1 Pedro 4 - Triqui de San Juan Copala

Da̱j quiꞌya̱j níꞌ ya̱j ga̱a yáán níꞌ doj rihaan chumii̱ nihánj a

¹ Dan me se cheꞌé se quiranꞌ ndoꞌo Cristó sayuun ga̱a me soꞌ yuvii̱ roꞌ, cheꞌé dan no̱ xcúún soj caꞌne̱j nucua̱j soj nimán soj, ga̱a ne̱ caꞌve̱e gu̱un nucua̱j soj rihaan sayuun quira̱nꞌ soj ado̱nj. Neꞌen soj se vaa síí quiranꞌ sayuun nee̱ man maꞌa̱n cheꞌé Yaꞌanj me se daj chiha̱a̱ míj se̱ quiꞌyaj canaán cacunꞌ rihaan soꞌ maꞌ.

² Dan me se ga̱a yáán soꞌ do̱j rihaan chumii̱ nihánj me se se̱ quiꞌyaj uún soꞌ me maꞌa̱n se nij me rá nee̱ man soꞌ quiꞌya̱j soꞌ maꞌ. Tana̱nj quiꞌya̱j soꞌ nda̱a vaa me rá Yaꞌanj quiꞌya̱j soꞌ ado̱nj.

³ Dan me se ga̱a naá me se ya̱ quiꞌyaj ndoꞌo soj nu̱ꞌ nij rasu̱u̱n nij nda̱a vaa me rá nij síí yaníj chugua̱nj. Dan me se cachéé soj chrej chiꞌi̱i̱ do̱ꞌ, chrej aꞌmii ga̱ chana̱ niha̱ꞌ rá do̱ꞌ, chrej uun xno̱ do̱ꞌ, chrej chiꞌi̱i̱ snúú rmaꞌa̱n do̱ꞌ, ꞌó nij chrej chiꞌi̱i̱ do̱ꞌ, ꞌyaj soj chugua̱nj. Ne̱ caráj gue̱e̱ soj rihaan yaꞌanj quiꞌyaj maꞌa̱n yuvii̱ nda̱a vaa naꞌvej rá Yaꞌanj quiꞌya̱j soj ado̱nj.

⁴ Tza̱j ne̱ ya̱j me se caꞌneꞌ rá soj ga̱ suun chéé ga̱ nij síí chiꞌi̱i̱ ne̱ ꞌyaj ndoꞌo se nij ga̱ nij soꞌ chugua̱nj. Cheꞌé dan ya̱j me se maꞌanj rá nij soꞌ niꞌya̱j nij soꞌ man soj, ne̱ aꞌmii qui̱j nij soꞌ cheꞌé soj cuano̱ ado̱nj.

⁵ Tza̱j ne̱ a̱j nicu̱nꞌ chru̱u̱n Cristó caꞌne̱ꞌ soꞌ cacunꞌ cheꞌé nij síí vaa iꞌna̱ꞌ do̱ꞌ, cheꞌé nij síí caviꞌ do̱ꞌ, ne̱ nij síí chiꞌi̱i̱ yoꞌ roꞌ, no̱ xcúún nij soꞌ nago̱ꞌ nij soꞌ cuentá rihaan Cristó cheꞌé nu̱ꞌ nij se chiꞌi̱i̱ quiꞌyaj nij soꞌ ado̱nj.

⁶ Cheꞌé dan caꞌmii natáj ꞌo̱ soꞌ snana̱ Yaꞌanj nana̱ sa̱ꞌ nda̱a rihaan nij síí caviꞌ, cheꞌé yan xa̱ꞌ nee̱ man nij soꞌ, tza̱j ne̱ taj nii se vaa tumé nij soꞌ cacunꞌ, tza̱j ne̱ xa̱ꞌ nimán nij soꞌ, tza̱j ne̱ ca̱yáán nij soꞌ rihaan Yaꞌanj a.

