1 Timoteo 3 - Triqui de San Juan Copala

Nataꞌ Pabló cheꞌé da̱j ga̱a̱ nij snóꞌo tumé sa̱ꞌ rihaan Yaꞌanj man nij yuvii̱ noco̱ꞌ man Cristó a

¹ Ya̱ vaa nana̱ nihánj á: Sese me rá ꞌo̱ soꞌ gu̱un soꞌ síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó, ne̱ sa̱ꞌ vaa suun me rá soꞌ ca̱ta̱ soꞌ ado̱nj.

² Xa̱ꞌ síí gu̱un síí tumé sa̱ꞌ man yuvii̱ rihaan Yaꞌanj, tza̱j ne̱ vaa cheꞌé gu̱un soꞌ síí nuviꞌ cacunꞌ tumé do̱ꞌ, síí vaa o̱rúnꞌ chana̱ nica̱ do̱ꞌ, síí chij nimán do̱ꞌ, síí veꞌé acaj cuentá do̱ꞌ, síí niꞌya̱nj rá do̱ꞌ, síí niha̱ꞌ rá cara̱nꞌ yuvii̱ avii ꞌó chumanꞌ tucuá do̱ꞌ, síí ya̱nj tu̱cuꞌyón man yuvii̱ do̱ꞌ ado̱nj.

³ Se̱ guun soꞌ síí niha̱ꞌ rá coꞌo̱ na vinó do̱ꞌ, síí yuva̱a̱ do̱ꞌ maꞌ. Tana̱nj gu̱un soꞌ síí laru̱u rá do̱ꞌ, síí ne niha̱ꞌ rá cano̱ tuviꞌ ga̱ ꞌó yuvii̱ do̱ꞌ, síí ne niha̱ꞌ rá quiri̱ꞌ ndoꞌo saꞌanj do̱ꞌ á.

⁴ Ma̱an se yan ga̱a̱ soꞌ me se sa̱ꞌ uxrá tu̱mé soꞌ tucuá soꞌ ne̱ gu̱un chij soꞌ do̱ꞌ, veꞌé uxrá cuno̱ taꞌníí soꞌ rihaan soꞌ do̱ꞌ, veꞌé cara̱j cochro̱j taꞌníí soꞌ rihaan soꞌ do̱ꞌ ado̱nj.

⁵ ꞌO̱ se sese ne neꞌen soꞌ gu̱un chij soꞌ rihaan tucuá soꞌ, ne̱ asa̱ꞌ caꞌve̱e tu̱mé soꞌ man xꞌneꞌ nij síí noco̱ꞌ man Yaꞌanj ga̱.

⁶ Sese síí noco̱ꞌ naca̱ stucua̱nj Yaꞌanj me ꞌo̱ soꞌ, ne̱ se̱ guun soꞌ síí tumé sa̱ꞌ man yuvii̱, se̱ gaa na̱nj gu̱un xta̱ꞌ nimán soꞌ ne̱ quira̱nꞌ soꞌ sayuun ga̱ Síí Chre̱e se vaa caca̱a̱ soꞌ, quiꞌya̱j Yaꞌanj na̱nj á.

⁷ Veé ꞌo̱ síí veꞌé aꞌmii yuvii̱ ne nocoꞌ man Cristó cheꞌé gu̱un soꞌ, se̱ gaa na̱nj quiꞌya̱j soꞌ cacunꞌ ne̱ quiri̱ꞌ snana̱ soꞌ do̱ꞌ, se̱ gaa na̱nj catu̱u̱ soꞌ raꞌngaꞌ uchruj Síí Chre̱e do̱ꞌ ado̱nj.

Nataꞌ Pabló cheꞌé da̱j ga̱a̱ nij síí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó a

⁸ Ne̱ veé da̱nj ga̱a̱ gue̱e̱ nij yuvii̱ gu̱un síí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó uún, ne̱ síí niꞌya̱nj gu̱un nij soꞌ á. Se̱ caꞌmii nij soꞌ nana̱ tihaꞌ yuꞌunj maꞌ. Se̱ gaa niha̱ꞌ rá nij soꞌ coꞌo̱ ndoꞌo nij soꞌ na vinó maꞌ. Se̱ tihaꞌ yuꞌunj nij soꞌ man yuvii̱ caꞌne̱e̱ u̱u̱n nij soꞌ saꞌanj maꞌ.

⁹ ꞌO̱ canoco̱ꞌ nij soꞌ nana̱ sa̱ꞌ yuve̱ tihaa̱n naca̱ Yaꞌanj man níꞌ, ne̱ tu̱mé nij soꞌ man nij soꞌ se̱ gaa na̱nj quiꞌya̱j nij soꞌ cacunꞌ á.

