1 Pedro 2 - Triqui de San Juan Copala

¹ Cheꞌé dan caꞌne̱ꞌ rá soj ga̱ nu̱ꞌ suun nachriꞌ man tuviꞌ á. A̱ ꞌó xcoꞌ se̱ tihaꞌ yuꞌunj soj man tuviꞌ soj maꞌ. ꞌO̱ nda̱a vaa taj soj roꞌ, veé da̱nj quiꞌya̱j gue̱e̱ soj á. Se̱ guun xco̱j ruva̱a̱ rá soj ni̱ꞌyaj soj tuviꞌ soj maꞌ. Ne̱ da̱j a̱ cuentó ne̱ roꞌ, se̱ nanó soj cheꞌé tuviꞌ soj a maan ado̱nj.

² Ase vaa me ndoꞌo rá leé no̱ cutzi̱i leé no̱ too roꞌ, da̱nj gu̱un ndoꞌo rá soj tu̱cuꞌyón soj snana̱ Yaꞌanj nana̱ ya̱ na̱nj á. Ase vaa racuíj too man leé no̱ achij leé no̱ roꞌ, da̱nj ga̱a̱ ra̱cuíj snana̱ Yaꞌanj man soj cunu̱u sca̱ꞌ nimán soj chugua̱nj. Dan, ga̱a ne̱ nani̱i̱ soj rihaan sayuun ne̱ cavi̱i̱ sa̱ꞌ ndoꞌo soj, quiꞌya̱j Yaꞌanj ado̱nj.

³ ꞌO̱ se a̱j neꞌen soj se vaa veꞌé ndoꞌo ꞌyaj Síí ꞌNi̱j Raꞌa man níꞌ cheꞌé níꞌ ado̱nj.

Ase vaa yuvej sa̱ꞌ vaa Cristó a

⁴ Caꞌna̱ꞌ soj rihaan Cristó á. Ase vaa ꞌo̱ yuvej xi̱j sa̱ꞌ uchruj nii asino ya̱a̱n tacóó veꞌ ga̱a nachráj nii veꞌ roꞌ, da̱nj vaa soꞌ na̱nj ado̱nj. Tza̱j ne̱ nij síí ma̱n rihaan chumii̱ nihánj me se nachriꞌ nij soꞌ niꞌya̱j nij soꞌ yuvej yoꞌ, tza̱j ne̱ síí vaa ndoꞌo yuꞌvee nó narii Yaꞌanj me soꞌ na̱nj ado̱nj.

⁵ Ne̱ ase vaa nij yuvej leꞌe̱j nii nataꞌ xráá yuvej xi̱j roꞌ, da̱nj vaa ta̱ranꞌ soj, sese canoco̱ꞌ xraan soj man Jesucristó, ne̱ veꞌé cuma̱n rcuaꞌa̱a̱n soj, quiꞌya̱j Jesucristó a. Ga̱a ne̱ cunu̱u sa̱ꞌ nimán soj, ga̱a ne̱ ase vaa xrej narii Yaꞌanj cu̱nuû rihaan soꞌ roꞌ, da̱nj ga̱a̱ soj rihaan Yaꞌanj a. Ne̱ ase vaa se sa̱ꞌ rqué nij xrej rihaan Yaꞌanj roꞌ, da̱nj ga̱a̱ se sa̱ꞌ quiꞌya̱j soj cheꞌé Jesucristó, ga̱a ne̱ cara̱nꞌ rá Yaꞌanj se vaa ꞌyaj soj ado̱nj.

⁶ Cheꞌé dan nó nana̱ nihánj rihaan Danj Yaꞌanj a: Ni̱ꞌyaj soj á. Cunéꞌ ꞌu̱nj ꞌo̱ snóꞌo chumanꞌ Sion ado̱nj. Ase vaa yuvej xi̱j uchruj yuvii̱ tacóó veꞌ roꞌ, da̱nj vaa soꞌ chugua̱nj. Da̱j se vaa yuvej narii nii vaa soꞌ, ne̱ vaa yuꞌvee ndoꞌo nó soꞌ ado̱nj. Síí cuchuma̱n rá ni̱ꞌyaj man soꞌ roꞌ, daj chiha̱a̱ míj se̱ guun naꞌa̱j soꞌ maꞌ. Da̱nj cataj Yaꞌanj, caꞌmii soꞌ cheꞌé Cristó ga̱a naá a.