⁷ Nichrunꞌ nu̱ꞌ caꞌa̱nj niꞌya̱ chumii̱ na̱nj á. Cheꞌé dan ga̱a̱ chij ina̱nj rá soj, ne̱ ꞌo̱ xca̱j soj cuentá, ga̱a ne̱ caꞌve̱e cachi̱nj niꞌya̱j soj rihaan Yaꞌanj chugua̱nj.

⁸ Ne̱ suun sa̱ꞌ noco̱o doj quiꞌya̱j soj me nihánj, ne̱ ga̱a̱ ꞌe̱e̱ uxrá rá soj man tuviꞌ soj nij síí noco̱ꞌ man Cristó, ne̱ sese ꞌe̱e̱ rá níꞌ tuviꞌ níꞌ, ga̱a ne̱ caꞌne̱e̱ noco̱o ndoꞌo níꞌ cacunꞌ xráá tuviꞌ níꞌ na̱nj ado̱nj.

⁹ Caꞌve̱j soj cara̱nꞌ tuviꞌ soj síí noco̱ꞌ man Cristó veꞌ tucuá soj, ne̱ rque̱ soj se chá cha̱ nij soꞌ, ne̱ se̱ guun cata̱j soj se vaa sayu̱u̱n uxrá vaa quiꞌya̱j soj da̱nj maꞌ.

¹⁰ Dan me se quiꞌyaj Yaꞌanj se lu̱j ga̱ ꞌo̱ ꞌo̱ níꞌ, rqué Yaꞌanj suun rihaan ꞌo̱ ꞌo̱ níꞌ quiꞌya̱j níꞌ cheꞌé tinúú níꞌ, ne̱ ino̱ doj vaa suun ꞌyaj ꞌo̱ ꞌo̱ níꞌ cheꞌé tinúú níꞌ, ne̱ cheꞌé dan no̱ xcúún soj ra̱cuíj soj man tinúú soj, nda̱a vaa uun nucua̱j soj chugua̱nj.

¹¹ Sese caꞌmi̱i̱ natáj ꞌo̱ tuviꞌ soj, ne̱ ꞌo̱ cu̱nuû rá soꞌ se vaa snana̱ Yaꞌanj me nij nana̱ aꞌmii natáj soꞌ á. Sese ra̱cuíj ꞌo̱ tuviꞌ soj man soj, ne̱ quiꞌya̱j soꞌ nu̱ꞌ nda̱a vaa gu̱un nucua̱j soꞌ quiꞌya̱j soꞌ quiꞌya̱j Yaꞌanj á. Ga̱a ne̱ caꞌve̱e caꞌmi̱i̱ sa̱ꞌ yuvii̱ cheꞌé Yaꞌanj ni̱ꞌyaj nij yuvii̱ man soj si̱j noco̱ꞌ man Cristó chugua̱nj. Ne̱ Yaꞌanj me se nu̱ꞌ cavii nu̱ꞌ caꞌanj veꞌé uxrá caꞌmi̱i̱ níꞌ cheꞌé soꞌ, ne̱ gu̱un chij ndoꞌo soꞌ ado̱nj. Veé da̱nj ga̱a̱ ya̱ ado̱nj.

Se̱ nanó rá níꞌ cheꞌé sayuun ranꞌ níꞌ maꞌ

¹² Tinu̱j, nocoj, se̱ caꞌanj rá soj cheꞌé sayuun quira̱nꞌ soj maꞌ. Ya̱ quira̱nꞌ ndoꞌo soj sayuun, cheꞌé rej caꞌve̱e xca̱j soj cuentá sese si̱j amán ya̱ rá niꞌya̱j man Yaꞌanj me soj chugua̱nj. Ne̱ se̱ guun rá soj se vaa o̱rúnꞌ soj me síí ranꞌ sayuun maꞌ.

