1 Timoteo 1 - Triqui de San Juan Copala

¹ ꞌU̱nj nihánj me síí cuꞌna̱j Pabló síí cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱ a. Yoꞌ me suun caꞌneꞌ Yaꞌanj Si̱j Tinanii man níꞌ rihaan Sayuun do̱ꞌ, Cristó Jesús si̱j nucua̱j ya̱ rá níꞌ quiꞌya̱j cavi̱i̱ sa̱ꞌ níꞌ do̱ꞌ ado̱nj.

² ꞌYáá ꞌu̱nj yanj cartá nihánj caꞌne̱j ꞌu̱nj rihaan so̱ꞌ si̱j cuꞌna̱j Timoteo a. Dan me se tihaán ꞌu̱nj snana̱ Yaꞌanj rihaan so̱ꞌ, ne̱ cuchumán rá so̱ꞌ nana̱ yoꞌ, ne̱ cheꞌé dan ase vaa ꞌo̱ taꞌníj roꞌ, da̱nj vaa yá so̱ꞌ rihanj ado̱nj. Me rá ꞌu̱nj se vaa Rej níꞌ Yaꞌanj ga̱ Cristó Jesús Si̱j ꞌNi̱j Raꞌa man níꞌ quiꞌya̱j ndoꞌo se lu̱j cheꞌé so̱ꞌ, ne̱ ga̱a̱ ꞌe̱e̱ rá ro̱j soꞌ mán so̱ꞌ, ne̱ ga̱a̱ xe̱j nimán so̱ꞌ, quiꞌya̱j ro̱j soꞌ, raj a.

Caꞌmii Pabló cheꞌé nij síí tucuꞌyón tucuáán ne̱ a

³ Dan me se a̱j neꞌén so̱ꞌ se vaa ga̱a ataa caꞌa̱nj ꞌu̱nj estadó Macedonia, ne̱ rqueé ꞌu̱nj mán so̱ꞌ se vaa quina̱j so̱ꞌ chumanꞌ Éfeso a. Ne̱ veé da̱nj rqueé ꞌu̱nj mán so̱ꞌ se vaa caꞌne̱ꞌ so̱ꞌ suun rihaan taꞌa̱j nij síí ma̱n Éfeso se vaa se̱ tucuꞌyón nij soꞌ tucuáán ne̱ rihaan nij tinúú níꞌ maꞌ.

⁴ Dan me se cata̱j so̱ꞌ rihaan nij tinúú níꞌ, ne̱ a̱ se̱ nanó xre̱j nij soꞌ cuentó ma̱n ga̱a naá do̱ꞌ, cuentó cheꞌé da̱j vaa da̱j a̱ xi̱i nij soꞌ síí ma̱n ga̱a naá do̱ꞌ maꞌ. ꞌO̱ se aꞌmii unuꞌ uxrá yuvii̱ cheꞌé nana̱ yoꞌ, tza̱j ne̱ ne racuíj nana̱ yoꞌ man níꞌ sa̱ꞌ doj canoco̱ꞌ níꞌ man Yaꞌanj maꞌ. ꞌO̱ se me rá Yaꞌanj ga̱a̱ nucua̱j rá níꞌ man maꞌa̱n Yaꞌanj ado̱nj.

⁵ ꞌO̱ se aꞌnéꞌ ꞌu̱nj suun yoꞌ rihaan so̱ꞌ cheꞌé se me rá ꞌu̱nj ga̱a̱ ꞌe̱e̱ rá níꞌ tuviꞌ níꞌ á. Sese naruvii nimán níꞌ, ne̱ sese taj cacunꞌ tumé níꞌ rá níꞌ, ne̱ sese amán ya̱ rá níꞌ niꞌya̱j níꞌ Yaꞌanj, ne̱ caꞌve̱e ga̱a̱ ꞌe̱e̱ rá níꞌ ni̱ꞌyaj níꞌ tuviꞌ níꞌ ado̱nj.

⁶ Dan me se vaa taꞌa̱j nij yuvii̱, ne̱ taꞌaa nij soꞌ ꞌó chrej aꞌmii nij soꞌ, ne̱ dan me se riꞌ rmaꞌa̱n tiempó, ꞌyaj nij soꞌ, aꞌmii nij soꞌ cheꞌé ꞌó tucuáán na̱nj á.

