1 Pedro 1 - Triqui de San Juan Copala

¹ ꞌU̱nj roꞌ, me síí cuꞌna̱j Pedró, ne̱ síí cuneꞌ Jesucristó caꞌa̱nj nata̱ꞌ snana̱ soꞌ rihaan nij yuvii̱ mej a. Ne̱ qui̱ꞌyáá ꞌu̱nj yanj nihánj caꞌne̱j ꞌu̱nj rihaan soj si̱j narii Yaꞌanj man canoco̱ꞌ man soꞌ, soj si̱j chaꞌnuu̱ caꞌanj nij estadó cuꞌna̱j Ponto do̱ꞌ, Galacia do̱ꞌ, Capadocia do̱ꞌ, Asia do̱ꞌ, Bitinia do̱ꞌ, cheꞌé sayuun quiranꞌ soj a.

² Asi̱j naá queneꞌen Rej níꞌ Yaꞌanj se vaa canoco̱ꞌ soj man soꞌ, ne̱ cheꞌé dan narii soꞌ man soj, ga̱a ne̱ guun cheꞌe̱ soj canocoꞌ soj man o̱rúnꞌ Yaꞌanj, quiꞌyaj Nimán Yaꞌanj, cheꞌé se me rá soꞌ cuno̱ soj rihaan soꞌ, ne̱ me rá soꞌ cunu̱u sa̱ꞌ nimán soj quiꞌya̱j ton cayanj man Jesucristó ga̱a caviꞌ soꞌ cheꞌé níꞌ a. Me rá ꞌu̱nj quiꞌya̱j ndoꞌo Yaꞌanj se lu̱j cheꞌé soj, ne̱ ga̱a̱ xe̱j ndoꞌo nimán soj quiꞌya̱j Yaꞌanj a.

Naꞌvi̱j níꞌ güii ca̱yáán níꞌ rihaan Yaꞌanj a

³ Cata̱j níꞌ se vaa ina̱nj sa̱ꞌ uxrá vaa Yaꞌanj Rej Jesucristó Si̱j ꞌNi̱j Raꞌa man níꞌ á. Cheꞌé se ꞌe̱e̱ uxrá rá Yaꞌanj niꞌya̱j soꞌ man níꞌ, ne̱ naquiꞌyaj iꞌna̱ꞌ soꞌ man Jesucristó, yan caꞌnga̱a̱ naca̱ nimán níꞌ ne̱ uun ya̱ rá níꞌ se vaa ca̱yáán níꞌ rihaan soꞌ nu̱ꞌ cavii nu̱ꞌ caꞌanj ado̱nj.

⁴ Ne̱ dan me se vaa se sa̱ꞌ nica̱j Yaꞌanj rque̱ Yaꞌanj man soj asa̱ꞌ nucuiꞌ soj rihaan soꞌ, ne̱ daj chiha̱a̱ míj se̱ quiriꞌ se sa̱ꞌ yoꞌ, ne̱ ꞌo̱ ga̱a̱ sa̱ꞌ yoꞌ nu̱ꞌ cavii nu̱ꞌ caꞌanj na̱nj ado̱nj.

⁵ Nucua̱j ndoꞌo Yaꞌanj, ne̱ cheꞌé se amán rá soj niꞌya̱j soj man Cristó, cheꞌé dan tumé Yaꞌanj man soj, cheꞌé rej caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj asa̱ꞌ quisíj güii caꞌa̱nj niꞌya̱ chumii̱ nihánj ne̱ queneꞌe̱n níꞌ nu̱ꞌ se vaa quiꞌya̱j soꞌ cheꞌé níꞌ ado̱nj.

⁶ Cheꞌé dan guun niha̱ꞌ uxrá rá soj na̱nj ado̱nj. Dan me se nda̱ꞌ se nanó rá soj cheꞌé da̱j a̱ sayuun ꞌnaꞌ rihaan soj do̱j güii na̱nj rihaan chumii̱ nihánj cuano̱, tza̱j ne̱ a̱j guun niha̱ꞌ ndoꞌo rá soj, cheꞌé se neꞌen soj se vaa cavi̱i̱ sa̱ꞌ soj vaa güii, quiꞌya̱j Yaꞌanj chugua̱nj.