⁷ Vaa yuꞌvee ndoꞌo nó Cristó rihaan soj si̱j amán rá niꞌya̱j man soꞌ, tza̱j ne̱ xa̱ꞌ nij síí ne amán rá niꞌya̱j man Cristó me se quisi̱j ya̱ nda̱a vaa taj nana̱ nihánj nana̱ no̱ rihaan Danj Yaꞌanj ado̱nj: Yuvej quiriꞌíj nij síí cuneꞌ veꞌ roꞌ, guun yuvej vaa se uun doj rihaan ꞌó da̱nj yuvej na̱nj ado̱nj, taj Danj Yaꞌanj a.

⁸ Ne̱ taj uún Danj Yaꞌanj a: Caco̱ꞌ cheꞌé yuvii̱, quiꞌya̱j yuvej yoꞌ, ne̱ naxru̱ꞌ yuvii̱ a, taj ꞌó nana̱ no̱ rihaan Danj Yaꞌanj a. Ne̱ nij síí ne amán rá niꞌya̱j man Cristó me se cheꞌé se ne cuno̱ nij soꞌ snana̱ Yaꞌanj roꞌ, cheꞌé dan naxru̱ꞌ nij soꞌ ne̱ quiri̱ꞌ nij soꞌ a. Dan me se caꞌnéé raꞌa Yaꞌanj man nij soꞌ quira̱nꞌ nij soꞌ da̱nj na̱nj ado̱nj.

Narii Yaꞌanj man níꞌ si̱j noco̱ꞌ man Cristó a

⁹ Xa̱ꞌ soj, tza̱j ne̱ si̱j narii Yaꞌanj me soj, ne̱ xrej uun chij ya̱ nu̱u̱ rihaan Yaꞌanj me soj, ne̱ xꞌneꞌ nij síí cunuu sa̱ꞌ nimán uun chij Yaꞌanj rihaan me soj ado̱nj. Cheꞌé se me rá Yaꞌanj nata̱ꞌ soj cheꞌé se sa̱ꞌ uxrá quiꞌyaj soꞌ roꞌ, cheꞌé dan narii soꞌ man soj ado̱nj. Dan me se si̱j noco̱ꞌ tucuáán rmi̱ꞌ me soj ga̱a naá, tza̱j ne̱ canacúún Yaꞌanj man soj xca̱j soj cuentá, ne̱ cuna̱j uxrá vaa stucua̱nj Yaꞌanj tucuáán noco̱ꞌ soj cuano̱ na̱nj á.

¹⁰ Dan me se ga̱a naá me se né yuvi̱i̱ ꞌni̱j raꞌa Yaꞌanj me soj, tza̱j ne̱ ya̱j me se soj me síí ꞌni̱j raꞌa Yaꞌanj a. Ga̱a naá me se ne ꞌe̱e̱ rá Yaꞌanj niꞌya̱j soꞌ man soj, tza̱j ne̱ ya̱j me se cunuu ꞌe̱e̱ rá Yaꞌanj niꞌya̱j soꞌ man soj ado̱nj.

Quiꞌya̱j níꞌ se‑su̱u̱n Yaꞌanj á

¹¹ Tinu̱j, nocoj, quiꞌya̱j soj se ndoꞌo uxrá, ne̱ cuno̱ soj á. Né chiha̱nj níꞌ me chumii̱ ma̱n níꞌ cuano̱ maꞌ. Ase vaa ꞌo̱ síí aranꞌ me maꞌa̱n rej roꞌ, da̱nj vaa níꞌ rihaan chumii̱ nihánj cuano̱ ado̱nj. Cheꞌé dan se̱ guun quiꞌya̱j soj rasu̱u̱n chiꞌi̱i̱ me rá nee̱ man soj quiꞌya̱j soj maꞌ. ꞌO̱ se unuꞌ se chiꞌi̱i̱ yoꞌ ga̱ nimán níꞌ ado̱nj.

