1 Corintios 6 - Triqui de San Juan Copala

Se̱ caꞌmii níꞌ cheꞌé cacunꞌ ma̱n scaꞌnúj níꞌ rihaan nij cuese̱ ma̱n chiháán níꞌ maꞌ

¹ Ga̱a anó tuviꞌ soj ga̱ tinúú soj, ne̱ ꞌanj soj uchruj soj cacunꞌ rihaan cuese̱ síí ne nocoꞌ man Cristó ne̱ ne ꞌanj soj rihaan ꞌo̱ tuviꞌ nij síí noco̱ꞌ man Cristó maan chugua̱nj. Nij uxrá vaa ꞌyaj soj da̱nj na̱nj á.

² Ne̱ ne neꞌen soj se vaa vaa güii, ne̱ caꞌne̱ꞌ níꞌ si̱j noco̱ꞌ man Cristó cunuda̱nj cacunꞌ cheꞌé cunuda̱nj nij yuvii̱ ma̱n rihaan chumii̱ nihánj a̱ naꞌ. Sese caꞌne̱ꞌ soj cacunꞌ cheꞌé cunuda̱nj chumii̱ vaa güii, ga̱a ne̱ me cheꞌé se̱ guun nucua̱j soj caꞌne̱ꞌ soj cacunꞌ cheꞌé cacunꞌ leꞌe̱j nii cuano̱ ga̱.

³ Ne neꞌen soj se vaa vaa güii, ne̱ nda̱a cheꞌé ya̱ se‑mo̱zó Yaꞌanj caꞌne̱ꞌ níꞌ cacunꞌ a̱ naꞌ. Cheꞌé dan me ya̱ gu̱un nucua̱j ya̱ soj caꞌne̱ꞌ soj cacunꞌ cheꞌé nij síí ma̱n rihaan chumii̱ nihánj cuano̱ ado̱nj.

⁴ Cheꞌé dan, sese vaa cacunꞌ scaꞌnúj soj rihaan chumii̱ nihánj, ne̱ me cheꞌé caꞌa̱nj cuchru̱j soj cacunꞌ rihaan nij síí ne nocoꞌ man Cristó caꞌne̱ꞌ nij soꞌ cacunꞌ cheꞌé tinúú soj ga̱.

⁵ Dan me se vaa cheꞌé gu̱un naꞌa̱j ya̱ soj cheꞌé se vaa ꞌyaj soj na̱nj á. Nuviꞌ a̱ ꞌó tinúú soj síí gu̱un nucua̱j naquiꞌya̱j cu̱u cheꞌé tinúú soj síí ma̱n scaꞌnúj soj a̱ naꞌ.

⁶ Tza̱j ne̱ nuveé, ma̱an se ina̱nj anó tuviꞌ soj ga̱ tinúú soj maꞌ. Nda̱a ꞌanj soj uchruj soj cacunꞌ ꞌyaj tinúú soj rihaan nij síí ne nocoꞌ man Cristó, ne̱ nij uxrá vaa ꞌyaj soj ado̱nj.

⁷ Cheꞌé yan anó tuviꞌ soj ga̱ tinúú soj me se a̱j tumé uxrá soj cacunꞌ vaa na̱nj ado̱nj. A̱j quiriꞌ nu̱ꞌ soj, ne̱ sa̱ꞌ doj sese caꞌne̱ꞌ gue̱e̱ rá soj quiꞌya̱j chiꞌi̱i̱ tinúú soj man soj do̱ꞌ, caꞌne̱ꞌ rá soj quiꞌya̱j itu̱u̱ tinúú soj man siꞌyaj soj do̱ꞌ na̱nj á.

⁸ Tza̱j ne̱ naꞌvej rá soj quiꞌya̱j soj da̱nj maꞌ. Tana̱nj a̱ maꞌa̱n soj ꞌyaj chiꞌi̱i̱ man tinúú soj do̱ꞌ, ꞌyaj itu̱u̱ soj siꞌyaj tinúú soj do̱ꞌ na̱nj xa̱ꞌ.

