1 Pedro 5 - Triqui de San Juan Copala

Narqué Pedró chrej rihaan nij síí noco̱ꞌ man Cristó a

¹ Rihaan soj si̱j tumé sa̱ꞌ rihaan Yaꞌanj man nij síí noco̱ꞌ man Cristó ma̱n da̱j a̱ chumanꞌ caꞌmi̱i̱ nu̱cuáj cuano̱ a. ꞌO̱ se síí tumé sa̱ꞌ rihaan Yaꞌanj man yuvii̱ mé ꞌu̱nj ga̱ soj, ne̱ síí queneꞌen sayuun se vaa quiranꞌ Cristó mé ꞌu̱nj, ne̱ dan me se veꞌé gu̱un chij ꞌu̱nj ga̱ Cristó asa̱ꞌ curuviꞌ uún soꞌ rihaan chumii̱ nihánj, raj a.

² Ase vaa nica̱j yuꞌunj yucuáj man matzinj roꞌ, da̱nj ga̱a̱ veꞌé ni̱caj yuꞌunj soj man nij síí noco̱ꞌ man Yaꞌanj nda̱a vaa caꞌneꞌ Yaꞌanj suun rihaan soj á. Se̱ naquiꞌyaj ꞌe̱e̱ soj man soj rihaan suun yoꞌ maꞌ. Ma̱an se veꞌé gu̱un rá soj quiꞌya̱j soj se‑su̱u̱n Yaꞌanj ado̱nj. Ne̱ se̱ guun ina̱nj rá soj quiꞌya̱j canaán soj saꞌanj cheꞌé suun ꞌyaj soj maꞌ. Tana̱nj ga̱a̱ niha̱ꞌ rá soj cheꞌé maꞌa̱n suun yoꞌ á.

³ Ne̱ se̱ guun niha̱ꞌ rá soj quiri̱i̱ taꞌngaꞌ soj rihaan nij síí nica̱j yuꞌunj soj man maꞌ. Ina̱nj veꞌé quiꞌya̱j soj ga̱ nij soꞌ, ne̱ queneꞌe̱n nij soꞌ da̱j ꞌyaj soj, ga̱a ne̱ xca̱j nij soꞌ cuentá da̱j quiꞌya̱j maꞌa̱n nij soꞌ uún a.

⁴ Ga̱a ne̱ asa̱ꞌ curiha̱nj Síí Nica̱j Yuꞌunj man ta̱ranꞌ níꞌ si̱j tumé sa̱ꞌ rihaan Yaꞌanj man nij síí noco̱ꞌ man Cristó me se caꞌna̱ꞌ ꞌo̱ cachriin coroná sa̱ꞌ ina̱nj cu̱nuû raa̱ níꞌ, quiꞌya̱j soꞌ, ne̱ dan me se nu̱ꞌ cavii nu̱ꞌ caꞌanj niꞌndaj ya̱ veꞌé ga̱a̱ níꞌ, quiꞌya̱j Cristó chugua̱nj.

⁵ Da̱nj na̱nj soj si̱j tachru̱u̱, ne̱ cuno̱ soj rihaan nij síí chij, ne̱ ta̱ranꞌ soj me se naquiꞌya̱j nica̱ꞌ soj nimán soj rihaan tuviꞌ soj á. ꞌO̱ se nana̱ nihánj nó rihaan Danj Yaꞌanj, taj yoꞌ a: Aráán Yaꞌanj chrej rihaan nij síí xta̱ꞌ nimán se̱ cavii sa̱ꞌ nij soꞌ, tza̱j ne̱ ꞌyaj Yaꞌanj se lu̱j ga̱ nij síí nica̱ꞌ nimán a, taj nana̱ yoꞌ a.

⁶ Cheꞌé dan me ꞌo̱ naquiꞌya̱j nica̱ꞌ soj nimán soj rihaan Yaꞌanj si̱j nucua̱j ndoꞌo uxrá, ne̱ cuno̱ soj rihaan soꞌ, ga̱a ne̱ vaa güii, ne̱ cavi̱i̱ sa̱ꞌ soj, quiꞌya̱j soꞌ ado̱nj.

⁷ A̱ ꞌó xcoꞌ se̱ nanó rá soj maꞌ. Yaꞌanj roꞌ, me síí nanó ndoꞌo rá da̱j ranꞌ soj, ne̱ cheꞌé dan me ꞌo̱ ga̱a̱ nucua̱j rá soj man soꞌ ado̱nj.

