1 Tesalonicenses 3 - Triqui de San Juan Copala

Cataj xnaꞌanj Timoteo rihaan Pabló se vaa veꞌé uxrá amán rá nij síí ma̱n Tesalónica niꞌya̱j nij soꞌ man Cristó a

¹ Cheꞌé dan ne caꞌve̱j uxrá rá núj ca̱yáán ra̱a̱n ta̱ranꞌ núj chumanꞌ nihánj a̱ maꞌ. Cheꞌé dan cavii raa̱ núj se vaa vi̱j ranꞌ gue̱e̱ rój me síí quina̱j chumanꞌ Atenas nihánj,

² ne̱ dan me se caꞌnéé núj man tinúꞌ Timoteo cuchi̱ꞌ soꞌ rej ma̱n soj a. Dan me se soꞌ me síí ꞌyaj se‑su̱u̱n Yaꞌanj ga̱ núj suun nataꞌ nana̱ sa̱ꞌ cheꞌé Cristó a. Me rá núj ra̱cuíj soꞌ man soj, narque̱ soꞌ chrej nucua̱j man soj, ne̱ xraan doj canoco̱ꞌ soj man Cristó, quiꞌya̱j soꞌ a.

³ Ne̱ a̱ ꞌó soj se̱ quiriꞌíj tucuáán noco̱ꞌ soj cheꞌé sayuun quiꞌya̱j yuvii̱ man soj, rá núj a̱ maꞌ. ꞌO̱ se neꞌen soj se vaa no̱ xcúún níꞌ quira̱nꞌ níꞌ sayuun rihaan chumii̱ nihánj ado̱nj.

⁴ Ne̱ ga̱a cayáán núj ga̱ soj, ne̱ cataj ya̱ núj rihaan soj se vaa xraj, ne̱ quira̱nꞌ níꞌ sayuun, ne̱ neꞌen soj se vaa ya̱ quiranꞌ níꞌ sayuun niha̱nꞌ.

⁵ Cheꞌé se me uxrá rá ꞌu̱nj que̱neꞌén ꞌu̱nj da̱j quiranꞌ soj, ne̱ cheꞌé dan caꞌnéé ꞌu̱nj man Timoteo cuchi̱ꞌ soꞌ rej ma̱n soj, ne̱ cata̱j xnaꞌanj soꞌ rihanj da̱j ꞌyaj soj noco̱ꞌ soj man Yaꞌanj, raj a. Dan me se nano̱ rá ꞌu̱nj sese a̱j caxríj Síí Chre̱e chrej chiꞌi̱i̱ rque soj do̱ꞌ, sese quiriꞌ nu̱ꞌ suun quiꞌyaj núj cheꞌé soj do̱ꞌ, raj a.

⁶ Dan me se canica̱j uún Timoteo namán soꞌ rihaan núj, ne̱ cataj xnaꞌanj soꞌ se vaa veꞌé uxrá amán rá soj niꞌya̱j soj man Cristó, ne̱ ꞌe̱e̱ rá soj tinúú soj, taj soꞌ, ne̱ niga̱nj veꞌé nuû rá soj man núj, taj soꞌ a. Ne̱ ase vaa me rá núj queneꞌe̱n núj man soj roꞌ, da̱nj me rá soj queneꞌe̱n soj man núj, taj soꞌ a.

⁷ Nda̱ꞌ se ranꞌ ndoꞌo núj sayuun, tza̱j ne̱ cuano̱ nihánj me guun niha̱ꞌ uxrá rá núj ga̱a cuno núj se vaa veꞌé uxrá amán rá soj niꞌya̱j soj man Cristó, tinu̱j, nocoj.

⁸ Dan me se cheꞌé se xraan nocoꞌ soj man Síí ꞌNi̱j Raꞌa man níꞌ, cheꞌé dan nariꞌ nucuaj rá núj ca̱yáán núj rihaan chumii̱ nihánj ado̱nj.

⁹ Dan me se guun niha̱ꞌ uxrá rá núj rihaan Yaꞌanj cheꞌé soj, ne̱ cheꞌé dan no̱ xcúún núj cata̱j ndoꞌo núj guun niꞌya̱j níꞌ rihaan Yaꞌanj cheꞌé soj,

¹⁰ ne̱ nuvi̱i niga̱nꞌ achíín niꞌya̱j núj rihaan Yaꞌanj se vaa caꞌve̱j rá Yaꞌanj queneꞌe̱n núj man soj, ne̱ narque̱ núj doj chrej sa̱ꞌ man soj, ne̱ sa̱ꞌ doj canoco̱ꞌ soj Yaꞌanj na̱nj ado̱nj.

Cunu̱u ꞌe̱e̱ rá níꞌ man cunuda̱nj yuvii̱ a

¹¹ Me rá núj ra̱cuíj maꞌa̱n Rej níꞌ Yaꞌanj ra̱cuíj Jesús Si̱j ꞌNi̱j Raꞌa man níꞌ ra̱cuíj man núj cuchi̱ꞌ núj rihaan soj a.

¹² Ne̱ ase vaa ꞌe̱e̱ rá núj man soj roꞌ, da̱nj ga̱a̱ cunu̱u ꞌe̱e̱ ndoꞌo rá soj ni̱ꞌyaj soj tinúú soj do̱ꞌ, cunuda̱nj yuvii̱ do̱ꞌ, quiꞌya̱j Síí ꞌNi̱j Raꞌa man níꞌ, rá núj a.

¹³ Nda̱a síj, ga̱a ne̱ ꞌo̱ cunu̱u sa̱ꞌ nimán soj rihaan Rej níꞌ Yaꞌanj asa̱ꞌ quisíj güii caꞌna̱ꞌ uún Jesús Si̱j ꞌNi̱j Raꞌa man níꞌ rihaan chumii̱ nihánj ga̱ cunuda̱nj nij síí sa̱ꞌ noco̱ꞌ man soꞌ, ne̱ a̱ ꞌó cacunꞌ se̱ tumé soj ga̱a a̱ maꞌ.