1 Corintios 9 - Triqui de San Juan Copala

No̱ xcúún Pabló cachi̱nj soꞌ se chá rihaan nij síí uno nana̱ aꞌmii natáj soꞌ, tza̱j ne̱ ne ꞌyaj soꞌ da̱nj maꞌ

¹ Neꞌen soj se vaa né mo̱zó u̱u̱n mé ꞌu̱nj maꞌ. Síí cuneꞌ Jesucristó caꞌa̱nj nata̱ꞌ snana̱ soꞌ mej, ne̱ queneꞌen yá ꞌu̱nj man Jesús Si̱j ꞌNi̱j Raꞌa man níꞌ, cheꞌé suun quiꞌyáá ꞌu̱nj canocoꞌ maꞌa̱n nij soj man Síí ꞌNi̱j Raꞌa man níꞌ ado̱nj.

² Dan me se vaa yuvii̱ taj se vaa né ya̱ síí cuneꞌ Jesucristó mé ꞌu̱nj, tza̱j ne̱ ya̱ neꞌen soj se vaa cuneꞌ Jesucristó mán ꞌu̱nj caꞌa̱nj nata̱ꞌ ꞌu̱nj snana̱ soꞌ rihaan soj a. Dan me se cheꞌé se canocoꞌ soj man Síí ꞌNi̱j Raꞌa man níꞌ, cheꞌé dan xca̱j yuvii̱ cuentá se vaa ya̱ atá ꞌu̱nj suun caꞌa̱nj nata̱ꞌ ꞌu̱nj rihaan yuvii̱ cheꞌé soꞌ ado̱nj.

³ Ne̱ ga̱a xnáꞌanj nij yuvii̱ manj sese ya̱ ya̱ cuneꞌ Jesucristó manj, ne̱ nihánj me se taj ꞌu̱nj ado̱nj:

⁴ Cheꞌé dan no̱ xcúún núj cha̱ núj á. No̱ xcúún núj coꞌo̱ núj á.

⁵ No̱ xcúún núj xca̱j núj man ꞌo̱ raꞌvij núj níí noco̱ꞌ man Cristó, caꞌa̱nj noꞌ me rej maꞌa̱n caꞌa̱nj núj á. Neꞌen soj se vaa nij tinúú Jesucristó Si̱j ꞌNi̱j Raꞌa man níꞌ do̱ꞌ, Cefas do̱ꞌ, ꞌó nij síí ata̱ suun caꞌa̱nj nata̱ꞌ snana̱ Jesucristó do̱ꞌ, vaa nica̱ ꞌo̱ ꞌo̱ nij soꞌ a.

⁶ Me cheꞌé o̱rúnꞌ vi̱j ranꞌ gue̱e̱ rój ga̱ síí cuꞌna̱j Bernabé me síí ꞌyaj suun cheꞌé rej quiri̱ꞌ rój saꞌanj cha̱ rój ga̱.

⁷ Tanuu roꞌ, oꞌ soꞌ se‑saꞌa̱nj maꞌa̱n soꞌ cheꞌé rasu̱u̱n achiin man soꞌ naꞌ. Taj maꞌ. Ne̱ síí ꞌyaj suun naa̱ uvá roꞌ, ne chá soꞌ uvá naꞌ. Chá soꞌ ado̱nj. Ne̱ síí tumé matzinj roꞌ, ne anuu soꞌ too ne̱ ꞌo soꞌ naꞌ. ꞌO soꞌ ado̱nj. Ne̱ da̱nj vaa gue̱e̱ núj, raj, tinu̱j, nocoj.

⁸ Né na̱na̱ avii raa̱ yuvii̱ me nana̱ nihánj maꞌ. ꞌO̱ cuya̱a̱n aꞌmii stucua̱nj Moisés ga̱ nana̱ nihánj a:

⁹ “Se̱ numíj so̱ꞌ tuꞌva scúj ga̱a ꞌyaj suun xoꞌ ga̱a tuguáj cheꞌé xoꞌ ꞌnúú trigó cunu̱u sa̱ꞌ ꞌnúú trigó maꞌ”, taj stucua̱nj Moisés yoꞌ a. Ina̱nj cheꞌé scúj nanó rá Yaꞌanj, rá soj naꞌ.

