1 Corintios 11 - Triqui de San Juan Copala

¹ Dan me se xcaj ꞌu̱nj cuentá da̱j quiꞌyaj Cristó, ne̱ ina̱nj da̱nj ꞌyáá ꞌu̱nj, ne̱ xca̱j soj cuentá da̱j ꞌyáá ꞌu̱nj, ne̱ ina̱nj da̱nj quiꞌya̱j soj uún á.

Da̱j quiꞌya̱j níꞌ ga̱a aráj gue̱e̱ níꞌ rihaan Yaꞌanj a

² A̱ ꞌó güii ne quiniꞌyo̱n soj manj, ne̱ veꞌé ꞌyaj soj nu̱ꞌ tucuáán tucuꞌyonj rihaan soj, ne̱ cheꞌé dan taj ꞌu̱nj se vaa sa̱ꞌ uxrá quiꞌyaj soj á.

³ Me raj xca̱j soj cuentá se vaa uun chij Cristó rihaan nu̱ꞌ snóꞌo, ne̱ snóꞌo uun chij rihaan chana̱ nica̱ soꞌ, ne̱ uun chij Yaꞌanj rihaan Cristó a.

⁴ Dan me se ga̱a achíín niꞌya̱j snóꞌo rihaan Yaꞌanj do̱ꞌ, ga̱a nataꞌ soꞌ snana̱ Yaꞌanj cuno̱ cunuda̱nj nij síí noco̱ꞌ man Cristó do̱ꞌ, ne̱ sese ca̱ráán soꞌ raa̱ soꞌ, ne̱ nij ndoꞌo ꞌyaj soꞌ rihaan maꞌa̱n soꞌ vaa ga̱a na̱nj ado̱nj.

⁵ Ne̱ chana̱ me se ga̱a achíín niꞌya̱j noꞌ rihaan Yaꞌanj do̱ꞌ, ga̱a nataꞌ noꞌ snana̱ Yaꞌanj cuno̱ cunuda̱nj nij síí noco̱ꞌ man Cristó do̱ꞌ, ne̱ sese se̱ caráán noꞌ raa̱ noꞌ, ne̱ nij ꞌyaj noꞌ rihaan maꞌa̱n noꞌ vaa na̱nj á. Ase vaa chana̱ raa̱ ca̱an roꞌ, vaa noꞌ,

⁶ sese se̱ caꞌvej rá noꞌ ca̱ráán noꞌ raa̱ noꞌ na̱nj ado̱nj. Táá a̱ se caꞌve̱j cachri̱j rá noꞌ caca̱ ca̱an nii raa̱ noꞌ, sese ne naꞌa̱j noꞌ ga̱a̱ da̱nj raa̱ noꞌ á. Sese naꞌa̱j noꞌ, ne̱ ca̱ráán noꞌ raa̱ noꞌ ado̱nj.

⁷ Ne nó xcúún núj sno̱ꞌo ca̱ráán núj raa̱ núj maꞌ. ꞌO̱ se ase vaa Yaꞌanj roꞌ, da̱nj vaa maꞌa̱n núj sno̱ꞌo, ne̱ cheꞌé dan niꞌya̱j yuvii̱ man snóꞌo ne̱ xcaj yuvii̱ cuentá se vaa veꞌé ndoꞌo vaa Yaꞌanj si̱j quiꞌyaj man snóꞌo ado̱nj. Ne̱ niꞌya̱j yuvii̱ man chana̱ ne̱ xcaj yuvii̱ cuentá se vaa veꞌé ndoꞌo vaa snóꞌo, cheꞌé se cúú man snóꞌo roꞌ, guun chana̱ a.

⁸ Neꞌen soj se vaa cúú man maꞌa̱n snóꞌo roꞌ, cavii chana̱, ne̱ né cu̱j man chana̱ cavii snóꞌo maꞌ.

⁹ Ne̱ né cheꞌe̱ chana̱ me quiꞌyaj Yaꞌanj man snóꞌo maꞌ. Cheꞌe̱ snóꞌo roꞌ, me quiꞌyaj Yaꞌanj man chana̱ ado̱nj.

¹⁰ Cheꞌé dan no̱ xcúún chana̱ ti̱haa̱n chana̱ se vaa uun chij snóꞌo rihaan noꞌ, ne̱ cheꞌé dan ca̱ráán noꞌ raa̱ noꞌ, ne̱ queneꞌe̱n nij se‑mo̱zó Yaꞌanj se vaa veꞌé ꞌyaj noꞌ ado̱nj.

¹¹ Tza̱j ne̱ níꞌ si̱j noco̱ꞌ man Yaꞌanj Si̱j ꞌNi̱j Raꞌa man níꞌ roꞌ, se̱ guun cata̱j níꞌ se vaa taj se uun snóꞌo rihaan chana̱, ne̱ se̱ guun cata̱j níꞌ se vaa taj se uun chana̱ rihaan snóꞌo maꞌ.

¹² ꞌO̱ se cheꞌé snóꞌo guun chana̱ rihaan chumii̱ nihánj, ne̱ cheꞌé chana̱ me aꞌngaa snóꞌo, tza̱j ne̱ Yaꞌanj me síí quiꞌyaj man cunuda̱nj níꞌ ado̱nj.

¹³ Nuchru̱j ra̱a̱ maꞌa̱n soj da̱j quiꞌya̱j soj á. Cuna̱j vaa cachi̱nj niꞌya̱j chana̱ rihaan Yaꞌanj sese se̱ caráán raa̱ noꞌ, rá soj naꞌ.

¹⁴ Neꞌen cunuda̱nj yuvii̱ se vaa sese ga̱a̱ xca̱a̱n ndoꞌo yuvé raa̱ snóꞌo, ne̱ gu̱un naꞌa̱j soꞌ,

¹⁵ tza̱j ne̱ sese xca̱a̱n yuvé raa̱ chana̱, ne̱ veꞌé vaa noꞌ, rá yuvii̱ a. Me rá Yaꞌanj ga̱a̱ xca̱a̱n yuvé raa̱ chana̱, ne̱ cheꞌé dan me rqué Yaꞌanj yuvé raa̱ noꞌ, cheꞌé se me rá Yaꞌanj ca̱ráán yoꞌ raa̱ noꞌ a.

¹⁶ Sese vaa ꞌo̱ síí naꞌvej rá cuno̱ nana̱ nihánj, ne̱ taj se quiꞌya̱j níꞌ a̱ maꞌ. ꞌO̱ se nuviꞌ ꞌó tucuáán canoco̱ꞌ níꞌ a̱ maꞌ. ꞌO̱ se veé nihánj me tucuáán noco̱ꞌ níꞌ do̱ꞌ, ta̱ranꞌ nij xꞌneꞌ nij síí noco̱ꞌ man Yaꞌanj ma̱n cunuda̱nj chumanꞌ do̱ꞌ na̱nj ado̱nj.

¹⁷ Vaa ꞌó nana̱ cata̱j xnaꞌanj ꞌu̱nj rihaan soj uún, tza̱j ne̱ se̱ cataj ꞌu̱nj se vaa veꞌé ꞌyaj soj maꞌ. Ma̱an se nij ꞌyaj soj ga̱a nuu chre̱ꞌ soj, ne̱ se̱ cavii sa̱ꞌ soj, quiