1 Timoteo 5 - Triqui de San Juan Copala

Da̱j caꞌmi̱i̱ Timoteo rihaan ꞌo̱ ꞌo̱ yuvii̱ noco̱ꞌ man Yaꞌanj a

¹ Se̱ caxríj yuva̱a̱ so̱ꞌ man nij chii nga̱ maꞌ. Tana̱nj veꞌé caꞌmi̱i̱ so̱ꞌ rihaan nij soꞌ narque̱ so̱ꞌ chrej sa̱ꞌ man nij soꞌ á. Da̱j se aꞌmii so̱ꞌ ga̱ réé so̱ꞌ roꞌ, da̱nj caꞌmi̱i̱ so̱ꞌ ga̱ nij chii nga̱ á. Ase aꞌmii so̱ꞌ ga̱ tinúú so̱ꞌ roꞌ, da̱nj caꞌmi̱i̱ so̱ꞌ ga̱ nij síí tachru̱u̱ uún a.

² Ase aꞌmii so̱ꞌ ga̱ nií so̱ꞌ roꞌ, da̱nj caꞌmi̱i̱ so̱ꞌ ga̱ nij vichij uún a. Ase aꞌmii so̱ꞌ ga̱ raꞌvij so̱ꞌ roꞌ, da̱nj caꞌmi̱i̱ so̱ꞌ ga̱ nij chana̱ tachru̱u̱ á. Se̱ caꞌmii so̱ꞌ a̱ doj nana̱ chiꞌi̱i̱ ga̱ nij noꞌ maꞌ.

Caꞌmii Pabló cheꞌé nij chana̱ caviꞌ nica̱ a

³ Cara̱a̱ co̱chróó so̱ꞌ man nij chana̱ caviꞌ nica̱ á. Rque̱ so̱ꞌ rasu̱u̱n achiin man nij noꞌ, sese nuviꞌ tuviꞌ chana̱ racuíj man chana̱ a.

⁴ Tza̱j ne̱ sese vaa se taꞌníí chana̱ do̱ꞌ, se taꞌnij siꞌno̱ chana̱ do̱ꞌ, ne̱ ta̱j yaꞌanj nij soꞌ man chana̱ yoꞌ á. Da̱nj quiꞌya̱j nij soꞌ, ne̱ quisi̱j suun caꞌneꞌ Yaꞌanj rihaan nij soꞌ se vaa ta̱j yaꞌanj nij soꞌ man tuviꞌ nij soꞌ á. ꞌO̱ se ase vaa quiꞌyaj nii nij soꞌ do̱ꞌ, xcuaꞌa̱nj nij soꞌ do̱ꞌ, man nij soꞌ roꞌ, da̱nj quiꞌya̱j maꞌa̱n nij soꞌ man nii nij soꞌ do̱ꞌ, xcuaꞌa̱nj nij soꞌ do̱ꞌ ado̱nj. Da̱nj quiꞌya̱j nij soꞌ, ga̱a ne̱ cara̱nꞌ rá Yaꞌanj ni̱ꞌyaj Yaꞌanj man nij soꞌ a.

⁵ Sese ya̱ chana̱ nique̱ me ꞌo̱ noꞌ, ne̱ naꞌvi̱j noꞌ ra̱cuíj Yaꞌanj man noꞌ, ne̱ ꞌo̱ nacúún noꞌ rihaan Yaꞌanj do̱ꞌ, ꞌo̱ achíín niꞌya̱j noꞌ rihaan Yaꞌanj do̱ꞌ, nuvi̱i niga̱nꞌ a.

⁶ Tza̱j ne̱ sese me ina̱nj rá noꞌ gu̱un niha̱ꞌ rá noꞌ rihaan chumii̱ nihánj, ne̱ nda̱ꞌ se vaa iꞌna̱ꞌ nee̱ man noꞌ, tza̱j ne̱ nimán noꞌ me se a̱j caviꞌ a.