⁷ Dan me se agaꞌ oró míí me se se ma̱n u̱u̱n rihaan chumii̱ nihánj me yoꞌ, ne̱ vaa güii caꞌa̱nj niꞌya̱ yoꞌ, tza̱j ne̱ axríj yaꞌan nii man agaꞌ oró míí yoꞌ, cheꞌé se me rá nii xca̱j nii cuentá sese agaꞌ sa̱ꞌ me yoꞌ niꞌ, ase agaꞌ nij me yoꞌ a. Ne̱ ase vaa yaꞌan rihaan agaꞌ oró míí yoꞌ roꞌ, da̱nj vaa sayuun rihaan soj, ne̱ cheꞌé sayuun ranꞌ soj roꞌ, cheꞌé dan acaj níꞌ cuentá sese ya̱ ya̱ amán rá soj niꞌya̱j soj man Yaꞌanj niꞌ, ase ꞌyaj rmaꞌa̱n soj a. Tza̱j ne̱ sa̱ꞌ doj vaa soj rihaan agaꞌ oró míí yoꞌ, ne̱ daj chiha̱a̱ míj se̱ caꞌanj niꞌya̱ soj, sese amán ya̱ rá soj niꞌya̱j soj man Yaꞌanj maꞌ. Dan me se cheꞌé se amán rá soj, ne̱ sa̱ꞌ uxrá caꞌmi̱i̱ nii do̱ꞌ, niꞌndaj ya̱ veꞌé caꞌmi̱i̱ nii do̱ꞌ, veꞌé caꞌmi̱i̱ cochro̱j nii do̱ꞌ, ni̱ꞌyaj nii man Yaꞌanj, asa̱ꞌ curuviꞌ uún Jesucristó chugua̱nj.

⁸ Ne̱ Jesucristó me se nda̱ꞌ se ne queneꞌe̱n rihaan soj man soꞌ, tza̱j ne̱ aráj cochro̱j soj rihaan soꞌ ado̱nj. Ne neꞌen rihaan soj man soꞌ nihánj cuano̱, tza̱j ne̱ cheꞌé se cuchumán ya̱ rá soj niꞌya̱j soj man soꞌ roꞌ, cheꞌé dan niꞌndaj ya̱ guun niha̱ꞌ uxrá ya̱ rá nimán soj ado̱nj.

⁹ Ne̱ cheꞌé se amán rá soj niꞌya̱j soj man Yaꞌanj roꞌ, cheꞌé dan nani̱i̱ soj rihaan sayuun ne̱ cavi̱i̱ sa̱ꞌ nimán soj rihaan soꞌ ado̱nj.

¹⁰ Dan me se nij síí nataꞌ snana̱ Yaꞌanj ga̱a naá roꞌ, nataꞌ nij soꞌ cheꞌé se lu̱j quiꞌya̱j Yaꞌanj cheꞌé soj a. Guun ndoꞌo rá nij soꞌ xca̱j nij soꞌ cuentá da̱j ga̱a̱ nani̱i̱ nij yuvii̱ rihaan sayuun quiꞌya̱j Yaꞌanj, ne̱ naquiꞌyaj cu̱u nij soꞌ cúú yave̱ nij soꞌ cheꞌé nu̱ꞌ nij rasu̱u̱n sa̱ꞌ chugua̱nj.

¹¹ Dan me se naquiꞌyaj cu̱u uxrá ya̱ nij soꞌ aman caꞌna̱ꞌ síí caꞌne̱j Yaꞌanj rihaan chumii̱ a. ꞌO̱ se nica̱j yuꞌunj Nimán Cristó man nij soꞌ, ne̱ maꞌa̱n Nimán Cristó cataj xnaꞌanj rihaan nij soꞌ da̱j quira̱nꞌ maꞌa̱n Cristó asa̱ꞌ caꞌnaꞌ soꞌ do̱ꞌ, cheꞌé suun niꞌndaj ya̱ sa̱ꞌ caꞌna̱ꞌ asa̱ꞌ quisíj quiranꞌ soꞌ sayuun do̱ꞌ a.

