1 Corintios 5 - Triqui de San Juan Copala

Caꞌneꞌ Pabló suun rihaan nij síí ma̱n Corinto se vaa quiri̱i̱ yaníj nij soꞌ man ꞌo̱ síí tumé cacunꞌ a

¹ Dan me se nataꞌ nii rihanj se vaa ꞌni̱j ꞌo̱ síí tumé ndoꞌo cacunꞌ scaꞌnúj nij soj, ne̱ cacunꞌ chiꞌi̱i̱ ndoꞌo me yoꞌ, ne̱ a̱ nij síí ne nocoꞌ man Yaꞌanj ne ꞌyaj da̱nj maꞌ. Dan me se vaa ꞌo̱ síí otoj ga̱ nii caꞌa̱a̱n soꞌ, taj nii asânj.

² Me cheꞌé aꞌmii xta̱ꞌ soj ga̱. Me cheꞌé ne nanó rá soj ga̱. Me cheꞌé ne quiri̱i̱ yaníj soj man síí tumé cacunꞌ ꞌni̱j scaꞌnúj soj ga̱.

^3-4 Nuviꞌ ya̱ xa̱ꞌ ꞌu̱nj ne ga̱ soj cuano̱, tza̱j ne̱ nuchruj ra̱a̱ ndoꞌoj cheꞌé soj, ne̱ nana̱ nihánj roꞌ, aꞌmii ꞌu̱nj, ne̱ ase uun rá soj ga̱a nej ga̱ soj roꞌ, da̱nj gu̱un rá soj cuno̱ soj nana̱ nihánj á. Cheꞌé dan asa̱ꞌ cunuu chre̱ꞌ soj, ne̱ xca̱j soj cuentá cheꞌé se ya̱ nicu̱nꞌ nimán ꞌu̱nj scaꞌnúj soj, quiꞌya̱j Jesús Si̱j ꞌNi̱j Raꞌa man níꞌ, ne̱ cheꞌé Jesús Si̱j ꞌNi̱j Raꞌa man níꞌ taj xnaꞌanj ꞌu̱nj rihaan soj se vaa ya̱ tumé ndoꞌo snóꞌo yoꞌ cacunꞌ,

⁵ ne̱ taj xnaꞌanj ꞌu̱nj rihaan soj se vaa ta̱cuachén soj man síí tumé cacunꞌ yoꞌ rihaan Síí Chre̱e, ga̱a ne̱ quira̱nꞌ ndoꞌo nee̱ man soꞌ sayuun, quiꞌya̱j Síí Chre̱e, ga̱a ne̱ sese xca̱j sa̱ꞌ soꞌ cuentá, ne̱ asa̱ꞌ caꞌnaꞌ Síí ꞌNi̱j Raꞌa man níꞌ caꞌne̱ꞌ soꞌ cacunꞌ cheꞌé yuvii̱, ga̱a ne̱ nani̱i̱ nimán soꞌ, quiꞌya̱j Síí ꞌNi̱j Raꞌa man níꞌ a.

⁶ Ne chiha̱nꞌ uxrá vaa ga̱a aꞌmii xta̱ꞌ soj maꞌ. Neꞌen soj se vaa do̱j tzínꞌ levadura ꞌyaj naraa nana̱ rque noco̱o ndoꞌo cunj ado̱nj. Ne̱ ase vaa levadura rihaan cunj yoꞌ roꞌ, da̱nj vaa o̱rúnꞌ síí ꞌyaj cacunꞌ rihaan soj, ne̱ dan me se quiri̱ꞌ queꞌe̱e̱ soj, quiꞌya̱j o̱rúnꞌ síí tumé cacunꞌ ꞌni̱j scaꞌnúj soj ado̱nj.

⁷ Cheꞌé dan me quiri̱i̱ yaníj soj nu̱ꞌ se nij ꞌni̱j scaꞌnúj soj, ga̱a ne̱ ase vaa cunj naca̱ sa̱ꞌ roꞌ, da̱nj ga̱a̱ soj, ne̱ se̱ guun qui̱ꞌnij se nij scaꞌnúj soj a̱ maꞌ. Ya̱ vaa sa̱ꞌ soj, quiꞌyaj Cristó, ne̱ dan me se a̱j caviꞌ soꞌ cheꞌé níꞌ, ne̱ ase vaa caráán matzinj rihaan sayuun cheꞌé nij yuvii̱ israelitá ga̱a naá roꞌ, da̱nj vaa caráán Cristó rihaan nu̱ꞌ sayuun cheꞌé níꞌ, ne̱ se̱ quiranꞌ níꞌ sayuun cheꞌé cacunꞌ tumé níꞌ a̱ maꞌ.