⁷ Caꞌne̱ꞌ so̱ꞌ suun cheꞌé nana̱ nihánj rihaan nij síí noco̱ꞌ man Yaꞌanj, se̱ gaa na̱nj cuta̱ꞌ yuvii̱ a̱ doj cacunꞌ xráá nij soꞌ maꞌ.

⁸ Sese vaa yuvii̱ ne taj yaꞌanj man tuviꞌ yuvii̱ do̱ꞌ, man nij tucua̱ yuvii̱ do̱ꞌ, ne̱ né yuvi̱i̱ noco̱ꞌ stucua̱nj níꞌ si̱j noco̱ꞌ man Yaꞌanj me nij soꞌ maꞌ. Nij doj ꞌyaj yuvii̱ yoꞌ rihaan nij yuvii̱ ne nocoꞌ man Yaꞌanj ado̱nj.

⁹ Ina̱nj se‑chuvi̱i nij chana̱ va̱j vaꞌnu̱j chiha̱a̱ (60) yoꞌ táá doj cachro̱n so̱ꞌ rihaan yanj no̱ se‑chuvi̱i nij chana̱ caviꞌ nica̱ á. Ne̱ ina̱nj se‑chuvi̱i chana̱ nica̱j xraan man o̱rúnꞌ nica̱ cachro̱n so̱ꞌ uún á.

¹⁰ Ne̱ queneꞌe̱n cunuda̱nj nii man nij noꞌ se vaa veꞌé ꞌyaj nij noꞌ suun sa̱ꞌ cheꞌé tuviꞌ nij noꞌ do̱ꞌ, se vaa veꞌé tucuachij nij noꞌ taꞌníí nij noꞌ do̱ꞌ, se vaa rqué nij noꞌ se chá chá yuvii̱ aranꞌ tucuá nij noꞌ do̱ꞌ, se vaa naꞌnuꞌ nij noꞌ tacóó nij síí noco̱ꞌ man Cristó do̱ꞌ, se vaa racuíj nij noꞌ man nij síí quiranꞌ sayuun do̱ꞌ, ne̱ nij noꞌ me caꞌve̱e cachro̱n so̱ꞌ se‑chuvi̱i rihaan yanj no̱ se‑chuvi̱i nij chana̱ caviꞌ nica̱ a.

¹¹ Tza̱j ne̱ se̱ cachrón so̱ꞌ se‑chuvi̱i chana̱ taꞌa̱j rihaan yanj maꞌ. ꞌO̱ se vaa güii gu̱un niha̱ꞌ rá nij chana̱ taꞌa̱j yoꞌ canoco̱ꞌ nij noꞌ ꞌó snóꞌo, ne̱ quiriꞌi̱j nij noꞌ suun ata̱ nij noꞌ cheꞌé Cristó na̱nj ado̱nj.

¹² Sese da̱nj quiꞌya̱j nij chana̱ taꞌa̱j, ga̱a ne̱ tu̱mé nij noꞌ cacunꞌ cheꞌé se tanáj nij noꞌ nana̱ cataꞌ tuꞌva nij noꞌ rihaan Cristó a.

¹³ Da̱nj na̱nj uún, ne̱ ne yáán xe̱j nij noꞌ veꞌ, ne̱ chéé rmaꞌa̱n nij noꞌ da̱j a̱ veꞌ, ne̱ uun rmi̱i̱ nij noꞌ, ne̱ achén u̱u̱n tiempó, ꞌyaj nij noꞌ, ne̱ nanó nij noꞌ cuentó ne̱ uún, ne̱ tiguíj nij noꞌ se‑cuento̱ nij noꞌ rihaan se‑cuento̱ ꞌó nij yuvii̱, ne̱ aꞌmii nij noꞌ náá guun rasu̱u̱n ne nó xcúún nij noꞌ caꞌmi̱i̱ nij noꞌ a.

¹⁴ Ma̱an cheꞌé dan me rá ꞌu̱nj xca̱j nij chana̱ taꞌa̱j yoꞌ ꞌó snóꞌo, ne̱ cuchru̱j nij noꞌ neꞌej, ne̱ tu̱mé nij noꞌ veꞌ tucuá nij noꞌ, ne̱ da̱nj ga̱a̱, ga̱a ne̱ se̱ caꞌvee caꞌmi̱i̱ nij síí ta̱j riꞌyunj man níꞌ nana̱ chiꞌi̱i̱ cheꞌé níꞌ maꞌ.

