1 Timoteo 4 - Triqui de San Juan Copala

Cuno̱ taꞌa̱j yuvii̱ snana̱ nij síí tucuꞌyón tucuáán ne̱, ga̱a ne̱ quiriꞌi̱j nij yuvii̱ yoꞌ stucua̱nj Yaꞌanj a

¹ Tza̱j ne̱ taj nica̱ ya̱ Nimán Yaꞌanj se vaa asa̱ꞌ nichrunꞌ navi̱j chumii̱ nihánj, ne̱ quiriꞌi̱j taꞌa̱j yuvii̱ stucua̱nj Yaꞌanj, ne̱ canoco̱ꞌ nij soꞌ ꞌó tucuáán, ne̱ cuno̱ nij soꞌ nana̱ tihaꞌ yuꞌunj nana̱ tu̱cuꞌyón nij nana̱ chre̱e ado̱nj.

² Dan me se cuchuma̱n rá nij soꞌ nana̱ caꞌmi̱i̱ síí taj aꞌmii sa̱ꞌ tuꞌva rmaꞌa̱n na̱nj á. Ne̱ síí ne̱ ndoꞌo me nij soꞌ, ne̱ caviꞌ iꞌna̱ꞌ nimán nij soꞌ ne̱ ne naꞌa̱j nij soꞌ cheꞌé cacunꞌ ꞌyaj nij soꞌ a̱ maꞌ.

³ Ne̱ tucuꞌyón nij síí ne̱ rihaan yuvii̱ se vaa ne no xcúún yuvii̱ xca̱j yuvii̱ chana̱, ne̱ cacunꞌ me yoꞌ, taj nij soꞌ a. Ne̱ tucuꞌyón nij soꞌ se vaa ne no xcúún yuvii̱ cha̱ yuvii̱ taꞌa̱j se chá uún a. Tza̱j ne̱ ꞌo̱ se nu̱ꞌ nij rasu̱u̱n ma̱n rihaan yoꞌóó me se rasu̱u̱n chá níꞌ taj níꞌ guun niꞌya̱j níꞌ rihaan Yaꞌanj me yoꞌ, rá Yaꞌanj, dan araa soꞌ rasu̱u̱n yoꞌ rihaan yoꞌóó cheꞌé nij síí amán rá nana̱ ya̱ ado̱nj.

⁴ Dan me se nu̱ꞌ rasu̱u̱n quiꞌyaj Yaꞌanj me se sa̱ꞌ, ne̱ ne nó xcúún níꞌ nachri̱ꞌ níꞌ ni̱ꞌyaj níꞌ man se vaa quiꞌyaj Yaꞌanj cheꞌé níꞌ maꞌ. Ma̱an se ni̱caj níꞌ man yoꞌ, ne̱ cata̱j níꞌ guun niꞌya̱j níꞌ rihaan Yaꞌanj cheꞌé rasu̱u̱n yoꞌ cha̱ níꞌ á.

⁵ Neꞌen níꞌ da̱j taj snana̱ Yaꞌanj, ne̱ cheꞌé dan neꞌen níꞌ se vaa sese cachi̱nj niꞌya̱j níꞌ asino ya̱a̱n rihaan Yaꞌanj, ne̱ Yaꞌanj me síí naquiꞌya̱j sa̱ꞌ yoꞌ cha̱ níꞌ ado̱nj.

Veꞌé quiꞌya̱j Timoteo suun caꞌneꞌ Yaꞌanj rihaan soꞌ á

⁶ Sese tu̱cuꞌyón so̱ꞌ tucuáán nihánj rihaan ꞌó nij tinúú níꞌ síí noco̱ꞌ man Cristó, ne̱ síí veꞌé ꞌyaj se‑su̱u̱n Cristó Jesús mé so̱ꞌ chugua̱nj. ꞌO̱ se tucuꞌyón nii tucuáán sa̱ꞌ yoꞌ rihaan so̱ꞌ, ne̱ cuchumán rá so̱ꞌ, ne̱ canocóꞌ so̱ꞌ tucuáán yoꞌ a.

⁷ Se̱ cunó so̱ꞌ cuentó nataꞌ yuvii̱ cuentó snúú rmaꞌa̱n ne aꞌmii ya̱ cheꞌé Yaꞌanj maꞌ. Tu̱cuꞌyón so̱ꞌ da̱j qui̱ꞌyáá so̱ꞌ, ne̱ veꞌé doj ca̱nocóꞌ so̱ꞌ stucua̱nj Yaꞌanj á.