¹³ Ma̱an se gu̱un niha̱ꞌ rá nimán soj cheꞌé se ase quiranꞌ Cristó sayuun roꞌ, da̱nj vaa ranꞌ gue̱e̱ soj ga̱ soꞌ, ga̱a ne̱ caꞌve̱e gu̱un niha̱ꞌ doj rá nimán soj güii caꞌna̱ꞌ uún soꞌ rihaan chumii̱ nihánj, cheꞌé se niꞌndaj ya̱ sa̱ꞌ veꞌé ga̱a̱ soꞌ curuvi̱ꞌ soꞌ na̱nj ado̱nj.

¹⁴ Sese nachri̱ꞌ yuvii̱ ni̱ꞌyaj yuvii̱ man soj cheꞌé se si̱j noco̱ꞌ man Cristó me soj, ne̱ vaa cheꞌé gu̱un niha̱ꞌ rá soj ado̱nj. ꞌO̱ se ya̱nj Nimán Yaꞌanj ga̱ soj, ne̱ niꞌndaj ya̱ sa̱ꞌ vaa Nimán Yaꞌanj ado̱nj. Ya̱ aꞌmii qui̱j yuvii̱ cheꞌé Nimán Yaꞌanj, tza̱j ne̱ soj me se aꞌmii sa̱ꞌ ndoꞌo soj cheꞌé soꞌ a.

¹⁵ A̱ ꞌó soj se̱ guun síí ticaviꞌ yuvii̱ do̱ꞌ, síí itu̱u̱ do̱ꞌ, síí chiꞌi̱i̱ do̱ꞌ, síí tiguíj man do̱ꞌ maꞌ. Ta̱dó soj á. Vaa cheꞌé quira̱nꞌ síí vaa da̱nj sayuun ado̱nj.

¹⁶ Tza̱j ne̱ sese quira̱nꞌ ꞌo̱ tuviꞌ soj sayuun cheꞌé se si̱j noco̱ꞌ man Cristó me soꞌ, ne̱ taj cheꞌé gu̱un naꞌa̱j soꞌ maꞌ. Tana̱nj cheꞌé se si̱j noco̱ꞌ man Cristó me soꞌ roꞌ, cheꞌé dan cata̱j soꞌ se vaa sa̱ꞌ uxrá vaa Yaꞌanj a.

¹⁷ ꞌO̱ se ya̱j me se a̱j guun cheꞌe̱ Yaꞌanj aꞌneꞌ Yaꞌanj cacunꞌ cheꞌé níꞌ si̱j tucua̱ Yaꞌanj a. Cheꞌé dan neꞌen níꞌ se vaa nij doj quira̱nꞌ nij síí naꞌvej rá cuno̱ snana̱ Yaꞌanj nana̱ sa̱ꞌ asa̱ꞌ caꞌneꞌ Yaꞌanj cacunꞌ cheꞌé nij soꞌ chugua̱nj.

¹⁸ ꞌO̱ se Danj Yaꞌanj taj a: Na̱nj síí noco̱ꞌ ndoꞌo man Yaꞌanj, tza̱j ne̱ sayu̱u̱n ndoꞌo nani̱i̱ nij soꞌ rihaan sayuun, ne̱ táá a̱ nij síí ne nocoꞌ man Yaꞌanj do̱ꞌ, táá a̱ nij síí chiꞌi̱i̱ do̱ꞌ, sayuun noco̱o quira̱nꞌ nij soꞌ ado̱nj. Da̱nj taj nana̱ no̱ rihaan Danj Yaꞌanj a.

¹⁹ Cheꞌé dan xa̱ꞌ nij síí ranꞌ sayuun nda̱a vaa me rá Yaꞌanj quira̱nꞌ nij soꞌ, tza̱j ne̱ ꞌo̱ ina̱nj quiꞌya̱j sa̱ꞌ nij soꞌ, ne̱ dan me se caꞌve̱j rá nij soꞌ ni̱caj yuꞌunj Yaꞌanj man nimán nij soꞌ á. ꞌO̱ se Yaꞌanj me síí quiꞌyaj man nij soꞌ, ne̱ vaa cheꞌé ga̱a̱ nucua̱j rá nij soꞌ man soꞌ ado̱nj.