1 Juan 4 - Triqui de San Juan Copala

Caꞌmii Juan cheꞌé nana̱ rqué Nimán Yaꞌanj do̱ꞌ, cheꞌé nana̱ ne̱ do̱ꞌ a

¹ Tinu̱j, nocoj, se̱ guun cuno̱ soj me maꞌa̱n nana̱ maꞌ. Asino xca̱j soj cuentá sese nana̱ rqué Nimán Yaꞌanj me nana̱ caꞌmii ꞌo̱ soꞌ á. ꞌO̱ se a̱j caꞌnaꞌ ndoꞌo síí ne̱ rihaan chumii̱ nihánj, ne̱ taj nij soꞌ se vaa si̱j nataꞌ snana̱ Yaꞌanj me nij soꞌ, tza̱j ne̱ tuꞌva rmaꞌa̱n nij soꞌ na̱nj á.

² Tza̱j ne̱ nihánj me se vaa quiꞌya̱j soj, ga̱a ne̱ caꞌve̱e xca̱j soj cuentá me nana̱ me nana̱ rqué Nimán Yaꞌanj ado̱nj. Sese cata̱j ꞌo̱ soꞌ se vaa Jesucristó me Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ guun Jesucristó yuvii̱ caꞌnaꞌ soꞌ, cata̱j ꞌo̱ soꞌ, ne̱ nana̱ yoꞌ me nana̱ rqué Nimán Yaꞌanj ado̱nj.

³ Tza̱j ne̱ nu̱ꞌ nij síí taj se vaa né si̱j caꞌnéé Yaꞌanj man me Jesús me se né na̱na̱ rqué Nimán Yaꞌanj me yoꞌ maꞌ. ꞌO̱ se snana̱ síí ta̱j riꞌyunj man Cristó me yoꞌ, ne̱ dan me se a̱j cuno soj se vaa caꞌna̱ꞌ nij soꞌ ado̱nj. Ne̱ ya̱j nihánj me se a̱j ma̱n ndoꞌo nij soꞌ rihaan chumii̱ nihánj cuano̱ chugua̱nj.

⁴ Tza̱j ne̱ ya̱j nihánj me se síí ya̱ noco̱ꞌ man Yaꞌanj me nij soj, tinu̱j, nocoj. Ne̱ a̱j quiꞌyaj canaán soj rihaan nij síí ne̱ cuano̱ ado̱nj. ꞌO̱ se nu̱u̱ Nimán Yaꞌanj nimán soj, ne̱ nucua̱j doj Nimán Yaꞌanj rihaan Síí Chre̱e va̱j rihaan chumii̱ nihánj chugua̱nj.

⁵ Ne̱ nij síí ne̱ yoꞌ, tza̱j ne̱ ma̱an síí ma̱n rihaan chumii̱ nihánj me nij soꞌ, ne̱ cheꞌé dan ina̱nj aꞌmii nij soꞌ nda̱a vaa nariꞌ nij soꞌ rihaan chumii̱ nihánj, ne̱ uno nij síí ma̱n rihaan chumii̱ nihánj snana̱ nij soꞌ na̱nj á.

⁶ Tza̱j ne̱ síí ya̱ noco̱ꞌ man Yaꞌanj me níꞌ, ne̱ nij síí neꞌen man Yaꞌanj roꞌ, uno nij soꞌ snana̱ níꞌ ado̱nj. Ne̱ xa̱ꞌ síí ne nocoꞌ man Yaꞌanj, tza̱j ne̱ ne uno nij soꞌ snana̱ níꞌ a̱ maꞌ. Cheꞌé dan neꞌen níꞌ me síí nu̱u̱ Nimán Yaꞌanj nimán, ne̱ neꞌen níꞌ me síí nu̱u̱ nana̱ tihaꞌ yuꞌunj nimán chugua̱nj.

No̱ xcúún níꞌ cunu̱u ꞌe̱e̱ rá níꞌ man tuviꞌ níꞌ, cheꞌé se ꞌe̱e̱ rá Yaꞌanj man níꞌ a

⁷ Tinu̱j, nocoj, no̱ xcúún níꞌ ga̱a̱ ꞌe̱e̱ rá níꞌ man tuviꞌ níꞌ ado̱nj. ꞌO̱ se Yaꞌanj me síí rqué rej nucua̱j rihaan níꞌ ga̱a̱ ꞌe̱e̱ rá níꞌ man tuviꞌ níꞌ a. Cheꞌé dan nu̱ꞌ síí ꞌe̱e̱ rá man tuviꞌ me se síí caꞌngaa naca̱ nimán quiꞌyaj Yaꞌanj me nij soꞌ ado̱nj. Ne̱ neꞌen nij soꞌ man Yaꞌanj ado̱nj.

⁸ Ne̱ síí ne ꞌe̱e̱ rá man tuviꞌ me se ataa xca̱j soꞌ cuentá cheꞌé Yaꞌanj na̱nj ado̱nj. ꞌO̱ se ataa xca̱j soꞌ cuentá se vaa Yaꞌanj me síí ꞌe̱e̱ ina̱nj rá man níꞌ ado̱nj.

⁹ Ne̱ nihánj me cata̱j xnaꞌanj ꞌu̱nj rihaan soj me cheꞌé neꞌen níꞌ se vaa ꞌe̱e̱ rá Yaꞌanj man níꞌ a. Dan me se nda̱ꞌ se o̱rúnꞌ ya̱ Taꞌníí Yaꞌanj, tza̱j ne̱ caꞌnéé Yaꞌanj man Taꞌníí soꞌ rihaan chumii̱ nihánj, cheꞌé rej caꞌve̱e ga̱a̱ iꞌna̱ꞌ nimán níꞌ nu̱ꞌ cavii nu̱ꞌ caꞌanj quiꞌya̱j soꞌ a.

