2 Corintios 13 - Triqui de San Juan Copala

¹ Dan me se cuchi̱ꞌ uún ꞌu̱nj, ne̱ quisi̱j vaꞌnu̱j cuchi̱ꞌ ꞌu̱nj rihaan soj, ne̱ sese vaa ꞌo̱ tinúú soj síí tumé cacunꞌ, ne̱ sese canicu̱nꞌ vi̱j síí queneꞌen do̱ꞌ, sese canicu̱nꞌ vaꞌnu̱j síí queneꞌen do̱ꞌ, ne̱ quira̱nꞌ soꞌ sayuun na̱nj á.

² Ga̱a quisíj vi̱j cuchíꞌ ꞌu̱nj rihaan soj, ne̱ cataj xnaꞌanj ꞌu̱nj rihaan soj se vaa sese cuchi̱ꞌ uún ꞌu̱nj rihaan soj, ne̱ se̱ caráj xꞌnaj ni̱ꞌyaj man síí veé da̱nj ꞌyaj cacunꞌ maꞌ. Ne̱ cuano̱ nihánj me se nuvíꞌ ꞌu̱nj yáán rej ma̱n soj, tza̱j ne̱ cata̱j xnaꞌanj uún ꞌu̱nj rihaan soj se vaa ya̱ ya̱ qui̱ꞌyáá ꞌu̱nj sayuun man cunuda̱nj nij síí tumé cacunꞌ yoꞌ a.

³ ꞌO̱ se sese da̱nj qui̱ꞌyáj, ne̱ gu̱un ya̱ rá soj se vaa ya̱ ya̱ Cristó me síí rqué nana̱ aꞌmii ꞌu̱nj rihaan soj na̱nj á. Xa̱ꞌ Cristó, tza̱j ne̱ né si̱j ninaj me soꞌ rihaan soj maꞌ. ꞌO̱ se si̱j gu̱un nucua̱j ndoꞌo tu̱mé man soj me Cristó ado̱nj.

⁴ Dan me se caꞌvej rá Cristó gu̱un nucua̱j doj yuvii̱ rihaan soꞌ, ne̱ cachrón nii man soꞌ rihaan rcutze̱, tza̱j ne̱ guun nucua̱j soꞌ cunuu iꞌna̱ꞌ uún soꞌ, quiꞌyaj Yaꞌanj, ne̱ cheꞌé se noco̱ꞌ núj man Cristó roꞌ, cheꞌé dan ase vaa síí ninaj vaa maꞌa̱n núj rihaan chumii̱ nihánj, tza̱j ne̱ Yaꞌanj roꞌ, me síí rque̱ se nucua̱j man núj, ga̱a ne̱ gu̱un nucua̱j núj ga̱ Cristó quiꞌya̱j núj se‑su̱u̱n Yaꞌanj cheꞌé nij soj na̱nj ado̱nj.

⁵ Xca̱j maꞌa̱n soj cuentá sese ya̱ ya̱ amán rá soj niꞌya̱j soj man Cristó á. Neꞌen soj se vaa ya̱nj Cristó ga̱ soj naꞌ. Ase ne neꞌen soj xa̱ꞌ. Ya̱ ne Cristó ga̱ soj, sese né si̱j tihaꞌ yuꞌunj me soj chugua̱nj.

⁶ ꞌO̱ se amán ya̱ raj, ne̱ me raj queneꞌe̱n soj se vaa né si̱j tihaꞌ yuꞌunj me núj maan chugua̱nj.

⁷ ꞌO̱ se achíín niꞌya̱j núj rihaan Yaꞌanj se vaa a̱ ꞌó se chiꞌi̱i̱ se̱ quiꞌyaj soj maꞌ. Né cheꞌe̱ se me rá núj cata̱j yuvii̱ se vaa sa̱ꞌ quiꞌyaj núj me achíín niꞌya̱j núj da̱nj maꞌ. Tana̱nj cheꞌé se me rá núj sa̱ꞌ ina̱nj quiꞌya̱j soj, cheꞌé dan achíín niꞌya̱j núj da̱nj rihaan Yaꞌanj ado̱nj. Caꞌve̱e se cata̱j yuvii̱ se vaa síí tihaꞌ yuꞌunj me maꞌa̱n núj, tza̱j ne̱ ꞌo̱ sa̱ꞌ quiꞌya̱j soj na̱nj á.

