1 Corintios 4 - Triqui de San Juan Copala

Síí ꞌNi̱j Raꞌa man níꞌ me síí naquiꞌya̱j cu̱u man níꞌ vaa güii a

¹ Dan me se me rá núj xca̱j cunuda̱nj yuvii̱ cuentá se vaa si̱j nu̱u̱ rihaan Cristó me núj, ne̱ no̱ xcúún núj nata̱ꞌ núj nana̱ sa̱ꞌ yuve̱ me rá Yaꞌanj ti̱haa̱n naca̱ Yaꞌanj man yuvii̱ na̱nj á.

² Dan me se no̱ xcúún núj quiꞌya̱j núj nu̱ꞌ suun caꞌneꞌ Yaꞌanj rihaan núj, ne̱ se̱ caꞌvee caꞌne̱ꞌ rá ꞌo̱ ꞌo̱ núj ga̱ suun yoꞌ a̱ maꞌ.

³ Tza̱j ne̱ caꞌve̱e se naquiꞌya̱j cu̱u soj manj do̱ꞌ, caꞌve̱e se na̱j guun cuese̱ naquiꞌya̱j cu̱u cheꞌej do̱ꞌ, tza̱j ne̱ taj se ꞌyaj maꞌ. ꞌO̱ se a̱ ma̱ꞌán ꞌu̱nj ne naquiꞌya̱j cuú ꞌu̱nj da̱j ꞌyáj maꞌ.

⁴ A̱ ꞌó cacunꞌ ne tumé ꞌu̱nj cuano̱, rá ꞌu̱nj, tza̱j ne̱ dan me se ne neꞌén ꞌu̱nj da̱j vaa man ma̱ꞌanj maꞌ. ꞌO̱ se o̱rúnꞌ Síí ꞌNi̱j Raꞌa man níꞌ me síí no̱ xcúún naquiꞌya̱j cu̱u cheꞌej na̱nj ado̱nj.

⁵ Cheꞌé dan se̱ guun naquiꞌya̱j cu̱u soj cheꞌé yuvii̱ maꞌ. Ma̱an se na̱ꞌvi̱j soj caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj na̱nj á. Cuano̱ nihánj me se ne neꞌen sa̱ꞌ níꞌ da̱j vaa ꞌyaj ꞌo̱ ꞌo̱ yuvii̱, tza̱j ne̱ asa̱ꞌ caꞌnaꞌ Síí ꞌNi̱j Raꞌa man níꞌ, ne̱ ti̱haa̱n soꞌ rihaan níꞌ da̱j vaa rá nimán ꞌo̱ ꞌo̱ yuvii̱ ma̱n rihaan chumii̱ nihánj, ne̱ sese sa̱ꞌ vaa rá nimán ꞌo̱ soꞌ, ne̱ maꞌa̱n Yaꞌanj cata̱j se vaa sa̱ꞌ quiꞌyaj soꞌ ado̱nj.

Ne nocoꞌ sa̱ꞌ nij síí ma̱n Corinto nana̱ tucuꞌyón Pabló man nij soꞌ a

⁶ Dan me se a̱j cataj xnaꞌanj ꞌu̱nj rihaan soj, tinu̱j, nocoj, se vaa maꞌa̱n Cristó naquiꞌya̱j cu̱u cheꞌé rój ga̱ Apolos, ne̱ me raj queneꞌe̱n soj man rój, ne̱ xca̱j soj cuentá se vaa no̱ xcúún soj cuno̱ soj ina̱nj nana̱ a̱j cataj xnaꞌanj Yaꞌanj rihaan níꞌ nana̱ no̱ rihaan yanj á. Dan me se se̱ cataj soj se vaa sa̱ꞌ doj vaa ꞌo̱ tuviꞌ núj rihaan ꞌó tuviꞌ núj maꞌ.

