1 Tesalonicenses 5 - Triqui de San Juan Copala

Xca̱j níꞌ cuentá da̱j quiꞌya̱j níꞌ nda̱a se quisi̱j güii caꞌna̱ꞌ uún Cristó á

¹ Taj cheꞌé cachro̱n núj nana̱ rihaan yanj cartá nihánj cata̱j xnaꞌanj núj rihaan soj cheꞌé me tiempó do̱ꞌ, me güii do̱ꞌ, caꞌna̱ꞌ uún Cristó, maan tinu̱j, maan nocoj.

² ꞌO̱ se a̱j neꞌen ya̱ soj se vaa ase vaa ne neꞌen níꞌ me güii catu̱u̱ síí itu̱u̱ quiꞌya̱j itu̱u̱ soꞌ roꞌ, da̱nj vaa ne neꞌen níꞌ me güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj a̱ maꞌ.

³ Dan me se vaa güii cata̱j yuvii̱ a: “Ya̱j me se dínj vaa rihaan chumii̱, ne̱ taj cheꞌé cuchuꞌvi̱ꞌ níꞌ maꞌ”, cata̱j nij yuvii̱ a. ꞌO̱ se güii yoꞌ me se ta̱j niꞌyo̱n ne̱ ase vaa ranꞌ chana̱ cuchru̱j neꞌej roꞌ, da̱nj ga̱a̱ quira̱nꞌ ndoꞌo nij yuvii̱ sayuun, ne̱ se̱ nanii nij soꞌ maꞌ.

⁴ Xa̱ꞌ soj, tza̱j ne̱ né si̱j chéé rej rmi̱ꞌ ne acaj cuentá me soj, maan tinu̱j, maan nocoj. ꞌO̱ se güii caꞌna̱ꞌ uún Cristó me se taj cheꞌé cuchuꞌvi̱ꞌ soj nda̱a vaa chuꞌviꞌ nij síí neꞌen man síí itu̱u̱ maꞌ.

⁵ Ino̱ vaa soj rihaan nij síí ne nocoꞌ man Cristó á. Dan me se xa̱ꞌ soj, tza̱j ne̱ si̱j chéé ranga̱ꞌ me soj, ne̱ si̱j acaj sa̱ꞌ cuentá me soj uún, ne̱ né si̱j chéé rej rmi̱ꞌ do̱ꞌ, rej nii̱ do̱ꞌ, me soj maꞌ.

⁶ Cheꞌé dan se̱ guun gu̱un níꞌ síí otoj nda̱ꞌ rá se vaa ꞌyaj taꞌa̱j nii maꞌ. ꞌO̱ se vaa cheꞌé ni̱ꞌyaj ranga̱ꞌ rlij rihaan níꞌ á. Se̱ canocoꞌ níꞌ tucuáán noco̱ꞌ ꞌó nij yuvii̱ maꞌ. Tana̱nj ꞌo̱ ga̱a̱ yuꞌve̱ níꞌ, ne̱ se̱ gaa xno̱ níꞌ maꞌ.

⁷ Dan me se nij síí ma̱n rihaan chumii̱ nihánj roꞌ, síí va̱j rej rmi̱ꞌ me nij soꞌ, ne̱ taj se ꞌyáꞌ xca̱j nij soꞌ cuentá maꞌ. Cheꞌé dan ase vaa ꞌo̱ síí otoj nu̱ꞌ do̱ꞌ, ase vaa síí xno̱ do̱ꞌ, vaa nij soꞌ, ne̱ ne neꞌen nij soꞌ da̱j uun a̱ maꞌ.