¹² Ne̱ veꞌé ina̱nj quiꞌya̱j soj rej ya̱nj soj scaꞌnúj nij síí chiꞌi̱i̱ ma̱n rihaan chumii̱ nihánj, ga̱a ne̱ sese gu̱un rá nij soꞌ cuta̱ꞌ nij soꞌ cacunꞌ rmi̱ꞌ xráá soj se vaa nij ꞌyaj soj, ga̱a ne̱ xca̱j nij soꞌ cuentá se vaa veꞌé ina̱nj ꞌyaj soj ado̱nj. Ga̱a ne̱ güii caꞌna̱ꞌ Yaꞌanj rihaan chumii̱ nihánj caꞌne̱ꞌ soꞌ cacunꞌ cheꞌé yuvii̱ me se cata̱j nij soꞌ se vaa sa̱ꞌ uxrá vaa Yaꞌanj chugua̱nj.

¹³ Cheꞌé se si̱j noco̱ꞌ man Síí ꞌNi̱j Raꞌa man níꞌ me soj roꞌ, cheꞌé dan cuno̱ soj rihaan ta̱ranꞌ nij síí nica̱j suun á. Dan me se cuno̱ soj rihaan síí nica̱j suun noco̱o emperador, cheꞌé se si̱j uun chij doj me soꞌ ado̱nj.

¹⁴ Ne̱ dan me se cuno̱ soj rihaan nij síí nica̱j suun gobernador uún, cheꞌé se si̱j aꞌneꞌ síí nica̱j suun emperador suun rihaan me nij soꞌ, ne̱ no̱ xcúún nij soꞌ quiꞌya̱j nij soꞌ sayuun man nij síí chiꞌi̱i̱ do̱ꞌ, caꞌmi̱i̱ sa̱ꞌ nij soꞌ cheꞌé nij síí sa̱ꞌ do̱ꞌ chugua̱nj.

¹⁵ Ne̱ me rá Yaꞌanj quiꞌya̱j níꞌ se sa̱ꞌ, ga̱a ne̱ cunu̱u dínj tuꞌva nij síí ne acaj cuentá nij síí tuꞌva rmaꞌa̱n nana̱ nij cheꞌé Cristó chugua̱nj.

¹⁶ Neꞌen níꞌ se vaa si̱j chéé u̱u̱n me níꞌ, tza̱j ne̱ se̱ guun cata̱j níꞌ se vaa cheꞌé dan me caꞌve̱e quiꞌya̱j níꞌ me maꞌa̱n se chiꞌi̱i̱ maꞌ. Tana̱nj gu̱un níꞌ síí nu̱u̱ rihaan Yaꞌanj ado̱nj.

¹⁷ Dan me se veꞌé caꞌmi̱i̱ soj ga̱ da̱j a̱ yuvii̱, ne̱ ga̱a̱ ꞌe̱e̱ rá soj man nu̱ꞌ nij síí noco̱ꞌ man Cristó, ne̱ cuno̱ soj rihaan Yaꞌanj, ne̱ veꞌé cara̱a̱ cochro̱j soj rihaan síí nica̱j suun emperador na̱nj á.

Ase vaa caꞌneꞌ sa̱ꞌ gue̱e̱ rá Cristó ga̱a quiranꞌ soꞌ sayuun roꞌ, da̱nj ga̱a̱ quiꞌya̱j níꞌ á

¹⁸ Veꞌé cuno̱ soj rihaan se‑ruꞌve̱e̱ soj si̱j uun mozó á. Né ina̱nj rihaan nij ruꞌvee sa̱ꞌ ruꞌvee niꞌya̱nj aꞌmii cuno̱ soj maꞌ. Tana̱nj cuno̱ soj rihaan nij ruꞌvee nij ꞌyaj do̱ꞌ uún na̱nj á.

¹⁹ Ne̱ sese quira̱nꞌ taꞌa̱j soj sayuun quiꞌya̱j se‑ruꞌve̱e̱ taꞌa̱j soj ruꞌvee chiꞌi̱i̱, cheꞌé se ma̱an se si̱j noco̱ꞌ man Yaꞌanj me síí ranꞌ sayuun yoꞌ, ne̱ sese aꞌneꞌ sa̱ꞌ gue̱e̱ rá síí ranꞌ sayuun yoꞌ ga̱ suun tucuáá rihaan ruꞌvee, ga̱a ne̱ cuna̱j uxrá ꞌyaj soꞌ niꞌya̱j Yaꞌanj ado̱nj.