⁸ Nda̱ꞌ se vaa yuꞌvee nó suun ꞌyaj suun nee̱ man níꞌ, tza̱j ne̱ vaa doj yuꞌvee nó nimán níꞌ, canoco̱ꞌ nimán níꞌ man Yaꞌanj na̱nj á. Cheꞌé suun ꞌyaj nimán níꞌ me se cavi̱i̱ sa̱ꞌ níꞌ ga̱a yáán níꞌ rihaan chumii̱ nihánj, ne̱ neꞌen níꞌ se vaa cavi̱i̱ sa̱ꞌ níꞌ ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.

⁹ Ya̱ vaa nana̱ yoꞌ, ne̱ vaa cheꞌé cuno̱ níꞌ man yoꞌ chugua̱nj.

¹⁰ Dan me se ꞌyaj uxrá níꞌ se‑su̱u̱n Yaꞌanj, ne̱ ne chuꞌviꞌ níꞌ caꞌmi̱i̱ yuvii̱ nana̱ nij cheꞌé níꞌ a̱ maꞌ. Da̱nj ꞌyaj níꞌ cheꞌé se naꞌvi̱j níꞌ cavi̱i̱ sa̱ꞌ níꞌ quiꞌya̱j Yaꞌanj si̱j vaa iꞌna̱ꞌ, ne̱ soꞌ me Síí Ti̱nanii rihaan Sayuun man cunuda̱nj yuvii̱ sese amán rá nij soꞌ niꞌya̱j nij soꞌ man soꞌ a.

¹¹ Tu̱cuꞌyón so̱ꞌ nana̱ yoꞌ rihaan yuvii̱, ne̱ caꞌne̱ꞌ so̱ꞌ suun rihaan nij yuvii̱ se vaa canoco̱ꞌ nij yuvii̱ nana̱ yoꞌ á.

¹² ꞌO̱ se xnii mé so̱ꞌ, ne̱ ataa cachi̱j so̱ꞌ, tza̱j ne̱ taj se ꞌyaj yoꞌ maꞌ. Se̱ guun cata̱j yuvii̱ se vaa taj se uún so̱ꞌ maꞌ. Ma̱an se veꞌé qui̱ꞌyáá so̱ꞌ nu̱ꞌ tucuáán noco̱ꞌ níꞌ, se vaa veꞌé caꞌmi̱i̱ so̱ꞌ do̱ꞌ, veꞌé qui̱ꞌyáá so̱ꞌ do̱ꞌ, ga̱a̱ ꞌe̱e̱ rá so̱ꞌ man tinúú so̱ꞌ do̱ꞌ, ga̱a̱ nucua̱j rá so̱ꞌ man Yaꞌanj do̱ꞌ, tu̱mé so̱ꞌ mán so̱ꞌ se̱ quiꞌyáá so̱ꞌ cacunꞌ do̱ꞌ, ga̱a ne̱ xca̱j nij síí noco̱ꞌ man Yaꞌanj cuentá da̱j no̱ xcúún nij soꞌ quiꞌya̱j nij soꞌ uún ado̱nj.

¹³ Nda̱a güii cuchi̱ꞌ ꞌu̱nj rej tiꞌyaj roꞌ, ꞌo̱ naya̱a̱ so̱ꞌ snana̱ Yaꞌanj cuno̱ nij soꞌ do̱ꞌ, ꞌo̱ narque̱ so̱ꞌ chrej nucua̱j man nij soꞌ do̱ꞌ, ꞌo̱ tu̱cuꞌyón so̱ꞌ man nij soꞌ do̱ꞌ á.

¹⁴ Se̱ niꞌyón so̱ꞌ suun sa̱ꞌ caꞌneꞌ Yaꞌanj rihaan so̱ꞌ güii cutaꞌ nij síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó raꞌa nij soꞌ raá so̱ꞌ, ne̱ tihaa̱n naca̱ Yaꞌanj ꞌo̱ nana̱ cheꞌé se‑su̱u̱n so̱ꞌ maꞌ.

¹⁵ Dan me se ꞌo̱ caꞌne̱j so̱ꞌ raá so̱ꞌ man nij rasu̱u̱n yoꞌ, ga̱a ne̱ queneꞌe̱n cunuda̱nj nij yuvii̱ se vaa va̱j nari̱ꞌ so̱ꞌ qui̱ꞌyáá so̱ꞌ se‑su̱u̱n Yaꞌanj á.

¹⁶ Xca̱j so̱ꞌ cuentá cheꞌé se vaa ꞌyáá so̱ꞌ do̱ꞌ, cheꞌé tucuáán tucuꞌyón so̱ꞌ do̱ꞌ á. ꞌO̱ ca̱nocóꞌ so̱ꞌ nu̱ꞌ tucuáán nihánj, ga̱a ne̱ nani̱i̱ ma̱ꞌán so̱ꞌ do̱ꞌ, nij yuvii̱ uno nana̱ aꞌmii so̱ꞌ do̱ꞌ, rihaan sayuun ne̱ cavi̱i̱ sa̱ꞌ soj a.