¹⁰ Ne̱ vaa cheꞌé xca̱j níꞌ cuentá se vaa ne cara̱a̱ cochro̱j níꞌ rihaan Yaꞌanj asino ya̱a̱n maꞌ. Tana̱nj asino ya̱a̱n me se cunuu ꞌe̱e̱ rá Yaꞌanj niꞌya̱j Yaꞌanj man níꞌ, ga̱a ne̱ caꞌnéé soꞌ man Taꞌníí soꞌ cheꞌé rej cavi̱ꞌ Taꞌníí soꞌ yan tinavi̱j Taꞌníí soꞌ cacunꞌ tumé níꞌ a.

¹¹ Tinu̱j, nocoj, cheꞌé se ꞌe̱e̱ rá Yaꞌanj man níꞌ da̱nj roꞌ, cheꞌé dan no̱ xcúún níꞌ ga̱a̱ ꞌe̱e̱ rá níꞌ man tuviꞌ níꞌ ado̱nj.

¹² A̱ doj yuvii̱ ne queneꞌe̱n rihaan man maꞌa̱n Yaꞌanj nu̱ꞌ cavii nu̱ꞌ caꞌnaꞌ maꞌ. Tza̱j ne̱ sese ga̱a̱ ꞌe̱e̱ rá níꞌ man tuviꞌ níꞌ, ne̱ ya̱ ya̱nj Yaꞌanj nimán níꞌ, ne̱ a̱j cunuu sa̱ꞌ nimán níꞌ nda̱a vaa guun rá Yaꞌanj ga̱a cunuu ꞌe̱e̱ rá Yaꞌanj man níꞌ a.

¹³ Dan me se cheꞌé se rqué Yaꞌanj Nimán Yaꞌanj rihaan níꞌ roꞌ, cheꞌé dan neꞌen níꞌ se vaa si̱j noco̱ꞌ man Yaꞌanj me níꞌ ne̱ ꞌo̱ ne soꞌ nimán níꞌ a.

¹⁴ Ne̱ a̱j neꞌen núj se vaa caꞌnéé Rej níꞌ Yaꞌanj man Taꞌníí soꞌ rihaan chumii̱ nihánj cheꞌé rej gu̱un soꞌ Síí Ti̱nanii rihaan Sayuun man nij síí ma̱n rihaan chumii̱ nihánj, ne̱ a̱j nataꞌ núj nana̱ yoꞌ rihaan yuvii̱ ado̱nj.

¹⁵ Ne̱ síí taj rihaan tuviꞌ se vaa Taꞌníí Yaꞌanj me Jesús roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj ga̱ soꞌ chugua̱nj.

¹⁶ Ne̱ a̱j neꞌen núj se vaa ꞌe̱e̱ rá Yaꞌanj man níꞌ, ne̱ amán rá núj se vaa ꞌe̱e̱ rá soꞌ man níꞌ ado̱nj. Yaꞌanj me síí ꞌe̱e̱ rá man níꞌ na̱nj á. Ne̱ síí ꞌo̱ ꞌe̱e̱ rá man tuviꞌ roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj nimán soꞌ ado̱nj.

¹⁷ Ne̱ cheꞌé dan sese ꞌe̱e̱ rá níꞌ man tuviꞌ níꞌ, ne̱ asa̱ꞌ quisíj güii caꞌne̱ꞌ Yaꞌanj cacunꞌ cheꞌé yuvii̱, ne̱ gu̱un ya̱ rá níꞌ se vaa cavi̱i̱ sa̱ꞌ níꞌ ado̱nj. ꞌO̱ se queneꞌe̱n níꞌ se vaa ase vaa quiꞌyaj Cristó ga̱a va̱j soꞌ rihaan chumii̱ nihánj roꞌ, da̱nj ꞌyaj maꞌa̱n níꞌ uún ado̱nj.

¹⁸ Cheꞌé dan síí ya̱ ya̱ ꞌe̱e̱ rá man tuviꞌ roꞌ, a̱ doj ne chuꞌviꞌ soꞌ maꞌ. Síí chuꞌviꞌ me síí uun rá se vaa quiꞌya̱j Yaꞌanj sayuun man soꞌ, ne̱ né si̱j ya̱ ya̱ ꞌe̱e̱ rá man tuviꞌ me síí guun da̱nj rá maꞌ.

¹⁹ Dan me se ꞌe̱e̱ rá níꞌ man tuviꞌ níꞌ cheꞌé se asino cunuu ꞌe̱e̱ rá maꞌa̱n Yaꞌanj man níꞌ a.

²⁰ Ne̱ sese cata̱j ꞌo̱ soꞌ se vaa aráj cochro̱j soꞌ rihaan Yaꞌanj, ne̱ sese nachriꞌ soꞌ niꞌya̱j soꞌ tinúú soꞌ, ne̱ síí ne̱ me soꞌ ado̱nj. ꞌO̱ se sese ruviꞌ ya̱ tinúú soꞌ niꞌya̱j soꞌ tza̱j ne̱ ne ꞌe̱e̱ rá soꞌ man tinúú soꞌ, ne̱ asa̱ꞌ caꞌve̱e cara̱a̱ cochro̱j soꞌ rihaan Yaꞌanj, sese ne ruviꞌ Yaꞌanj niꞌya̱j soꞌ ga̱.

²¹ Ne̱ nihánj me suun caꞌneꞌ Cristó rihaan níꞌ cuno̱ níꞌ, se vaa síí aráj cochro̱j rihaan Yaꞌanj roꞌ, no̱ xcúún soꞌ ga̱a̱ ꞌe̱e̱ rá soꞌ man tuviꞌ soꞌ uún ado̱nj, taj Cristó a.