1 Corintios 2 - Triqui de San Juan Copala

Né na̱na̱ nachranꞌ me nana̱ se vaa caviꞌ Cristó rihaan rcutze̱ cheꞌé níꞌ maꞌ

¹ Neꞌen nij soj se vaa ga̱a cuchíꞌ ꞌu̱nj chiháán soj, ne̱ natáꞌ ꞌu̱nj snana̱ Yaꞌanj rihaan soj, ne̱ ne gu̱un rá ꞌu̱nj caꞌmi̱i̱ ꞌu̱nj nana̱ nachranꞌ ndoꞌo rihaan soj, maan tinu̱j, maan nocoj. ꞌO̱ se ne gu̱un rá ꞌu̱nj cata̱j soj se vaa avii ndoꞌo raá ꞌu̱nj maꞌ.

² Tana̱nj ꞌo̱ guun rá ꞌu̱nj cata̱j xnaꞌanj ꞌu̱nj cheꞌé o̱rúnꞌ Jesucristó se vaa caviꞌ soꞌ rihaan rcutze̱ cheꞌé soj a.

³ Dan me se ga̱a cuchíꞌ ꞌu̱nj rihaan soj, ne̱ guun naꞌa̱j ꞌu̱nj caꞌmi̱i̱ ꞌu̱nj, ne̱ cuchuꞌviꞌ nimanj, ne̱ quiriꞌíj ndoꞌo manj na̱nj á.

⁴ Ne̱ xa̱ꞌ nana̱ caꞌmii ꞌu̱nj ga̱ nij soj do̱ꞌ, nana̱ natáꞌ ꞌu̱nj rihaan nij soj do̱ꞌ, tza̱j ne̱ né na̱na̱ cu̱u cavii raa̱ yuvii̱ cheꞌé yan gu̱un ya̱ rá soj me nana̱ yoꞌ maꞌ. Tza̱j ne̱ cuno nij soj nana̱, ne̱ guun ya̱ rá soj se vaa Nimán Yaꞌanj rqué nana̱ yoꞌ manj, ne̱ guun ya̱ rá soj se vaa maꞌa̱n Yaꞌanj rqué se nucua̱j manj ado̱nj.

⁵ Cheꞌé dan né cheꞌe̱ se cavii ndoꞌo raá ꞌu̱nj me cuchumán rá soj cuno soj nana̱ yoꞌ maꞌ. Tana̱nj cheꞌé se vaa rqué Yaꞌanj se nucua̱j man níꞌ me cuchumán rá soj ado̱nj.

Ino̱ uxrá vaa nana̱ avii raa̱ nij síí ma̱n rihaan chumii̱ nihánj ga̱ nana̱ cu̱u aꞌmii Yaꞌanj a

⁶ Tza̱j ne̱ ya̱ nana̱ cu̱u aꞌmii núj rihaan nij yuvii̱ a̱j cachij cheꞌé stucua̱nj Yaꞌanj, tza̱j ne̱ né na̱na̱ avii raa̱ yuvii̱ ma̱n rihaan chumii̱ nihánj cuano̱ me nana̱ aꞌmii núj maꞌ. Ne aꞌmii núj nana̱ avii raa̱ nij síí uun chij rihaan chumii̱ nihánj cuano̱ maꞌ. ꞌO̱ se nichrunꞌ caꞌne̱e̱ Yaꞌanj suun uun chij ata̱ nij soꞌ na̱nj ado̱nj.

⁷ Tza̱j ne̱ aꞌmii núj snana̱ Yaꞌanj nana̱ cu̱u ado̱nj. Dan me se ga̱a ataa quiꞌya̱j Yaꞌanj chumii̱, ne̱ ꞌo̱ guun rá Yaꞌanj se vaa cuno̱ yuvii̱ nana̱ cu̱u yuve̱ yoꞌ, ne̱ cavi̱i̱ sa̱ꞌ níꞌ, ne̱ veꞌé ndoꞌo ga̱a̱ níꞌ, tza̱j ne̱ nij síí ma̱n ga̱a naá roꞌ, ne queneꞌe̱n nij soꞌ nana̱ yoꞌ maꞌ. Nda̱a ya̱j me tihaa̱n Yaꞌanj nana̱ cu̱u yuve̱ yoꞌ rihaan yuvii̱ na̱nj ado̱nj.

⁸ Ne queneꞌe̱n nij síí uun chij ma̱n rihaan chumii̱ nihánj snana̱ Yaꞌanj nana̱ cu̱u yoꞌ maꞌ. Dan me se niꞌndaj ya̱ sa̱ꞌ veꞌé vaa Cristó, ne̱ sese cuno nij síí uun chij ma̱n rihaan chumii̱ nihánj snana̱ Yaꞌanj, ne̱ ne cachro̱n nij soꞌ man Cristó rihaan rcutze̱ asuun tza̱j maꞌ.

