1 Corintios 12 - Triqui de San Juan Copala

Nataꞌ Pabló cheꞌé suun sa̱ꞌ nica̱j níꞌ ꞌyaj Nimán Yaꞌanj a

¹ Me raj xca̱j soj cuentá cheꞌé suun sa̱ꞌ nica̱j níꞌ ꞌyaj Nimán Yaꞌanj, tinu̱j, nocoj.

² Neꞌen soj se vaa ga̱a ataa canoco̱ꞌ soj man Yaꞌanj, ne̱ náá quiꞌyaj rmaꞌa̱n nii man soj, tihaꞌ yuꞌunj nii man soj, ne̱ chéé soj rihaan yaꞌanj yaꞌmi̱i quiꞌyaj maꞌa̱n yuvii̱ na̱nj á.

³ Cheꞌé dan xa̱ꞌ níꞌ si̱j noco̱ꞌ man Cristó nihánj me se ino̱ ꞌyaj níꞌ, ne̱ cheꞌé dan cata̱j xnaꞌanj ꞌu̱nj rihaan soj se vaa nda̱ꞌ se cata̱j ꞌo̱ soꞌ se vaa qui̱j ndoꞌo vaa Jesús, tza̱j ne̱ né na̱na̱ rqué Nimán Yaꞌanj rihaan soꞌ me nana̱ aꞌmii soꞌ a̱ maꞌ. Tza̱j ne̱ sese cata̱j ꞌo̱ soꞌ se vaa Síí ꞌNi̱j Raꞌa man níꞌ me Jesús, ne̱ nana̱ yoꞌ me nana̱ rqué Nimán Yaꞌanj rihaan soꞌ, dan aꞌvee aꞌmii soꞌ da̱nj ado̱nj.

⁴ Dan me se ino̱ vaa ꞌo̱ ꞌo̱ suun sa̱ꞌ rqué Nimán Yaꞌanj man ꞌo̱ ꞌo̱ níꞌ nica̱j níꞌ chugua̱nj. Tza̱j ne̱ o̱rúnꞌ Nimán Yaꞌanj me síí rqué man ꞌo̱ ꞌo̱ suun sa̱ꞌ yoꞌ na̱nj ado̱nj.

⁵ Ne̱ ino̱ vaa ꞌo̱ ꞌo̱ suun ꞌyaj ꞌo̱ ꞌo̱ níꞌ rihaan tinúú níꞌ a. Tza̱j ne̱ veé o̱rúnꞌ Síí ꞌNi̱j Raꞌa man níꞌ me ꞌyaj nu̱ꞌ suun yoꞌ na̱nj á.

⁶ Ne̱ ino̱ vaa suun ꞌyaj Yaꞌanj ga̱ ꞌo̱ ꞌo̱ níꞌ, tza̱j ne̱ veé o̱rúnꞌ Yaꞌanj ꞌyaj da̱j a̱ suun sa̱ꞌ yoꞌ na̱nj á.

⁷ Dan me se vaa suun sa̱ꞌ nica̱j ꞌo̱ ꞌo̱ níꞌ, ꞌyaj Nimán Yaꞌanj, ne̱ cheꞌé dan neꞌen níꞌ se vaa ya̱nj Nimán Yaꞌanj ga̱ níꞌ, ne̱ cheꞌé suun sa̱ꞌ nica̱j níꞌ roꞌ, cavi̱i̱ sa̱ꞌ doj nu̱ꞌ nij tinu̱j níꞌ, quiꞌya̱j níꞌ ado̱nj.

⁸ Dan me se ꞌo̱ tinúú níꞌ aꞌmii nana̱ cu̱u, ꞌyaj Nimán Yaꞌanj, ne̱ avii ndoꞌo raa̱ ꞌó tinúú níꞌ, ꞌyaj uún maꞌa̱n Nimán Yaꞌanj,

⁹ ne̱ ꞌó tinúú níꞌ me síí nucua̱j ndoꞌo rá man Yaꞌanj se vaa ra̱cuíj ndoꞌo Yaꞌanj man níꞌ, ꞌyaj uún maꞌa̱n Nimán Yaꞌanj, ne̱ uun nucua̱j ꞌó tinúú níꞌ tinahuun sa̱ꞌ soꞌ man síí ranꞌ, ꞌyaj uún maꞌa̱n Nimán Yaꞌanj, tza̱j ne̱ veé o̱rúnꞌ Nimán Yaꞌanj ꞌyaj na̱nj ado̱nj.

