1 Tesalonicenses 1 - Triqui de San Juan Copala

¹ Síí cuꞌna̱j Pabló do̱ꞌ, Silvano do̱ꞌ, Timoteo do̱ꞌ, me núj, ne̱ ꞌyaj núj yanj nihánj caꞌne̱j núj rihaan nij soj xꞌneꞌ yuvii̱ ya̱nj chumanꞌ Tesalónica noco̱ꞌ man Rej níꞌ Yaꞌanj do̱ꞌ, man Jesucristó Si̱j ꞌNi̱j Raꞌa man níꞌ do̱ꞌ a. Me rá núj quiꞌya̱j ndoꞌo Rej níꞌ Yaꞌanj ga̱ Jesucristó Si̱j ꞌNi̱j Raꞌa man níꞌ se lu̱j cheꞌé soj, ne̱ ga̱a̱ xe̱j nimán soj a.

Nij síí cuchumán rá niꞌya̱j man Cristó ya̱nj chumanꞌ Tesalónica roꞌ, sa̱ꞌ uxrá nocoꞌ nij soꞌ man Yaꞌanj a

² Niga̱nj taj núj guun niꞌya̱j níꞌ rihaan Yaꞌanj cheꞌé cunuda̱nj soj, ne̱ ga̱a achíín niꞌya̱j núj roꞌ, aꞌmii núj rihaan soꞌ cheꞌé soj ado̱nj.

³ Dan me se ꞌo̱ nuû rá núj rihaan Rej níꞌ Yaꞌanj se vaa caꞌnéé uxrá nimán soj cuchuma̱n rá soj ni̱ꞌyaj soj man Jesucristó do̱ꞌ, se vaa ꞌo̱ ꞌyaj soj se‑su̱u̱n Jesucristó cheꞌé se ꞌe̱e̱ ya̱ rá soj man yuvii̱ do̱ꞌ, se vaa ꞌo̱ xraan naꞌvi̱j soj cavi̱i̱ sa̱ꞌ soj quiꞌya̱j Jesucristó Si̱j ꞌNi̱j Raꞌa man níꞌ do̱ꞌ ado̱nj.

⁴ Ya̱ ya̱ ꞌe̱e̱ rá Yaꞌanj man soj, tinu̱j, nocoj. Ne̱ neꞌen núj se vaa narii Yaꞌanj man soj gu̱un soj se‑chuma̱nꞌ soꞌ ado̱nj.

⁵ ꞌO̱ se ga̱a nataꞌ núj nana̱ sa̱ꞌ cheꞌé Cristó rihaan soj, ne̱ né na̱na̱ u̱u̱n nataꞌ núj rihaan soj maꞌ. Tana̱nj racuíj Nimán Yaꞌanj man núj ꞌyaj núj suun sa̱ꞌ noco̱o, ne̱ guun ya̱ rá soj se vaa nana̱ ya̱ me nana̱ nataꞌ núj a. Ga̱a cayáán núj ga̱ soj, ne̱ queneꞌen soj da̱j quiꞌyaj núj cheꞌé se ꞌe̱e̱ rá núj niꞌya̱j núj man soj a.

⁶ Ne̱ ase quiꞌyaj gue̱e̱ núj do̱ꞌ, ase ꞌyaj gue̱e̱ Síí ꞌNi̱j Raꞌa man níꞌ do̱ꞌ, da̱nj quiꞌyaj gue̱e̱ soj chugua̱nj. Dan me se nda̱ꞌ se quiranꞌ soj sayuun quiꞌyaj nij yuvii̱ ne nocoꞌ man Cristó, tza̱j ne̱ ꞌo̱ canocoꞌ soj snana̱ Yaꞌanj, ne̱ guun niha̱ꞌ rá soj, quiꞌyaj Nimán Yaꞌanj ado̱nj.

⁷ Ne̱ cunuda̱nj nij yuvii̱ noco̱ꞌ man Cristó ma̱n estadó Macedonia ga̱ estadó Acaya roꞌ, xcaj nij soꞌ cuentá cheꞌé se vaa quiꞌyaj soj, ne̱ da̱nj me rá nij soꞌ quiꞌya̱j gue̱e̱ nij soꞌ uún ado̱nj.

⁸ Dan me se a̱j cuno ndoꞌo yuvii̱ snana̱ Síí ꞌNi̱j Raꞌa man níꞌ, quiꞌyaj soj, ne̱ dan me se né ina̱nj nij yuvii̱ ma̱n estadó Macedonia ga̱ estadó Acaya cuno nana̱ se vaa amán rá soj niꞌya̱j soj man Yaꞌanj maꞌ. ꞌO̱ se yuvii̱ ma̱n nu̱ꞌ canó ya̱ rej cuno nana̱ yoꞌ na̱nj ado̱nj. Cheꞌé dan me taj cheꞌé cata̱j xnaꞌanj núj rihaan nij yuvii̱ cheꞌé se vaa quiꞌyaj soj maꞌ.

⁹ Maꞌa̱n nij yuvii̱ taj xnaꞌanj rihaan tuviꞌ nij soꞌ se vaa veꞌé uxrá caꞌmii soj ga̱ núj ga̱a cayáán núj ga̱ soj ado̱nj. Ne̱ taj xnaꞌanj nij soꞌ se vaa tanáj soj yaꞌanj quiꞌyaj maꞌa̱n yuvii̱ canocoꞌ soj ga̱a rque̱, ne̱ ya̱j me se canica̱j soj canocoꞌ soj man Yaꞌanj si̱j vaa iꞌna̱ꞌ ya̱ ya̱,

¹⁰ ne̱ naꞌvi̱j soj caꞌna̱ꞌ uún maꞌa̱n Jesús Taꞌníí Yaꞌanj rej xta̱ꞌ a. Ne̱ soꞌ roꞌ, me síí cunuu iꞌna̱ꞌ ya̱ uún quiꞌyaj Yaꞌanj ga̱a caviꞌ soꞌ, ne̱ ti̱nanii Jesús man níꞌ rihaan sayuun asa̱ꞌ quisíj güii quiꞌya̱j uxrá Yaꞌanj sayuun man nij síí tumé cacunꞌ ado̱nj.