¹⁰ ꞌO̱ se asino xca̱j nii cuentá ni̱ꞌyaj nii man nij soꞌ sese taj cacunꞌ tumé nij soꞌ, ga̱a ne̱ caꞌve̱e gu̱un nij soꞌ síí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó ado̱nj.

¹¹ Veé da̱nj ga̱a̱ gue̱e̱ nij chana̱ uún, ne̱ chij ga̱a̱ rá nij noꞌ do̱ꞌ, se̱ caꞌmii ne̱ nij noꞌ do̱ꞌ, chij caꞌmi̱i̱ nij noꞌ do̱ꞌ, ꞌo̱ veꞌé quiꞌya̱j nij noꞌ da̱j a̱ rasu̱u̱n do̱ꞌ á.

¹² Xa̱ꞌ nij yuvii̱ gu̱un síí nica̱j suun rihaan Yaꞌanj ra̱cuíj man nij yuvii̱, tza̱j ne̱ o̱rúnꞌ nica̱ nij soꞌ ni̱caj nij soꞌ do̱ꞌ, sa̱ꞌ tu̱mé nij soꞌ man taꞌníí nij soꞌ do̱ꞌ, sa̱ꞌ tu̱mé nij soꞌ man nu̱ꞌ nij tucua̱ nij soꞌ do̱ꞌ na̱nj á.

¹³ Ne̱ sese sa̱ꞌ ꞌyaj nij soꞌ nu̱ꞌ suun vaa rihaan nij soꞌ, ne̱ síí sa̱ꞌ me nij soꞌ, cata̱j nij yuvii̱ noco̱ꞌ man Yaꞌanj, ne̱ se̱ cuchuꞌviꞌ nij soꞌ cata̱j xnaꞌanj nij soꞌ da̱j quiꞌya̱j níꞌ canoco̱ꞌ níꞌ man Cristó Jesús maꞌ.

Nataꞌ Pabló se vaa sa̱ꞌ uxrá vaa nana̱ cataj xnaꞌanj Yaꞌanj rihaan níꞌ nana̱ canocoꞌ níꞌ a

¹⁴ Dan me se cachrón ꞌu̱nj nana̱ nihánj rihaan yanj nihánj, ne̱ caꞌne̱j ꞌu̱nj rihaan so̱ꞌ á. Tza̱j ne̱ naꞌvi̱j ꞌu̱nj se vaa cuchi̱ꞌ ꞌu̱nj rihaan so̱ꞌ rque do̱j güii ado̱nj.

¹⁵ Tza̱j ne̱ sese se̱ cuchiꞌ raꞌya̱nj ꞌu̱nj, ne̱ taj se ꞌyaj maꞌ. A̱j neꞌén so̱ꞌ da̱j quiꞌya̱j soj si̱j noco̱ꞌ man Yaꞌanj ga̱a yáán soj ga̱ tinúú soj ado̱nj. ꞌO̱ se tucuá Yaꞌanj me xꞌneꞌ cunuda̱nj soj síí noco̱ꞌ man Yaꞌanj si̱j vaa iꞌna̱ꞌ ya̱ na̱nj á. Cheꞌé maꞌa̱n soj me se acaj yuvii̱ cuentá se vaa ya̱ vaa snana̱ Yaꞌanj ne̱ maꞌa̱n soj me síí nica̱j nana̱ ya̱ ado̱nj.

¹⁶ Neꞌen cunuda̱nj níꞌ se vaa noco̱o uxrá vaa nana̱ sa̱ꞌ yuve̱ tihaa̱n naca̱ Yaꞌanj man níꞌ nana̱ canocoꞌ níꞌ, ne̱ nihánj me nana̱ yoꞌ a: Curiha̱nj Yaꞌanj rihaan chumii̱, ne̱ guun soꞌ yuvii̱ a. Veꞌé ndoꞌo quiꞌyaj soꞌ, cataj Nimán Yaꞌanj a. Queneꞌen nij se‑mo̱zó Yaꞌanj man soꞌ a. Nataꞌ nii cheꞌé soꞌ rihaan nij yuvii̱ yaníj a. Cuchumán rá taꞌa̱j nij síí ma̱n rihaan chumii̱ nihánj niꞌya̱j nij soꞌ man soꞌ a. Quinanꞌ soꞌ xta̱ꞌ, ne̱ niꞌndaj ya̱ veꞌé nacaj nij síí ma̱n xta̱ꞌ man soꞌ a. Yoꞌ me nana̱ noco̱ꞌ níꞌ a.