2 Corintios 1 - Triqui de San Juan Copala

¹ ꞌU̱nj me síí cuꞌna̱j Pabló si̱j cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱, nda̱a vaa me rá maꞌa̱n Yaꞌanj qui̱ꞌyáj a. Ya̱nj tinúꞌ Timoteo ga̱j, ne̱ ꞌyaj rój yanj nihánj caꞌne̱j rój rihaan soj xꞌneꞌ nij síí noco̱ꞌ man Cristó ya̱nj chumanꞌ cuꞌna̱j Corinto, ga̱ cunuda̱nj ꞌó nij soj si̱j noco̱ꞌ man Cristó ya̱nj nu̱ꞌ estadó cuꞌna̱j Acaya uún a.

² Dan me se me rá rój quiꞌya̱j ndoꞌo Rej níꞌ Yaꞌanj do̱ꞌ, Jesucristó Si̱j ꞌNi̱j Raꞌa man níꞌ do̱ꞌ, se lu̱j cheꞌé nij soj, ne̱ me rá rój ga̱a̱ xe̱j nimán soj quiꞌya̱j ro̱j soꞌ a.

Quiranꞌ ndoꞌo nij tuvi̱ꞌ Pabló sayuun, tza̱j ne̱ tinanii Yaꞌanj man nij soꞌ a

³ Cata̱j níꞌ se vaa ina̱nj sa̱ꞌ uxrá vaa Yaꞌanj ado̱nj. Taꞌanj Jesucristó Si̱j ꞌNi̱j Raꞌa man níꞌ me Yaꞌanj, ne̱ Rej Jesucristó me Yaꞌanj uún chugua̱nj. Ne̱ soꞌ me síí ꞌe̱e̱ ndoꞌo rá man yuvii̱, ne̱ soꞌ me síí ꞌyaj nariꞌ nucuaj nimán yuvii̱ chugua̱nj.

⁴ Caꞌve̱e se me maꞌa̱n sayuun ranꞌ núj, tza̱j ne̱ Yaꞌanj roꞌ, me síí narqué ndoꞌo chrej nucua̱j man núj, ne̱ cheꞌé dan gu̱un nucua̱j núj nago̱ꞌ núj chrej nucua̱j man tinúú núj güii quira̱nꞌ tinúú núj sayuun uún chugua̱nj. Cheꞌé dan asa̱ꞌ ranꞌ tinúú núj sayuun, ne̱ caꞌve̱e nago̱ꞌ núj chrej nucua̱j man tinúú núj chrej narqué maꞌa̱n Yaꞌanj man núj chugua̱nj.

⁵ Dan me se nda̱ꞌ rá se vaa quiranꞌ uxrá Cristó sayuun roꞌ, da̱nj vaa ꞌnaꞌ uxrá sayuun xráá núj, ne̱ cheꞌé dan cunuu ꞌe̱e̱ uxrá rá Cristó man núj cheꞌé sayuun ranꞌ núj ado̱nj. Cheꞌé dan nariꞌ nucuaj rá núj cheꞌé Cristó, ꞌyaj Yaꞌanj a.

⁶ ꞌO̱ se sese ranꞌ núj sayuun, ne̱ cheꞌé yan nari̱ꞌ nucuaj nimán soj do̱ꞌ, cheꞌé yan nani̱i̱ soj rihaan sayuun ne̱ cavi̱i̱ sa̱ꞌ soj do̱ꞌ, me ranꞌ núj sayuun ado̱nj. Dan me se sese Yaꞌanj rqué se nucua̱j nu̱u̱ nimán núj, ne̱ veé da̱nj ga̱a̱ gue̱e̱ cu̱nuû se nucua̱j nimán soj asa̱ꞌ quiranꞌ soj sayuun se vaa ranꞌ núj ado̱nj.

⁷ Dan me se ꞌo̱ nucua̱j ya̱ rá núj niꞌya̱j núj man soj cheꞌé se vaa ranꞌ soj na̱nj á. ꞌO̱ se nda̱ꞌ rá se vaa ꞌnaꞌ sayuun xráá soj roꞌ, veé da̱nj vaa aꞌnéé Yaꞌanj se nucua̱j nimán soj uún chugua̱nj. Ase vaa ranꞌ núj sayuun roꞌ, da̱nj vaa ranꞌ gue̱e̱ soj sayuun, ne̱ ase vaa nariꞌ nucuaj rá núj ꞌyaj Yaꞌanj roꞌ, da̱nj vaa nariꞌ nucuaj rá soj ꞌyaj uún Yaꞌanj a.