⁸ Ga̱a̱ sca̱ꞌ rá soj, ne̱ tu̱mé soj man soj da̱j quiꞌya̱j soj á. ꞌO̱ se vaa síí ta̱j riꞌyunj niꞌya̱j man soj, ne̱ Síí Chre̱e me soꞌ, ne̱ ase ꞌyaj chuvaa̱ aguáj chéé nanoꞌ xcuu cha̱ roꞌ, da̱nj ꞌyaj Síí Chre̱e, chéé soꞌ nanoꞌ soꞌ man síí caꞌve̱e tiri̱ꞌ soꞌ man chugua̱nj.

⁹ ꞌO̱ xraan canoco̱ꞌ soj man Yaꞌanj, ne̱ daj chiha̱a̱ míj se̱ cuno soj rihaan Síí Chre̱e maꞌ. Xca̱j soj cuentá se vaa ase vaa sayuun ranꞌ soj roꞌ, da̱nj vaa gue̱e̱ sayuun ranꞌ ta̱ranꞌ nij síí noco̱ꞌ man Cristó ma̱n rihaan chumii̱ nihánj chugua̱nj.

¹⁰ Dan me se Yaꞌanj roꞌ, me síí ꞌyaj da̱j a̱ se lu̱j cheꞌé soj, ne̱ soꞌ me síí canacúún man soj cavi̱i̱ sa̱ꞌ uxrá soj ga̱ soꞌ nu̱ꞌ cavii nu̱ꞌ caꞌanj cheꞌé Cristó ado̱nj. Asa̱ꞌ quisíj quiranꞌ soj sayuun do̱j güii rihaan chumii̱ nihánj, ga̱a ne̱ naquiꞌya̱j sa̱ꞌ Yaꞌanj man soj, ne̱ naquiꞌya̱j sca̱ꞌ soꞌ man soj, ne̱ ga̱a̱ nucua̱j ina̱nj rá soj, quiꞌya̱j soꞌ, ne̱ cune̱ꞌ sa̱ꞌ soꞌ man soj ado̱nj.

¹¹ Ne̱ gu̱un chij ndoꞌo Yaꞌanj nu̱ꞌ cavii nu̱ꞌ caꞌanj, ne̱ niꞌndaj ya̱ sa̱ꞌ veꞌé ga̱a̱ soꞌ na̱nj ado̱nj. Veé da̱nj ga̱a̱ ya̱ ado̱nj.

Veꞌé ca̱yáán nij síí caꞌa̱nj yanj cartá nihánj rihaan, rá nij tuvi̱ꞌ Pedró a

¹² Veé da̱nj síj natáꞌ ꞌu̱nj do̱j nij nana̱ no̱ rihaan yanj nihánj, ne̱ tinúꞌ Silvano me síí cachrón snana̱j rihaan yanj nihánj, ne̱ dan me se tinúú níꞌ síí nucua̱j rá níꞌ man me soꞌ a. Dan me se nana̱ nihánj me se narquej chrej nucua̱j rihaan soj, ne̱ cataj xnaꞌanj ꞌu̱nj rihaan soj se vaa tucuáán noco̱ꞌ níꞌ roꞌ, maꞌa̱n ya̱ tucuáán yoꞌ me rej ꞌyaj Yaꞌanj se lu̱j cheꞌé níꞌ chugua̱nj. Raan canoco̱ꞌ soj tucuáán yoꞌ á.

¹³ Dan me se xꞌneꞌ nij tinúú níꞌ síí ma̱n chumanꞌ nihánj chumanꞌ cuꞌna̱j Babilonia roꞌ, me rá nij soꞌ se vaa veꞌé cuma̱n soj a. Narii Yaꞌanj man nij soꞌ ga̱ soj canoco̱ꞌ ta̱ranꞌ nij soj man Yaꞌanj, ne̱ vaa tinúꞌ Marcos, ne̱ ase vaa ꞌo̱ taꞌníj roꞌ, vaa soꞌ rihanj, ne̱ veꞌé ca̱yáán soj, rá soꞌ uún a.

¹⁴ Ga̱a nariꞌ tuviꞌ nij soj, ne̱ veꞌé ndoꞌo caꞌmi̱i̱ soj ga̱ tuviꞌ soj rihaan Yaꞌanj á. Ne̱ me ndoꞌo rá ꞌu̱nj ga̱a̱ xe̱j nimán cunuda̱nj soj si̱j noco̱ꞌ man Cristó quiꞌya̱j Yaꞌanj na̱nj chugua̱nj.