2 Corintios 10 - Triqui de San Juan Copala

No̱ xcúún nij síí ma̱n Corinto cuno̱ nij soꞌ rihaan Pabló, ne̱ se̱ cuno nij soꞌ rihaan nij síí tihaꞌ yuꞌunj a

¹ Xa̱ꞌ ꞌu̱nj si̱j cuꞌna̱j Pabló, tza̱j ne̱ me rá ꞌu̱nj ga̱a̱ ꞌu̱nj nda̱a rá se vaa maꞌa̱n Cristó ado̱nj. Dan me se naꞌvej rá ꞌu̱nj caxri̱i̱ yuva̱a̱ ꞌu̱nj man soj maꞌ. Ma̱an se veꞌé ina̱nj caꞌmi̱j ga̱ soj, raj a. Neꞌen soj se vaa vaa yuvii̱ ꞌni̱j scaꞌnúj soj taj se vaa veꞌé uxrá aꞌmii ꞌu̱nj rihaan soj ga̱a nicúnꞌ ꞌu̱nj rihaan soj, tza̱j ne̱ axríj yuva̱a̱ ꞌu̱nj man soj ga̱a nicunꞌ yaníj ꞌu̱nj a. Da̱nj tuꞌva nij yuvii̱ yoꞌ, tza̱j ne̱ cuano̱ nihánj me rqueé ꞌu̱nj man soj

² se vaa quiꞌya̱j soj se ndoꞌo, ne̱ se̱ quiꞌyaj tuchi̱ꞌ soj cuma̱n soj, ne̱ asa̱ꞌ cuchíꞌ ꞌu̱nj, ga̱a ne̱ se̱ caxríj yuva̱a̱ ꞌu̱nj man soj maan rugua̱nj. Ya̱ quisi̱j rá ꞌu̱nj caxri̱i̱ yuva̱a̱ ꞌu̱nj man nij síí taj se vaa ina̱nj ꞌyaj núj se vaa me rá nee̱ man núj quiꞌya̱j núj na̱nj á.

³ Dan me se vaa iꞌna̱ꞌ nee̱ man núj cuano̱, tza̱j ne̱ ne unuꞌ núj ase vaa unuꞌ nij síí noco̱ꞌ se‑chre̱j chumii̱ nihánj maꞌ.

⁴ Xa̱ꞌ se nucua̱j núj, tza̱j ne̱ né se nucua̱j ma̱n rihaan chumii̱ nihánj me yoꞌ maꞌ. ꞌO̱ se se nucua̱j rqué maꞌa̱n ya̱ Yaꞌanj man núj me yoꞌ ado̱nj. Cheꞌé dan gu̱un nucua̱j núj quiꞌya̱j canaán núj rihaan cunuda̱nj nij síí me rá cunu̱ꞌ ga̱ Yaꞌanj, ne̱ dan me se tiri̱ꞌ núj nana̱ tihaꞌ yuꞌunj nana̱ avii raa̱ yuvii̱,

⁵ ne̱ tiri̱ꞌ núj nu̱ꞌ nana̱ aráán chrej rihaan yuvii̱ cuno̱ nij yuvii̱ snana̱ Yaꞌanj, ga̱a ne̱ gu̱un rá nij yuvii̱ cuno̱ nij yuvii̱ rihaan Cristó, quiꞌya̱j núj a.

⁶ Ne̱ asa̱ꞌ cuno maꞌa̱n soj rihaan Yaꞌanj, ne̱ gu̱un nucua̱j núj quiꞌya̱j núj sayuun man cunuda̱nj nij tuviꞌ soj síí naꞌvej rá cuno̱ rihaan Yaꞌanj ado̱nj.

⁷ Dan me se ni̱ꞌyaj sa̱ꞌ soj man núj, ne̱ xca̱j soj cuentá da̱j vaa núj, ne̱ sese vaa ꞌo̱ tuviꞌ soj uun rá se vaa ya̱ ya̱ nocoꞌ soꞌ man Cristó, ne̱ xca̱j soꞌ cuentá se vaa ase vaa noco̱ꞌ soꞌ man Cristó roꞌ, taꞌngaꞌ da̱nj vaa noco̱ꞌ maꞌa̱n núj uún man Cristó na̱nj ado̱nj.

⁸ Dan me se neꞌen soj se vaa caꞌneꞌ Síí ꞌNi̱j Raꞌa man níꞌ suun rihanj, ne̱ veé dan me se naꞌvej rá soꞌ ti̱ríꞌ ꞌu̱nj man soj maꞌ. Tana̱nj me rá soꞌ naquiꞌya̱j sa̱ꞌ soj doj nimán soj qui̱ꞌyáj na̱nj ado̱nj. Ne̱ caꞌve̱e se veꞌé caꞌmi̱j cheꞌé suun a̱tá ꞌu̱nj, tza̱j ne̱ se̱ guun naꞌa̱j ꞌu̱nj daj chiha̱a̱ míj maꞌ.

⁹ Dan me se naꞌvej uxrá rá ꞌu̱nj gu̱un rá soj se vaa ma̱an cheꞌé se me rá ꞌu̱nj tu̱chuꞌvíꞌ ꞌu̱nj man soj me aꞌnéé ꞌu̱nj nij yanj cartá rihaan soj a̱ maꞌ.

