1 Corintios 14 - Triqui de San Juan Copala

Nataꞌ Pabló cheꞌé xnaꞌánj naca̱ xnaꞌánj ne neꞌen maꞌa̱n yuvii̱ a

¹ Cheꞌé dan ꞌo̱ ga̱a̱ suun ꞌe̱e̱ rá man tuviꞌ nimán soj, ne̱ nano̱ꞌ soj da̱j quiꞌya̱j soj, ne̱ ni̱caj soj suun sa̱ꞌ, quiꞌya̱j Nimán Yaꞌanj á. Tza̱j ne̱ doj a̱ gu̱un rá soj nata̱ꞌ soj nana̱ rqué Yaꞌanj rihaan soj na̱nj ado̱nj.

² Dan me se xa̱ꞌ síí aꞌmii xnaꞌánj naca̱, tza̱j ne̱ ne aꞌmii soꞌ rihaan yuvii̱ maꞌ. Rihaan Yaꞌanj aꞌmii soꞌ, ne̱ taj síí uno nana̱ aꞌmii soꞌ maꞌ. ꞌO̱ se racuíj Nimán Yaꞌanj man soꞌ aꞌmii soꞌ nana̱ sa̱ꞌ yuve̱ tihaa̱n naca̱ Yaꞌanj rihaan maꞌa̱n soꞌ ado̱nj.

³ Tza̱j ne̱ síí nataꞌ nana̱ rqué Yaꞌanj rihaan, tza̱j ne̱ rihaan yuvii̱ aꞌmii soꞌ, ne̱ sa̱ꞌ doj xca̱j nij yuvii̱ cuentá da̱j quiꞌya̱j nij yuvii̱ canoco̱ꞌ nij yuvii̱ man Yaꞌanj, ne̱ nari̱ꞌ nucuaj nimán nij yuvii̱, quiꞌya̱j soꞌ, ne̱ se̱ nanó rá nij yuvii̱ maꞌ. ꞌO̱ se gu̱un niha̱ꞌ doj rá nij soꞌ ado̱nj.

⁴ Dan me se síí aꞌmii xnaꞌánj naca̱ roꞌ, o̱rúnꞌ maꞌa̱n soꞌ nocoꞌ sa̱ꞌ doj man Yaꞌanj, ꞌyaj soꞌ, tza̱j ne̱ síí nataꞌ nana̱ rqué Yaꞌanj rihaan me se sa̱ꞌ doj nocoꞌ xꞌneꞌ cunuda̱nj nij síí noco̱ꞌ man Cristó man Yaꞌanj, ꞌyaj soꞌ ado̱nj.

⁵ Me raj caꞌmi̱i̱ ta̱ranꞌ soj xnaꞌánj naca̱, tza̱j ne̱ sa̱ꞌ doj nata̱ꞌ soj nana̱ rqué Yaꞌanj rihaan soj á. Dan me se sa̱ꞌ doj ꞌyaj síí nataꞌ snana̱ Yaꞌanj rihaan síí aꞌmii xnaꞌánj naca̱, tza̱j ne̱ sese gu̱un nucua̱j síí aꞌmii xnaꞌánj naca̱ cata̱j xnaꞌanj soꞌ rihaan nij yuvii̱ me se me raj cata̱a nana̱ aꞌmii soꞌ ga̱a uun cheꞌe̱ soꞌ aꞌmii soꞌ xnaꞌánj naca̱, ne̱ sa̱ꞌ doj quiꞌya̱j soꞌ, ne̱ cavi̱i̱ sa̱ꞌ doj xꞌneꞌ nij síí noco̱ꞌ man Cristó, quiꞌya̱j soꞌ, sese da̱nj quiꞌya̱j soꞌ ado̱nj.

⁶ Cuno̱ soj caꞌmi̱j, tinu̱j, nocoj, ne̱ dan me se sese cuchi̱ꞌ ꞌu̱nj rihaan soj, ne̱ cuno̱ soj sese ina̱nj xnaꞌánj naca̱ caꞌmi̱j rihaan soj, rá soj naꞌ. Taj maꞌ. Me nana̱ nari̱ꞌ soj, sese da̱nj qui̱ꞌyáj ga̱. Tza̱j ne̱ sese ti̱haán ꞌu̱nj ꞌo̱ nana̱ naca̱ nana̱ caꞌmii Yaꞌanj rihanj rihaan soj, ne̱ cuno̱ soj doj, ne̱ sese cavi̱i̱ ndoꞌo raá ꞌu̱nj do̱ꞌ, sese nata̱ꞌ ꞌu̱nj nana̱ rqué Yaꞌanj manj do̱ꞌ, sese tu̱cuꞌyonj rihaan soj do̱ꞌ, ne̱ cuno̱ sa̱ꞌ soj doj á.