¹⁵ ꞌO̱ se vaa taꞌa̱j nij chana̱ caviꞌ nica̱, ne̱ a̱j quiriꞌíj taꞌa̱j nij noꞌ tucuáán noco̱ꞌ níꞌ, ne̱ canocoꞌ nij noꞌ man Síí Chre̱e na̱nj ado̱nj.

¹⁶ Tza̱j ne̱ sese vaa chana̱ noco̱ꞌ man Cristó, ne̱ sese vaa tuviꞌ nij noꞌ chana̱ caviꞌ nica̱ ꞌni̱j scaꞌnúj nij noꞌ, ne̱ ra̱cuíj chana̱ noco̱ꞌ man Cristó man tuviꞌ noꞌ chana̱ caviꞌ nica̱ á. Ga̱a ne̱ se̱ cachiin ta̱j yaꞌanj xꞌneꞌ nij síí noco̱ꞌ man Cristó man chana̱ caviꞌ nica̱ yoꞌ maꞌ. Ma̱an se ta̱j yaꞌanj nij soꞌ man nij chana̱ quináj u̱u̱n ina̱nj na̱nj á.

Cataj Pabló da̱j quiꞌya̱j níꞌ man nij síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó a

¹⁷ Vi̱j ya̱ na̱nj go̱ꞌ soj tuꞌvee nij síí tumé sa̱ꞌ rihaan Yaꞌanj man nij síí noco̱ꞌ man Cristó á. Da̱nj quiꞌya̱j soj, ne̱ cara̱a̱ cochro̱j soj rihaan nij soꞌ sese ya̱ si̱j aꞌmii natáj snana̱ Yaꞌanj me nij soꞌ do̱ꞌ, sese ya̱ tucuꞌyón nij soꞌ nana̱ rihaan yuvii̱ do̱ꞌ á.

¹⁸ Danj Yaꞌanj taj a: “Se̱ numíj so̱ꞌ tacúún scúj ga̱a ꞌyaj suun scúj utunꞌ scúj ꞌnúú trigó cunu̱u sa̱ꞌ ꞌnúú trigó maꞌ”, taj yoꞌ a. Ne̱ taj uún yoꞌ a: “Naca̱j mozó saꞌanj tuꞌvee soꞌ sese ꞌyaj suun soꞌ á.” Da̱nj taj Danj Yaꞌanj a.

¹⁹ Sese cuta̱ꞌ nii cacunꞌ xráá ꞌo̱ síí tumé sa̱ꞌ rihaan Yaꞌanj man nij síí noco̱ꞌ man Cristó, ne̱ se̱ cuchumán rá so̱ꞌ maꞌ. Tza̱j ne̱ sese vaa vi̱j vaꞌnu̱j síí queneꞌen se vaa tumé soꞌ cacunꞌ, ne̱ cu̱nó so̱ꞌ nana̱ caꞌmi̱i̱ nij soꞌ á.

²⁰ Sese vaa ꞌo̱ síí tumé sa̱ꞌ rihaan Yaꞌanj man nij síí noco̱ꞌ man Cristó quiꞌyaj ndoꞌo cacunꞌ, ne̱ caꞌne̱ꞌ so̱ꞌ cacunꞌ cheꞌé soꞌ queneꞌe̱n nu̱ꞌ xꞌneꞌ nij síí noco̱ꞌ man Cristó, ga̱a ne̱ cuchuꞌvi̱ꞌ ꞌó nij síí ata̱ suun cheꞌé Yaꞌanj ne̱ se̱ quiꞌyaj maꞌa̱n nij soꞌ cacunꞌ uún maꞌ.