¹² Dan me se cataj xnaꞌanj Yaꞌanj rihaan nij soꞌ se vaa né maꞌa̱n nij soꞌ me nij síí queneꞌe̱n caꞌna̱ꞌ síí caꞌne̱j Yaꞌanj maꞌ. Tana̱nj nu̱ꞌ nij soj me nij síí queneꞌe̱n man síí caꞌne̱j Yaꞌanj, asa̱ꞌ caꞌnaꞌ soꞌ, taj Yaꞌanj rihaan nij síí nataꞌ snana̱ Yaꞌanj ga̱a naá yoꞌ a. Ne̱ nihánj me se nij síí caꞌmii natáj nana̱ sa̱ꞌ cheꞌé Cristó rihaan soj ya̱j roꞌ, caꞌnéé Yaꞌanj Nimán Yaꞌanj rihaan nij soꞌ, ne̱ a̱j nataꞌ nij soꞌ nu̱ꞌ se vaa quiꞌyaj Cristó síí caꞌnéé Yaꞌanj rihaan chumii̱ nihánj cuno soj a. Ne̱ nda̱a nij se‑mo̱zó Yaꞌanj síí ya̱nj xta̱ꞌ me rá queneꞌe̱n da̱j ga̱a̱ cavi̱i̱ sa̱ꞌ níꞌ quiꞌya̱j Cristó ado̱nj.

Nacúún Yaꞌanj man níꞌ gu̱un níꞌ síí sa̱ꞌ ina̱nj rihaan soꞌ a

¹³ Cheꞌé dan ꞌo̱ caꞌne̱j nimán soj quiꞌya̱j soj nda̱a vaa me rá Yaꞌanj na̱nj á. Ga̱a̱ chij rá soj ga̱ tuviꞌ soj, ne̱ ꞌo̱ ga̱a̱ nucua̱j rá soj man Yaꞌanj se vaa quiꞌya̱j ndoꞌo soꞌ se lu̱j cheꞌé soj asa̱ꞌ curuviꞌ uún Jesucristó á.

¹⁴ Ase vaa xnii uno sa̱ꞌ rihaan rej roꞌ, taꞌngaꞌ da̱nj gu̱un soj síí uno sa̱ꞌ rihaan Yaꞌanj ado̱nj. Ga̱a naá me se ne queneꞌe̱n soj da̱j vaa Yaꞌanj, ne̱ ina̱nj guun rá soj quiꞌya̱j soj se nij, tza̱j ne̱ ya̱j me se se̱ guun quiꞌya̱j uún soj da̱nj maꞌ.

¹⁵ Tana̱nj cheꞌé se síí sa̱ꞌ ina̱nj me Yaꞌanj si̱j nacúún man soj canoco̱ꞌ soj man soꞌ, cheꞌé dan no̱ xcúún maꞌa̱n soj gu̱un soj síí sa̱ꞌ ado̱nj.

¹⁶ Cheꞌé dan no̱ nana̱ nihánj rihaan Danj Yaꞌanj a: “Síí sa̱ꞌ ina̱nj mé ꞌu̱nj, ne̱ cheꞌé dan gu̱un soj síí sa̱ꞌ uún á”, taj Yaꞌanj rihaan nij síí canocoꞌ man soꞌ ga̱a naá a.

¹⁷ Yaꞌanj roꞌ, me síí nica̱ ina̱nj aꞌneꞌ cacunꞌ cheꞌé ꞌo̱ ꞌo̱ níꞌ nda̱a vaa ꞌyaj ꞌo̱ ꞌo̱ níꞌ, ne̱ cheꞌé se “Ata̱j Chij” taj soj rihaan Yaꞌanj ga̱a achíín niꞌya̱j soj rihaan soꞌ roꞌ, cheꞌé dan ꞌo̱ cara̱a̱ cochro̱j soj rihaan soꞌ do̱j nij güii ca̱yáán soj rihaan yoꞌóó nihánj á.

¹⁸ A̱j neꞌen soj da̱j quiꞌyaj Yaꞌanj ga̱a tinanii soꞌ man soj rihaan tucuáán nij rmaꞌa̱n canocoꞌ nij xi̱i soj síí cumán ga̱a naá, ne̱ ne go̱ꞌ Yaꞌanj se navi̱j u̱u̱n ase vaa platá catzi̱i̱ do̱ꞌ, oró míí do̱ꞌ, ga̱a tinanii soꞌ man soj maꞌ.