⁸ Cheꞌé dan, ase vaa navij rá nij yuvii̱ israelitá Chaꞌanj Pascuá chaꞌanj aviꞌ matzinj cheꞌé nij soꞌ roꞌ, da̱nj ga̱a̱ veꞌé ndoꞌo quiꞌya̱j maꞌa̱n níꞌ rihaan Yaꞌanj cuano̱, cheꞌé se caviꞌ Cristó cheꞌé níꞌ á. Dan me se yuvii̱ israelitá roꞌ, riꞌíj nij soꞌ nu̱ꞌ levadura ma̱n tucuá nij soꞌ ga̱a navij rá nij soꞌ Chaꞌanj Pascuá, ne̱ ꞌo̱ cuya̱a̱n quiꞌya̱j níꞌ ga̱ nij soꞌ, quiriꞌi̱j níꞌ nu̱ꞌ se chiꞌi̱i̱ ma̱n nimán níꞌ á. Se̱ quiꞌyaj níꞌ se nij quiꞌyaj níꞌ ga̱a rque̱ maꞌ. Tana̱nj ina̱nj nana̱ ya̱ caꞌmi̱i̱ níꞌ, ne̱ ina̱nj tucuáán ya̱ quiꞌya̱j níꞌ á.

Sese ꞌyaj ndoꞌo ꞌo̱ síí taj se vaa me soꞌ tinúú níꞌ cacunꞌ, ne̱ se̱ chá níꞌ ga̱ soꞌ maꞌ

⁹ A̱j caꞌnéé ꞌu̱nj nana̱ rihaan soj rihaan ꞌó yanj se vaa se̱ cunuu chre̱ꞌ soj ga̱ nij síí otoj ga̱ ꞌó yuvii̱ sese né ni̱ca̱ nij soꞌ me maꞌ.

¹⁰ Tza̱j ne̱ ne caꞌmi̱i̱ ꞌu̱nj cheꞌé síí noco̱ꞌ se‑chre̱j chumii̱ nihánj síí ne nocoꞌ man Cristó maꞌ. Dan me se nij soꞌ me síí otoj ga̱ ꞌó yuvii̱ né ni̱ca̱ nij soꞌ me, ne̱ uun ndoꞌo rá nij soꞌ quiꞌya̱j canaán nij soꞌ saꞌanj, ne̱ ꞌyaj itu̱u̱ nij soꞌ siꞌyaj tuviꞌ nij soꞌ, ne̱ aráj gue̱e̱ nij soꞌ rihaan yaꞌanj ne vaa iꞌna̱ꞌ uún a. Tza̱j ne̱ sese me rá soj gu̱un yaníj soj ga̱ nij síí ꞌyaj cacunꞌ ma̱n rihaan chumii̱ nihánj, ne̱ me rej caꞌa̱nj soj ga̱. ꞌO̱ se ma̱n nij soꞌ rihaan nu̱ꞌ cachra̱ꞌ chumii̱ nihánj, ne̱ se̱ caꞌvee cu̱riha̱nj soj rihaan nij soꞌ rihaan chumii̱ nihánj maꞌ.

¹¹ Ma̱an se cheꞌé soj cachrón ꞌu̱nj nana̱ nihánj se vaa se̱ guun cunu̱u chre̱ꞌ soj ga̱ ꞌo̱ síí taj rihaan soj se vaa tinúú níꞌ me soꞌ, tza̱j ne̱ ne ya̱ nocoꞌ soꞌ man Cristó, ne̱ ꞌni̱j soꞌ scaꞌnúj soj maꞌ. Dan me se sese tinúú soj me soꞌ, taj ꞌo̱ soꞌ, tza̱j ne̱ sese otoj soꞌ ga̱ ꞌó yuvii̱ né ni̱ca̱ soꞌ me do̱ꞌ, sese uun ndoꞌo rá soꞌ quiꞌya̱j canaán soꞌ saꞌanj do̱ꞌ, sese aráj gue̱e̱ soꞌ rihaan yaꞌanj ne vaa iꞌna̱ꞌ do̱ꞌ, sese aꞌmii nachriꞌ soꞌ niꞌya̱j soꞌ tuviꞌ soꞌ do̱ꞌ, sese síí xno̱ me soꞌ do̱ꞌ, sese síí itu̱u̱ me soꞌ do̱ꞌ, ne̱ se̱ cunuu chre̱ꞌ soj ga̱ soꞌ ne̱ a̱ se̱ chá soj ga̱ soꞌ a̱ maꞌ.

^12-13 Dan me se ne nó xcúún ꞌu̱nj caꞌne̱ꞌ ꞌu̱nj cacunꞌ cheꞌé nij síí ne nocoꞌ man Yaꞌanj maꞌ. Maꞌa̱n Yaꞌanj nó xcúún caꞌne̱ꞌ cacunꞌ cheꞌé nij soꞌ ado̱nj. Tza̱j ne̱ no̱ xcúún soj caꞌne̱ꞌ soj cacunꞌ cheꞌé nij síí nuu chre̱ꞌ ga̱ soj, ne̱ Danj Yaꞌanj taj a: “Quiri̱i̱ yaníj soj man síí chiꞌi̱i̱ ꞌni̱j scaꞌnúj maꞌa̱n soj á.” Da̱nj taj Danj Yaꞌanj ado̱nj.