1 Corintios 16 - Triqui de San Juan Copala

Caꞌmii Pabló cheꞌé saꞌanj me rá nij síí ma̱n chumanꞌ Corinto rque̱ nij soꞌ man nij síí nique̱ ma̱n chumanꞌ Jerusalén a

¹ Cata̱j xnaꞌanj ꞌu̱nj rihaan nij soj cheꞌé saꞌanj naquiꞌya̱j chre̱ꞌ soj rque̱ soj man nij síí nique̱ síí noco̱ꞌ man Cristó á. Dan me se quiꞌya̱j soj nda̱a se vaa caꞌnéꞌ ꞌu̱nj suun rihaan nij xꞌneꞌ nij síí noco̱ꞌ man Cristó ya̱nj estadó Galacia a.

² ꞌO̱ se da̱j a̱ cotungó roꞌ, caꞌne̱j sa̱ꞌ soj do̱j saꞌanj tucuá soj cheꞌé nij síí nique̱ á. Sese noco̱o doj quiꞌyaj canaán ꞌo̱ soj, ne̱ noco̱o doj caꞌne̱j sa̱ꞌ soj, ne̱ sese do̱j doj quiꞌyaj canaán ꞌó soj, ne̱ do̱j doj caꞌne̱j sa̱ꞌ soj á. Veꞌé tu̱mé soj saꞌanj yoꞌ nda̱a se cuchi̱ꞌ ꞌu̱nj chiháán soj á. ꞌO̱ se naꞌvej raj naquiꞌya̱j chre̱ꞌ soj saꞌanj nda̱a güii cuchi̱ꞌ ꞌu̱nj maꞌ. ꞌO̱ se güii yoꞌ a̱j naquiꞌyaj chre̱ꞌ soj saꞌanj, raj a.

³ Asa̱ꞌ cuchíꞌ ꞌu̱nj rihaan soj, ne̱ caxri̱i̱ soj saꞌanj naquiꞌyaj chre̱ꞌ soj ston tinúú soj síí narii soj ni̱caj saꞌanj yoꞌ a. Ne̱ caꞌa̱nj ni̱caj nij soꞌ saꞌanj yoꞌ nda̱a chumanꞌ Jerusalén a. Ne̱ me raj ni̱caj nij soꞌ yanj cartá cata̱j xnaꞌanj rihaan nij síí ma̱n Jerusalén se vaa va̱j saꞌanj yoꞌ rihaan nij soꞌ, ꞌyaj nij tinúú níꞌ a.

⁴ Sese vaa cheꞌé caꞌa̱nj ma̱ꞌanj chumanꞌ Jerusalén, ne̱ ni̱caj tuviꞌ núj caꞌa̱nj núj a.

Caꞌmii Pabló cheꞌé me güii cuchi̱ꞌ soꞌ chumanꞌ Corinto a

⁵ Vaa cheꞌé caꞌa̱nj ꞌu̱nj Macedonia, ne̱ ga̱a síj cachén ꞌu̱nj Macedonia, ga̱a ne̱ cuchi̱ꞌ ꞌu̱nj chiháán soj a.

⁶ ꞌO̱ se xraj, ne̱ ca̱ránꞌ ꞌu̱nj chiháán soj queꞌe̱e̱ güii, ase nda̱a nu̱ꞌ tiempó acoj ndoꞌo ado̱nj. ꞌO̱ se da̱nj caꞌve̱e veꞌé ra̱cuíj soj manj asa̱ꞌ cavii ꞌu̱nj caꞌa̱nj ꞌu̱nj a.

⁷ Naꞌvej raj cache̱n raꞌya̱nj uún ꞌu̱nj chiháán soj maꞌ. ꞌO̱ se me raj gu̱un ra̱a̱n ꞌu̱nj queꞌe̱e̱ güii, sese caꞌve̱j Yaꞌanj Si̱j ꞌNi̱j Raꞌa man níꞌ da̱nj ga̱a ado̱nj.

⁸ Tza̱j ne̱ me raj cu̱nuû ꞌu̱nj chumanꞌ Éfeso nihánj nda̱a se cache̱n ya̱ Chaꞌanj Pentecostés ado̱nj.

⁹ ꞌO̱ se vaa ndoꞌo rej veꞌé qui̱ꞌyáá ꞌu̱nj se‑su̱u̱n Yaꞌanj, tza̱j ne̱ ꞌo̱ se ma̱n ndoꞌo síí ta̱j riꞌyunj man níꞌ chumanꞌ yoꞌ na̱nj ado̱nj.

Caꞌmii Pabló cheꞌé nij tinúú soꞌ síí noco̱ꞌ man Cristó a

¹⁰ Tza̱j ne̱ sese cuchi̱ꞌ síí cuꞌna̱j Timoteo rihaan soj, ne̱ veꞌé caꞌmi̱i̱ soj ga̱ soꞌ, ga̱a ne̱ gu̱un niha̱ꞌ rá soꞌ ga̱ soj á. ꞌO̱ se ase vaa ꞌyáá ꞌu̱nj se‑su̱u̱n Síí ꞌNi̱j Raꞌa man níꞌ, taꞌngaꞌ da̱nj vaa ꞌyaj maꞌa̱n soꞌ ado̱nj.

¹¹ Se̱ nachriꞌ soj ni̱ꞌyaj soj man soꞌ maꞌ. Ma̱an se dínj cuma̱n soj ga̱ soꞌ, ne̱ veꞌé ra̱cuíj soj man soꞌ yan caꞌna̱ꞌ uún soꞌ rihanj nihánj á. Naꞌvi̱j uxraj caꞌna̱ꞌ uún soꞌ ga̱ ꞌó nij tinúú níꞌ ado̱nj.

