1 Timoteo 6 - Triqui de San Juan Copala

Narqué Pabló chrej se vaa veꞌé quiꞌya̱j suun mozó rihaan se‑ruꞌve̱e̱ mozó a

¹ Ne̱ nij mozó me se veꞌé cara̱a̱ cochro̱j nij mozó rihaan se‑ruꞌve̱e̱ nij soꞌ a. ꞌO̱ se yoꞌ me quiꞌya̱j nij soꞌ, ga̱a ne̱ se̱ caꞌmi̱i̱ qui̱j yuvii̱ cheꞌé se‑chuvi̱i Yaꞌanj do̱ꞌ, cheꞌé tucuáán tucuꞌyón níꞌ do̱ꞌ maꞌ.

² Ne̱ sese síí noco̱ꞌ man Yaꞌanj me ruꞌvee, ne̱ se̱ guun cata̱j mozó a: “Tinúú ꞌu̱nj me se‑ruꞌve̱e̱ ꞌu̱nj, ne̱ taj cheꞌé quiꞌya̱j suun nu̱cuáá ꞌu̱nj rihaan soꞌ maꞌ.” Se̱ guun caꞌmi̱i̱ mozó da̱nj maꞌ. Tana̱nj veꞌé quiꞌya̱j suun soꞌ rihaan se‑ruꞌve̱e̱ soꞌ, ne̱ ga̱a̱ ꞌe̱e̱ rá soꞌ se‑ruꞌve̱e̱ soꞌ á. ꞌO̱ se neꞌen mozó se vaa si̱j noco̱ꞌ man Yaꞌanj me se‑ruꞌve̱e̱ mozó, ne̱ gu̱un niha̱ꞌ rá mozó se vaa doj a̱ cavi̱i̱ sa̱ꞌ ꞌo̱ tinúú soꞌ cheꞌé suun ꞌyaj suun soꞌ ado̱nj. Nana̱ nihánj me chrej nucua̱j nago̱ꞌ so̱ꞌ man nij yuvii̱ a.

Caꞌmii Pabló cheꞌé nij síí tucuꞌyón tucuáán ne̱ a.

³ Sese tucuꞌyón ꞌo̱ soꞌ tucuáán ne̱, ne̱ ne aꞌneꞌ rá soꞌ ga̱ tucuáán ya̱ cuchruj Jesucristó Si̱j ꞌNi̱j Raꞌa man níꞌ do̱ꞌ, ga̱ tucuáán aranꞌ rá Yaꞌanj cuno̱ níꞌ do̱ꞌ,

⁴ ne̱ síí xta̱ꞌ nimán me soꞌ, ne̱ a̱ doj ne xcaj soꞌ cuentá a̱ maan ado̱nj. Niha̱ꞌ uxrá rá nij soꞌ caꞌmi̱i̱ cunu̱ꞌ nij soꞌ cheꞌé nana̱ aꞌmii nij soꞌ, ne̱ cheꞌé dan uun xco̱j ruva̱a̱ rá nij soꞌ niꞌya̱j nij soꞌ tuviꞌ nij soꞌ, ne̱ unuꞌ ndoꞌo nij soꞌ, ne̱ aꞌmii qui̱j nij soꞌ cheꞌé Yaꞌanj, ne̱ nij ꞌyaj nij soꞌ, utaꞌ nij soꞌ cacunꞌ rmi̱ꞌ xráá tuviꞌ nij soꞌ ado̱nj.

⁵ Síí niꞌyo̱n me nij soꞌ, ne̱ naꞌvee xca̱j nij soꞌ cuentá a̱ maꞌ. Nana̱ ya̱ naꞌvee cuno̱ nij soꞌ maꞌ. Ma̱an se sese veꞌé canoco̱ꞌ nij soꞌ man Yaꞌanj, ne̱ quiꞌya̱j canaán ndoꞌo nij soꞌ saꞌanj, rá nij soꞌ ado̱nj.

⁶ Dan me se ya̱ uxrá da̱nj vaa, ne̱ si̱j quiri̱ꞌ uxrá ya̱ se sa̱ꞌ me níꞌ, tza̱j ne̱ ꞌo̱ ga̱a̱ xe̱j nimán níꞌ canoco̱ꞌ níꞌ Yaꞌanj, ga̱a ne̱ caꞌve̱e gu̱un níꞌ síí cavi̱i̱ sa̱ꞌ uxrá ado̱nj.

⁷ Dan me se xca̱j níꞌ cuentá, ne̱ ga̱a caꞌngaa níꞌ rihaan chumii̱ nihánj, ne̱ taj se nica̱j níꞌ caꞌnaꞌ níꞌ maꞌ. Ne̱ taj rasu̱u̱n ni̱caj níꞌ caꞌa̱nj níꞌ asa̱ꞌ caviꞌ níꞌ a̱ maꞌ.

⁸ Cheꞌé dan me sese vaa se chá níꞌ do̱ꞌ, sese vaa yatzíj ta̱j xráá níꞌ do̱ꞌ, ne̱ taj cheꞌé gu̱un rá níꞌ ga̱a̱ doj rasu̱u̱n rihaan níꞌ maꞌ.

⁹ Tza̱j ne̱ xa̱ꞌ nij yuvii̱ me rá gu̱un ruꞌvee me se ne uun nucua̱j nij soꞌ canoco̱ꞌ nij soꞌ man Yaꞌanj a̱ maꞌ. Ne̱ nda̱a uun rá nij soꞌ quiꞌya̱j nij soꞌ cacunꞌ cheꞌé rej quiꞌya̱j canaán nij soꞌ rasu̱u̱n ga̱a̱ rihaan nij soꞌ, ne̱ dan me se ranꞌ ndoꞌo nij soꞌ sayuun, ne̱ síj, ga̱a ne̱ yu̱u̱n cheꞌe̱ quiri̱ꞌ nij soꞌ na̱nj ado̱nj.

¹⁰ Ma̱an cheꞌé se uun ndoꞌo rá yuvii̱ ga̱a̱ ndoꞌo saꞌanj rihaan nij soꞌ roꞌ, cheꞌé dan ꞌnaꞌ da̱j a̱ sayuun ado̱nj. Nij yuvii̱ aranꞌ rá saꞌanj roꞌ, quiriꞌíj nij soꞌ stucua̱nj Yaꞌanj tucuáán canocoꞌ nij soꞌ asi̱j rque̱ doj, ga̱a ne̱ quiranꞌ ndoꞌo nij soꞌ sayuun, ne̱ quinanó ndoꞌo rá nij soꞌ ado̱nj.

Me rá Pabló se vaa veꞌé cuno̱ níꞌ nu̱ꞌ snana̱ Yaꞌanj a

¹¹ Tza̱j ne̱ so̱ꞌ si̱j noco̱ꞌ man Yaꞌanj me se se̱ guun rá so̱ꞌ quiꞌya̱j canaán so̱ꞌ noco̱o saꞌanj maꞌ. Tana̱nj nano̱ꞌ so̱ꞌ naquiꞌya̱j nica̱ so̱ꞌ man yuvii̱ do̱ꞌ, canoco̱ꞌ xraan so̱ꞌ man Yaꞌanj do̱ꞌ, cuchuma̱n uxrá rá so̱ꞌ man Yaꞌanj do̱ꞌ, ga̱a̱ ꞌe̱e̱ rá so̱ꞌ man yuvii̱ do̱ꞌ, ga̱a̱ nucua̱j nimán so̱ꞌ rihaan sayuun do̱ꞌ, ga̱a̱ naj nimán so̱ꞌ do̱ꞌ á.

¹² Quiꞌya̱j uxrá so̱ꞌ suun sca̱ꞌ sa̱ꞌ caꞌneꞌ Yaꞌanj rihaan níꞌ si̱j noco̱ꞌ man soꞌ, ga̱a ne̱ ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj a. Cheꞌé dan cuneꞌ Yaꞌanj mán so̱ꞌ qui̱ꞌyáá so̱ꞌ se‑su̱u̱n soꞌ, ne̱ cataj yá so̱ꞌ cuno queꞌe̱e̱ tinúú níꞌ se vaa ya̱ qui̱ꞌyáá so̱ꞌ se‑su̱u̱n Yaꞌanj ca̱nocóꞌ so̱ꞌ man soꞌ á.

¹³ Neꞌén so̱ꞌ se vaa Yaꞌanj me síí quiꞌyaj vaa iꞌna̱ꞌ cunuda̱nj rasu̱u̱n, ne̱ neꞌén so̱ꞌ da̱j quiꞌyaj Cristó Jesús ga̱a canicunꞌ soꞌ rihaan síí nica̱j suun Poncio Pilató, se vaa nataꞌ ya̱ soꞌ cheꞌé suun cata̱ soꞌ a. Ne̱ cuno̱ Yaꞌanj cuno̱ Cristó cuno̱ chrej narqué ꞌu̱nj nihánj mán so̱ꞌ á.

¹⁴ Dan me se ꞌo̱ cu̱nó so̱ꞌ nu̱ꞌ suun nihánj, ne̱ qui̱ꞌyáá so̱ꞌ nda̱a vaa taj yoꞌ, ne̱ tu̱mé so̱ꞌ man ma̱ꞌán so̱ꞌ se̱ quiꞌyáá so̱ꞌ cacunꞌ maꞌ. Da̱nj qui̱ꞌyáá so̱ꞌ nda̱a güii caꞌna̱ꞌ uún Jesucristó Si̱j ꞌNi̱j Raꞌa man níꞌ rihaan chumii̱ nihánj á.

¹⁵ ꞌO̱ se Yaꞌanj me síí quiꞌya̱j caꞌna̱ꞌ soꞌ güii cachrón maꞌa̱n Yaꞌanj a. Xa̱ꞌ Yaꞌanj, tza̱j ne̱ sa̱ꞌ uxrá vaa soꞌ, ne̱ o̱rúnꞌ soꞌ gu̱un chij a. Rey uun chij doj rihaan ꞌó da̱nj rey do̱ꞌ, síí nica̱j suun noco̱o doj rihaan ꞌó da̱nj síí nica̱j suun do̱ꞌ, me soꞌ ado̱nj.

¹⁶ O̱rúnꞌ soꞌ me síí vaa iꞌna̱ꞌ nu̱ꞌ cavii nu̱ꞌ caꞌanj, ne̱ ya̱nj soꞌ rej acoꞌ yaꞌan chuguu̱n rej naꞌvee nichru̱nꞌ yuvii̱ á. A̱ ꞌó yuvii̱ ne queneꞌe̱n man soꞌ, ne̱ daj chiha̱a̱ míj se̱ caꞌvee queneꞌe̱n yuvii̱ man soꞌ maꞌ. Cheꞌé dan cara̱a̱ cochro̱j níꞌ rihaan soꞌ, ne̱ ga̱a̱ nucua̱j ndoꞌo soꞌ nu̱ꞌ cavii nu̱ꞌ caꞌanj rugua̱nj. Veé da̱nj ga̱a̱ ya̱ ado̱nj.

Nataꞌ Pabló cheꞌé da̱j quiꞌya̱j nij ruꞌvee a

¹⁷ Narque̱ so̱ꞌ chrej nucua̱j man nij síí ruꞌvee ya̱nj rihaan chumii̱ nihánj cuano̱ se vaa se̱ guun cata̱j nij soꞌ se vaa si̱j sa̱ꞌ uxrá me nij soꞌ cheꞌé se vaa saꞌanj rihaan nij soꞌ maꞌ. Se̱ gaa nucua̱j rá nij soꞌ man siꞌyaj nij soꞌ maꞌ. Xraj, ne̱ caꞌa̱nj niꞌya̱ se‑saꞌa̱nj nij soꞌ a. Cheꞌé dan ꞌo̱ ga̱a̱ nucua̱j rá nij ruꞌvee man Yaꞌanj, ne̱ Yaꞌanj me síí rqué cunuda̱nj se sa̱ꞌ rihaan níꞌ, cheꞌé rej gu̱un niha̱ꞌ rá níꞌ quiꞌya̱j rasu̱u̱n yoꞌ a.

¹⁸ Ma̱an se cata̱j xnaꞌanj so̱ꞌ rihaan nij síí ruꞌvee se vaa quiꞌya̱j nij soꞌ suun sa̱ꞌ, cheꞌé rej gu̱un ruꞌvee nij soꞌ rihaan Yaꞌanj, ne̱ veꞌé rque̱ nij soꞌ rasu̱u̱n achiin man tinúú nij soꞌ síí nique̱ á.

¹⁹ Da̱nj quiꞌya̱j nij ruꞌvee cheꞌé rej cata̱j Yaꞌanj vaa güii se vaa ya̱ cuno ruꞌvee yoꞌ rihaan Yaꞌanj, ga̱a ne̱ ca̱yáán ruꞌvee yoꞌ ga̱ Yaꞌanj nu̱ꞌ cavii nu̱ꞌ caꞌanj, ne̱ doj a̱ ya̱ ya̱ ga̱a̱ iꞌna̱ꞌ nij síí ca̱yáán ga̱ Yaꞌanj rihaan nij síí ma̱n rihaan chumii̱ nihánj cuano̱ ado̱nj.

Cataj Pabló se vaa se̱ cuno Timoteo ꞌó nana̱ maꞌ

²⁰ ꞌO̱ tu̱mé so̱ꞌ se‑su̱u̱n Yaꞌanj suun caꞌneꞌ Yaꞌanj rihaan so̱ꞌ, tinu̱j. Se̱ cunó so̱ꞌ ꞌó nana̱ cu̱u tucuꞌyón nii, nana̱ aꞌmii yuvii̱ u̱u̱n maꞌ. ꞌO̱ se avii ndoꞌo raa̱ nij síí noco̱ꞌ ꞌó nana̱, rá nij soꞌ, tza̱j ne̱ ne neꞌen uxrá nij soꞌ a̱ maꞌ.

²¹ Vaa yuvii̱ noco̱ꞌ ꞌó nana̱ yoꞌ, tza̱j ne̱ veé da̱nj a̱j tanáj nij soꞌ stucua̱nj Yaꞌanj na̱nj ado̱nj. Me rá ꞌu̱nj quiꞌya̱j ndoꞌo Yaꞌanj se lu̱j cheꞌé ta̱ranꞌ soj ado̱nj.