¹⁰ ꞌO̱ se neꞌen soj se vaa cataj taꞌa̱j nij síí ꞌni̱j scaꞌnúj soj se vaa nda̱ꞌ se nana̱ nucua̱j achrón ꞌu̱nj rihaan yanj cartá, tza̱j ne̱ ga̱a nicúnꞌ ꞌu̱nj rihaan soj, ne̱ ne gu̱un nu̱cuáá ꞌu̱nj caꞌmi̱i̱ sca̱ꞌ ꞌu̱nj rihaan soj, taj nij soꞌ a. Ma̱an se taj yuꞌvee nó nana̱ aꞌmii ꞌu̱nj rihaan soj ga̱a nicúnꞌ ꞌu̱nj rihaan soj, taj nij soꞌ a.

¹¹ Tza̱j ne̱ xca̱j nij síí aꞌmii da̱nj cuentá se vaa ase vaa nana̱ achrón núj rihaan yanj cartá ga̱a nuviꞌ núj yáán ga̱ soj roꞌ, taꞌngaꞌ da̱nj ga̱a̱ suun quiꞌya̱j núj asa̱ꞌ cuchiꞌ núj rihaan soj ado̱nj.

¹² Dan me se xa̱ꞌ nij síí aꞌmii da̱nj, tza̱j ne̱ taj nij soꞌ se vaa sa̱ꞌ uxrá vaa maꞌa̱n nij soꞌ, ne̱ cheꞌé dan se̱ quisíj rá núj cata̱j núj se vaa ꞌyaj nij soꞌ nda̱a vaa ꞌyaj maꞌa̱n núj a. ꞌO̱ se neꞌen núj se vaa né si̱j acaj cuentá me nij soꞌ maꞌ. ꞌO̱ se maꞌa̱n nij soꞌ taj se vaa cunuda̱nj yuvii̱ ꞌyaj tucuáán noco̱ꞌ nij soꞌ roꞌ, me síí sa̱ꞌ, ne̱ taj uún nij soꞌ se vaa maꞌa̱n nij soꞌ me síí sa̱ꞌ doj rihaan ꞌó nij yuvii̱ noco̱ꞌ tucuáán noco̱ꞌ maꞌa̱n nij soꞌ, ne̱ ina̱nj da̱nj tuꞌva nij soꞌ,

¹³ tza̱j ne̱ daj chiha̱a̱ míj se̱ caꞌmii xta̱ꞌ núj nda̱a vaa tuꞌva nij soꞌ da̱nj maꞌ. Ma̱an se ina̱nj cheꞌé suun caꞌneꞌ maꞌa̱n Yaꞌanj rihaan maꞌa̱n núj me caꞌmi̱i̱ núj a. Ne̱ Yaꞌanj me síí caꞌneꞌ suun rihaan núj nata̱ꞌ núj snana̱ Yaꞌanj nda̱a rihaan maꞌa̱n soj na̱nj ado̱nj.

¹⁴ Dan me se ne ꞌanj núj quiꞌya̱j núj se‑su̱u̱n Yaꞌanj rej naꞌvej rá Yaꞌanj caꞌa̱nj núj maꞌ. ꞌO̱ se me rá Yaꞌanj cuchi̱ꞌ núj rihaan soj cata̱j xnaꞌanj núj nana̱ sa̱ꞌ cheꞌé Cristó rihaan soj, ne̱ da̱nj quiꞌyaj núj, ne̱ asino núj me síí cataj xnaꞌanj snana̱ Cristó rihaan soj na̱nj ado̱nj.

¹⁵ Dan me se se̱ caꞌmii xta̱ꞌ núj cheꞌé se vaa quiꞌyaj ꞌó yuvii̱ maꞌ. Ne nó xcúún núj quiꞌya̱j núj da̱nj maꞌ. Ma̱an se naꞌvi̱j ndoꞌo núj se vaa cuchuma̱n doj rá soj ni̱ꞌyaj soj man Yaꞌanj, ga̱a ne̱ uxrá doj quiꞌya̱j núj se‑su̱u̱n Yaꞌanj scaꞌnúj soj, nda̱a vaa me rá Yaꞌanj quiꞌya̱j núj a.

¹⁶ Ga̱a ne̱ nda̱a gu̱un nucua̱j núj cata̱j xnaꞌanj núj nana̱ sa̱ꞌ cheꞌé Cristó rihaan nij yuvii̱ ma̱n ꞌó chumanꞌ ga̱nꞌ doj uún a. Tza̱j ne̱ taj cheꞌé caꞌa̱nj núj rej a̱j ꞌyaj ꞌó yuvii̱ se‑su̱u̱n Yaꞌanj ne̱ cata̱j núj se vaa maꞌa̱n núj me síí quiꞌyaj se vaa quiꞌyaj ꞌó soꞌ a̱ maꞌ.

¹⁷ Sese me rá ꞌo̱ soꞌ caꞌmi̱i̱ sa̱ꞌ soꞌ, ne̱ se̱ caꞌmii sa̱ꞌ soꞌ cheꞌé se vaa quiꞌyaj maꞌa̱n soꞌ maꞌ. Tana̱nj caꞌmi̱i̱ sa̱ꞌ soꞌ cheꞌé se vaa quiꞌyaj Yaꞌanj Si̱j ꞌNi̱j Raꞌa man níꞌ á.

¹⁸ ꞌO̱ se sese cata̱j ꞌo̱ soꞌ se vaa maꞌa̱n soꞌ quiꞌyaj se sa̱ꞌ, ne̱ taj se ꞌyaj maꞌ. Tza̱j ne̱ sese cata̱j Síí ꞌNi̱j Raꞌa man níꞌ se vaa sa̱ꞌ quiꞌyaj soꞌ, ne̱ ya̱ ya̱ sa̱ꞌ quiꞌyaj soꞌ chugua̱nj.