¹² Ne̱ tinúú níꞌ síí cuꞌna̱j Apolos me se rquee̱ ndoꞌo ꞌu̱nj man soꞌ se vaa cuchi̱ꞌ soꞌ ga̱ ꞌó nij tinúú níꞌ rihaan soj, tza̱j ne̱ a̱ doj ne caꞌve̱j soꞌ cuchi̱ꞌ soꞌ cuano̱ maꞌ. Tza̱j ne̱ nda̱a güii xꞌnúj rihaan soꞌ asuun, ga̱a ne̱ cuchi̱ꞌ soꞌ rihaan soj a.

¹³ ꞌO̱ tu̱mé soj man soj á. Raan canoco̱ꞌ soj man Jesucristó á. Ga̱a̱ nucua̱j nimán soj, ne̱ ꞌo̱ caꞌne̱j nimán soj quiꞌya̱j soj se‑su̱u̱n Yaꞌanj á.

¹⁴ Ne̱ ga̱a ꞌyaj soj nu̱ꞌ suun vaa rihaan soj, ne̱ uxrá ga̱a̱ ꞌe̱e̱ rá soj man tinúú soj á.

^15-16 Neꞌen nij soj man nij tucua̱ tinúú níꞌ síí cuꞌna̱j Estéfanas se vaa nij soꞌ me síí cuchumán rá niꞌya̱j man Jesucristó asino ya̱a̱n rihaan cunuda̱nj nij yuvii̱ ma̱n estadó Acaya a. Ne̱ caꞌnéé nimán maꞌa̱n nij soꞌ quiꞌya̱j suun nij soꞌ ra̱cuíj nij soꞌ man nij síí noco̱ꞌ man Cristó ado̱nj. Cuano̱ nihánj me se cata̱j xnaꞌanj ꞌu̱nj rihaan soj se vaa veꞌé cuno̱ soj rihaan cunuda̱nj yuvii̱ ꞌyaj suun nda̱a vaa ꞌyaj suun nij soꞌ, tinu̱j, nocoj. Ne̱ cuno̱ uún soj rihaan cunuda̱nj nij síí aꞌnéé ndoꞌo nimán quiꞌya̱j suun ga̱ nij soꞌ na̱nj á.

¹⁷ Guun niha̱ꞌ ndoꞌo raj se vaa caꞌnaꞌ maꞌa̱n síí cuꞌna̱j Estéfanas do̱ꞌ, Fortunato do̱ꞌ, Acaico do̱ꞌ á. Ga̱a queneꞌenj man nij soꞌ, ne̱ nda̱a maꞌa̱n ya̱ soj queneꞌenj raj na̱nj á. ꞌO̱ se nayón nij soꞌ rihaan soj a.

¹⁸ Dan me se nuu cui̱j nimanj, quiꞌyaj nij soꞌ, ne̱ dan me se nu̱u cui̱j nimán maꞌa̱n soj, quiꞌya̱j uún nij soꞌ a. ꞌO̱ se nij yuvii̱ vaa da̱nj me se no̱ xcúún ya̱ soj cara̱a̱ cochro̱j soj man nij soꞌ na̱nj ado̱nj.

Me rá nij tuvi̱ꞌ Pabló veꞌé cuma̱n nij síí noco̱ꞌ man Cristó ya̱nj Corinto a

¹⁹ Nij xꞌneꞌ cunuda̱nj nij síí noco̱ꞌ man Cristó ma̱n estadó Asia roꞌ, me rá se vaa veꞌé cuma̱n nij soj, ga̱ síí cuꞌna̱j Aquila do̱ꞌ, chana̱ cuꞌna̱j Priscila do̱ꞌ, xꞌneꞌ ta̱ranꞌ nij síí noco̱ꞌ man Cristó nuu chre̱ꞌ tucuá ro̱j soꞌ do̱ꞌ a.

²⁰ Dan me se me rá cunuda̱nj nij tinúú níꞌ veꞌé cuma̱n nij soj ado̱nj. Ga̱a nariꞌ tuviꞌ nij soj, ne̱ veꞌé ndoꞌo caꞌmi̱i̱ soj ga̱ tuviꞌ soj rihaan Yaꞌanj á.

²¹ Me rá ma̱ꞌanj se vaa veꞌé cuma̱n soj uún ado̱nj. Nihánj me nana̱ cachrón ma̱ꞌanj raꞌaj rihaan yanj nihánj ado̱nj.

²² Sese vaa ꞌo̱ tuviꞌ soj ne aráj cochro̱j rihaan Síí ꞌNi̱j Raꞌa man níꞌ, ne̱ queneꞌe̱n soj se vaa ya̱ quira̱nꞌ uxrá síí vaa da̱nj sayuun na̱nj chugua̱nj. Ya̱ caꞌna̱ꞌ uún Síí ꞌNi̱j Raꞌa man níꞌ ado̱nj.

²³ Me rá ꞌu̱nj quiꞌya̱j ndoꞌo Jesús Si̱j ꞌNi̱j Raꞌa man níꞌ se lu̱j cheꞌé soj na̱nj á.

²⁴ Ne̱ ꞌe̱e̱ rá ꞌu̱nj man ta̱ranꞌ soj si̱j noco̱ꞌ xraan man Cristó Jesús ado̱nj.