⁷ Sa̱ꞌ doj vaa so̱ꞌ rihaan ꞌó yuvii̱, rá so̱ꞌ naꞌ. Me síí cataj rihaan so̱ꞌ se vaa sa̱ꞌ doj vaa so̱ꞌ ga̱. Sese vaa ꞌo̱ suun aꞌvee sa̱ꞌ ꞌyáá so̱ꞌ, ne̱ me síí racuíj mán so̱ꞌ ꞌyáá so̱ꞌ, rá so̱ꞌ ga̱. Ma̱ꞌán so̱ꞌ ꞌyaj naꞌ. Ase Yaꞌanj racuíj mán so̱ꞌ xa̱ꞌ. Sese Yaꞌanj me síí racuíj mán so̱ꞌ sa̱ꞌ ꞌyáá so̱ꞌ ꞌo̱ suun, ne̱ taj cheꞌé gu̱un xta̱ꞌ nimán so̱ꞌ cata̱j so̱ꞌ se vaa ma̱ꞌán so̱ꞌ ꞌyaj sa̱ꞌ suun yoꞌ maꞌ.

⁸ Ne̱ xa̱ꞌ soj, tza̱j ne̱ a̱ ꞌó rasu̱u̱n ne achiin man soj, rá soj, ne̱ ruꞌvee me soj, rá soj, ne̱ rii taꞌngaꞌ ndoꞌo soj, rá soj a. Ne̱ xa̱ꞌ núj, tza̱j ne̱ a̱ doj ne rii taꞌngaꞌ núj, rá soj a. Sese ya̱ rii taꞌngaꞌ soj, ne̱ gu̱un niha̱ꞌ uxrá raj, ne̱ nda̱a a̱ núj quiri̱i̱ taꞌngaꞌ ga̱ soj vaa tza̱j asanj.

⁹ Ne̱ xa̱ꞌ núj si̱j ata̱ suun caꞌa̱nj nata̱ꞌ snana̱ Jesucristó, tza̱j ne̱ ase vaa ꞌo̱ juese̱ cataj se vaa no̱ xcúún ꞌo̱ soꞌ cavi̱ꞌ soꞌ vaa núj, ne̱ nocoꞌ núj rej xco̱ ꞌó nij síí va̱j cavi̱ꞌ rá ꞌu̱nj a. Ne̱ niꞌya̱j ndoꞌo nij síí ma̱n rihaan chumii̱ nihánj niꞌya̱j maꞌa̱n nij se‑mo̱zó Yaꞌanj niꞌya̱j ndoꞌo man núj cheꞌé se nichrunꞌ cavi̱ꞌ núj a.

¹⁰ Dan me se ase vaa síí niꞌyo̱n vaa núj rihaan chumii̱ nihánj, cheꞌé Cristó, tza̱j ne̱ síí cu̱u raa̱ me soj cheꞌé Cristó, rá soj a. Ne̱ síí nucua̱j ndoꞌo me soj, rá soj, tza̱j ne̱ núj me se síí ninaj me núj a. Ne̱ veꞌé ndoꞌo aráj cochro̱j yuvii̱ rihaan soj, tza̱j ne̱ xa̱ꞌ maꞌa̱n núj, tza̱j ne̱ tana̱nj a̱ nachriꞌ yuvii̱ niꞌya̱j yuvii̱ man núj a.

¹¹ Nu̱ꞌ caꞌnaꞌ me se achiin se chá rihaan núj do̱ꞌ, achiin se coꞌo̱ núj do̱ꞌ, achiin yatzíj quita̱j xráá núj do̱ꞌ á. Tucuxruꞌ ndoꞌo nii man núj, ne̱ taj va̱j veꞌ tucuá núj a.

¹² Dan me se ꞌyaj suun ndoꞌo núj, ga̱a ne̱ aꞌvee riꞌ núj se achiin man núj a. Aꞌmii chre̱e nii niꞌya̱j nii man núj, tza̱j ne̱ aꞌmii núj nana̱ lu̱j rihaan nij síí aꞌmii chre̱e niꞌya̱j man núj a. Ne̱ ꞌyaj nii sayuun man núj, tza̱j ne̱ ne aꞌneꞌ rá núj ga̱ suun vaa rihaan núj a̱ maan ado̱nj.

¹³ Nana̱ nij aꞌmii nii cheꞌé núj, tza̱j ne̱ nana̱ sa̱ꞌ aꞌmii núj ga̱ nij síí aꞌmii nij cheꞌé núj a. Ase vaa nacaj naꞌnuꞌ nii rihaan cunuda̱nj rasu̱u̱n ma̱n rihaan chumii̱ roꞌ, da̱nj vaa núj rihaan chumii̱ nihánj nu̱ꞌ caꞌnaꞌ, ne̱ veé da̱nj vaa núj nda̱a cuano̱ nihánj na̱nj ado̱nj.