⁷ Dan me se neꞌen soj da̱j vaa yaꞌánj, ne̱ ne vaa iꞌna̱ꞌ yaꞌánj, tza̱j ne̱ vaa cheꞌé agüiin sca̱ꞌ yoꞌ, ne̱ sese ne ticaꞌmii sca̱ꞌ nii man yaꞌaâ nu̱u̱ rihaan yaꞌánj yoꞌ ga̱a anica̱j ꞌo̱ ꞌo̱ chraꞌ, ga̱a ne̱ asa̱ꞌ caꞌve̱e xca̱j yuvii̱ cuentá me chraꞌ me achráá nii rihaan yaꞌánj yoꞌ ga̱. Veé da̱nj vaa rihuu uún a.

⁸ Sese ne tinaca̱j nii snana̱ chruun aꞌyánj yoꞌ ga̱a aꞌyánj nii, ga̱a ne̱ asa̱ꞌ caꞌve̱e xca̱j nij tanuu cuentá se vaa caꞌa̱nj nij soꞌ cunu̱ꞌ nij soꞌ ga̱.

⁹ Ne̱ ase vaa yaꞌánj do̱ꞌ, chruun aꞌyánj do̱ꞌ, taꞌngaꞌ da̱nj vaa nij soj uún, ne̱ sese caꞌmi̱i̱ soj xnaꞌánj naca̱, ne̱ sese se̱ gaa nica̱ nana̱ caꞌmi̱i̱ soj, ne̱ asa̱ꞌ caꞌve̱e cuno̱ yuvii̱ me taj soj ga̱. ꞌO̱ se se̱ caꞌmii soj rihaan yuvii̱ a̱ maꞌ. Ma̱an rihaan nana̱ u̱u̱n caꞌmi̱i̱ soj, raj a.

¹⁰ Dan me se ma̱n uxrá xnaꞌánj aꞌmii yuvii̱ rihaan chumii̱ nihánj, raj, ne̱ vaa yuvii̱ uno cunuda̱nj nij xnaꞌánj yoꞌ,

¹¹ tza̱j ne̱ sese caꞌmi̱i̱ ꞌo̱ soꞌ xnaꞌánj aꞌmii maꞌa̱n soꞌ rihanj, ne̱ sese se̱ cunoj nana̱ caꞌmi̱i̱ soꞌ, ga̱a ne̱ ase vaa síí yaníj vaa soꞌ rihanj, ne̱ ma̱ꞌán ꞌu̱nj gu̱un si̱j ꞌnaꞌ ꞌó chumanꞌ rihaan soꞌ a.

¹² Cheꞌé dan me xca̱j soj cuentá da̱j quiꞌya̱j maꞌa̱n soj uún, ne̱ dan me se gu̱un rá soj ni̱caj soj suun sa̱ꞌ, quiꞌya̱j Nimán Yaꞌanj, tza̱j ne̱ nano̱ꞌ soj da̱j quiꞌya̱j soj, ne̱ caꞌve̱e ni̱caj soj suun sa̱ꞌ doj suun ra̱cuíj man nu̱ꞌ xꞌneꞌ nij síí noco̱ꞌ man Cristó cavi̱i̱ sa̱ꞌ nij soꞌ doj, quiꞌya̱j Nimán Yaꞌanj a.

¹³ Cheꞌé dan me sese vaa ꞌo̱ tinúú soj síí aꞌmii xnaꞌánj naca̱, ne̱ no̱ xcúún soꞌ cachi̱nj niꞌya̱j soꞌ rihaan Yaꞌanj se vaa gu̱un nucua̱j soꞌ cata̱j xnaꞌanj soꞌ me se me raj cata̱a nana̱ caꞌmi̱i̱ soꞌ rihaan nij yuvii̱ cuno̱ nana̱ yoꞌ ado̱nj.