¹⁰ ꞌÓ tinúú níꞌ me síí uun nucua̱j ꞌyaj suun sa̱ꞌ noco̱o, ne̱ ꞌó tinúú níꞌ uun nucua̱j nataꞌ nana̱ rqué Yaꞌanj rihaan, ne̱ ꞌó tinúú níꞌ me síí uun nucua̱j xcaj cuentá da̱j vaa nana̱ aꞌmii ꞌo̱ ꞌo̱ níꞌ, ne̱ soꞌ roꞌ, me síí neꞌen sese snana̱ Nimán Yaꞌanj aꞌmii níꞌ niꞌ, ase snana̱ Síí Chre̱e aꞌmii níꞌ a. Ne̱ vaa ꞌó tinúú níꞌ aꞌmii xnaꞌánj naca̱ xnaꞌánj ne neꞌen a̱ maꞌa̱n nij soꞌ maꞌ. Ne̱ ꞌó tinúú níꞌ roꞌ, me síí nataꞌ me se me raj cata̱a nana̱ caꞌmii tinúú níꞌ síí aꞌmii xnaꞌánj naca̱ yoꞌ a.

¹¹ Ne̱ maꞌa̱n Nimán Yaꞌanj me síí ꞌyaj uun nucua̱j ꞌo̱ ꞌo̱ tinúú níꞌ quiꞌya̱j tinúú níꞌ suun sa̱ꞌ nica̱j soꞌ, ne̱ o̱rúnꞌ Nimán Yaꞌanj me síí ꞌyaj suun ga̱ ꞌo̱ ꞌo̱ níꞌ na̱nj ado̱nj. Neꞌen Nimán Yaꞌanj da̱j vaa ꞌo̱ ꞌo̱ níꞌ, ne̱ rqué soꞌ rihaan ꞌo̱ ꞌo̱ níꞌ se vaa me rá soꞌ rque̱ soꞌ man níꞌ, ne̱ dan me se nda̱a ino̱ vaa suun sa̱ꞌ rqué soꞌ rihaan ꞌo̱ ꞌo̱ níꞌ a.

¹² Neꞌen nij soj se vaa vaa o̱rúnꞌ nee̱ man níꞌ, tza̱j ne̱ ma̱n queꞌe̱e̱ rej ꞌyaj suun man níꞌ ado̱nj. ꞌO̱ se ma̱n raꞌa níꞌ do̱ꞌ, tacóó níꞌ do̱ꞌ, xréé níꞌ do̱ꞌ, rlij rihaan níꞌ do̱ꞌ a. Dan me se queꞌe̱e̱ nee̱ ꞌyaj suun man níꞌ, tza̱j ne̱ o̱rúnꞌ níꞌ, ne̱ ase vaa nee̱ man o̱rúnꞌ yuvii̱ roꞌ, da̱nj vaa ta̱ranꞌ níꞌ si̱j noco̱ꞌ man Cristó ado̱nj.

¹³ Dan me se ga̱a cataꞌ ne níꞌ, ne̱ cunuu rcuaꞌa̱a̱n ta̱ranꞌ níꞌ, quiꞌyaj Nimán Yaꞌanj, ne̱ cheꞌé dan ase vaa nee̱ man o̱rúnꞌ yuvii̱ roꞌ, vaa ta̱ranꞌ níꞌ cuano̱ na̱nj chugua̱nj. Ino̱ vaa taꞌa̱j ꞌo̱ ꞌo̱ níꞌ, ne̱ veé dan me se taꞌa̱j níꞌ me yuvii̱ israelitá do̱ꞌ, taꞌa̱j níꞌ me yuvii̱ yaníj do̱ꞌ, taꞌa̱j níꞌ me mozó do̱ꞌ, taꞌa̱j níꞌ ne uun mozó do̱ꞌ, tza̱j ne̱ ase vaa nee̱ man o̱rúnꞌ yuvii̱ roꞌ, vaa ta̱ranꞌ níꞌ cuano̱, ne̱ ya̱nj ndoꞌo Nimán Yaꞌanj ga̱ cunuda̱nj níꞌ cuano̱ ado̱nj.

¹⁴ Neꞌen soj se vaa ne ꞌo̱ cuya̱a̱n vaa cunuda̱nj nee̱ man ꞌo̱ yuvii̱ maꞌ. Ma̱an se ino̱ vaa ꞌo̱ ꞌo̱ rej ꞌyaj suun man yuvii̱ ado̱nj.