¹⁰ Ase cheꞌé maꞌa̱n ya̱ níꞌ aꞌmii nana̱ nihánj xa̱ꞌ. Cheꞌé maꞌa̱n ya̱ níꞌ aꞌmii nana̱ nihánj ado̱nj. Síí uxraꞌ yoꞌóó roꞌ, no̱ xcúún soꞌ ga̱a̱ nucua̱j rá soꞌ se vaa ya̱ quiri̱ꞌ soꞌ taꞌa̱j se achij rihaan yoꞌóó yoꞌ vaa güii ado̱nj. Ne̱ síí rii naa̱ roꞌ, no̱ xcúún soꞌ ga̱a̱ nucua̱j rá soꞌ se vaa quiri̱ꞌ maꞌa̱n soꞌ taꞌa̱j se rii soꞌ man rque naa̱ yoꞌ chugua̱nj.

¹¹ Ne̱ ase vaa síí ꞌyaj suun yoꞌóó roꞌ, da̱nj vaa núj cheꞌé soj, ne̱ dan me se caxríj núj snana̱ Yaꞌanj nimán soj, ne̱ cavi̱i̱ sa̱ꞌ nij soj nu̱ꞌ cavii nu̱ꞌ caꞌanj, ne̱ cheꞌé dan, sese rque̱ soj do̱j se chá ma̱n rihaan chumii̱ nihánj rihaan núj, ne̱ né se yaꞌa̱nj tihaꞌ me yoꞌ rihaan núj maꞌ.

¹² Sese no̱ xcúún ꞌó yuvii̱ cha̱ nij soꞌ se vaa rqué soj rihaan nij soꞌ, ne̱ táá a̱ núj, ne̱ doj a̱ no̱ xcúún núj cha̱ núj se vaa rqué soj rihaan núj, raj a. Tza̱j ne̱ ne achíín núj se chá rihaan soj maꞌ. ꞌO̱ se chuꞌviꞌ núj se vaa gu̱un rá yuvii̱ se vaa aꞌmii natáj núj nana̱ sa̱ꞌ cheꞌé Cristó cheꞌé saꞌanj do̱ꞌ, cheꞌé se chá do̱ꞌ, ne̱ se̱ cuchumán rá nij yuvii̱ cuno̱ nij yuvii̱ nana̱ sa̱ꞌ yoꞌ, rá núj maꞌ. ꞌO̱ se aꞌvej rá núj quira̱nꞌ núj me maꞌa̱n sayuun cheꞌé nana̱ sa̱ꞌ yoꞌ na̱nj ado̱nj.

¹³ Neꞌen soj se vaa nij síí ꞌyaj suun rihaan Yaꞌanj rque nuvií noco̱o roꞌ, chá nij soꞌ taꞌa̱j rasu̱u̱n ꞌanj nica̱j yuvii̱ rque nuvií yoꞌ a. Ne̱ nij síí racuíj man yuvii̱ rqué rasu̱u̱n rihaan Yaꞌanj roꞌ, chá maꞌa̱n nij soꞌ taꞌa̱j rasu̱u̱n yoꞌ, ne̱ dan me se no̱ xcúún nij soꞌ cha̱ nij soꞌ rasu̱u̱n yoꞌ ado̱nj.

¹⁴ Ne̱ xa̱ꞌ núj si̱j nataꞌ nana̱ sa̱ꞌ cheꞌé Cristó rihaan yuvii̱, tza̱j ne̱ caꞌneꞌ Síí ꞌNi̱j Raꞌa man níꞌ suun se vaa cha̱ núj se vaa rque̱ yuvii̱ rihaan núj cheꞌé se‑su̱u̱n núj suun nataꞌ nana̱ sa̱ꞌ rihaan yuvii̱ a.

¹⁵ Tza̱j ne̱ a̱ ꞌó güii ne qui̱ꞌyáj da̱nj maꞌ. Né cheꞌe̱ se me raj rque̱ soj rasu̱u̱n rihanj me cachronj nana̱ nihánj maꞌ. ꞌO̱ se nda̱ꞌ se cavij, tza̱j ne̱ se̱ guun raj daj chiha̱a̱ míj rque̱ soj saꞌanj manj maꞌ. Sese ta̱ꞌaa ꞌu̱nj saꞌanj, ne̱ cata̱j yuvii̱ se vaa tuꞌva rma̱ꞌán ꞌu̱nj taj ꞌu̱nj se vaa se̱ taꞌaa ꞌu̱nj saꞌanj cheꞌé se‑su̱u̱n ꞌu̱nj, ne̱ cheꞌé dan daj chiha̱a̱ míj se̱ quiꞌyáj da̱nj maꞌ.

