1 Juan 5 - Triqui de San Juan Copala

¹ Cunuda̱nj nij síí amán rá se vaa me Jesús Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, a̱j caꞌngaa naca̱ nimán nij soꞌ quiꞌyaj Yaꞌanj chugua̱nj. Ne̱ cheꞌé dan nij síí aráj cochro̱j rihaan Yaꞌanj roꞌ, no̱ xcúún nij soꞌ ga̱a̱ ꞌe̱e̱ rá nij soꞌ man nij síí caꞌngaa naca̱ nimán na̱nj á.

² Ne̱ sese aráj cochro̱j níꞌ rihaan Yaꞌanj, ne̱ sese uno níꞌ nij suun caꞌneꞌ Yaꞌanj cuno̱ níꞌ, ne̱ ya̱ síí ꞌe̱e̱ rá man nij taꞌníí Yaꞌanj me uún níꞌ ado̱nj.

³ Ne̱ sese uno níꞌ nij suun caꞌneꞌ Yaꞌanj cuno̱ níꞌ, ne̱ si̱j aráj cochro̱j rihaan Yaꞌanj me níꞌ chugua̱nj. Ne̱ ne sayu̱u̱n vaa cuno̱ níꞌ nij suun caꞌneꞌ Yaꞌanj rihaan níꞌ maꞌ.

Sese cuchuma̱n rá níꞌ ni̱ꞌyaj níꞌ man Jesús, ne̱ quiꞌya̱j canaán níꞌ rihaan se nij ma̱n rihaan chumii̱ nihánj a

⁴ ꞌO̱ se cunuda̱nj nij síí caꞌngaa naca̱ nimán quiꞌyaj Yaꞌanj roꞌ, ꞌyaj canaán nij soꞌ rihaan se nij ma̱n rihaan chumii̱ nihánj ado̱nj. Ne̱ cheꞌé se amán rá níꞌ niꞌya̱j níꞌ man Jesús roꞌ, cheꞌé dan a̱j quiꞌyaj canaán níꞌ rihaan chumii̱ nihánj na̱nj ado̱nj.

⁵ Dan me se síí amán rá se vaa Jesús me Taꞌníí Yaꞌanj roꞌ, soꞌ me síí ꞌyaj canaán rihaan se nij ma̱n rihaan chumii̱ nihánj ado̱nj.

⁶ Nihánj me Jesucristó síí caꞌnaꞌ cata̱ꞌ ne, ne̱ ꞌo̱ se ne caꞌna̱ꞌ soꞌ cata̱ꞌ ne u̱u̱n soꞌ maꞌ. Dan me se caꞌnaꞌ soꞌ cata̱ꞌ ne soꞌ, ne̱ caꞌnaꞌ soꞌ caya̱nj ton man soꞌ ne̱ cavi̱ꞌ soꞌ cheꞌé níꞌ uún ado̱nj. ꞌO̱ se Nimán Yaꞌanj taj xnaꞌanj rihaan níꞌ, ne̱ amán ya̱ rá níꞌ, ese ya̱ uxrá aꞌmii Nimán Yaꞌanj ado̱nj.

⁷ ꞌO̱ se vaꞌnu̱j nij rasu̱u̱n taj xnaꞌanj rihaan níꞌ cheꞌé Jesucristó ado̱nj.

⁸ Dan me se cheꞌé Nimán Yaꞌanj do̱ꞌ, cheꞌé na cataꞌ ne Jesucristó do̱ꞌ, cheꞌé ton cavii man Jesucristó ga̱a caviꞌ soꞌ do̱ꞌ roꞌ, cheꞌé dan xcaj níꞌ cuentá cheꞌé soꞌ, ne̱ cuya̱a̱n aꞌmii vaꞌnu̱j nij rasu̱u̱n yoꞌ a.

⁹ Dan me se na̱nj uno níꞌ nana̱ nataꞌ tuviꞌ níꞌ rihaan níꞌ, ne̱ cheꞌé dan vaa cheꞌé doj cuno̱ níꞌ nana̱ nataꞌ Yaꞌanj rihaan níꞌ a. ꞌO̱ se nataꞌ Yaꞌanj nana̱ nihánj rihaan níꞌ cheꞌé Taꞌníí soꞌ a.

¹⁰ Síí amán rá niꞌya̱j man Taꞌníí Yaꞌanj roꞌ, soꞌ me síí uun ya̱ rá se vaa nana̱ ya̱ me snana̱ Yaꞌanj a. Tza̱j ne̱ síí naꞌvej rá cuchuma̱n rá snana̱ Yaꞌanj roꞌ, soꞌ me síí uun rá se vaa síí ne̱ me Yaꞌanj a. ꞌO̱ se ne cuchuma̱n rá soꞌ nana̱ nataꞌ Yaꞌanj rihaan soꞌ cheꞌé Taꞌníí Yaꞌanj maꞌ.

¹¹ Ne̱ nana̱ nataꞌ Yaꞌanj rihaan níꞌ taj se vaa caꞌve̱e ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj, quiꞌyaj Yaꞌanj, cheꞌé se caviꞌ Taꞌníí Yaꞌanj cheꞌé níꞌ a.

¹² Síí noco̱ꞌ man Taꞌníí Yaꞌanj me síí a̱j guun cheꞌe̱ yáán ga̱ Yaꞌanj nu̱ꞌ cavii nu̱ꞌ caꞌanj ya̱ ado̱nj. Tza̱j ne̱ síí naꞌvej rá canoco̱ꞌ man soꞌ roꞌ, se̱ cayáán soꞌ ga̱ Yaꞌanj maꞌ.

