1 Corintios 3 - Triqui de San Juan Copala

Quiꞌyaj Pabló se‑su̱u̱n Yaꞌanj se vaa tucuꞌyón soꞌ snana̱ Yaꞌanj rihaan nij síí ma̱n Corinto a

¹ Dan me se ase vaa yuvii̱ tiha̱j guun cheꞌe̱ canocoꞌ man Cristó roꞌ, da̱nj vaa nij soj ga̱a cuchíꞌ ꞌu̱nj rihaan nij soj, tinu̱j, nocoj. ꞌO̱ se vaa niꞌyo̱n doj rá soj, ne̱ ataa doj nari̱ꞌ soj cuno̱ soj rihaan Nimán Yaꞌanj, ne̱ quiꞌyaj ndoꞌo soj se vaa me rá nee̱ man soj quiꞌya̱j soj, ne̱ cheꞌé dan ne caꞌve̱e caꞌmi̱j nana̱ nuchranꞌ doj rihaan soj a̱ maꞌ.

² Ne gu̱un nucua̱j soj cuno̱ soj nana̱ nuchranꞌ doj aꞌmii Nimán Yaꞌanj a̱ maꞌ. Ma̱an se ina̱nj nana̱ tucuꞌyón nii man xnii caꞌmii ꞌu̱nj rihaan soj, ne̱ veé da̱nj vaa soj nda̱a cuano̱ nihánj, ne̱ ne gu̱un nucua̱j soj cuno̱ soj nana̱ nuchranꞌ doj maꞌ.

³ Dan me se ꞌyaj ndoꞌo soj se vaa me rá ina̱nj nee̱ man soj quiꞌya̱j soj, ne̱ dan me se uun xco̱j ruva̱a̱ ndoꞌo rá soj niꞌya̱j soj tinúú soj, ne̱ cheꞌé dan aꞌmii anó tuviꞌ soj ga̱ tinúú soj, ne̱ ase vaa na̱j guun yuvii̱ ma̱n rihaan chumii̱ nihánj roꞌ, da̱nj vaa soj ado̱nj.

⁴ Dan me se taj ꞌo̱ tuviꞌ soj a: “Si̱j noco̱ꞌ man síí cuꞌna̱j Pabló mej á.” Ne̱ ꞌó soꞌ roꞌ, taj a: “Si̱j noco̱ꞌ man síí cuꞌna̱j Apolos mej á.” Da̱nj aꞌmii ꞌo̱ ꞌo̱ taꞌa̱j soj, ne̱ cheꞌé dan ase vaa na̱j guun yuvii̱ ma̱n rihaan chumii̱ nihánj vaa soj, rá ꞌu̱nj na̱nj á.

⁵ Da̱j si̱j me síí cuꞌna̱j Apolos, ne̱ da̱j si̱j mej, rá soj ga̱. Ma̱an se síí ꞌyaj u̱u̱n se‑su̱u̱n Síí ꞌNi̱j Raꞌa man níꞌ me rój, ne̱ ino̱ vaa suun ata̱ ꞌo̱ ꞌo̱ rój, quiꞌyaj soꞌ, ne̱ cheꞌé suun quiꞌyaj rój roꞌ, cheꞌé dan amán rá soj niꞌya̱j soj man Síí ꞌNi̱j Raꞌa man níꞌ a.

⁶ Dan me se asino ya̱a̱n cataj xnaꞌanj ꞌu̱nj snana̱ Yaꞌanj rihaan soj, ga̱a ne̱ cuchiꞌ síí cuꞌna̱j Apolos rihaan soj uún, ga̱a ne̱ sa̱ꞌ doj tucuꞌyón soꞌ nu̱ꞌ snana̱ Yaꞌanj rihaan soj, tza̱j ne̱ maꞌa̱n Yaꞌanj me síí quiꞌyaj doj a̱ canocoꞌ sa̱ꞌ nimán soj man soꞌ,

⁷ ne̱ cheꞌé dan taj cheꞌé canoco̱ꞌ soj manj do̱ꞌ, man síí cuꞌna̱j Apolos do̱ꞌ maꞌ. Ma̱an se no̱ xcúún soj canoco̱ꞌ soj man o̱rúnꞌ Yaꞌanj ado̱nj.

⁸ Ne̱ ꞌo̱ cuya̱a̱n vaa ꞌu̱nj ga̱ síí cuꞌna̱j Apolos, ne̱ vaa güii na̱ruꞌvee Yaꞌanj rihaan rój cheꞌé suun ꞌyaj ꞌo̱ ꞌo̱ rój,

⁹ ne̱ dan me se ꞌyaj rój se‑su̱u̱n Yaꞌanj, tucuꞌyón rój snana̱ Yaꞌanj rihaan soj, ne̱ ase vaa naa̱ cunô maꞌa̱n Yaꞌanj do̱ꞌ, ase vaa ꞌo̱ veꞌ cuneꞌ Yaꞌanj do̱ꞌ, vaa soj na̱nj ado̱nj.