⁸ Me rá núj nanu̱j rá soj se vaa quiranꞌ núj sayuun estadó Asia, tinu̱j, nocoj. Ne̱ me rá núj queneꞌe̱n soj se vaa ya̱ uxrá quiranꞌ núj sayuun, ne̱ guun rá núj se vaa se̱ guun nucua̱j núj a̱ maꞌ. Ne̱ da̱j doj se caviꞌ ya̱ núj, rá núj na̱nj ado̱nj.

⁹ Dan me se ꞌo̱ sayuun noco̱o ya̱ ya̱ me yoꞌ, ne̱ rá se vaa síí nataꞌ se‑cacu̱nꞌ cavi̱ꞌ roꞌ, da̱nj vaa guun rá núj na̱nj ado̱nj. Tza̱j ne̱ ꞌo̱ se cuna̱j uxrá quiranꞌ núj da̱nj, ga̱a ne̱ yu̱u̱n cheꞌe̱ se̱ gaa nucua̱j rá núj man maꞌa̱n núj maꞌ. ꞌO̱ se vaa cheꞌé ga̱a̱ nucua̱j ya̱ rá núj man Yaꞌanj síí naquiꞌyaj iꞌna̱ꞌ man yuvii̱ caviꞌ na̱nj ado̱nj.

¹⁰ Dan me se da̱j doj se caviꞌ núj, tza̱j ne̱ Yaꞌanj me síí tinanii man núj rihaan sayuun yoꞌ, ne̱ soꞌ me síí ti̱nanii man núj rihaan sayuun quira̱nꞌ núj rej riha̱a̱n, ne̱ nucua̱j rá núj man soꞌ, ne̱ ya̱ ya̱ ti̱nanii soꞌ man núj rihaan sayuun na̱nj ado̱nj.

¹¹ Ne̱ racuíj ndoꞌo soj man núj achíín niꞌya̱j soj rihaan Yaꞌanj cheꞌé núj a. Dan me se uno Yaꞌanj se vaa achíín niꞌya̱j queꞌe̱e̱ yuvii̱ rihaan soꞌ cheꞌé núj, ne̱ quiꞌya̱j soꞌ se lu̱j cheꞌé núj ti̱nanii soꞌ man núj rihaan sayuun ado̱nj. Ne̱ cata̱j queꞌe̱e̱ níꞌ guun niꞌya̱j níꞌ rihaan Yaꞌanj cheꞌé se vaa tinanii soꞌ man núj rihaan sayuun á.

Nataꞌ Pabló me cheꞌé ne cuchi̱ꞌ soꞌ chumanꞌ Corinto a

¹² Niha̱ꞌ ndoꞌo rá núj, cheꞌé se neꞌen núj se vaa nuviꞌ cacunꞌ tumé núj a. ꞌO̱ se veꞌé quiꞌyaj núj ga̱ soj ga̱a chéé núj rihaan chumii̱ nihánj, ne̱ ne tiha̱ꞌ yuꞌunj núj man soj maꞌ. Ma̱an se cuno núj rihaan Yaꞌanj, ne̱ caꞌmii chij núj rihaan soj, ne̱ ne quiꞌya̱j núj ina̱nj se vaa cavii raa̱ maꞌa̱n núj maꞌ. ꞌO̱ se maꞌa̱n Yaꞌanj racuíj man núj, ne̱ quiꞌyaj núj ina̱nj se vaa me rá Yaꞌanj quiꞌya̱j núj na̱nj ado̱nj.

^13-14 Dan me se taj va̱j nana̱ nachranꞌ cachrón núj naya̱a̱ soj maꞌ. Ina̱nj nana̱ gu̱un nucua̱j soj naya̱a̱ soj do̱ꞌ, ina̱nj nana̱ gu̱un nucua̱j soj cuno̱ soj do̱ꞌ, me nana̱ cachrón núj naya̱a̱ soj na̱nj ado̱nj. Cuano̱ roꞌ, a̱j nariꞌ soj taꞌa̱j nana̱ cataj xnaꞌanj núj rihaan soj, ne̱ me rá núj nari̱ꞌ gue̱e̱ soj nu̱ꞌ nana̱ yoꞌ a. Da̱nj me rá núj, cheꞌé yan gu̱un niha̱ꞌ rá núj cheꞌé soj güii caꞌna̱ꞌ uún Jesús Si̱j ꞌNi̱j Raꞌa man níꞌ rihaan chumii̱ nihánj, ne̱ veé da̱nj gu̱un niha̱ꞌ rá soj cheꞌé núj uún na̱nj á.