¹⁴ Tza̱j ne̱ sese caꞌmi̱i̱ ꞌu̱nj xnaꞌánj naca̱ cachi̱nj ni̱ꞌyáá ꞌu̱nj rihaan Yaꞌanj, ne̱ ina̱nj ma̱an nimán ꞌu̱nj me cachi̱nj niꞌya̱j rihaan Yaꞌanj, ne̱ cúú ya̱vej, tza̱j ne̱ se̱ cachíín niꞌya̱j yoꞌ rihaan Yaꞌanj a̱ maꞌ.

¹⁵ ꞌO̱ se me se no̱ xcúún ꞌu̱nj qui̱ꞌyáj ga̱. ꞌO̱ se no̱ xcúún ꞌu̱nj asino ya̱a̱n cachi̱nj ni̱ꞌyáj rihaan Yaꞌanj ga̱ nimanj, ga̱a ne̱ cachi̱nj niꞌya̱j cúú ya̱vej uún rihaan Yaꞌanj, ne̱ asino ya̱a̱n cachra̱a̱ ꞌu̱nj chraꞌ rihaan Yaꞌanj ga̱ nimanj, ga̱a ne̱ nu̱ꞌ cúú ya̱vej cachra̱a̱ chraꞌ uún rihaan Yaꞌanj ado̱nj.

¹⁶ Da̱nj quiꞌya̱j soj cheꞌé se asa̱ꞌ nuu chre̱ꞌ soj cachi̱nj niꞌya̱j soj rihaan Yaꞌanj, ne̱ ꞌnaꞌ nij síí ataa nari̱ꞌ sa̱ꞌ snana̱ Yaꞌanj a. Ne̱ sese ina̱nj nimán so̱ꞌ cata̱j so̱ꞌ guun niꞌya̱j níꞌ rihaan Yaꞌanj do̱ꞌ, sese ina̱nj nimán so̱ꞌ cata̱j se vaa sa̱ꞌ vaa Yaꞌanj do̱ꞌ, ne̱ asa̱ꞌ caꞌve̱e cuno̱ síí ꞌnaꞌ naca̱ nana̱ caꞌmi̱i̱ so̱ꞌ ga̱. Asa̱ꞌ caꞌve̱e cata̱j soꞌ “Ya̱ da̱nj vaa ado̱nj” cheꞌé nana̱ caꞌmii so̱ꞌ ga̱.

¹⁷ Caꞌve̱e se veꞌé uxrá ga̱a̱ nana̱ cachi̱nj ni̱ꞌyáá so̱ꞌ rihaan Yaꞌanj, tza̱j ne̱ se̱ caꞌvee ra̱cuíj nana̱ yoꞌ man ꞌó soꞌ maꞌ.

¹⁸ Taj ꞌu̱nj guun niꞌya̱j níꞌ rihaan Yaꞌanj cheꞌé se aꞌmii ꞌu̱nj doj xnaꞌánj naca̱ rihaan ta̱ranꞌ nij soj a.

¹⁹ Tza̱j ne̱ ga̱a nuu chre̱ꞌ ꞌu̱nj ga̱ xꞌneꞌ nij tinúú níꞌ nij síí noco̱ꞌ man Cristó, ne̱ no̱ xcúnj caꞌmi̱j nana̱ avii cúú ya̱vej rihaan nij soꞌ, ne̱ dan me se caꞌve̱e se chi̱ꞌ míj nana̱ xnaꞌánj naca̱ caꞌmi̱j, tza̱j ne̱ se̱ cavii sa̱ꞌ doj tinúj, quiꞌya̱j nana̱ yoꞌ a̱ maꞌ. Tza̱j ne̱ sese caꞌmi̱j nda̱ꞌ se ꞌu̱nꞌ gue̱e̱ nana̱ cavi̱i̱ cúú ya̱vej rihaan nij tinúú níꞌ, tza̱j ne̱ cavi̱i̱ sa̱ꞌ nij soꞌ doj, quiꞌya̱j nana̱ yoꞌ, cheꞌé se nana̱ uno nij soꞌ me yoꞌ ado̱nj.