¹⁵ Dan me se caꞌve̱e se gu̱un rá tacóó níꞌ se vaa, cheꞌé se naꞌvee quiꞌya̱j suun yoꞌ se‑su̱u̱n raꞌa níꞌ roꞌ, cheꞌé dan naxu̱u̱n yoꞌ man maꞌa̱n yoꞌ rihaan níꞌ cata̱j yoꞌ, tza̱j ne̱ se̱ guun nucua̱j yoꞌ quiꞌya̱j yoꞌ da̱nj maꞌ. ꞌO̱ se nee̱ man maꞌa̱n níꞌ me tacóó níꞌ na̱nj ado̱nj.

¹⁶ Ne̱ caꞌve̱e se gu̱un rá xréé níꞌ se vaa, cheꞌé se naꞌvee quiꞌya̱j suun yoꞌ se‑su̱u̱n rlij rihaan níꞌ, ne̱ cheꞌé dan naxu̱u̱n yoꞌ man maꞌa̱n yoꞌ rihaan níꞌ, tza̱j ne̱ se̱ guun nucua̱j yoꞌ quiꞌya̱j yoꞌ da̱nj maꞌ. ꞌO̱ se nee̱ man maꞌa̱n níꞌ me xréé níꞌ na̱nj ado̱nj.

¹⁷ Ne̱ vaa se uun nu̱ꞌ nee̱ man níꞌ rihaan níꞌ, ne̱ sese ina̱nj rlij rihaan níꞌ me nu̱ꞌ nee̱ man níꞌ, ne̱ asa̱ꞌ caꞌve̱e cuno̱ níꞌ, rá soj ga̱. Ne̱ sese ina̱nj xréé níꞌ me nu̱ꞌ nee̱ man níꞌ, ne̱ asa̱ꞌ caꞌve̱e cuchru̱nj níꞌ, rá soj ga̱.

¹⁸ Yaꞌanj me síí quiꞌyaj nu̱ꞌ nee̱ man níꞌ, ne̱ Yaꞌanj roꞌ, me síí rqué suun rihaan ꞌo̱ ꞌo̱ nee̱ man níꞌ da̱j quiꞌya̱j nij yoꞌ a.

¹⁹ Sese cuya̱a̱n ga̱a̱ cunuda̱nj nee̱ man níꞌ, ne̱ né yuvi̱i̱ me níꞌ maꞌ.

²⁰ Dan me se nda̱ꞌ se ino̱ vaa ꞌo̱ ꞌo̱ nee̱ man níꞌ, tza̱j ne̱ o̱rúnꞌ nee̱ me níꞌ na̱nj ado̱nj.

²¹ Ne nó xcúún rlij rihaan níꞌ cata̱j yoꞌ rihaan raꞌa níꞌ a: “Taj se uún so̱ꞌ rihanj maꞌ.” Ne̱ ne nó xcúún raa̱ níꞌ cata̱j yoꞌ rihaan tacóó níꞌ a: “Taj se uún so̱ꞌ rihanj maꞌ.” Se̱ guun tuꞌva̱ yoꞌ da̱nj maꞌ.

²² ꞌO̱ se nee̱ man níꞌ nee̱ vaa ninaj doj rá níꞌ roꞌ, doj a̱ achiin nee̱ yoꞌ man níꞌ,

²³ ne̱ nee̱ man níꞌ nee̱ nij doj rá níꞌ roꞌ, veꞌé a̱ doj nique̱e̱ sa̱ꞌ yoꞌ, ꞌyaj níꞌ, ne̱ naꞌvej rá níꞌ queneꞌe̱n yuvii̱ man nee̱ yoꞌ, ne̱ cheꞌé dan aráán níꞌ yatzíj man nee̱ yoꞌ a.