¹⁵ Cheꞌé se guun ya̱ raj se vaa cavi̱i̱ sa̱ꞌ ta̱ranꞌ níꞌ vaa güii, cheꞌé dan guun raj caꞌa̱nj ꞌu̱nj chiháán soj, ga̱a ne̱ quisi̱j vi̱j caꞌa̱nj ni̱ꞌyaj ꞌu̱nj man soj, cheꞌé se me raj gu̱un niha̱ꞌ rá soj doj a.

¹⁶ Dan me se ga̱a va̱j ꞌu̱nj caꞌanj ꞌu̱nj estadó Macedonia, ne̱ guun raj ca̱ranj chiháán soj ga̱a cachén ꞌu̱nj chrej caꞌanj ꞌu̱nj estadó yoꞌ a. Dan me se guun raj ca̱ranj chiháán soj rej caꞌanj ꞌu̱nj ne̱ rej ꞌnaꞌ niquej uún a. Da̱nj guun raj qui̱ꞌyáj cheꞌé se guun raj ra̱cuíj soj manj caꞌa̱nj ꞌu̱nj estadó Judea ado̱nj.

¹⁷ Ga̱a guun rá ꞌu̱nj cache̱n ꞌu̱nj chiháán soj roꞌ, uun vi̱j rá ꞌu̱nj do̱ꞌ, aꞌmii rma̱ꞌán ꞌu̱nj do̱ꞌ, da̱j se vaa ꞌyaj nij síí ma̱n rihaan chumii̱ nihánj, rá soj naꞌ. Taj maꞌ.

¹⁸ Da̱j se vaa ya̱ vaa Yaꞌanj roꞌ, da̱nj ya̱ vaa snana̱ núj, ne̱ né taꞌa̱j nana̱ “caꞌve̱e” do̱ꞌ, taꞌa̱j nana̱ “se̱ caꞌvee” do̱ꞌ, me nana̱ caꞌmii núj maꞌ.

¹⁹ Xa̱ꞌ Taꞌníí Yaꞌanj Jesucristó si̱j cheꞌe̱ caꞌmii natáj ꞌu̱nj ga̱ Silvano ga̱ Timoteo, tza̱j ne̱ né si̱j ataꞌ tuꞌva tza̱j ne̱ se̱ quisíj snana̱ me soꞌ maꞌ. Tana̱nj ataꞌ tuꞌva soꞌ, ne̱ síj ya̱ snana̱ soꞌ ado̱nj.

²⁰ Cunuda̱nj nij nana̱ cataꞌ tuꞌva Yaꞌanj cheꞌé níꞌ roꞌ, niꞌya̱j níꞌ man Cristó ne̱ xcaj níꞌ cuentá se vaa ya̱ vaa nu̱ꞌ nana̱ yoꞌ chugua̱nj. Ne̱ cheꞌé se si̱j noco̱ꞌ man Cristó me níꞌ, cheꞌé dan taj níꞌ “Ya̱ da̱nj vaa ado̱nj”, taj níꞌ rihaan Yaꞌanj, ne̱ sa̱ꞌ doj xcaj yuvii̱ cuentá se vaa veꞌé ndoꞌo ꞌyaj Yaꞌanj ado̱nj.

²¹ Yaꞌanj me síí racuíj man núj nocoꞌ sa̱ꞌ núj man Cristó ga̱ soj, ne̱ soꞌ me síí cuneꞌ man núj quiꞌya̱j núj se‑su̱u̱n soꞌ a.

²² Ne̱ soꞌ me síí cataj se vaa ya̱ ya̱ taꞌni̱j soꞌ me níꞌ, ne̱ caꞌnéé soꞌ Nimán soꞌ ca̱yáán nimán níꞌ, ne̱ cheꞌé dan guun ya̱ rá níꞌ se vaa ya̱ rque̱ soꞌ se sa̱ꞌ man níꞌ, vaa güii ado̱nj.

²³ Neꞌen Yaꞌanj nimanj, se vaa ya̱ vaa nana̱ aꞌmij rihaan soj cuano̱ nihánj, ne̱ cheꞌé se ne caꞌve̱j ya̱ raj qui̱ꞌyáj sayuun man soj, cheꞌé dan ne cuchi̱j chumanꞌ Corinto ado̱nj.

²⁴ ꞌO̱ se ne me rá núj quiri̱i̱ taꞌngaꞌ núj rihaan soj da̱j quiꞌya̱j soj canoco̱ꞌ soj man Cristó maꞌ. ꞌO̱ se síí ꞌyaj se‑su̱u̱n Yaꞌanj rcuaꞌa̱a̱n ga̱ soj yan cavi̱i̱ sa̱ꞌ soj ne̱ gu̱un niha̱ꞌ rá soj me núj, ne̱ a̱j nariꞌ sa̱ꞌ soj canoco̱ꞌ maꞌa̱n soj man Cristó na̱nj ado̱nj.