⁸ ꞌO̱ se se̱ guun nucua̱j núj tiha̱ꞌ yuꞌunj núj man Yaꞌanj da̱j vaa nimán ꞌo̱ ꞌo̱ níꞌ maꞌ. Ma̱an se tana̱nj rquee̱ núj caꞌmi̱i̱ núj nana̱ ya̱ cheꞌé ꞌo̱ ꞌo̱ níꞌ a.

⁹ Ne̱ caꞌve̱e se né si̱j nucua̱j me núj, tza̱j ne̱ uun niha̱ꞌ rá núj cheꞌé se si̱j nucua̱j me soj, ne̱ achíín niꞌya̱j núj rihaan Yaꞌanj se vaa rque̱ Yaꞌanj nu̱ꞌ se vaa achiin man nimán soj, ga̱a ne̱ quiꞌya̱j soj se‑su̱u̱n soꞌ a.

¹⁰ Cheꞌé dan cuano̱ nihánj me se cachrón ꞌu̱nj nana̱ nihánj rihaan yanj cartá naya̱a̱ soj a. Dan me se nda̱ꞌ se nuvíꞌ ꞌu̱nj yáán ga̱ soj cuano̱, tza̱j ne̱ cachrón ꞌu̱nj nana̱ nihánj, ga̱a ne̱ güii cuchi̱ꞌ ꞌu̱nj rihaan soj me se se̱ gaa suun rihanj quiꞌya̱j ndoꞌoj sayuun man soj a̱ maꞌ. Dan me se caꞌneꞌ Síí ꞌNi̱j Raꞌa man níꞌ suun rihanj cu̱tumej man soj, ne̱ dan me se naꞌvej rá soꞌ quiri̱ꞌ soj qui̱ꞌyáj a̱ maꞌ. ꞌO̱ se me rá soꞌ ra̱cuíj ꞌu̱nj man soj yan canoco̱ꞌ sa̱ꞌ soj man soꞌ ado̱nj.

Me rá nij tuvi̱ꞌ Pabló se vaa veꞌé cuma̱n nij síí ma̱n Corinto a

¹¹ Ne̱ vaa do̱j nana̱ me raj cata̱j xnaꞌanj ꞌu̱nj rihaan soj, tinu̱j, nocoj. Dan me se ga̱a̱ niha̱ꞌ ya̱ rá nimán soj á. Rquee̱ soj sa̱ꞌ doj ga̱a̱ nimán soj á. Ga̱a̱ nucua̱j rá soj quiꞌya̱j snana̱ ꞌu̱nj á. ꞌO̱ cuya̱a̱n ga̱a̱ rá nimán soj ga̱ tuviꞌ soj na̱nj á. Ga̱a̱ xe̱j nimán soj á. Ne̱ ca̱yáán Yaꞌanj si̱j ꞌyaj vaa xe̱j nimán níꞌ do̱ꞌ, si̱j ꞌyaj nuu ꞌe̱e̱ rá níꞌ tinúú níꞌ do̱ꞌ, ga̱ soj ado̱nj.

¹² Ne̱ ga̱a nariꞌ tuviꞌ soj ga̱ tinúú soj, ne̱ veꞌé uxrá caꞌmi̱i̱ soj ga̱ tinúú soj rihaan Yaꞌanj á.

¹³ Veꞌé ca̱yáán nij soj, rá cunuda̱nj nij síí noco̱ꞌ man Cristó ado̱nj.

¹⁴ Dan me se me rá núj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j ga̱ cunuda̱nj soj, ne̱ me rá núj ga̱a̱ ꞌe̱e̱ rá Yaꞌanj ni̱ꞌyaj Yaꞌanj man cunuda̱nj soj, ne̱ me rá núj ꞌo̱ veꞌé caꞌmi̱i̱ cunuda̱nj soj ga̱ tinúú soj quiꞌya̱j Nimán Yaꞌanj na̱nj ado̱nj.