¹⁴ Dan me se quisíj cachrón ꞌu̱nj nana̱ nihánj naya̱a̱ soj, ne̱ né cheꞌe̱ se me raj gu̱un naꞌa̱j soj me cachronj nana̱ nihánj maꞌ. ꞌO̱ se ase vaa taꞌníj vaa soj rihanj, tinu̱j, nocoj, ne̱ cheꞌé se ꞌe̱e̱ raj man soj, cheꞌé dan me raj narque̱j chrej sa̱ꞌ man soj na̱nj ado̱nj.

¹⁵ Caꞌve̱e se cuchi̱ꞌ chi̱ꞌ míj síí tu̱cuꞌyón cheꞌé Cristó rihaan soj, tza̱j ne̱ asinoj me síí cataj xnaꞌanj nana̱ sa̱ꞌ cheꞌé soꞌ rihaan soj á. Canocoꞌ soj man Cristó Jesús ga̱ ꞌu̱nj, ne̱ cheꞌé dan ase vaa rej soj vaa ꞌu̱nj ado̱nj.

¹⁶ Cheꞌé dan me rqueé ꞌu̱nj man soj se vaa ase vaa ꞌyáá ꞌu̱nj roꞌ, da̱nj ga̱a̱ quiꞌya̱j gue̱e̱ soj uún a.

¹⁷ Cheꞌé dan caꞌne̱j ꞌu̱nj man síí cuꞌna̱j Timoteo cuchi̱ꞌ soꞌ rihaan soj, ne̱ síí noco̱ꞌ man Síí ꞌNi̱j Raꞌa man níꞌ me soꞌ ga̱ ꞌu̱nj, ne̱ cheꞌé dan ase vaa taꞌníj vaa soꞌ a. ꞌE̱e̱ raj man soꞌ, ne̱ nucua̱j raj man soꞌ na̱nj ado̱nj. Cata̱j xnaꞌanj uún soꞌ rihaan soj nu̱ꞌ tucuáán noco̱ꞌ ꞌu̱nj cheꞌé Cristó Jesús, ne̱ ꞌo̱ cuya̱a̱n vaa nana̱ tu̱cuꞌyón soꞌ ga̱ nana̱ tucuꞌyón ꞌu̱nj rihaan cunuda̱nj nij xꞌneꞌ nij síí noco̱ꞌ man Cristó ma̱n cunuda̱nj nij chumanꞌ rej va̱j ꞌu̱nj a.

¹⁸ Guun cheꞌe̱ taꞌa̱j nij soj caꞌmii xta̱ꞌ nij soj, ne̱ xa̱ꞌ nij síí aꞌmii xta̱ꞌ, tza̱j ne̱ se̱ cuchiꞌ ma̱ꞌanj rihaan soj, rá nij soꞌ a.

¹⁹ Tza̱j ne̱ raꞌya̱nj ya̱ cuchi̱ꞌ ma̱ꞌanj rihaan soj, sese caꞌve̱j Yaꞌanj Si̱j ꞌNi̱j Raꞌa man níꞌ, ga̱a ne̱ né ina̱nj cheꞌé nana̱ aꞌmii xta̱ꞌ nij soꞌ xca̱j ꞌu̱nj cuentá maꞌ. ꞌO̱ se xca̱j ꞌu̱nj cuentá sese ya̱ gu̱un nucua̱j nij soꞌ quiꞌya̱j nij soꞌ nda̱a vaa taj nij soꞌ ado̱nj.

²⁰ ꞌO̱ se né cheꞌe̱ ina̱nj nana̱ aꞌmii níꞌ me neꞌen yuvii̱ se vaa uun chij Yaꞌanj nimán níꞌ maꞌ. Tana̱nj neꞌen yuvii̱ se vaa uun chij Yaꞌanj nimán níꞌ cheꞌé suun uun nucua̱j níꞌ ꞌyaj níꞌ cheꞌé Yaꞌanj ado̱nj.

²¹ Me se me rá soj qui̱ꞌyáj ga̱ soj asa̱ꞌ cuchíꞌ ꞌu̱nj rihaan soj ga̱. Me rá soj cayu̱u̱n soj qui̱ꞌyáj naꞌ. Ase me rá soj ga̱a̱ ꞌe̱e̱ rá ꞌu̱nj man soj ne̱ veꞌé caꞌmi̱j ga̱ soj xa̱ꞌ.