²¹ Nihánj me suun caꞌnéꞌ ꞌu̱nj rihaan so̱ꞌ niꞌya̱j Yaꞌanj do̱ꞌ, niꞌya̱j Cristó Jesús do̱ꞌ, niꞌya̱j nij se‑mo̱zó Yaꞌanj narii Yaꞌanj man do̱ꞌ a. Ga̱a caꞌne̱ꞌ so̱ꞌ cacunꞌ cheꞌé yuvii̱, ne̱ ꞌo̱ cuya̱a̱n qui̱ꞌyáá so̱ꞌ ga̱ ꞌo̱ ꞌo̱ nij soꞌ a. Taj se ꞌyaj sese si̱j sa̱ꞌ doj me ꞌo̱ soꞌ rihaan so̱ꞌ maꞌ. Ma̱an se caꞌne̱ꞌ yá so̱ꞌ cacunꞌ me maꞌa̱n cacunꞌ tumé ꞌo̱ ꞌo̱ soꞌ a.

²² Se̱ gaa raꞌya̱nj rá so̱ꞌ cuta̱ꞌ raꞌá so̱ꞌ raa̱ me maꞌa̱n ꞌo̱ soꞌ cheꞌé yan gu̱un soꞌ síí ca̱ta̱ suun cheꞌé Yaꞌanj maꞌ. ꞌO̱ se sese si̱j tumé cacunꞌ me soꞌ, ne̱ taj cheꞌé ra̱cuíj so̱ꞌ man soꞌ gu̱un chij soꞌ maꞌ. Da̱nj ina̱nj qui̱ꞌyáá so̱ꞌ, ga̱a ne̱ se̱ gaa na̱nj tu̱mé so̱ꞌ se‑cacu̱nꞌ soꞌ a. Dan me se ꞌo̱ ina̱nj se̱ caꞌvej so̱ꞌ catu̱u̱ a̱ ꞌó se chiꞌi̱i̱ maꞌ.

Coꞌo̱ Timoteo do̱j tzínꞌ na vinó a

²³ Cheꞌé se ranꞌ ndoꞌo so̱ꞌ, ne̱ veꞌee̱ rqué so̱ꞌ, ne̱ se̱ coꞌo so̱ꞌ ina̱nj na u̱u̱n maꞌ. Tana̱nj coꞌo̱ so̱ꞌ do̱j tzínꞌ na vinó a.

Nataꞌ Pabló se vaa vaa güii, ne̱ ya̱ queneꞌe̱n níꞌ me yuvii̱ tumé cacunꞌ do̱ꞌ, me yuvii̱ quiꞌyaj suun sa̱ꞌ do̱ꞌ a

²⁴ Vaa yuvii̱ tumé cacunꞌ, ne̱ nda̱ꞌ se ataa quira̱nꞌ nij soꞌ sayuun, tza̱j ne̱ a̱j neꞌen cunuda̱nj yuvii̱ se vaa tumé nij soꞌ cacunꞌ ado̱nj. Tza̱j ne̱ ino̱ vaa ꞌó taꞌa̱j nij yuvii̱ tumé cacunꞌ uún na̱nj á. Nda̱ꞌ se ne neꞌen nii se vaa quiꞌyaj nij soꞌ cacunꞌ, tza̱j ne̱ vaa güii quira̱nꞌ nij soꞌ sayuun cheꞌé cacunꞌ tumé nij soꞌ, ne̱ queneꞌe̱n nii man nij soꞌ, ne̱ xca̱j nii cuentá se vaa ya̱ tumé nij soꞌ cacunꞌ ado̱nj.

²⁵ Veé da̱nj vaa uún nij suun sa̱ꞌ ꞌyaj ꞌó taꞌa̱j nij yuvii̱, ne̱ canó yuvii̱ niꞌya̱j man nij suun sa̱ꞌ ado̱nj. Tza̱j ne̱ sese vaa suun sa̱ꞌ ne ruviꞌ do̱ꞌ, ne acaj yuvii̱ cuentá do̱ꞌ, ne̱ taj se ꞌyaj maꞌ. Ma̱an se vaa güii, ne̱ xca̱j cunuda̱nj yuvii̱ cuentá se vaa sa̱ꞌ quiꞌyaj nij soꞌ ado̱nj.