⁷ ꞌO̱ se me rá nij soꞌ gu̱un nij soꞌ maestró tucuꞌyón stucua̱nj Moisés, tza̱j ne̱ ne neꞌen nij soꞌ me taj nij soꞌ a̱ maꞌ. Ne̱ sa̱ꞌ uxrá vaa nana̱ tucuꞌyón nij soꞌ rá maꞌa̱n nij soꞌ, tza̱j ne̱ ne neꞌen uxrá nij soꞌ nana̱ yoꞌ a̱ maꞌ.

Nataꞌ Pabló se vaa ina̱nj cheꞌé nij síí ꞌyaj cacunꞌ vaa stucua̱nj Moisés a

⁸ Neꞌen níꞌ se vaa sa̱ꞌ vaa stucua̱nj Moisés, ne̱ cataj Yaꞌanj rihaan Moisés da̱j quiꞌya̱j nij yuvii̱ israelitá canoco̱ꞌ nij soꞌ man Yaꞌanj, tza̱j ne̱ xca̱j níꞌ cuentá me cheꞌé me caꞌmii Yaꞌanj da̱nj á.

⁹ Neꞌen níꞌ se vaa xa̱ꞌ yuvii̱ nica̱ nimán, tza̱j ne̱ taj tucuáán achiin man nij soꞌ canoco̱ꞌ nij soꞌ Yaꞌanj maꞌ. Tana̱nj cuchruj Yaꞌanj stucua̱nj Moisés cheꞌé yuvii̱ ne uno suun caꞌneꞌ Yaꞌanj do̱ꞌ, yuvii̱ tucuáá do̱ꞌ, yuvii̱ ne nocoꞌ man Yaꞌanj do̱ꞌ, yuvii̱ tumé ndoꞌo cacunꞌ do̱ꞌ, yuvii̱ ne vaa sa̱ꞌ nimán do̱ꞌ, yuvii̱ ne acaj cuentá cheꞌé Yaꞌanj do̱ꞌ, yuvii̱ ticaviꞌ rej do̱ꞌ, yuvii̱ ticaviꞌ nii do̱ꞌ, yuvii̱ ticaviꞌ me maꞌa̱n ꞌó yuvii̱ do̱ꞌ ado̱nj.

¹⁰ Ne̱ veé da̱nj cuchruj Yaꞌanj stucua̱nj Moisés cheꞌé yuvii̱ otoj ga̱ ꞌó yuvii̱ né ni̱ca̱ me do̱ꞌ, chii cha̱na̱ do̱ꞌ, síí otoj ga̱ chii cha̱na̱ do̱ꞌ, yuvii̱ tuꞌvéj man tuviꞌ do̱ꞌ, yuvii̱ aꞌmii nana̱ ne̱ do̱ꞌ, yuvii̱ ataꞌ tuꞌva aꞌmii ne̱ do̱ꞌ, yuvii̱ ꞌyaj me maꞌa̱n rasu̱u̱n ino̱ vaa ga̱ tucuáán ya̱ do̱ꞌ ado̱nj.

¹¹ Ne̱ tucuáán ya̱ yoꞌ roꞌ, ꞌo̱ cuya̱a̱n aꞌmii yoꞌ ga̱ snana̱ Yaꞌanj si̱j sa̱ꞌ ndoꞌo, nana̱ niꞌndaj ya̱ sa̱ꞌ vaa, ne̱ nana̱ yoꞌ me se cuneꞌ Yaꞌanj mán ꞌu̱nj nata̱ꞌ ꞌu̱nj rihaan yuvii̱ ado̱nj.

Nataꞌ Pabló se vaa cunuu ꞌe̱e̱ ndoꞌo rá Cristó man soꞌ a

¹² Taj ꞌu̱nj guun niꞌya̱j níꞌ rihaan Cristó Jesús Si̱j ꞌNi̱j Raꞌa man níꞌ cheꞌé se nariꞌ nucuáá ꞌu̱nj, quiꞌyaj soꞌ a. Dan me se uxrá ya̱ cataj Yaꞌanj se vaa xraan canocóꞌ ꞌu̱nj man soꞌ, ne̱ cuneꞌ soꞌ mán ꞌu̱nj qui̱ꞌyáá ꞌu̱nj se‑su̱u̱n soꞌ ado̱nj.