²⁰ Dan me se síí tumé ya̱ cacunꞌ roꞌ, vaa cheꞌé cayu̱u̱n soꞌ, ne̱ nda̱ꞌ se caꞌve̱e caꞌne̱ꞌ sa̱ꞌ gue̱e̱ rá soꞌ cayu̱u̱n soꞌ do̱ꞌ, ranꞌ soꞌ sayuun do̱ꞌ, tza̱j ne̱ se̱ cataj níꞌ se vaa cuna̱j ꞌyaj soꞌ ranꞌ soꞌ sayuun a̱ maꞌ. Ma̱an cheꞌé cacunꞌ tumé soꞌ me ayuun soꞌ na̱nj ado̱nj. Tza̱j ne̱ síí ina̱nj se sa̱ꞌ ꞌyaj me se sese caꞌneꞌ sa̱ꞌ gue̱e̱ rá soꞌ quiranꞌ cachri̱j soꞌ sayuun cheꞌé Yaꞌanj, ne̱ cara̱nꞌ rá Yaꞌanj ni̱ꞌyaj Yaꞌanj man soꞌ na̱nj ado̱nj.

²¹ ꞌO̱ se canacúún Yaꞌanj man níꞌ canoco̱ꞌ níꞌ man soꞌ ne̱ quira̱nꞌ níꞌ sayuun ado̱nj. Xa̱ꞌ Cristó, tza̱j ne̱ quiranꞌ soꞌ sayuun cheꞌé níꞌ, ne̱ caꞌneꞌ sa̱ꞌ gue̱e̱ rá soꞌ ga̱a quiranꞌ soꞌ da̱nj ado̱nj. Dan me se nda̱a rá se vaa caꞌneꞌ rá Cristó ga̱a quiranꞌ soꞌ sayuun cheꞌé níꞌ roꞌ, da̱nj ga̱a̱ gue̱e̱ caꞌne̱ꞌ rá níꞌ quira̱nꞌ níꞌ sayuun, rá soꞌ ado̱nj.

²² Ne̱ Cristó me se a̱ ꞌó cacunꞌ ne quiꞌya̱j soꞌ ne̱ a̱ doj nana̱ ne̱ ne nari̱ꞌ níꞌ tuꞌva soꞌ a̱ maꞌ.

²³ Caꞌmii chre̱e yuvii̱ cheꞌé soꞌ, tza̱j ne̱ ne caꞌmi̱i̱ chre̱e soꞌ cheꞌé nij yuvii̱ maꞌ. Quiranꞌ soꞌ sayuun, tza̱j ne̱ ne caꞌmi̱i̱ soꞌ nana̱ qui̱j maꞌ. Tana̱nj guun rá soꞌ se vaa Yaꞌanj si̱j aꞌneꞌ nica̱ cacunꞌ cheꞌé níꞌ roꞌ, soꞌ me síí caꞌne̱ꞌ cacunꞌ cheꞌé soꞌ vaa güii a.

²⁴ Cacunꞌ tumé níꞌ roꞌ, nataꞌ xráá Cristó ga̱a caviꞌ soꞌ rihaan rcutze̱, cheꞌé rej caꞌne̱ꞌ rá níꞌ ga̱ suun ꞌyaj cacunꞌ ne̱ ina̱nj tucuáán sa̱ꞌ canoco̱ꞌ níꞌ a. Ne̱ cheꞌé se goꞌ nii cuartá xráá soꞌ roꞌ, cheꞌé dan nahuun sa̱ꞌ nimán soj a.

²⁵ Dan me se ase vaa matzinj chaꞌnuu̱ rcoꞌ roꞌ, vaa soj ga̱a naá, ne̱ ne canoco̱ꞌ soj man Yaꞌanj ga̱a naá maꞌ. Tza̱j ne̱ ya̱j roꞌ, canica̱j nimán soj, ne̱ guun cheꞌe̱ soj canocoꞌ soj man Cristó a. Ne̱ ase vaa síí veꞌé ndoꞌo tumé daán matzinj roꞌ, da̱nj vaa soꞌ ga̱ soj cuano̱, ne̱ veꞌé nica̱j yuꞌunj soꞌ man soj cuano̱ ado̱nj. Dan me se soꞌ me síí tumé sa̱ꞌ man nimán soj cuano̱ chugua̱nj.