⁹ Tza̱j ne̱ Danj Yaꞌanj taj a: A̱ ꞌó yuvii̱ ne queneꞌe̱n do̱ꞌ, a̱ ꞌó yuvii̱ ne cuno̱ do̱ꞌ, a̱ ꞌó yuvii̱ ne cavi̱i̱ nimán do̱ꞌ, se vaa quiꞌyaj Yaꞌanj cheꞌé níꞌ si̱j aráj cochro̱j rihaan Yaꞌanj a. Da̱nj taj Danj Yaꞌanj á.

¹⁰ Tza̱j ne̱ quiꞌyaj Yaꞌanj se vaa tihaa̱n Nimán Yaꞌanj man núj cheꞌé nij rasu̱u̱n quiꞌyaj Yaꞌanj cheꞌé níꞌ si̱j aráj cochro̱j rihaan Yaꞌanj a. Dan me se nuchruj ra̱a̱ Nimán Yaꞌanj cunuda̱nj rasu̱u̱n, ne̱ sa̱ꞌ uxrá nuchruj ra̱a̱ Nimán Yaꞌanj da̱j vaa maꞌa̱n Yaꞌanj ado̱nj.

¹¹ ꞌO̱ se a̱ ꞌó yuvii̱ ne neꞌen da̱j vaa rasu̱u̱n ꞌni̱j yuve̱ nimán ꞌó yuvii̱ maꞌ. ꞌO̱ se o̱rúnꞌ nimán yuvii̱ neꞌen da̱j vaa nimán maꞌa̱n yuvii̱ na̱nj ado̱nj. Ne̱ da̱nj vaa Yaꞌanj uún a. A̱ ꞌó níꞌ se̱ caꞌvee xca̱j cuentá da̱j vaa Yaꞌanj maꞌ. Ma̱an se o̱rúnꞌ Nimán Yaꞌanj me síí neꞌen da̱j vaa Yaꞌanj na̱nj ado̱nj.

¹² Ne̱ ino̱ uxrá vaa nimán núj ga̱ nimán nij yuvii̱ ma̱n rihaan chumii̱ nihánj, ne̱ xa̱ꞌ núj, tza̱j ne̱ nu̱u̱ Nimán Yaꞌanj nimán núj, ne̱ cheꞌé dan me xcaj núj cuentá da̱j vaa nij se sa̱ꞌ rqué Yaꞌanj rihaan níꞌ ado̱nj.

¹³ Dan me se ga̱a nataꞌ núj rihaan yuvii̱ cheꞌé nij se sa̱ꞌ rqué Yaꞌanj rihaan níꞌ, ne̱ ne aꞌmii núj nana̱ avii raa̱ yuvii̱ maꞌ. Ma̱an se aꞌmii núj nana̱ tucuꞌyón Nimán Yaꞌanj man núj, ne̱ tucuꞌyón núj nana̱ yoꞌ rihaan yuvii̱ nu̱u̱ Nimán Yaꞌanj nimán ado̱nj.

¹⁴ ꞌO̱ se naꞌvej rá yuvii̱ ma̱n rihaan chumii̱ nihánj cuno̱ nij soꞌ nana̱ aꞌmii Nimán Yaꞌanj maꞌ. ꞌO̱ se snúú rmaꞌa̱n nana̱ aꞌmii Nimán Yaꞌanj, rá nij soꞌ, ne̱ ne racuíj Nimán Yaꞌanj man nij soꞌ naquiꞌya̱j cu̱u nij soꞌ nana̱ yoꞌ a̱ maan ado̱nj. Cheꞌé dan taj se ꞌyáꞌ cuno̱ nij soꞌ maꞌ.

¹⁵ Xa̱ꞌ síí racuíj Nimán Yaꞌanj man, tza̱j ne̱ neꞌen soꞌ naquiꞌya̱j cu̱u soꞌ cunuda̱nj rasu̱u̱n, tza̱j ne̱ se̱ caꞌvee naquiꞌya̱j cu̱u ꞌó yuvii̱ man soꞌ maꞌ.

¹⁶ Dan me se Danj Yaꞌanj taj a: A̱ ꞌó yuvii̱ ne neꞌen da̱j vaa rá Síí ꞌNi̱j Raꞌa man níꞌ maꞌ. Se̱ guun nucua̱j yuvii̱ nago̱ꞌ yuvii̱ chrej man soꞌ maꞌ. Da̱nj taj Danj Yaꞌanj á. Ne̱ ase vaa rá Cristó roꞌ, da̱nj vaa rá maꞌa̱n núj ado̱nj.