¹⁶ Dan me se aꞌmii natáj ꞌu̱nj nana̱ sa̱ꞌ cheꞌé Cristó, tza̱j ne̱ se̱ caꞌmii xta̱ꞌ ꞌu̱nj cheꞌé suun yoꞌ maꞌ. Ma̱an se suun caꞌneꞌ Yaꞌanj rihaan ꞌu̱nj me suun yoꞌ, ne̱ sese se̱ caꞌmii natáj ꞌu̱nj nana̱ sa̱ꞌ yoꞌ, ga̱a ne̱ qui̱ránꞌ ꞌu̱nj cacunꞌ noco̱o ndoꞌo ga̱a na̱nj ado̱nj.

¹⁷ Sese gu̱un niha̱ꞌ raj qui̱ꞌyáá ꞌu̱nj suun caꞌneꞌ Yaꞌanj rihanj, ne̱ na̱ruꞌvee Yaꞌanj rihanj a. Tza̱j ne̱ caꞌve̱e se ne ga̱a̱ niha̱ꞌ raj qui̱ꞌyáá ꞌu̱nj suun cheꞌé Yaꞌanj, tza̱j ne̱ daj chiha̱a̱ míj se̱ caꞌneꞌ raj ga̱ suun aꞌmii natáj nana̱ sa̱ꞌ maꞌ.

¹⁸ Ne̱ me se na̱ruꞌvee Yaꞌanj rihanj, rá soj ga̱. ꞌO̱ se ina̱nj caꞌve̱j rá Yaꞌanj rque̱ u̱u̱n ꞌu̱nj nana̱ sa̱ꞌ rihaan yuvii̱, ne̱ cuno̱ u̱u̱n yuvii̱ nana̱ sa̱ꞌ cheꞌé Cristó caꞌmi̱i̱ natáj ꞌu̱nj, ne̱ se̱ rqué yuvii̱ saꞌanj rihanj maꞌ. Ma̱an se cuno̱ u̱u̱n nij yuvii̱, ne̱ se lu̱j rqué Yaꞌanj manj me nana̱ yoꞌ, ne̱ se̱ naruꞌvee yuvii̱ rihanj maꞌ.

¹⁹ Né mo̱zó mej rihaan yuvii̱ maꞌ. A̱ ꞌó yuvii̱ se̱ guun nucua̱j quiri̱i̱ taꞌngaꞌ rihanj, tza̱j ne̱ naquiꞌyaj yá ꞌu̱nj mozó manj rihaan cunuda̱nj yuvii̱, cheꞌé se me raj gu̱un ri̱i̱ ndoꞌo yuvii̱ canoco̱ꞌ man Cristó ado̱nj.

²⁰ Dan me se ga̱a va̱j ꞌu̱nj scaꞌnúj nij yuvii̱ israelitá, ga̱a ne̱ naquiꞌyáj manj nda̱a vaa ꞌyaj maꞌa̱n nij soꞌ, ga̱a ne̱ caꞌve̱e canoco̱ꞌ nij soꞌ stucua̱nj Cristó, cheꞌé se me raj cuno̱ nij soꞌ snana̱ Cristó na̱nj á. Ase vaa nij síí noco̱ꞌ uxrá stucua̱nj Moisés roꞌ, da̱nj vaa ma̱ꞌanj ga̱a taj xnaꞌanj ꞌu̱nj rihaan nij soꞌ cheꞌé Cristó ado̱nj. Taj cheꞌé canoco̱ꞌ ma̱ꞌanj stucua̱nj Moisés, tza̱j ne̱ ma̱an cheꞌé se me raj cuno̱ nij soꞌ snana̱ Cristó me ꞌyáj da̱nj na̱nj ado̱nj.

²¹ Ase vaa nij síí ne nocoꞌ stucua̱nj Moisés roꞌ, da̱nj vaa ꞌu̱nj ga̱a taj xnaꞌanj ꞌu̱nj rihaan nij soꞌ cheꞌé Cristó, cheꞌé se me raj cuno̱ nij soꞌ snana̱ Cristó ado̱nj. Dan me se ne ꞌyáá ꞌu̱nj na̱j guun se vaa me raj qui̱ꞌyáj maꞌ. Né se ne unó ꞌu̱nj stucua̱nj Yaꞌanj, tza̱j ne̱ unó ꞌu̱nj tucuáán cuchruj Cristó ado̱nj. ꞌO̱ se unó ꞌu̱nj rihaan Yaꞌanj, ne̱ unó ꞌu̱nj cunuda̱nj tucuáán cuchruj Cristó rihaan níꞌ ado̱nj.