¹³ Asino ya̱a̱n me se qui̱j uxrá caꞌmii ꞌu̱nj cheꞌé Cristó, ne̱ quiꞌyaj ndoꞌo ꞌu̱nj sayuun man nij síí noco̱ꞌ man soꞌ, ne̱ caꞌmii xta̱ꞌ ꞌu̱nj niꞌya̱j ꞌu̱nj man soꞌ, tza̱j ne̱ queneꞌen Cristó se vaa cheꞌé se ne queneꞌe̱n yá ꞌu̱nj da̱j vaa soꞌ roꞌ, cheꞌé dan ne cuchuma̱n rá ꞌu̱nj ni̱ꞌyaj ꞌu̱nj man soꞌ a. Tza̱j ne̱ cunuu ꞌe̱e̱ rá Cristó manj, ne̱ ne quiꞌya̱j soꞌ sayuun manj maꞌ.

¹⁴ Tana̱nj quiꞌyaj uxrá Cristó Jesús Si̱j ꞌNi̱j Raꞌa man níꞌ se lu̱j ga̱ ꞌu̱nj, se vaa cuchumán rá ꞌu̱nj niꞌya̱j ꞌu̱nj man soꞌ, ne̱ cunuu ꞌe̱e̱ raj tuvij, quiꞌyaj soꞌ ado̱nj.

¹⁵ Dan me se ya̱ uxrá vaa nana̱ nihánj, ne̱ ta̱ranꞌ níꞌ no̱ xcúún cuno̱ nana̱ nihánj se vaa me rá Cristó Jesús ti̱nanii soꞌ man nij síí tumé cacunꞌ rihaan chrej chiꞌi̱i̱ do̱ꞌ, rihaan sayuun do̱ꞌ na̱nj ado̱nj. Cheꞌé dan caꞌnaꞌ soꞌ rihaan chumii̱ nihánj ado̱nj. Dan me se noco̱o doj cacunꞌ quiꞌyáá ꞌu̱nj rihaan cacunꞌ quiꞌyaj ta̱ranꞌ ꞌó nij yuvii̱ a.

¹⁶ Tza̱j ne̱ cunuu ꞌe̱e̱ rá Cristó Jesús niꞌya̱j soꞌ manj, cheꞌé se guun rá Cristó Jesús se vaa xca̱j ꞌó nij síí cuchuma̱n rá ni̱ꞌyaj man soꞌ cuentá se vaa canoco̱ꞌ nij soꞌ man Cristó Jesús, ne̱ xꞌne̱e̱ cacunꞌ xráá nij soꞌ, ne̱ caꞌve̱e ca̱yáán nij soꞌ ga̱ soꞌ nu̱ꞌ cavii nu̱ꞌ caꞌanj ado̱nj.

¹⁷ Nu̱ꞌ cavii nu̱ꞌ caꞌanj cata̱j níꞌ se vaa niꞌndaj ya̱ sa̱ꞌ vaa Yaꞌanj, ne̱ soꞌ me Rey gu̱un chij nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ caviꞌ soꞌ maꞌ. Ne ruviꞌ soꞌ niꞌya̱j yuvii̱ maꞌ. Taj va̱j ꞌó Yaꞌanj maꞌ. O̱rúnꞌ soꞌ me Yaꞌanj ya̱ ado̱nj. Veé da̱nj ga̱a̱ ya̱ ado̱nj.

^18-19 Timoteo, ase vaa taꞌníí ya̱ ma̱ꞌanj vaa yá so̱ꞌ ado̱nj. Dan me se aꞌneꞌ yá ꞌu̱nj suun rihaan so̱ꞌ ꞌo̱ caꞌmi̱i̱ cunu̱ꞌ sa̱ꞌ yá so̱ꞌ cheꞌé tucuáán sa̱ꞌ ya̱ nihánj á. ꞌO̱ ga̱a̱ nica̱ nimán so̱ꞌ, ne̱ ꞌo̱ ga̱a̱ nucua̱j rá so̱ꞌ cuchuma̱n rá so̱ꞌ, ga̱a ne̱ quisi̱j ya̱ nda̱a vaa ya̱ nataꞌ nij síí caꞌmii Yaꞌanj rihaan cheꞌé so̱ꞌ na̱nj á. Dan me se vaa taꞌa̱j nij síí quiriꞌ rá, ne̱ ne cuchuma̱n ya̱ rá nij soꞌ maꞌ.

²⁰ Dan me se vi̱j nij soꞌ me ro̱j síí cuꞌna̱j Himeneo ga̱ Alejandró síí caꞌmii qui̱j cheꞌé Yaꞌanj a. Dan me se nagoꞌ yá ꞌu̱nj man ro̱j soꞌ raꞌa Síí Chre̱e, ga̱a ne̱ xca̱j ro̱j soꞌ cuentá, ne̱ se̱ caꞌmii qui̱j ro̱j soꞌ cheꞌé Yaꞌanj maꞌ.