞌyaj maꞌa̱n Cristó vaa soj chugua̱nj. Tza̱j ne̱ né ya̱nj cartá quiꞌyaj nii ga̱ tintá me yoꞌ maꞌ. Né le̱trá cachrón nii rihaan yahij me yoꞌ maꞌ. ꞌO̱ se letrá cachrón ya̱ maꞌa̱n Cristó nda̱a nimán soj me nana̱ yoꞌ ado̱nj. Ne̱ yoꞌ me quiꞌyaj Nimán Yaꞌanj, ne̱ cheꞌé Nimán Yaꞌanj me nuû nana̱ yoꞌ nda̱a rque nimán soj na̱nj á.

Guun nucua̱j nij tuvi̱ꞌ Pabló caꞌmii natáj nij soꞌ, quiꞌyaj maꞌa̱n Yaꞌanj a

⁴ ꞌO̱ nucua̱j rá núj man Yaꞌanj cheꞌé Cristó se vaa ya̱ racuíj Yaꞌanj man núj ado̱nj.

⁵ Dan me se ne nó xcúún núj cata̱j núj se vaa uun nucua̱j núj quiꞌya̱j núj se‑su̱u̱n Yaꞌanj maꞌ. ꞌO̱ se maꞌa̱n Yaꞌanj me síí ꞌyaj uun nucua̱j núj quiꞌya̱j núj se‑su̱u̱n soꞌ ado̱nj.

⁶ Ne̱ Yaꞌanj me síí quiꞌyaj guun nucua̱j núj cataj xnaꞌanj núj cheꞌé tucuáán naca̱ cuchruj Yaꞌanj cheꞌé yuvii̱ ado̱nj. Ne̱ xa̱ꞌ tucuáán naca̱ yoꞌ, tza̱j ne̱ né ina̱nj tucuáán no̱ rihaan yanj da̱j vaa no̱ xcúún níꞌ canoco̱ꞌ níꞌ me tucuáán naca̱ yoꞌ maꞌ. ꞌO̱ se se̱ guun nucua̱j níꞌ canoco̱ꞌ níꞌ tucuáán no̱ rihaan yanj maꞌ. Xa̱ꞌ tucuáán no̱ rihaan yanj, tza̱j ne̱ cavi̱ꞌ nimán níꞌ, quiꞌya̱j tucuáán vaa da̱nj na̱nj á. Dan me se xa̱ꞌ tucuáán naca̱ cuchruj Yaꞌanj cheꞌé níꞌ, tza̱j ne̱ tana̱nj a̱ cunu̱u iꞌna̱ꞌ nimán níꞌ quiꞌya̱j Nimán Yaꞌanj cheꞌé tucuáán naca̱ yoꞌ na̱nj ado̱nj.

Veꞌé ndoꞌo vaa nana̱ aꞌmii natáj nij tuvi̱ꞌ Pabló cheꞌé Nimán Yaꞌanj a

⁷ Nana̱ cataj xnaꞌanj Yaꞌanj rihaan Moisés ga̱a naá roꞌ, cachrón Yaꞌanj nana̱ yoꞌ rihaan yahij caxra̱ꞌ, ne̱ cataj soꞌ se vaa síí se̱ cuno nu̱ꞌ nana̱ yoꞌ roꞌ, yu̱u̱n cheꞌe̱ cavi̱ꞌ soꞌ, taj soꞌ a. Dan me se ga̱a tacuachén Moisés tucuáán yoꞌ rihaan nij yuvii̱, ne̱ cuchuguu̱n uxrá rihaan soꞌ, ne̱ ne gu̱un nucua̱j nij yuvii̱ israelitá ni̱ꞌyaj nij soꞌ rihaan Moisés maꞌ. Tza̱j ne̱ do̱ꞌ do̱ꞌ navij se chuguu̱n yoꞌ rihaan Moisés a.

⁸ Táá a̱ suun vaa rihaan núj suun nataꞌ stucua̱nj Nimán Yaꞌanj chugua̱nj.

⁹ ꞌO̱ se xa̱ꞌ stucua̱nj Moisés, tza̱j ne̱ sa̱ꞌ uxrá caꞌmii nii niꞌya̱j nii se‑su̱u̱n Moisés suun nataꞌ cheꞌé tucuáán ꞌyaj ꞌnaꞌ cacunꞌ xráá yuvii̱, ne̱ táá a̱ se‑su̱u̱n núj, ne̱ sa̱ꞌ doj ꞌyaj núj nataꞌ núj tucuáán ꞌyaj nuu sa̱ꞌ yuvii̱ rihaan Yaꞌanj ado̱nj.