²⁰ Ga̱a̱ sca̱ꞌ raa̱ nij soj, tinu̱j, nocoj. Se̱ gaa raa̱ soj ase vaa raa̱ ꞌo̱ xnii maꞌ. Dan me se ase vaa neꞌej ataa nari̱ꞌ quiꞌya̱j cacunꞌ roꞌ, da̱nj ga̱a̱ soj, tza̱j ne̱ ga̱a̱ sca̱ꞌ raa̱ soj á.

²¹ Dan me se vaa nana̱ no̱ rihaan Danj Yaꞌanj taj a: “Caꞌne̱j ꞌu̱nj yuvii̱ ma̱n ga̱nꞌ cuchi̱ꞌ rihaan nij yuvii̱ israelitá, ne̱ ꞌó xnaꞌánj nata̱ꞌ nij soꞌ rihaan nij yuvii̱ israelitá, tza̱j ne̱ se̱ quiꞌyaj nij yuvii̱ israelitá se vaa cata̱j ꞌu̱nj rihaan nij soꞌ maꞌ.” Da̱nj cataj Yaꞌanj rihaan nij yuvii̱ israelitá ga̱a naá a.

²² Dan me se xca̱j níꞌ cuentá se vaa né cheꞌe̱ maꞌa̱n níꞌ si̱j noco̱ꞌ man Cristó vaa xnaꞌánj naca̱ xnaꞌánj ne neꞌen a̱ ꞌó yuvii̱ yoꞌ maꞌ. ꞌO̱ se cheꞌé nij síí ne nocoꞌ man Cristó vaa xnaꞌánj naca̱ yoꞌ, ne̱ dan me se cuno̱ nij soꞌ xnaꞌánj naca̱, ga̱a ne̱ xca̱j nij soꞌ cuentá se vaa né si̱j noco̱ꞌ man Yaꞌanj me maꞌa̱n nij soꞌ a. Ne̱ snana̱ Yaꞌanj nana̱ nataꞌ nii roꞌ, né cheꞌe̱ nij síí ne nocoꞌ man Cristó vaa nana̱ yoꞌ maꞌ. ꞌO̱ se cheꞌé níꞌ si̱j noco̱ꞌ man Cristó vaa nana̱ yoꞌ ado̱nj.

²³ Dan me se sese ina̱nj xnaꞌánj naca̱ caꞌmi̱i̱ ta̱ranꞌ soj ga̱a nuu chre̱ꞌ xꞌneꞌ soj, ne̱ catu̱u̱ nij síí ataa nari̱ꞌ sa̱ꞌ tucuáán noco̱ꞌ níꞌ catu̱u̱ síí ne nocoꞌ man Cristó catu̱u̱ rá veꞌ ga̱ nij soj, ne̱ da̱j cata̱j nij soꞌ, rá soj ga̱. Se̱ cuno nij soꞌ xnaꞌánj caꞌmii soj a̱ maꞌ. Cheꞌé dan cata̱j nij soꞌ se vaa snúú rmaꞌa̱n nij soj na̱nj ado̱nj.

²⁴ Tza̱j ne̱ sese nata̱ꞌ ta̱ranꞌ soj nana̱ rqué Yaꞌanj rihaan soj, ne̱ catu̱u̱ nij síí ataa nari̱ꞌ tucuáán noco̱ꞌ níꞌ catu̱u̱ nij síí ne nocoꞌ man Cristó catu̱u̱ rá veꞌ, ga̱a ne̱ xca̱j nij soꞌ cuentá cheꞌé cacunꞌ tumé nij soꞌ, quiꞌya̱j ta̱ranꞌ soj, ne̱ nano̱ rá nij soꞌ cheꞌé cacunꞌ tumé nij soꞌ, quiꞌya̱j ta̱ranꞌ soj chugua̱nj.

²⁵ Cuno̱ nij soꞌ nana̱ caꞌmi̱i̱ ta̱ranꞌ soj, ga̱a ne̱ xca̱j nij soꞌ cuentá cheꞌé nu̱ꞌ se chiꞌi̱i̱ ma̱n nimán nij soꞌ, ne̱ caꞌa̱nj ca̱yáán ru̱j nij soꞌ, ga̱a ne̱ cara̱a̱ gue̱e̱ nij soꞌ rihaan Yaꞌanj, ne̱ cata̱j ya̱ nij soꞌ se vaa ya̱ Yaꞌanj nicunꞌ scaꞌnúj soj ado̱nj.