⁹ Ne neꞌen soj se vaa nij síí chiꞌi̱i̱ roꞌ, se̱ cayáán nij soꞌ rej uun chij Yaꞌanj a̱ naꞌ. Se̱ guun tiha̱ꞌ yuꞌunj soj man maꞌa̱n soj maꞌ. ꞌO̱ se síí otoj ga̱ ꞌó yuvii̱ né ni̱ca̱ me do̱ꞌ, síí aráj gue̱e̱ rihaan yaꞌanj ne vaa iꞌna̱ꞌ do̱ꞌ, síí otoj ga̱ nica̱ tuviꞌ do̱ꞌ, chii cha̱na̱ do̱ꞌ, síí otoj ga̱ chii cha̱na̱ do̱ꞌ,

¹⁰ síí itu̱u̱ do̱ꞌ, síí uun xco̱j ruva̱a̱ rá do̱ꞌ, síí xno̱ do̱ꞌ, síí aꞌmii nachriꞌ niꞌya̱j tuviꞌ do̱ꞌ, síí tihaꞌ yuꞌunj man tuviꞌ do̱ꞌ, se̱ cayáán nij soꞌ rej gu̱un chij Yaꞌanj a̱ maꞌ.

¹¹ Dan me se da̱nj ina̱nj quiꞌyaj taꞌa̱j soj ga̱a rque̱, tza̱j ne̱ ya̱j me se xꞌnéj cacunꞌ ta̱j xráá soj, ne̱ cunuu sa̱ꞌ nimán soj, ne̱ cunuu nica̱ nimán soj rihaan Yaꞌanj, cheꞌé se‑chuvi̱i Jesús Si̱j ꞌNi̱j Raꞌa man níꞌ do̱ꞌ, cheꞌé Nimán Yaꞌanj si̱j noco̱ꞌ níꞌ man do̱ꞌ, cuano̱ ado̱nj.

Ne nó xcúún níꞌ quiꞌya̱j níꞌ cacunꞌ ga̱ chana̱ maꞌ

¹² Dan me se taj ya̱ uún nii a: “Síí vaa yaꞌnúj rihaan mej a. Caꞌve̱e qui̱ꞌyáá ꞌu̱nj na̱j guun rasu̱u̱n me raj qui̱ꞌyáj á.” Tza̱j ne̱ se̱ cavii sa̱ꞌ ꞌu̱nj, quiꞌya̱j na̱j guun rasu̱u̱n me raj qui̱ꞌyáj a̱ maꞌ. Dan me se ya̱ uxrá síí vaa yaꞌnúj rihaan mej, tza̱j ne̱ se̱ caꞌvej raj gu̱un chij a̱ doj rasu̱u̱n rihanj maꞌ.

¹³ Dan me se taj ya̱ uún nii a: “Vaa rque níꞌ a. Cheꞌé dan cha̱ níꞌ a. Ina̱nj cheꞌé rque níꞌ roꞌ, vaa se chá yoꞌ a. Ne̱ cheꞌé se chá yoꞌ vaa rque níꞌ uún a”, taj uún nii a. Dan me se ya̱ uxrá ado̱nj. Da̱nj vaa ro̱j yoꞌ na̱nj á. Tza̱j ne̱ Yaꞌanj quiꞌya̱j navi̱j ro̱j yoꞌ na̱nj chugua̱nj. Dan me se xa̱ꞌ nee̱ man níꞌ, tza̱j ne̱ né se quiꞌya̱j cacunꞌ ga̱ chana̱ me yoꞌ maꞌ. Se ca̱yáán ga̱ Síí ꞌNi̱j Raꞌa man níꞌ me yoꞌ, ne̱ rej ya̱nj soꞌ me uún yoꞌ chugua̱nj.