Tu̱mé ꞌo̱ ꞌo̱ síí me rá quiꞌya̱j se‑su̱u̱n Yaꞌanj man maꞌa̱n soꞌ, ga̱a ne̱ sa̱ꞌ quiꞌya̱j soꞌ a

¹⁰ Dan me se ase vaa síí veꞌé uchruj taꞌngaꞌ chihón ca̱yáán tacóó veꞌ roꞌ, vaa ꞌu̱nj, ne̱ veꞌé cuchruj ꞌu̱nj tucuáán canocoꞌ soj, cheꞌé se lu̱j quiꞌyaj Yaꞌanj ga̱ ꞌu̱nj, cheꞌé se caꞌneꞌ Yaꞌanj suun yoꞌ rihanj a. Ne̱ cuano̱ roꞌ, ꞌyaj suun ꞌó soꞌ racuíj soꞌ man soj, ne̱ da̱j se ꞌyaj síí utaꞌ doj yahij xráá tacóó veꞌ roꞌ, vaa soꞌ a. Dan me se, da̱j se no̱ xcúún ꞌo̱ ꞌo̱ síí ꞌyaj ꞌo̱ veꞌ tu̱mé soꞌ se‑su̱u̱n soꞌ roꞌ, da̱nj no̱ xcúún ꞌo̱ ꞌo̱ síí ꞌyaj se‑su̱u̱n Yaꞌanj tu̱mé soꞌ man maꞌa̱n soꞌ, ne̱ sa̱ꞌ ga̱a̱ suun quiꞌya̱j nij soꞌ á.

¹¹ ꞌO̱ se stucua̱nj Jesucristó me tucuáán cuchruj ꞌu̱nj rihaan soj, ne̱ se̱ guun natuna̱ nii tucuáán yoꞌ a̱ maan ado̱nj. Da̱j se vaa sca̱ꞌ ndoꞌo tacóó veꞌ roꞌ, da̱j vaa stucua̱nj Jesucristó a.

¹² Dan me se ꞌó nij yuvii̱ ꞌyaj se‑su̱u̱n Yaꞌanj chiháán soj roꞌ, taꞌa̱j nij soꞌ veꞌé ꞌyaj suun nij soꞌ, ne̱ da̱j se vaa síí ꞌyaj veꞌ ne̱ rásuun nij soꞌ agaꞌ oró do̱ꞌ, agaꞌ platá do̱ꞌ, yuvej tuꞌve̱e̱ ndoꞌo do̱ꞌ, vaa nij soꞌ a. Ne̱ ꞌó taꞌa̱j nij síí ꞌyaj suun roꞌ, da̱j se vaa síí ꞌyaj veꞌ ne̱ rásuun nij soꞌ chruun do̱ꞌ, cuya̱ꞌ do̱ꞌ, rmíí do̱ꞌ, vaa nij soꞌ a.

¹³ Dan me se vaa güii queneꞌe̱n níꞌ da̱j vaa se‑su̱u̱n ꞌo̱ ꞌo̱ nij síí ꞌyaj se‑su̱u̱n Yaꞌanj, cheꞌé se caꞌna̱ꞌ uún Cristó rihaan chumii̱ nihánj, ne̱ naquiꞌya̱j cu̱u soꞌ cheꞌé suun quiꞌyaj ꞌo̱ ꞌo̱ núj, ne̱ da̱j se vaa yaꞌan ꞌyaj acaa veꞌ roꞌ, da̱nj quiꞌya̱j soꞌ, ne̱ queneꞌe̱n núj da̱j vaa suun quiꞌyaj ꞌo̱ ꞌo̱ núj na̱nj ado̱nj.

¹⁴ Dan me se sese suun sa̱ꞌ ꞌyaj ꞌo̱ soꞌ, ne̱ se̱ cacaa yoꞌ, ne̱ na̱ruꞌvee Yaꞌanj rihaan soꞌ,

¹⁵ tza̱j ne̱ sese nij vaa suun ꞌyaj ꞌo̱ soꞌ, ne̱ caca̱a̱ nu̱ꞌ suun yoꞌ, ne̱ queneꞌe̱n níꞌ se vaa taj yuꞌvee nó yoꞌ, ne̱ a̱ ꞌó xcoꞌ se̱ naruꞌvee Yaꞌanj rihaan soꞌ a̱ maꞌ. Dan me se se‑su̱u̱n soꞌ caca̱a̱, tza̱j ne̱ nani̱i̱ cuanꞌ maꞌa̱n soꞌ rihaan sayuun na̱nj ado̱nj.