⁸ Xa̱ꞌ níꞌ, tza̱j ne̱ si̱j va̱j rej ranga̱ꞌ me níꞌ, ne̱ acaj níꞌ cuentá da̱j ꞌyaj níꞌ na̱nj á. Dan me se ꞌo̱ ga̱a̱ nucua̱j rá níꞌ man Cristó, ne̱ ga̱a̱ ꞌe̱e̱ rá níꞌ man tinúú níꞌ, ne̱ ase vaa aráán rihaan nimán tanuu ꞌyaj agaꞌ no̱ rucua̱a̱ tanuu roꞌ, da̱nj ga̱a̱ ca̱ráán rihaan nimán níꞌ a. Ne̱ gu̱un ya̱ rá níꞌ se vaa ya̱ nani̱i̱ níꞌ rihaan sayuun ne̱ cavi̱i̱ sa̱ꞌ níꞌ, ne̱ ase vaa avii sa̱ꞌ tanuu ꞌyaj agaꞌ nu̱u̱ raa̱ tanuu roꞌ, da̱nj ga̱a̱ cavi̱i̱ sa̱ꞌ níꞌ a.

⁹ Né cheꞌe̱ se me rá Yaꞌanj quiꞌya̱j Yaꞌanj sayuun man níꞌ me cataj Yaꞌanj se vaa canoco̱ꞌ níꞌ man soꞌ maꞌ. ꞌO̱ se cataj Yaꞌanj da̱nj cheꞌé se me rá Yaꞌanj nani̱i̱ níꞌ rihaan sayuun ne̱ cavi̱i̱ sa̱ꞌ níꞌ cheꞌé Jesucristó Si̱j ꞌNi̱j Raꞌa man níꞌ ado̱nj.

¹⁰ Ne̱ Cristó me síí caviꞌ cheꞌé níꞌ, ne̱ cheꞌé dan asa̱ꞌ caꞌnaꞌ uún soꞌ caꞌve̱e se a̱j cavi̱ꞌ níꞌ, caꞌve̱e se ga̱a̱ iꞌna̱ꞌ níꞌ, tza̱j ne̱ ca̱yáán rcuaꞌa̱a̱n cunuda̱nj níꞌ ga̱ soꞌ ado̱nj.

¹¹ Cheꞌé dan ase vaa ꞌyaj soj cuano̱ roꞌ, da̱nj na̱nj nago̱ꞌ soj nana̱ sa̱ꞌ man tinúú soj, cheꞌé rej nari̱ꞌ nucuaj nimán tinúú soj, ne̱ ra̱cuíj soj man tinúú soj yan sa̱ꞌ doj canoco̱ꞌ nij tinu̱j nij soj man Yaꞌanj á.

Nagoꞌ Pabló chrej man nu̱ꞌ nij síí noco̱ꞌ man Cristó a

¹² Cuano̱ nihánj me cata̱j xnaꞌanj núj rihaan soj se vaa cara̱a̱ cochro̱j soj rihaan nij síí uun chij rihaan soj, tinu̱j, nocoj. Dan me se nij soꞌ roꞌ, me síí nica̱j yuꞌunj man soj rihaan Síí ꞌNi̱j Raꞌa man níꞌ, ne̱ narqué nij soꞌ chrej sa̱ꞌ man soj,

¹³ ne̱ cheꞌé dan ga̱a̱ ꞌe̱e̱ rá soj man nij soꞌ, ne̱ cara̱a̱ cochro̱j soj rihaan nij soꞌ á. Ne̱ dínj cuma̱n soj ga̱ tinúú soj á.

¹⁴ Ne̱ cuano̱ nihánj me rquee̱ núj man soj se vaa nago̱ꞌ soj chrej nucua̱j man nij síí rmi̱i̱ se vaa quiꞌya̱j suun nij soꞌ, tinu̱j, nocoj. Sese vaa síí chuꞌviꞌ nimán, ne̱ caꞌmi̱i̱ soj nana̱ sa̱ꞌ rihaan soꞌ, ne̱ nari̱ꞌ nucuaj nimán soꞌ, quiꞌya̱j soj á. Ra̱cuíj soj man nij yuvii̱ ninaj nimán, ne̱ ga̱a̱ ina̱j nimán soj ni̱ꞌyaj soj man cunuda̱nj yuvii̱ á.

