1 Juan 3 - Triqui de San Juan Copala

¹ Dan me se xca̱j soj cuentá se vaa cunuu ꞌe̱e̱ uxrá rá Rej níꞌ Yaꞌanj niꞌya̱j soꞌ man níꞌ, ne̱ nda̱a taꞌníí Yaꞌanj guun níꞌ, quiꞌyaj Yaꞌanj chugua̱nj. Cheꞌé dan ne neꞌen nij síí ma̱n rihaan chumii̱ nihánj da̱j si̱j me níꞌ maan chugua̱nj. ꞌO̱ se ne neꞌen nij soꞌ man maꞌa̱n Yaꞌanj uún a̱ maan ado̱nj.

² Tinu̱j, nocoj, cuano̱ nihánj me se taꞌni̱j Yaꞌanj me níꞌ, ne̱ ataa xca̱j níꞌ cuentá da̱j si̱j ga̱a̱ níꞌ quiꞌya̱j Yaꞌanj vaa güii ado̱nj. Ma̱an se neꞌen níꞌ se vaa asa̱ꞌ caꞌnaꞌ Cristó, ne̱ ase vaa soꞌ roꞌ, da̱nj ga̱a̱ maꞌa̱n níꞌ uún ado̱nj. ꞌO̱ se queneꞌe̱n níꞌ man soꞌ, ne̱ xca̱j ya̱ níꞌ cuentá da̱j vaa xa̱ꞌ soꞌ na̱nj ado̱nj.

³ Ne̱ nij síí uun ya̱ rá se vaa queneꞌe̱n nij soꞌ man Cristó roꞌ, ya̱ cunu̱u sa̱ꞌ nimán nij soꞌ quiꞌya̱j nij soꞌ, ne̱ ase vaa sa̱ꞌ nimán Cristó roꞌ, da̱nj ga̱a̱ sa̱ꞌ nimán nij soꞌ uún ado̱nj.

⁴ Dan me se nu̱ꞌ nij síí ꞌyaj cacunꞌ roꞌ, nij soꞌ me nij síí naꞌvej rá cuno̱ stucua̱nj Yaꞌanj a. ꞌO̱ se cacunꞌ me raj cata̱a ga̱a ne unóꞌ stucua̱nj Yaꞌanj a.

⁵ Ne̱ neꞌen nij soj se vaa caꞌnaꞌ Cristó rihaan chumii̱ nihánj, cheꞌé rej caꞌve̱e tinavi̱j soꞌ cacunꞌ tumé yuvii̱, ne̱ a̱ doj cacunꞌ taj tumé soꞌ maꞌ.

⁶ Ne̱ ta̱ranꞌ nij síí ꞌo̱ nocoꞌ man soꞌ roꞌ, né si̱j noco̱ꞌ cacunꞌ me nij soꞌ maꞌ. Ne̱ nij síí noco̱ꞌ tucuáán ꞌyaj cacunꞌ roꞌ, né si̱j neꞌen man Cristó me nij soꞌ maan ado̱nj.

⁷ Dan me se ase vaa taꞌníj vaa soj rihanj, tinu̱j, nocoj, ne̱ se̱ guun tiha̱ꞌ yuꞌunj a̱ doj yuvii̱ man soj maan chugua̱nj. Síí ꞌyaj sa̱ꞌ roꞌ, síí sa̱ꞌ me soꞌ, ne̱ ase vaa maꞌa̱n Cristó vaa soꞌ ado̱nj.

⁸ Ne̱ síí ꞌyaj cacunꞌ me se síí noco̱ꞌ stucua̱nj Síí Chre̱e me soꞌ na̱nj ado̱nj. ꞌO̱ se asi̱j guun cheꞌe̱ Yaꞌanj quiꞌyaj Yaꞌanj chumii̱ nihánj, ne̱ si̱j ꞌyaj ina̱nj cacunꞌ me Síí Chre̱e na̱nj ado̱nj. Ne̱ caꞌnaꞌ Taꞌníí Yaꞌanj rihaan chumii̱ nihánj, cheꞌé rej caꞌve̱e tiri̱ꞌ soꞌ nu̱ꞌ se vaa ꞌyaj Síí Chre̱e yoꞌ ado̱nj.