¹⁶ Ne neꞌen soj se vaa snuvií maꞌa̱n Yaꞌanj me soj do̱ꞌ, se vaa ya̱nj Nimán Yaꞌanj nimán soj do̱ꞌ naꞌ.

¹⁷ Sese tiri̱ꞌ ꞌo̱ soꞌ snuvií Yaꞌanj, ne̱ tiri̱ꞌ Yaꞌanj man soꞌ, cheꞌé se se sa̱ꞌ ina̱nj me snuvií Yaꞌanj, ne̱ maꞌa̱n soj me nuvií yoꞌ ado̱nj.

¹⁸ Sese vaa ꞌo̱ tuviꞌ soj avii ndoꞌo raa̱ nana̱ cu̱u nana̱ uno yuvii̱ ma̱n rihaan chumii̱ nihánj cuano̱, rá maꞌa̱n soꞌ, ne̱ dan me se caꞌne̱ꞌ rá soꞌ ga̱ suun aꞌmii da̱nj na̱nj á. Se̱ guun tiha̱ꞌ yuꞌunj soꞌ man maꞌa̱n soꞌ maꞌ. Ma̱an se xca̱j soꞌ cuentá ne̱ naquiꞌya̱j soꞌ síí snúú rmaꞌa̱n man soꞌ, ga̱a ne̱ caꞌve̱e quisi̱j soꞌ gu̱un soꞌ síí avii ndoꞌo raa̱ doj chugua̱nj.

¹⁹ Nana̱ avii raa̱ yuvii̱ ma̱n rihaan chumii̱ nihánj roꞌ, daj chiha̱a̱ míj taj se uun nana̱ yoꞌ rihaan Yaꞌanj maꞌ. ꞌO̱ se Danj Yaꞌanj taj se vaa yuvii̱ avii raa̱ roꞌ, me rá nij soꞌ tiha̱ꞌ yuꞌunj nij soꞌ tuviꞌ nij soꞌ, tza̱j ne̱ nica̱j Yaꞌanj nana̱ avii raa̱ nij soꞌ, ne̱ tiha̱ꞌ yuꞌunj nij soꞌ man maꞌa̱n nij soꞌ ꞌyaj Yaꞌanj na̱nj ado̱nj. Da̱nj taj Danj Yaꞌanj á.

²⁰ Ne̱ taj uún Danj Yaꞌanj se vaa neꞌen Yaꞌanj se vaa taj yuꞌvee nó nana̱ uun rá nij síí avii raa̱ ma̱n rihaan chumii̱ nihánj a̱ maꞌ. Da̱nj taj Danj Yaꞌanj a.

²¹ Cheꞌé dan ne nó xcúún níꞌ caꞌmi̱i̱ xta̱ꞌ níꞌ cheꞌé nana̱ avii raa̱ ꞌo̱ yuvii̱ maꞌ. Se̱ guun cata̱j níꞌ se vaa sa̱ꞌ doj avii raa̱ ꞌo̱ soꞌ, ne̱ ꞌó soꞌ nij ꞌyaj, cata̱j níꞌ maꞌ. Tana̱nj xca̱j soj cuentá se vaa vaa yuꞌvee nó snana̱ ta̱ranꞌ nij snóꞌo yoꞌ rihaan soj á.

²² Dan me se nana̱ aꞌmij do̱ꞌ, nana̱ aꞌmii Apolos do̱ꞌ, nana̱ aꞌmii Cefas do̱ꞌ, vaa yuꞌvee nó nana̱ yoꞌ rihaan soj, ne̱ rasu̱u̱n ma̱n rihaan chumii̱ nihánj roꞌ, vaa yuꞌvee nó yoꞌ rihaan soj á. Ne̱ sese vaa iꞌna̱ꞌ soj, ne̱ cavi̱i̱ sa̱ꞌ soj, cheꞌé se vaa iꞌna̱ꞌ soj a. Sese cavi̱ꞌ soj, ne̱ caꞌve̱e cavi̱i̱ sa̱ꞌ soj uún a. Ne̱ sese ranꞌ soj cuano̱ nihánj do̱ꞌ, sese quira̱nꞌ soj rej rihaan níꞌ do̱ꞌ, ne̱ nu̱ꞌ nij rasu̱u̱n yoꞌ me se vaa yuꞌvee nó rihaan soj á.

²³ ꞌO̱ se síí noco̱ꞌ man Cristó me soj, ne̱ Taꞌni̱j Yaꞌanj me Cristó uún a.