¹⁵ Tu̱mé soj man soj se̱ guun quiꞌya̱j chiꞌi̱i̱ ꞌo̱ tuviꞌ soj man síí ꞌyaj chiꞌi̱i̱ man soꞌ maꞌ. Tana̱nj ina̱nj suun sa̱ꞌ quiꞌya̱j soj cheꞌé tuviꞌ soj do̱ꞌ, cheꞌé cunuda̱nj yuvii̱ do̱ꞌ á.

¹⁶ Niga̱nj ga̱a̱ niha̱ꞌ rá nimán soj,

¹⁷ ne̱ se̱ caꞌneꞌ rá soj ga̱ suun achíín niꞌya̱j rihaan Yaꞌanj maꞌ.

¹⁸ Ne̱ caꞌve̱e se me maꞌa̱n sayuun quira̱nꞌ soj, tza̱j ne̱ ꞌo̱ cata̱j soj guun niꞌya̱j níꞌ rihaan Yaꞌanj á. Da̱nj me rá Yaꞌanj quiꞌya̱j soj cheꞌé se si̱j noco̱ꞌ man Cristó Jesús me soj ado̱nj.

¹⁹ Se̱ guun ca̱ráán soj chrej rihaan Nimán Yaꞌanj maꞌ.

²⁰ Se̱ nachriꞌ soj man nana̱ cata̱j xnaꞌanj naca̱ Nimán Yaꞌanj rihaan soj maꞌ.

²¹ Tza̱j ne̱ xca̱j soj cuentá da̱j vaa ꞌo̱ ꞌo̱ nana̱ cuno̱ soj, ga̱a ne̱ queneꞌe̱n soj sese ya̱ nana̱ caꞌmii Nimán Yaꞌanj me yoꞌ, ne̱ sa̱ꞌ cu̱nuû rá soj nu̱ꞌ nana̱ sa̱ꞌ yoꞌ á.

²² Ne̱ se̱ caꞌvej rá soj quiꞌya̱j soj da̱j a̱ se nij maꞌ.

²³ Yaꞌanj roꞌ, me síí naquiꞌyaj xe̱j nimán níꞌ, ne̱ me rá núj cunu̱u sa̱ꞌ ina̱nj nimán soj rihaan soꞌ, quiꞌya̱j maꞌa̱n soꞌ, ne̱ tu̱mé Yaꞌanj man maꞌa̱n soj nda̱a se quisi̱j güii caꞌna̱ꞌ uún Jesucristó Si̱j ꞌNi̱j Raꞌa man níꞌ a. Ne̱ dan me se me rá núj tu̱mé Yaꞌanj man nimán soj do̱ꞌ, man nee̱ man soj do̱ꞌ, ne̱ a̱ ꞌó cacunꞌ se̱ tumé soj a̱ maꞌ.

²⁴ Dan me se Yaꞌanj me síí nacúún man soj canoco̱ꞌ soj man soꞌ, ne̱ vaa cheꞌé ga̱a̱ nucua̱j rá soj man soꞌ se vaa tu̱mé soꞌ man soj ado̱nj.

²⁵ Ne̱ cachi̱nj niꞌya̱j soj rihaan Yaꞌanj cheꞌé núj, tinu̱j, nocoj.

²⁶ Ga̱a nariꞌ tuviꞌ nij soj, ne̱ veꞌé ndoꞌo caꞌmi̱i̱ soj ga̱ tuviꞌ soj rihaan Yaꞌanj á.

²⁷ Ma̱an cheꞌé se Síí ꞌNi̱j Raꞌa man níꞌ rqué suun manj, cheꞌé dan me no̱ xcúnj cata̱j xnaꞌanj ꞌu̱nj rihaan soj se vaa naya̱a̱ soj yanj cartá nihánj rihaan cunuda̱nj nij tinúú níꞌ síí noco̱ꞌ man Cristó ado̱nj.

²⁸ Ne̱ me rá núj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j cheꞌé soj ado̱nj.