²⁴ Tza̱j ne̱ nee̱ man níꞌ nee̱ veꞌé doj roꞌ, ne achiin ca̱ráán níꞌ yatzíj man nee̱ yoꞌ maꞌ. Ne̱ veꞌé ndoꞌo vaa rcuaꞌa̱a̱n nu̱ꞌ nee̱ man níꞌ, quiꞌyaj Yaꞌanj, ne̱ veꞌé doj quiꞌyaj soꞌ cheꞌé nee̱ man níꞌ nee̱ taj suun doj,

²⁵ cheꞌé rej naꞌvej rá soꞌ ga̱a̱ yaníj nee̱ yoꞌ man níꞌ a. Ma̱an se veꞌé tu̱mé ꞌo̱ nee̱ man níꞌ man tuviꞌ nee̱ man níꞌ, rá Yaꞌanj,

²⁶ ne̱ sese ranꞌ chiꞌii̱ do̱j nee̱ man níꞌ, ne̱ aꞌngaj nu̱ꞌ nee̱ man níꞌ a. Ne̱ da̱nj ina̱nj uún, ne̱ sese aꞌmii cochro̱j nii cheꞌé do̱j nee̱ man níꞌ, ne̱ uun niha̱ꞌ rá nu̱ꞌ nee̱ man níꞌ uún a.

²⁷ Ya̱j me se síí noco̱ꞌ man Cristó me ta̱ranꞌ soj, ne̱ cheꞌé dan ase vaa nee̱ man Cristó vaa cunuda̱nj soj, ne̱ ase vaa do̱j nee̱ man Cristó vaa ꞌo̱ ꞌo̱ nij soj á.

²⁸ Ne̱ Yaꞌanj roꞌ, me síí cuneꞌ man ꞌo̱ ꞌo̱ soj quiꞌya̱j soj se‑su̱u̱n Yaꞌanj cheꞌé xꞌneꞌ nij síí noco̱ꞌ man Cristó, ne̱ ino̱ vaa suun caꞌneꞌ Yaꞌanj rihaan ꞌo̱ ꞌo̱ soj a. Ne̱ dan me se asino cuneꞌ Yaꞌanj man núj si̱j ꞌanj nataꞌ snana̱ Jesucristó, ga̱a ne̱ cuneꞌ uún Yaꞌanj man nij síí nataꞌ nana̱ rqué Yaꞌanj rihaan a. Ga̱a ne̱ cuneꞌ uún Yaꞌanj man nij síí tucuꞌyón snana̱ Yaꞌanj rihaan yuvii̱, ga̱a ne̱ cuneꞌ uún Yaꞌanj man nij síí ꞌyaj suun sa̱ꞌ noco̱o a. Ga̱a ne̱ cuneꞌ uún Yaꞌanj man nij síí uun nucua̱j tinahuun sa̱ꞌ man yuvii̱ ranꞌ, ne̱ cuneꞌ uún Yaꞌanj man nij síí racuíj man yuvii̱ ranꞌ sayuun a. Ne̱ cuneꞌ Yaꞌanj man nij síí uun chij rihaan nij síí noco̱ꞌ man Cristó, ne̱ cuneꞌ Yaꞌanj man nij síí neꞌen caꞌmi̱i̱ xnaꞌánj naca̱ a.

²⁹ Tza̱j ne̱ né si̱j cuneꞌ Jesucristó caꞌa̱nj nata̱ꞌ snana̱ soꞌ me ta̱ranꞌ soj maꞌ. Né si̱j nataꞌ nana̱ rqué Yaꞌanj rihaan nij soꞌ me cunuda̱nj soj maꞌ. Né si̱j tucuꞌyón snana̱ Yaꞌanj rihaan tinúú níꞌ me cunuda̱nj soj maꞌ. Ne uun nucua̱j cunuda̱nj níꞌ quiꞌya̱j níꞌ suun sa̱ꞌ noco̱o maꞌ.

³⁰ Ne uun nucua̱j ta̱ranꞌ soj tinahuun sa̱ꞌ ta̱ranꞌ soj man yuvii̱ ranꞌ maꞌ. Ne aꞌmii cunuda̱nj soj xnaꞌánj naca̱ maꞌ. Ne uun nucua̱j ta̱ranꞌ soj cataj xnaꞌanj soj me se me raj cata̱a nana̱ aꞌmii tinúú níꞌ ga̱a aꞌmii tinúú níꞌ xnaꞌánj naca̱ maꞌ.

³¹ ꞌO̱ se nano̱ꞌ soj da̱j quiꞌya̱j soj, ga̱a ne̱ caꞌne̱ꞌ Yaꞌanj suun rihaan soj quiꞌya̱j soj nij suun sa̱ꞌ doj á. Tza̱j ne̱ me rá ꞌu̱nj cata̱j ꞌu̱nj ꞌó nana̱ rihaan soj, ne̱ me ya̱ raj nari̱ꞌ soj ꞌó tucuáán sa̱ꞌ ina̱nj na̱nj ado̱nj.