1 Juan 2 - Triqui de San Juan Copala

Jesucristó me síí aꞌmii yuꞌunj cheꞌé níꞌ a

¹ Ase vaa taꞌníí ꞌu̱nj roꞌ, da̱nj vaa soj, tinu̱j, nocoj. Ne̱ achrón ꞌu̱nj nu̱ꞌ nana̱ nihánj rihaan yanj nihánj, cheꞌé rej se̱ quiꞌyaj soj cacunꞌ maꞌ. Dan me se sese quiꞌya̱j níꞌ cacunꞌ, ne̱ vaa ꞌo̱ síí nica̱ ina̱nj nimán aꞌmii yuꞌunj cheꞌé níꞌ rihaan Rej níꞌ Yaꞌanj, ne̱ Jesucristó me soꞌ ado̱nj.

² Ne̱ soꞌ me síí caviꞌ cheꞌé rej caꞌve̱e navi̱j cacunꞌ tumé níꞌ ado̱nj. Tza̱j ne̱ né cheꞌe̱ ma̱an do̱j se‑cacu̱nꞌ níꞌ me caviꞌ soꞌ maꞌ. Caviꞌ soꞌ cheꞌé cacunꞌ tumé cunuda̱nj nij yuvii̱ ma̱n rihaan chumii̱ ado̱nj.

³ Dan me se nihánj me rej neꞌen níꞌ se vaa si̱j noco̱ꞌ man Cristó me níꞌ a. Dan me se sese uno níꞌ suun caꞌneꞌ Jesucristó rihaan níꞌ, ne̱ si̱j noco̱ꞌ ya̱ man soꞌ me níꞌ ado̱nj.

⁴ Tza̱j ne̱ sese taj ꞌo̱ soꞌ se vaa si̱j noco̱ꞌ man Cristó me soꞌ ne̱ ne uno soꞌ suun caꞌneꞌ Cristó rihaan níꞌ, ne̱ síí ne̱ me soꞌ, ne̱ né si̱j aꞌmii nana̱ ya̱ me soꞌ maꞌ.

⁵ Tza̱j ne̱ síí uno snana̱ Cristó roꞌ, soꞌ me síí ya̱ ya̱ aráj cochro̱j rihaan Yaꞌanj chugua̱nj. Cheꞌé dan, sese quiꞌya̱j níꞌ da̱nj, ne̱ caꞌve̱e gu̱un ya̱ rá níꞌ se vaa si̱j noco̱ꞌ man Cristó me níꞌ ado̱nj.

⁶ Ne̱ síí taj se vaa ꞌo̱ nocoꞌ soꞌ man Cristó roꞌ, ase vaa quiꞌyaj Jesús, da̱nj ina̱nj nó xcúún soꞌ quiꞌya̱j maꞌa̱n soꞌ uún ado̱nj.

⁷ Dan me se ꞌe̱e̱ raj man soj, tinu̱j, nocoj. Ne̱ nihánj me se cachro̱n ꞌu̱nj cheꞌé ꞌo̱ suun aꞌnéꞌ ꞌu̱nj rihaan soj cuno̱ soj chugua̱nj. Tza̱j ne̱ né su̱u̱n aꞌneꞌ naca̱ ꞌu̱nj rihaan soj me nana̱ nihánj maꞌ. Veé nana̱ cuno soj asi̱j guun cheꞌe̱ soj canocoꞌ soj man Cristó me nana̱ nihánj na̱nj ado̱nj.

⁸ Dan me se cachro̱n uún ꞌu̱nj ꞌo̱ suun naca̱ aꞌnéꞌ ꞌu̱nj rihaan soj cuno̱ soj, ne̱ ya̱ ya̱ suun naca̱ tucuꞌyón Cristó me suun nihánj, ne̱ cuno soj suun nihánj ado̱nj. ꞌO̱ se va̱j navi̱j rej rmi̱ꞌ rihaan chumii̱ nihánj, ne̱ Cristó roꞌ, me yaꞌan chuguu̱n, ne̱ dan me se guun cheꞌe̱ snana̱ soꞌ cuchuguu̱n snana̱ soꞌ rihaan chumii̱ nihánj ado̱nj.

⁹ Ne̱ xa̱ꞌ síí taj se vaa va̱j soꞌ rej chuguu̱n ga̱ snana̱ Cristó ne̱ nachriꞌ soꞌ niꞌya̱j soꞌ man tinúú soꞌ, ne̱ si̱j va̱j gue̱e̱ rej rmi̱ꞌ me ya̱ soꞌ na̱nj chugua̱nj.

¹⁰ Ne̱ síí ꞌe̱e̱ rá man tinúú me se soꞌ me síí chéé rej chuguu̱n ga̱ snana̱ Cristó, ne̱ se̱ caꞌvee naxru̱ꞌ soꞌ maꞌ.