⁹ Ne̱ ta̱ranꞌ nij síí caꞌngaa naca̱ nimán quiꞌyaj Yaꞌanj roꞌ, né ꞌo̱ ꞌyaj nij soꞌ cacunꞌ a̱ maꞌ. ꞌO̱ se Yaꞌanj me síí quiꞌyaj caꞌngaa naca̱ nimán nij soꞌ, ne̱ se̱ caꞌvee ꞌo̱ quiꞌya̱j nij soꞌ cacunꞌ, ese maꞌa̱n Yaꞌanj quiꞌyaj caꞌngaa naca̱ nimán nij soꞌ na̱nj ado̱nj.

¹⁰ Ne̱ nihánj me xca̱j níꞌ cuentá ni̱ꞌyaj níꞌ, ga̱a ne̱ cunu̱u ya̱a̱n níꞌ taꞌníí Yaꞌanj do̱ꞌ, taꞌníí Síí Chre̱e do̱ꞌ ado̱nj. Dan me se nij síí ne ꞌyaj se sa̱ꞌ roꞌ, né si̱j noco̱ꞌ man Yaꞌanj me nij soꞌ maꞌ. Dan me se né si̱j ꞌe̱e̱ rá man tinúú me nij soꞌ a̱ maan ado̱nj.

No̱ xcúún níꞌ cunu̱u ꞌe̱e̱ rá níꞌ man tuviꞌ níꞌ a

¹¹ ꞌO̱ se nana̱ nihánj me nana̱ cuno soj asi̱j guun cheꞌe̱ soj canocoꞌ soj man Yaꞌanj, ne̱ nana̱ nihánj taj se vaa no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ chugua̱nj.

¹² Dan me se se̱ quiꞌyaj níꞌ nda̱a vaa quiꞌyaj síí cuꞌna̱j Caín ga̱a naá maꞌ. ꞌO̱ se si̱j noco̱ꞌ stucua̱nj Síí Chre̱e me soꞌ, ne̱ ticaviꞌ ya̱ soꞌ tinúú soꞌ ado̱nj. Ne̱ me cheꞌé quiꞌyaj soꞌ da̱nj, rá soj ga̱. ꞌO̱ se nu̱ꞌ rasu̱u̱n quiꞌyaj soꞌ me se ina̱nj chiꞌi̱i̱ ndoꞌo quiꞌyaj maꞌa̱n soꞌ, ne̱ tinúú soꞌ me se sa̱ꞌ ina̱nj vaa rasu̱u̱n quiꞌyaj tinúú soꞌ, ne̱ cheꞌé dan guun xco̱j ruva̱a̱ rá soꞌ niꞌya̱j soꞌ tinúú soꞌ ado̱nj.

¹³ Dan me se se̱ caꞌanj rá soj sese nachri̱ꞌ nij síí ma̱n rihaan chumii̱ nihánj ni̱ꞌyaj nij soꞌ man soj, maan tinu̱j, maan nocoj.

¹⁴ ꞌO̱ se cheꞌé se cunuu ꞌe̱e̱ rá níꞌ man tinúú níꞌ roꞌ, cheꞌé dan neꞌen níꞌ se vaa a̱j tanáj xco̱ níꞌ chrej chiꞌi̱i̱ chrej quiꞌya̱j cavi̱ꞌ níꞌ, ne̱ a̱j cunuu sa̱ꞌ nimán níꞌ, ne̱ caꞌve̱e ca̱yáán níꞌ ga̱ Yaꞌanj ado̱nj. Ne̱ síí ne ꞌe̱e̱ rá man tuviꞌ me se adi̱ꞌ se vaa nij síí caviꞌ roꞌ, vaa nij soꞌ na̱nj ado̱nj.

¹⁵ Dan me se xa̱ꞌ ta̱ranꞌ nij síí nachriꞌ niꞌya̱j man tinúú me se ase vaa síí ticaviꞌ man tinúú roꞌ, vaa nij soꞌ, ne̱ neꞌen soj se vaa síí vaa da̱nj roꞌ, ne vaa iꞌna̱ꞌ nimán soꞌ rihaan Yaꞌanj a̱ maꞌ.