¹⁴ Dan me se nda̱ꞌ rá se vaa naquiꞌyaj iꞌna̱ꞌ Yaꞌanj man Síí ꞌNi̱j Raꞌa man níꞌ ga̱a caviꞌ soꞌ roꞌ, da̱nj gu̱un nucua̱j Yaꞌanj quiꞌya̱j uún soꞌ se vaa cunu̱u iꞌna̱ꞌ uún maꞌa̱n níꞌ na̱nj ado̱nj.

¹⁵ Ne̱ ne neꞌen soj se vaa nee̱ man nij soj me se ase vaa nee̱ man Cristó roꞌ, vaa nee̱ man soj naꞌ. Dan me se caꞌve̱e ni̱caj níꞌ nee̱ man Cristó, ne̱ cunu̱u rcuaꞌa̱a̱n yoꞌ ga̱ chana̱ niha̱ꞌ rá ga̱ chii, quiꞌya̱j níꞌ naꞌ. Se̱ caꞌvee quiꞌya̱j níꞌ da̱nj a̱ maꞌ.

¹⁶ Dan me se ne neꞌen soj se vaa síí otoj ga̱ chana̱ niha̱ꞌ rá ga̱ chii roꞌ, nuu ꞌo̱ nee̱ man soꞌ ga̱ chana̱ yoꞌ naꞌ. Dan me se ase vaa o̱rúnꞌ yuvii̱ vaa soꞌ ga̱ chana̱ yoꞌ na̱nj chugua̱nj. Danj Yaꞌanj taj a: “Ase vaa o̱rúnꞌ yuvii̱ roꞌ, da̱nj ga̱a̱ ro̱j soꞌ a.” Da̱nj aꞌmii Danj Yaꞌanj na̱nj á.

¹⁷ Tza̱j ne̱ sese guun tuvi̱ꞌ níꞌ ga̱ Síí ꞌNi̱j Raꞌa man níꞌ, ne̱ ꞌo̱ vaa nimán níꞌ ga̱ soꞌ ado̱nj.

¹⁸ Tu̱mé uxrá soj man soj se̱ gaa na̱nj coto̱j soj ga̱ ꞌó yuvii̱ né ni̱ca̱ soj me á. Na̱j guun cacunꞌ quiꞌya̱j maꞌa̱n yuvii̱ roꞌ, né cacu̱nꞌ quiꞌya̱j yuvii̱ man maꞌa̱n nee̱ man yuvii̱ me cacunꞌ yoꞌ maꞌ. Tza̱j ne̱ sese quiꞌya̱j ꞌo̱ yuvii̱ cacunꞌ ga̱ ꞌó yuvii̱ sese né ni̱ca̱ yuvii̱ me, ne̱ yoꞌ me cacunꞌ quiꞌya̱j yuvii̱ man maꞌa̱n nee̱ man yuvii̱ ado̱nj.

¹⁹ Ne̱ ne neꞌen soj se vaa ase vaa nuvií sa̱ꞌ ndoꞌo vaa nee̱ man soj, ne̱ rej ya̱nj Nimán Yaꞌanj me yoꞌ a̱ naꞌ. Dan me se Yaꞌanj me síí rqué nee̱ man soj rihaan soj, ne̱ né siꞌya̱j maꞌa̱n soj me nee̱ man soj a̱ maan ado̱nj.

²⁰ Dan me se vaa ndoꞌo yuꞌvee nó soj rihaan Yaꞌanj, ne̱ noco̱o uxrá naruꞌvee soꞌ ga̱a quiránj soꞌ man soj, ne̱ cheꞌé dan no̱ xcúún soj quiꞌya̱j nee̱ man soj se‑su̱u̱n Yaꞌanj, ne̱ veꞌé ndoꞌo caꞌmi̱i̱ yuvii̱ cheꞌé Yaꞌanj, quiꞌya̱j soj ado̱nj.