¹¹ Ne̱ xa̱ꞌ síí nachriꞌ man tinúú, tza̱j ne̱ soꞌ me síí va̱j rej rmi̱ꞌ, ne̱ ꞌo̱ chéé gue̱e̱ soꞌ rej rmi̱ꞌ na̱nj á. Ne neꞌen soꞌ me rej va̱j soꞌ a̱ maꞌ. ꞌO̱ se caráán rihaan soꞌ, quiꞌyaj rej rmi̱ꞌ va̱j soꞌ na̱nj ado̱nj.

¹² Dan me se achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se navij cacunꞌ tumé soj rihaan Yaꞌanj cheꞌé se noco̱ꞌ soj man Cristó ado̱nj.

¹³ Achrón ꞌu̱nj nu̱ꞌ nana̱ nihánj naya̱a̱ soj si̱j vaa taꞌníí, cheꞌé se a̱j neꞌen soj man síí cayáán ga̱ Yaꞌanj asi̱j tacóó chumii̱ a. Achrón ꞌu̱nj nu̱ꞌ nana̱ nihánj naya̱a̱ soj si̱j tachru̱u̱, cheꞌé se a̱j quiꞌyaj canaán soj rihaan Síí Chre̱e ado̱nj. Achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se a̱j neꞌen soj man Rej níꞌ Yaꞌanj ado̱nj.

¹⁴ Achrón ꞌu̱nj nu̱ꞌ nana̱ nihánj naya̱a̱ soj si̱j vaa taꞌníí, cheꞌé se a̱j neꞌen soj man síí cayáán ga̱ Yaꞌanj asi̱j tacóó chumii̱ ado̱nj. Achrón ꞌu̱nj nu̱ꞌ nana̱ nihánj naya̱a̱ soj si̱j tachru̱u̱, cheꞌé se nucua̱j ndoꞌo nimán soj rihaan sayuun, ne̱ ꞌo̱ uno soj snana̱ Yaꞌanj, ne̱ a̱j quiꞌyaj canaán soj rihaan Síí Chre̱e na̱nj ado̱nj.

¹⁵ Se̱ guun rá soj ni̱ꞌyaj soj chumii̱ nihánj do̱ꞌ, nij rasu̱u̱n ma̱n rihaan chumii̱ nihánj do̱ꞌ maꞌ. ꞌO̱ se xa̱ꞌ síí me rá niꞌya̱j chumii̱ nihánj, tza̱j ne̱ né si̱j aráj cochro̱j man Rej níꞌ Yaꞌanj me soꞌ maan chugua̱nj.

¹⁶ ꞌO̱ se rihaan chumii̱ nihánj vaa ndoꞌo se me rá nee̱ man yuvii̱ quiꞌya̱j yoꞌ do̱ꞌ, vaa ndoꞌo se me rá yuvii̱ ni̱ꞌyaj yuvii̱ do̱ꞌ, vaa ndoꞌo rasu̱u̱n ꞌyaj uun xta̱ꞌ nimán yuvii̱ do̱ꞌ, tza̱j ne̱ né ra̱su̱u̱n cavii rihaan Rej níꞌ Yaꞌanj me nu̱ꞌ nij rasu̱u̱n vaa da̱nj maꞌ. ꞌO̱ se na̱nj rasu̱u̱n ma̱n rihaan chumii̱ nihánj me nij rasu̱u̱n yoꞌ na̱nj ado̱nj.

¹⁷ Ne̱ va̱j navi̱j chumii̱ nihánj ado̱nj. Ne̱ va̱j navi̱j nu̱ꞌ se vaa me rá nij yuvii̱ ma̱n rihaan chumii̱ nihánj quiꞌya̱j nij soꞌ na̱nj ado̱nj. Tza̱j ne̱ síí ꞌyaj nda̱a vaa me rá Yaꞌanj me se ca̱yáán soꞌ nu̱ꞌ cavii nu̱ꞌ caꞌanj ga̱ Yaꞌanj chugua̱nj.

Nataꞌ Juan cheꞌé síí taꞌyunj taj se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ a

¹⁸ Dan me se ase vaa taꞌníj vaa soj, ne̱ me raj cuno̱ soj nana̱ nihánj ado̱nj. ꞌO̱ se nichrunꞌ navi̱j güii man níꞌ, ne̱ a̱j cuno soj nana̱ se vaa caꞌna̱ꞌ maꞌa̱n síí ta̱j riꞌyunj man Cristó, ne̱ cata̱j soꞌ se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ, ne̱ nihánj me se a̱j caꞌnaꞌ queꞌe̱e̱ síí ta̱j riꞌyunj man Cristó, ne̱ cheꞌé dan neꞌen ya̱ níꞌ se vaa ya̱ nichrunꞌ navi̱j güii man níꞌ ado̱nj.

¹⁹ Dan me se ase vaa tinúú níꞌ vaa nij soꞌ asi̱j rque̱, tza̱j ne̱ caꞌanj yaníj nij soꞌ rihaan níꞌ, ne̱ né ya̱ ya̱ tinu̱j níꞌ me nij soꞌ a̱ maꞌ. ꞌO̱ se caꞌanj yaníj nij soꞌ rihaan níꞌ cheꞌé rej caꞌve̱e xca̱j níꞌ cuentá se vaa né tinu̱j níꞌ me ta̱ranꞌ nij soꞌ a̱ maan ado̱nj.