Nataꞌ Juan da̱j queneꞌe̱n níꞌ se vaa ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj a

¹³ Dan me se a̱j cachronj nana̱ nihánj naya̱a̱ nij soj si̱j amán rá niꞌya̱j se‑chuvi̱i Taꞌníí Yaꞌanj, cheꞌé rej queneꞌe̱n soj se vaa a̱j guun cheꞌe̱ soj yáán soj ga̱ Yaꞌanj nu̱ꞌ cavii nu̱ꞌ caꞌanj ado̱nj.

¹⁴ Ne̱ cuano̱ nihánj me se a̱ doj ne chuꞌviꞌ níꞌ cachi̱nj niꞌya̱j níꞌ ꞌo̱ rasu̱u̱n rihaan Yaꞌanj a̱ maꞌ. ꞌO̱ se a̱j neꞌen ya̱ níꞌ se vaa sese caꞌve̱j rá soꞌ ni̱caj níꞌ rasu̱u̱n cachíín niꞌya̱j níꞌ rihaan soꞌ, ne̱ uno soꞌ ado̱nj.

¹⁵ Ne̱ cheꞌé se neꞌen níꞌ se vaa cuno̱ soꞌ me maꞌa̱n nana̱ cachi̱nj niꞌya̱j níꞌ rihaan soꞌ, cheꞌé dan neꞌen níꞌ se vaa quiꞌya̱j soꞌ nda̱a vaa cachi̱nj niꞌya̱j níꞌ rihaan soꞌ ado̱nj.

Caꞌmii Juan cheꞌé cacunꞌ a

¹⁶ Dan me se sese neꞌen níꞌ man tinúú níꞌ ꞌyaj soꞌ me maꞌa̱n cacunꞌ, ne̱ cachi̱nj niꞌya̱j níꞌ cheꞌé soꞌ rihaan Yaꞌanj, ne̱ Yaꞌanj me síí cara̱a̱ xꞌnaa cheꞌé cacunꞌ quiꞌyaj soꞌ ado̱nj. Tza̱j ne̱ sese neꞌen níꞌ man tinúú níꞌ ꞌyaj soꞌ cacunꞌ noco̱o ndoꞌo cacunꞌ quiꞌya̱j cavi̱ꞌ nu̱ꞌ soꞌ rihaan Yaꞌanj, ne̱ taj cheꞌé cachi̱nj niꞌya̱j níꞌ rihaan Yaꞌanj cheꞌé soꞌ a̱ maꞌ. Dan me se vaa cacunꞌ u̱u̱n, ne̱ vaa cacunꞌ noco̱o ndoꞌo quiꞌya̱j cavi̱ꞌ nu̱ꞌ níꞌ rihaan Yaꞌanj ado̱nj. Cheꞌé cacunꞌ noco̱o yoꞌ me se se̱ cachíín niꞌya̱j soj maꞌ.

¹⁷ Dan me se me maꞌa̱n se nij ꞌyaj níꞌ me cacunꞌ chugua̱nj. Tza̱j ne̱ se̱ caviꞌ nu̱ꞌ níꞌ rihaan Yaꞌanj quiꞌya̱j me maꞌa̱n cacunꞌ yoꞌ maꞌ. ꞌO̱ se caꞌve̱e tinavi̱j Yaꞌanj cacunꞌ yoꞌ ado̱nj.

¹⁸ Dan me se neꞌen níꞌ se vaa nu̱ꞌ nij síí caꞌngaa naca̱ nimán quiꞌyaj Yaꞌanj roꞌ, ne ꞌyaj nij soꞌ cacunꞌ a̱ maan ado̱nj. ꞌO̱ se tumé Taꞌníí Yaꞌanj man nij soꞌ, ne̱ se̱ caꞌvee quiꞌya̱j chiꞌi̱i̱ Síí Chre̱e man nij soꞌ a̱ maꞌ.

¹⁹ Ne̱ neꞌen níꞌ se vaa síí caꞌngaa naca̱ nimán quiꞌyaj Yaꞌanj me níꞌ ado̱nj. Tza̱j ne̱ cunuda̱nj nij yuvii̱ ma̱n rihaan chumii̱ nihánj roꞌ, ꞌni̱j raꞌa Síí Chre̱e man nij soꞌ na̱nj ado̱nj.

²⁰ Ne̱ neꞌen níꞌ se vaa a̱j caꞌnaꞌ Taꞌníí Yaꞌanj, ne̱ caꞌvee xcaj níꞌ cuentá cheꞌé Yaꞌanj ya̱ quiꞌyaj Taꞌníí Yaꞌanj, ne̱ neꞌen níꞌ se vaa me níꞌ síí noco̱ꞌ man maꞌa̱n ya̱ Taꞌníí soꞌ Jesucristó, ne̱ Jesucristó roꞌ, maꞌa̱n Yaꞌanj ya̱ me soꞌ, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.

²¹ Ase vaa taꞌníj vaa nij soj rihanj, tinu̱j, nocoj. Dan me se cata̱j xnaꞌanj ꞌu̱nj rihaan soj se vaa tu̱mé ndoꞌo soj man soj rihaan yaꞌanj quiꞌyaj maꞌa̱n yuvii̱ á.