¹⁶ Ne̱ Cristó roꞌ, me síí caꞌvej rá cavi̱ꞌ cheꞌé níꞌ, ne̱ cheꞌé dan neꞌen níꞌ se vaa ꞌe̱e̱ rá soꞌ man níꞌ ado̱nj. Ne̱ cheꞌé dan no̱ xcúún níꞌ caꞌne̱j nimán níꞌ cavi̱ꞌ níꞌ cheꞌé tinúú níꞌ chugua̱nj.

¹⁷ Dan me se sese vaa ndoꞌo rasu̱u̱n ma̱n rihaan chumii̱ nihánj ni̱caj ꞌo̱ soꞌ, ne̱ nda̱ꞌ se neꞌen soꞌ se vaa achiin ndoꞌo rasu̱u̱n man tinúú soꞌ tza̱j ne̱ naꞌvej rá soꞌ ra̱cuíj soꞌ man tinúú soꞌ, ne̱ né si̱j ꞌe̱e̱ rá man tuviꞌ nda̱a vaa ꞌe̱e̱ rá Yaꞌanj man níꞌ me soꞌ a̱ maan ado̱nj.

¹⁸ Dan me se ase vaa taꞌníj vaa soj chugua̱nj. Dan me se se̱ guun cata̱j u̱u̱n níꞌ nana̱ u̱u̱n se vaa ꞌe̱e̱ rá níꞌ man tuviꞌ níꞌ maꞌ. Tana̱nj quiꞌya̱j níꞌ se sa̱ꞌ nda̱a vaa taj nana̱ ya̱ a.

Taj cheꞌé gu̱un naꞌa̱j níꞌ ni̱ꞌyaj níꞌ Yaꞌanj maꞌ

¹⁹ Dan me se sese quiꞌya̱j níꞌ da̱nj, ne̱ queneꞌe̱n níꞌ se vaa si̱j noco̱ꞌ ya̱ nana̱ ya̱ me níꞌ, ne̱ dan me se gu̱un ya̱ ya̱ rá nimán níꞌ rihaan Yaꞌanj ado̱nj.

²⁰ ꞌO̱ se nda̱ꞌ se caꞌve̱e nano̱ rá níꞌ cheꞌé cacunꞌ tumé níꞌ, tza̱j ne̱ sa̱ꞌ doj vaa Yaꞌanj rihaan nimán níꞌ, ne̱ Yaꞌanj me síí neꞌen cunuda̱nj ado̱nj.

²¹ Tinu̱j, nocoj, sese nuviꞌ cacunꞌ tumé níꞌ rá níꞌ, ne̱ se̱ cuchuꞌviꞌ níꞌ caꞌmi̱i̱ níꞌ ga̱ Yaꞌanj maꞌ.

²² Dan me se me maꞌa̱n rasu̱u̱n cachi̱nj níꞌ rihaan Yaꞌanj, ne̱ rque̱ Yaꞌanj cunuda̱nj se vaa cachi̱nj niꞌya̱j níꞌ rihaan soꞌ, cheꞌé se si̱j uno suun caꞌneꞌ soꞌ me níꞌ, ne̱ uun niha̱ꞌ rá soꞌ niꞌya̱j soꞌ se sa̱ꞌ ꞌyaj níꞌ ado̱nj.

²³ Dan me se nihánj me suun caꞌneꞌ Yaꞌanj cuno̱ níꞌ a. Me rá Yaꞌanj cuchuma̱n rá níꞌ ni̱ꞌyaj níꞌ man Taꞌníí soꞌ Jesucristó, ne̱ me rá Yaꞌanj cunu̱u ꞌe̱e̱ rá níꞌ ni̱ꞌyaj níꞌ man tuviꞌ níꞌ nda̱a vaa caꞌneꞌ Yaꞌanj suun rihaan níꞌ a.

²⁴ Ne̱ síí uno suun caꞌneꞌ Yaꞌanj rihaan níꞌ roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj ga̱ soꞌ ado̱nj. Ne̱ nihánj me rej neꞌen níꞌ se vaa ꞌo̱ ne Yaꞌanj ga̱ níꞌ na̱nj ado̱nj. ꞌO̱ se rqué Yaꞌanj Nimán Yaꞌanj man níꞌ ado̱nj.