²⁰ Ne̱ xa̱ꞌ soj, tza̱j ne̱ nu̱u̱ Nimán Yaꞌanj nimán soj, ne̱ xcaj soj cuentá ne̱ neꞌen cunuda̱nj soj nana̱ ya̱ ꞌyaj Nimán Yaꞌanj ado̱nj.

²¹ Né cheꞌe̱ se ne neꞌen soj nana̱ ya̱ me cachrón ꞌu̱nj nana̱ nihánj naya̱a̱ soj maꞌ. Tana̱nj achrón ꞌu̱nj nana̱ nihánj cheꞌé se si̱j neꞌen nij nana̱ ya̱ me soj, ne̱ a̱j neꞌen soj se vaa ino̱ doj vaa nana̱ ne̱ ga̱ nana̱ ya̱ nana̱ noco̱ꞌ níꞌ ado̱nj.

²² Ne̱ síí ne̱ me se soꞌ me síí taj se vaa né Si̱j Caꞌnéé Yaꞌanj Ti̱nanii man Yuvii̱ rihaan Sayuun me Jesús chugua̱nj. Dan me se síí ta̱j riꞌyunj man Cristó me soꞌ chugua̱nj. Ne̱ dan me se ne aráj cochro̱j soꞌ rihaan Rej níꞌ Yaꞌanj do̱ꞌ, rihaan Taꞌníí Yaꞌanj do̱ꞌ maꞌ.

²³ Dan me se xa̱ꞌ síí ne aráj cochro̱j rihaan Taꞌníí Yaꞌanj, tza̱j ne̱ si̱j ne nocoꞌ man Rej níꞌ Yaꞌanj me soꞌ ado̱nj. Tza̱j ne̱ síí nataꞌ ya̱ se vaa veꞌé nocoꞌ soꞌ man Taꞌníí Yaꞌanj roꞌ, soꞌ me síí noco̱ꞌ ya̱ man Rej níꞌ Yaꞌanj uún ado̱nj.

²⁴ Ne̱ xa̱ꞌ soj, tza̱j ne̱ ꞌo̱ cuno̱ soj nana̱ cuno soj ga̱a guun cheꞌe̱ soj canocoꞌ soj man Cristó á. Sese quiꞌya̱j soj da̱nj, ne̱ si̱j noco̱ꞌ ya̱ man Taꞌníí Yaꞌanj do̱ꞌ, man maꞌa̱n Rej níꞌ Yaꞌanj do̱ꞌ, me soj chugua̱nj.

²⁵ Ne̱ nihánj me nana̱ cataꞌ tuꞌva maꞌa̱n Cristó rihaan níꞌ, se vaa caꞌve̱e ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ya̱ ado̱nj.

²⁶ Dan me se cachrón ꞌu̱nj nu̱ꞌ nana̱ nihánj naya̱a̱ soj cheꞌé rej xca̱j soj cuentá cheꞌé nij síí me rá tiha̱ꞌ yuꞌunj man soj ado̱nj.

²⁷ Ne̱ xa̱ꞌ soj, tza̱j ne̱ cheꞌé se nu̱u̱ Nimán Yaꞌanj nimán soj quiꞌyaj Cristó, ne̱ cheꞌé dan ꞌo̱ nocoꞌ soj man Cristó, ne̱ taj cheꞌé tu̱cuꞌyón nii doj nana̱ man soj a̱ maꞌ. Tana̱nj cheꞌé se nu̱u̱ Nimán Yaꞌanj nimán soj, cheꞌé dan a̱j nariꞌ soj nana̱ cheꞌé nu̱ꞌ rasu̱u̱n, ne̱ ina̱nj nana̱ ya̱ nariꞌ soj ado̱nj. Né na̱na̱ ne̱ me nana̱ nariꞌ soj, quiꞌyaj Nimán Yaꞌanj maꞌ. Dan me se ꞌo̱ canoco̱ꞌ soj man Cristó, nda̱a vaa tucuꞌyón ya̱ Nimán Yaꞌanj man soj ado̱nj.

Taꞌni̱j Yaꞌanj me níꞌ a

²⁸ Dan me se ase vaa taꞌníj vaa nij soj rihanj, ne̱ me rá ꞌu̱nj se vaa ꞌo̱ canoco̱ꞌ xraan soj man Cristó, cheꞌé rej asa̱ꞌ caꞌnaꞌ uún soꞌ rihaan chumii̱ nihánj, ne̱ ga̱a̱ dínj nimán níꞌ, ne̱ se̱ guun naꞌa̱j níꞌ a̱ doj maꞌ.

²⁹ Dan me se neꞌen soj se vaa síí sa̱ꞌ ina̱nj me Cristó, ne̱ cheꞌé dan neꞌen soj se vaa nu̱ꞌ nij síí ꞌyaj sa̱ꞌ roꞌ, ta̱ranꞌ nij soꞌ me síí cunuu sa̱ꞌ nimán quiꞌyaj soꞌ ado̱nj.