²⁶ Cheꞌé dan nihánj me cata̱j xnaꞌanj ꞌu̱nj rihaan soj da̱j quiꞌya̱j soj, tinu̱j, nocoj. Ga̱a nuu chre̱ꞌ soj, ne̱ ino̱ ga̱a̱ se quiꞌya̱j ꞌo̱ ꞌo̱ soj na̱nj á. ꞌO̱ tinúú soj cachra̱a̱ ꞌo̱ chraꞌ, ne̱ tu̱cuꞌyón ꞌó tinúú soj snana̱ Yaꞌanj rihaan soj, ne̱ nata̱ꞌ ꞌó tinúú soj nana̱ rqué Yaꞌanj rihaan soꞌ, ne̱ caꞌmi̱i̱ ꞌó tinúú soj xnaꞌánj naca̱, ne̱ cata̱j xnaꞌanj ꞌó tinúú soj me se me raj cata̱a nana̱ caꞌmii tinúú soj síí caꞌmii xnaꞌánj naca̱, ne̱ ina̱nj da̱nj quiꞌya̱j soj, ra̱cuíj ta̱ranꞌ soj man tinúú soj, ga̱a ne̱ veꞌé doj nari̱ꞌ soj canoco̱ꞌ soj man Jesucristó a.

²⁷ Sese vaa vi̱j vaꞌnu̱j soj me rá caꞌmi̱i̱ xnaꞌánj naca̱, ne̱ caꞌve̱e caꞌmi̱i̱ nij soꞌ, tza̱j ne̱ sese queꞌe̱e̱ soj doj me rá caꞌmi̱i̱, ga̱a ne̱ se̱ caꞌvee maꞌ. ꞌO̱ se dínj tuꞌva taꞌa̱j soj, ga̱a ne̱ canicu̱nꞌ ꞌó tuviꞌ soj nata̱ꞌ soꞌ me se me raj cata̱a nana̱ caꞌmii nij síí caꞌmii xnaꞌánj naca̱ yoꞌ á.

²⁸ Tza̱j ne̱ sese taj va̱j a̱ ꞌó soj uun nucua̱j nata̱ꞌ me se me raj cata̱a nana̱ aꞌmii nij síí aꞌmii xnaꞌánj naca̱, ne̱ táá a̱ se se̱ caꞌmii nij soꞌ xnaꞌánj naca̱ rihaan xꞌneꞌ yuvii̱ a̱ maꞌ. Ma̱an se dínj ga̱a̱ tuꞌva nij soꞌ ga̱a nuu chre̱ꞌ soj á. Ina̱nj rihaan maꞌa̱n nij soꞌ do̱ꞌ, rihaan Yaꞌanj do̱ꞌ, caꞌmi̱i̱ nij soꞌ xnaꞌánj naca̱ yoꞌ á.

²⁹ Dan me se veé da̱nj quiꞌya̱j gue̱e̱ soj asa̱ꞌ nataꞌ soj snana̱ Yaꞌanj uún a. Nata̱ꞌ vi̱j vaꞌnu̱j tinúú soj, síí rqué Yaꞌanj snana̱ soꞌ rihaan, ne̱ nuchru̱j ra̱a̱ ꞌó tinúú soj cheꞌé nana̱ nataꞌ nij soꞌ a.

³⁰ Sese nataꞌ ꞌo̱ soꞌ, ne̱ sese gu̱un rá ꞌó soꞌ nata̱ꞌ soꞌ ꞌó nana̱ tiha̱j rqué Yaꞌanj rihaan maꞌa̱n soꞌ, ne̱ caꞌne̱ꞌ rá síí nicu̱nꞌ aꞌmii yoꞌ caꞌmi̱i̱ ꞌó tinúú soꞌ á.

³¹ Veé dan me se ga̱a̱ yaꞌnúj rihaan ta̱ranꞌ soj, ne̱ nda̱a ꞌo̱ ꞌo̱ soj nata̱ꞌ nana̱ rqué Yaꞌanj rihaan soj, ne̱ nari̱ꞌ cunuda̱nj soj nana̱ achiin man soj, ga̱a ne̱ nari̱ꞌ nucuaj nimán ta̱ranꞌ soj a.