¹⁹ Tana̱nj caꞌnéé Yaꞌanj man Cristó cavi̱ꞌ ya̱ soꞌ caya̱nj ton man soꞌ cheꞌé níꞌ ado̱nj. Ase vaa aviꞌ matzinj leꞌe̱j sa̱ꞌ ina̱nj ꞌyaj nij síí israelitá cheꞌé cacunꞌ tumé nij soꞌ roꞌ, da̱nj vaa caviꞌ Cristó cheꞌé níꞌ, ne̱ soꞌ roꞌ, vaa yuꞌvee ndoꞌo nó soꞌ cheꞌé se taj cacunꞌ tumé soꞌ maan chugua̱nj.

²⁰ Dan me se asi̱j ataa quiꞌya̱j Yaꞌanj chumii̱, ne̱ a̱j neꞌen Yaꞌanj se vaa cavi̱ꞌ Cristó cheꞌé níꞌ, ne̱ cuano̱ ga̱a nichrunꞌ navi̱j chumii̱ nihánj me se curuviꞌ Cristó rihaan chumii̱ nihánj cheꞌé maꞌa̱n nij soj ado̱nj.

²¹ Ne̱ cheꞌé se vaa quiꞌyaj Cristó cheꞌé soj roꞌ, cheꞌé dan amán rá soj niꞌya̱j soj man Yaꞌanj cheꞌé se soꞌ me síí naquiꞌyaj iꞌna̱ꞌ man Cristó, ne̱ soꞌ me síí quiꞌyaj se vaa taj yuvii̱ se vaa niꞌndaj ya̱ sa̱ꞌ cavii Cristó a. Ne̱ cheꞌé se da̱nj quiꞌyaj Yaꞌanj roꞌ, cheꞌé dan amán rá soj niꞌya̱j soj man Yaꞌanj, ne̱ naꞌvi̱j soj quisi̱j güii cavi̱i̱ sa̱ꞌ ndoꞌo soj quiꞌya̱j soꞌ a.

²² Dan me se uno soj snana̱ Yaꞌanj nana̱ ya̱, ne̱ cheꞌé dan cunuu sa̱ꞌ nimán soj, ne̱ cheꞌé dan no̱ xcúún soj ga̱a̱ ꞌe̱e̱ rá soj man tuviꞌ soj ado̱nj. Se̱ cataj rmaꞌa̱n soj se vaa ꞌe̱e̱ rá soj man tuviꞌ soj maꞌ. Ya̱ ga̱a̱ ꞌe̱e̱ ndoꞌo rá soj man tuviꞌ soj á.

²³ ꞌO̱ se caꞌngaa naca̱ nimán soj, quiꞌyaj snana̱ Yaꞌanj, ne̱ né se cavi̱ꞌ me snana̱ Yaꞌanj maꞌ. Tana̱nj ase vaa ꞌo̱ rasu̱u̱n vaa iꞌna̱ꞌ vaa snana̱ Yaꞌanj, ne̱ daj chiha̱a̱ míj se̱ caꞌanj niꞌya̱ yoꞌ maꞌ.

²⁴ Cheꞌé dan nó nana̱ nihánj rihaan Danj Yaꞌanj a: Ase vaa coj chri̱nꞌ ma̱n tacaan roꞌ, da̱nj vaa ta̱ranꞌ níꞌ, ne̱ ase vaa yâj ta̱j raa̱ coj roꞌ, da̱nj vaa suun sa̱ꞌ ꞌyaj níꞌ a. Da̱j se vaa coj ne̱ navij yâj ayuu roꞌ, da̱nj vaa níꞌ navij níꞌ a.

²⁵ Tza̱j ne̱ daj chiha̱a̱ míj se̱ navij snana̱ Síí ꞌNi̱j Raꞌa man níꞌ maꞌ. Da̱nj taj nana̱ no̱ rihaan Danj Yaꞌanj, ne̱ snana̱ Yaꞌanj yoꞌ me nana̱ sa̱ꞌ nataꞌ núj rihaan soj ado̱nj.