¹⁰ Dan me se ga̱a naá roꞌ, niꞌndaj ya̱ veꞌé chuguu̱n rihaan Moisés, rá nij yuvii̱ israelitá, tza̱j ne̱ ya̱j me se ne veꞌé vaa nana̱ nga̱ yoꞌ rihaan níꞌ a̱ maꞌ. Ne̱ tucuáán naca̱ cuchruj Yaꞌanj cheꞌé níꞌ roꞌ, niꞌndaj ya̱ veꞌé vaa yoꞌ rihaan níꞌ ya̱j ado̱nj. ꞌO̱ se veꞌé doj vaa tucuáán cuchruj Yaꞌanj cuano̱ rihaan nana̱ caꞌmii Yaꞌanj ga̱a naá na̱nj ado̱nj.

¹¹ ꞌO̱ se ina̱nj rque do̱j tiempó cuchuguu̱n rihaan Moisés, quiꞌyaj nana̱ caꞌmii Yaꞌanj rihaan soꞌ ga̱a naá, tza̱j ne̱ sa̱ꞌ doj vaa nana̱ caꞌmii Yaꞌanj cuno níꞌ ya̱j, ne̱ veꞌé uxrá doj cuma̱n níꞌ nu̱ꞌ cavii nu̱ꞌ caꞌanj, quiꞌya̱j nana̱ naca̱ yoꞌ ado̱nj.

¹² Cheꞌé se uun ya̱ rá núj se vaa ga̱a̱ iꞌna̱ꞌ núj nu̱ꞌ cavii nu̱ꞌ caꞌanj, cheꞌé dan niha̱ꞌ rá núj, ne̱ ne naꞌa̱j núj a̱ maꞌ.

¹³ Ne ꞌyaj núj nda̱a vaa quiꞌyaj Moisés ga̱a naá maꞌ. Dan me se caráán soꞌ yatzéj rihaan soꞌ, se̱ gaa na̱nj ni̱ꞌyaj nij yuvii̱ israelitá rihaan soꞌ da̱j gu̱un canicunꞌ se chuguu̱n rihaan soꞌ a.

¹⁴ Dan me se ne queneꞌe̱n nij soꞌ da̱j vaa canicunꞌ se chuguu̱n rihaan Moisés maꞌ. ꞌO̱ se ne gu̱un nucua̱j nij soꞌ xca̱j nij soꞌ cuentá a̱ maan ado̱nj. Ne̱ ina̱nj da̱nj vaa uún nij yuvii̱ israelitá nda̱a cuano̱ nihánj, ne̱ aráán rihaan nij soꞌ ga̱a nayaa nij soꞌ tucuáán cuchruj Yaꞌanj ga̱a naá, ne̱ taj se ꞌyáꞌ xca̱j nij soꞌ cuentá cheꞌé nana̱ yoꞌ a̱ maan ado̱nj. Ina̱nj nij síí noco̱ꞌ man Cristó me síí uun nucua̱j xca̱j cuentá cheꞌé nana̱ yoꞌ na̱nj á.

¹⁵ Tza̱j ne̱ veé da̱nj vaa nda̱a cuano̱, ne̱ ne gu̱un nucua̱j nij yuvii̱ israelitá xca̱j sa̱ꞌ nij soꞌ cuentá ga̱a nayaa nij soꞌ stucua̱nj Moisés maꞌ. Veé da̱nj aráán rihaan nij soꞌ na̱nj á.

¹⁶ Ne̱ ga̱a canica̱j níꞌ nocoꞌ níꞌ man Síí ꞌNi̱j Raꞌa man níꞌ, ga̱a ne̱ xꞌnéj yatzíj aráán rihaan níꞌ, ne̱ aꞌvee ruviꞌ sa̱ꞌ rihaan níꞌ niꞌya̱j níꞌ ado̱nj.

¹⁷ Dan me se da̱nj vaa ese Nimán Yaꞌanj me Síí ꞌNi̱j Raꞌa man níꞌ, ne̱ dan me se rej ya̱nj Nimán Yaꞌanj me se vaa yaꞌnúj rej yoꞌ a.

¹⁸ Ne̱ taj se aráán rihaan ta̱ranꞌ níꞌ maꞌ. ꞌO̱ se uun nucua̱j níꞌ neꞌen níꞌ man Síí ꞌNi̱j Raꞌa man níꞌ, se vaa niꞌndaj ya̱ veꞌé vaa soꞌ, ne̱ ase vaa soꞌ roꞌ, da̱nj ga̱a̱ uún maꞌa̱n níꞌ, cheꞌé se niꞌya̱j níꞌ man soꞌ ado̱nj. Dan me se do̱ꞌ do̱ꞌ naquiꞌyaj sa̱ꞌ Nimán Yaꞌanj Si̱j ꞌNi̱j Raꞌa man níꞌ nimán níꞌ, ne̱ dan me se ne̱ soꞌ nimán níꞌ, ne̱ ase vaa maꞌa̱n soꞌ roꞌ, da̱nj ga̱a̱ ta̱ranꞌ níꞌ uún ado̱nj.