³² ꞌO̱ se uun nucua̱j nij síí nataꞌ nana̱ rqué Yaꞌanj rihaan nij soꞌ quiri̱i̱ taꞌngaꞌ nij soꞌ rihaan nimán maꞌa̱n nij soꞌ, ne̱ uun nucua̱j nij soꞌ caꞌne̱ꞌ rá nij soꞌ ga̱ nana̱ aꞌmii nij soꞌ ado̱nj.

^33-34 Dan me se xa̱ꞌ Yaꞌanj, tza̱j ne̱ né si̱j tinachej rasu̱u̱n me Yaꞌanj maꞌ. ꞌO̱ se Yaꞌanj roꞌ, me síí ꞌyaj nica̱ vaa nu̱ꞌ rasu̱u̱n ado̱nj. Dínj ga̱a̱ tuꞌva chana̱ ga̱a nuu chre̱ꞌ nij xꞌneꞌ nij soj si̱j noco̱ꞌ man Cristó á. Ne nó xcúún chana̱ caꞌmi̱i̱ chana̱ maꞌ. Ma̱an se nano̱ xre̱j noꞌ á. Ina̱nj da̱nj taj stucua̱nj Moisés, ne̱ ina̱nj da̱nj vaa tucuáán noco̱ꞌ cunuda̱nj nij xꞌneꞌ nij síí noco̱ꞌ man Cristó ma̱n da̱j a̱ chumanꞌ a.

³⁵ Sese vaa ꞌo̱ nana̱ me rá chana̱ nari̱ꞌ noꞌ, ne̱ xna̱ꞌanj noꞌ man snóꞌo nica̱ noꞌ veꞌ tucuá noꞌ, ne̱ cata̱j xnaꞌanj soꞌ rihaan noꞌ a. Tza̱j ne̱ nij vaa sese canicu̱nꞌ chana̱ caꞌmi̱i̱ noꞌ rihaan cunuda̱nj nij síí noco̱ꞌ man Cristó ga̱a nuu chre̱ꞌ nij soꞌ ado̱nj.

³⁶ Né na̱na̱ cavii raa̱ nij soj me snana̱ Yaꞌanj maꞌ. Né ina̱nj soj me síí cuchiꞌ snana̱ Yaꞌanj rihaan maꞌ. Cheꞌé dan me xca̱j soj cuentá da̱j vaa tucuáán noco̱ꞌ núj si̱j noco̱ꞌ man Cristó á.

³⁷ Sese guun rá ꞌo̱ soꞌ se vaa neꞌen soꞌ nata̱ꞌ soꞌ nana̱ rqué Yaꞌanj rihaan soꞌ do̱ꞌ, sese guun rá soꞌ se vaa ya̱nj Nimán Yaꞌanj ga̱ maꞌa̱n soꞌ do̱ꞌ, ne̱ xca̱j soꞌ cuentá se vaa nana̱ nihánj nana̱ cachrón ꞌu̱nj cheꞌé soj roꞌ, suun caꞌneꞌ maꞌa̱n Síí ꞌNi̱j Raꞌa man níꞌ rihaan níꞌ me nana̱ nihánj a.

³⁸ Sese vaa ꞌo̱ síí taj se vaa né na̱na̱ cataj xnaꞌanj Síí ꞌNi̱j Raꞌa man níꞌ me nana̱ nihánj, ne̱ se̱ cuchumán rá níꞌ se vaa si̱j nataꞌ snana̱ Yaꞌanj me maꞌa̱n soꞌ maꞌ.

³⁹ Cheꞌé dan me nano̱ꞌ uxrá soj da̱j quiꞌya̱j soj, ne̱ gu̱un nucua̱j soj nata̱ꞌ soj nana̱ rqué Yaꞌanj rihaan soj, tinu̱j. Ne̱ se̱ cataj soj se vaa se̱ caꞌvee caꞌmi̱i̱ yuvii̱ xnaꞌánj naca̱ maꞌ.

⁴⁰ Tza̱j ne̱ veꞌé ina̱nj quiꞌya̱j soj nu̱ꞌ se vaa ꞌyaj soj, ne̱ chij ina̱nj quiꞌya̱j soj nu̱ꞌ se‑su̱u̱n Yaꞌanj á.