1 Timoteo 2 - Triqui de San Juan Copala

Cachi̱nj niꞌya̱j níꞌ rihaan Yaꞌanj cheꞌé cunuda̱nj yuvii̱ a

¹ Narqué ꞌu̱nj chrej nucua̱j man soj cheꞌé suun noco̱o doj se vaa rquee̱ soj man Yaꞌanj ne̱ cachi̱nj niꞌya̱j soj rihaan soꞌ á. Cachi̱nj niꞌya̱j soj cheꞌé se vaa achiin man cunuda̱nj yuvii̱, ne̱ cata̱j soj guun niꞌya̱j níꞌ rihaan Yaꞌanj cheꞌé cunuda̱nj nij yuvii̱ a.

² Ne̱ cachi̱nj niꞌya̱j soj cheꞌé cunuda̱nj nij síí nica̱j suun, ga̱a ne̱ ga̱a̱ dínj ca̱yáán níꞌ rihaan chumii̱ nihánj, ne̱ veꞌé quiꞌya̱j níꞌ, canoco̱ꞌ níꞌ man Yaꞌanj á.

³ Sa̱ꞌ uxrá vaa sese da̱nj quiꞌya̱j níꞌ ni̱ꞌyaj Yaꞌanj Si̱j Tinanii man níꞌ rihaan Sayuun ado̱nj.

⁴ Me rá Yaꞌanj nani̱i̱ cunuda̱nj yuvii̱ rihaan sayuun ne̱ cavi̱i̱ sa̱ꞌ nij soꞌ, ne̱ me rá Yaꞌanj nari̱ꞌ cunuda̱nj yuvii̱ nana̱ ya̱ na̱nj á.

⁵ ꞌO̱ se o̱rúnꞌ Yaꞌanj, ne̱ o̱rúnꞌ ꞌo̱ snóꞌo taj xnaꞌanj rihaan níꞌ da̱j vaa Yaꞌanj, ne̱ soꞌ me síí aꞌmii rihaan Yaꞌanj cheꞌé níꞌ, ne̱ Cristó Jesús me síí ꞌyaj da̱nj ado̱nj.

⁶ Ne̱ Cristó Jesús me se caꞌvej rá soꞌ cavi̱ꞌ soꞌ cheꞌé cunuda̱nj yuvii̱, cheꞌé rej nani̱i̱ nij yuvii̱ rihaan sayuun a. Dan me se cachrón Yaꞌanj güii cavi̱ꞌ Cristó Jesús, ne̱ güii dan caviꞌ Cristó Jesús, ne̱ tihaa̱n Cristó Jesús se vaa me uxrá rá Yaꞌanj cavi̱i̱ sa̱ꞌ cunuda̱nj yuvii̱ a.

⁷ Ne̱ cuneꞌ Yaꞌanj mán ꞌu̱nj caꞌmi̱i̱ natáj ꞌu̱nj do̱ꞌ, caꞌa̱nj nata̱ꞌ ꞌu̱nj snana̱ Cristó do̱ꞌ, tu̱cuꞌyón ꞌu̱nj man nij yuvii̱ yaníj da̱j cuchuma̱n rá nij soꞌ ni̱ꞌyaj nij soꞌ man Yaꞌanj ne̱ cuno̱ nij soꞌ nana̱ ya̱ caꞌmii Yaꞌanj do̱ꞌ a. Xa̱ꞌ nana̱ nihánj, tza̱j ne̱ nana̱ ya̱ uxrá me nana̱ nihánj, ne̱ ne aꞌmii ne̱ ꞌu̱nj maꞌ.