²² Ase vaa nij síí ne gu̱un ya̱ rá se vaa aꞌvej rá Yaꞌanj cha̱ nij soꞌ na̱j guun rasu̱u̱n roꞌ, da̱nj vaa ma̱ꞌanj ga̱a tucuꞌyonj snana̱ Yaꞌanj rihaan nij soꞌ, cheꞌé se me raj xraan doj canoco̱ꞌ nij soꞌ man Jesucristó a. Dan me se ase vaa ꞌo̱ ꞌo̱ nij yuvii̱ roꞌ, da̱nj vaa naquiꞌyáj man ma̱ꞌanj ga̱a taj xnaꞌanj ꞌu̱nj rihaan ꞌo̱ ꞌo̱ nij soꞌ cheꞌé Cristó, ga̱a ne̱ canoco̱ꞌ taꞌa̱j ꞌo̱ ꞌo̱ nij yuvii̱ man Cristó, qui̱ꞌyáj ado̱nj.

²³ Ina̱nj da̱nj ꞌyáá ꞌu̱nj ga̱ nana̱ sa̱ꞌ cheꞌé Cristó, ga̱a ne̱ cavi̱i̱ sa̱ꞌ ma̱ꞌanj, quiꞌya̱j nana̱ sa̱ꞌ yoꞌ, raj a.

²⁴ Neꞌen soj se vaa nij síí unánj tico tuviꞌ roꞌ, nucua̱j unánj cunuda̱nj nij soꞌ, tza̱j ne̱ o̱rúnꞌ tuviꞌ nij soꞌ ꞌyaj canaán ado̱nj. Dan me se ase vaa ꞌyaj síí ꞌyaj canaán roꞌ, da̱nj quiꞌya̱j soj cheꞌé Cristó, ga̱a ne̱ quiꞌya̱j canaán soj, ne̱ cavi̱i̱ sa̱ꞌ soj á.

²⁵ Dan me se síí me rá quiꞌya̱j canaán ga̱a tico nii roꞌ, tumé uxrá soꞌ man maꞌa̱n soꞌ da̱j quiꞌya̱j soꞌ, ne̱ se̱ náj quiꞌya̱j rmaꞌa̱n soꞌ maꞌ. ꞌO̱ se me rá soꞌ gu̱un nucua̱j soꞌ quiꞌya̱j canaán soꞌ ꞌo̱ cachriin coj cu̱nuû raa̱ soꞌ, tza̱j ne̱ vaa güii canaco̱o̱ yoꞌ na̱nj ado̱nj. Tza̱j ne̱ se rque̱ Yaꞌanj man níꞌ roꞌ, ꞌo̱ ga̱a̱ yoꞌ nu̱ꞌ cavii nu̱ꞌ caꞌanj, ne̱ cheꞌé dan tu̱mé uxrá níꞌ man maꞌa̱n níꞌ na̱nj á.

²⁶ Xa̱ꞌ síí unánj tico tuviꞌ, tza̱j ne̱ neꞌen soꞌ me rej cuchi̱ꞌ soꞌ, ne̱ ne ꞌanj soꞌ na̱j guun chrej maꞌ. Ne̱ da̱nj ꞌyaj gue̱e̱ ꞌu̱nj na̱nj á. Ne̱ síí tico tuviꞌ cuxruꞌ, tza̱j ne̱ oꞌ soꞌ tuviꞌ soꞌ, ne̱ ne oꞌ soꞌ rihaan nana̱ u̱u̱n maꞌ. Ne̱ da̱nj ꞌyaj gue̱e̱ ꞌu̱nj na̱nj á.

²⁷ Dan me se síí tico tuviꞌ cuxruꞌ roꞌ, me se oꞌ soꞌ man maꞌa̱n soꞌ, cheꞌé se me rá soꞌ ga̱a̱ sca̱ꞌ nee̱ man soꞌ, ga̱a ne̱ quiꞌya̱j canaán soꞌ man tuviꞌ soꞌ a. Uxrá tumé soꞌ man nee̱ man maꞌa̱n soꞌ, ne̱ da̱nj vaa tumej man ma̱ꞌanj a. Dan me se caꞌmii natáj ꞌu̱nj rihaan ꞌó yuvii̱ se vaa canoco̱ꞌ nij soꞌ man Cristó, ne̱ naꞌvej raj cata̱j Cristó se vaa ne canoco̱ꞌ ya̱ ma̱ꞌanj man soꞌ maꞌ.