1 Juan 1 - Triqui de San Juan Copala

Cata̱j xnaꞌanj Juan cheꞌé se vaa queneꞌen rihaan maꞌa̱n soꞌ a

¹ Dan me se núj me se cata̱j xnaꞌanj núj rihaan nij soj cheꞌé ꞌo̱ síí cayáán ga̱a naá asi̱j guun cheꞌe̱ Yaꞌanj quiꞌyaj Yaꞌanj chumii̱, ne̱ ina̱nj se vaa cuno maꞌa̱n núj do̱ꞌ, se vaa queneꞌen rihaan maꞌa̱n núj do̱ꞌ, se vaa cutaꞌ núj raꞌa núj xráá do̱ꞌ, cheꞌé ina̱nj rasu̱u̱n vaa da̱nj cata̱j xnaꞌanj núj rihaan soj a. Dan me se cata̱j xnaꞌanj núj cheꞌé síí me Snana̱ Yaꞌanj, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.

² Dan me se caꞌnaꞌ soꞌ, ne̱ queneꞌen núj man soꞌ, ne̱ nihánj me se nataꞌ núj rihaan nij soj cheꞌé soꞌ se vaa asino canicunꞌ soꞌ ga̱ Rej níꞌ Yaꞌanj rej ya̱nj Yaꞌanj ga̱a naá, ga̱a ne̱ ya̱j me se caꞌnaꞌ soꞌ rej ya̱nj níꞌ a.

³ Dan me se nataꞌ núj rihaan maꞌa̱n nij soj cheꞌé se vaa queneꞌen núj do̱ꞌ, cheꞌé se vaa cuno núj do̱ꞌ, cheꞌé rej caꞌve̱e cunu̱u rcuaꞌa̱a̱n soj ga̱ núj, ne̱ dan me se cunu̱u rcuaꞌa̱a̱n níꞌ ga̱ Rej níꞌ Yaꞌanj ga̱ Taꞌníí soꞌ Jesucristó a.

⁴ Ne̱ achrón núj nana̱ nihánj rihaan yanj naya̱a̱ soj, cheꞌé rej caꞌve̱e gu̱un niha̱ꞌ uxrá ya̱ rá nimán ta̱ranꞌ níꞌ ado̱nj.

Ase vaa yaꞌan chuguu̱n roꞌ, da̱nj vaa Yaꞌanj, ne̱ caꞌve̱e cunu̱u sa̱ꞌ nimán níꞌ quiꞌya̱j soꞌ a

⁵ Ne̱ nihánj roꞌ, me nana̱ cataj xnaꞌanj Jesucristó cuno núj, ne̱ nataꞌ núj nana̱ nihánj rihaan soj, ne̱ dan me se ase vaa ꞌo̱ yaꞌan chuguu̱n vaa Yaꞌanj, ne̱ rej va̱j Yaꞌanj me se nuviꞌ rej rmi̱ꞌ rej va̱j soꞌ maꞌ.

⁶ Cheꞌé dan sese cata̱j níꞌ se vaa si̱j chéé ga̱ Yaꞌanj me níꞌ, ne̱ sese chéé níꞌ rej rmi̱ꞌ, ga̱a ne̱ tuꞌva rmaꞌa̱n níꞌ vaa ga̱a na̱nj ado̱nj. Ne̱ ne nocoꞌ níꞌ nana̱ ya̱ yoꞌ ga̱a a̱ maꞌ.

⁷ Tza̱j ne̱ sese chéé níꞌ rej chuguu̱n sa̱ꞌ rej va̱j maꞌa̱n Yaꞌanj, ne̱ veꞌé sa̱ꞌ mán ta̱ranꞌ níꞌ, ne̱ navi̱j nu̱ꞌ cacunꞌ tumé níꞌ, quiꞌya̱j ton cayanj man Jesús Taꞌníí Yaꞌanj ga̱a caviꞌ soꞌ cheꞌé níꞌ, ne̱ ꞌo̱ cunu̱u sa̱ꞌ nimán níꞌ ado̱nj.

⁸ Dan me se sese cata̱j níꞌ se vaa a̱ doj cacunꞌ ne tumé níꞌ, ne̱ dan me se tihaꞌ yuꞌunj níꞌ man maꞌa̱n níꞌ na̱nj ado̱nj. Ne̱ né si̱j aꞌmii nana̱ ya̱ me níꞌ a̱ maꞌ.

⁹ Tza̱j ne̱ sese nata̱ꞌ ya̱ níꞌ rihaan Yaꞌanj cheꞌé cacunꞌ tumé níꞌ, ne̱ nica̱ quiꞌya̱j Yaꞌanj cheꞌé níꞌ, ne̱ dan me se cata̱j soꞌ se vaa navij cacunꞌ tumé níꞌ, ne̱ tinavi̱j soꞌ nu̱ꞌ se chiꞌi̱i̱ ma̱n nimán níꞌ ado̱nj.

¹⁰ Dan me se sese cata̱j níꞌ se vaa a̱ doj ne quiꞌya̱j níꞌ cacunꞌ, ne̱ ꞌyaj níꞌ síí ne̱ man nda̱a maꞌa̱n Yaꞌanj vaa ga̱a na̱nj chugua̱nj. Ne̱ sese caꞌmi̱i̱ níꞌ da̱nj, ne̱ né si̱j uno snana̱ Yaꞌanj me níꞌ ga̱a maꞌ.