⁸ Dan me se me rej maꞌa̱n nuu chre̱ꞌ soj si̱j noco̱ꞌ man Cristó, ne̱ me rá ꞌu̱nj cachi̱nj niꞌya̱j nij snóꞌo rihaan Yaꞌanj, ne̱ naxca̱j raꞌa nij soꞌ rej xta̱ꞌ cachi̱nj niꞌya̱j nij soꞌ rihaan Yaꞌanj, ne̱ ꞌo̱ gu̱un rá nij soꞌ se vaa veꞌé canoco̱ꞌ nij soꞌ man Yaꞌanj, ne̱ se̱ caꞌmaan rá nij soꞌ do̱ꞌ, se̱ canó tuviꞌ nij soꞌ do̱ꞌ, se̱ caꞌmii cunuꞌ nij soꞌ do̱ꞌ, ꞌo̱ se sa̱ꞌ ina̱nj cachi̱nj niꞌya̱j nij soꞌ na̱nj ado̱nj.

Caꞌmii Pabló cheꞌé da̱j quiꞌya̱j chana̱ noco̱ꞌ man Cristó a

⁹ Ne̱ xa̱ꞌ chana̱, tza̱j ne̱ cu̱nuû chana̱ yatzíj veꞌé aráán nee̱ man chana̱ á. Se̱ caráyaꞌa̱nj ndoꞌo chana̱ cheꞌé yuvé raa̱ noꞌ maꞌ. Se̱ rásuun noꞌ agaꞌ oró do̱ꞌ, chruj perlá do̱ꞌ, se cunuû noꞌ yatzíj tuꞌve̱e̱ ndoꞌo maꞌ.

¹⁰ Tana̱nj quiꞌya̱j noꞌ suun sa̱ꞌ ra̱cuíj noꞌ man yuvii̱, ne̱ ase vaa yatzíj veꞌé vaa roꞌ, da̱nj ga̱a̱ suun sa̱ꞌ yoꞌ a. Da̱nj quiꞌya̱j chana̱, ne̱ queneꞌe̱n yuvii̱ se vaa ya̱ vaa nana̱ aꞌmii noꞌ se vaa níí noco̱ꞌ man Yaꞌanj me noꞌ ado̱nj.

¹¹ Ga̱a tucuꞌyón nii snana̱ Yaꞌanj, ne̱ ga̱a̱ dínj tuꞌva nij chana̱ veꞌé cuno̱ nij noꞌ á.

¹² Naꞌvej rá ꞌu̱nj tu̱cuꞌyón chana̱ man snóꞌo maꞌ. Se̱ guun gu̱un chij chana̱ rihaan snóꞌo maꞌ. Ma̱an se dínj ga̱a̱ tuꞌva chana̱ ado̱nj.

¹³ ꞌO̱ se ga̱a guun cheꞌe̱ chumii̱, ne̱ asino quiꞌyaj Yaꞌanj man snóꞌo cuꞌna̱j Adán, ga̱a ne̱ quiꞌyaj Yaꞌanj man chana̱ cuꞌna̱j Eva ado̱nj.

¹⁴ Ne tiha̱ꞌ yuꞌunj Síí Chre̱e man Adán maꞌ. Tana̱nj chana̱ tihaꞌ yuꞌunj soꞌ, ne̱ quiꞌyaj noꞌ cacunꞌ rihaan Yaꞌanj, quiꞌyaj Síí Chre̱e ado̱nj.

¹⁵ Tza̱j ne̱ cavi̱i̱ sa̱ꞌ nij chana̱ ga̱a cuchru̱j chana̱ neꞌej, sese ꞌo̱ cuchuma̱n rá chana̱ ni̱ꞌyaj chana̱ man Yaꞌanj do̱ꞌ, sese ꞌo̱ cunu̱u ꞌe̱e̱ rá chana̱ tuviꞌ chana̱ do̱ꞌ, sese ꞌo̱ cunu̱u sa̱ꞌ nimán chana̱ rihaan Yaꞌanj do̱ꞌ, ne̱ veꞌé tu̱mé chana̱ man maꞌa̱n chana̱ da̱j quiꞌya̱j noꞌ ado̱nj.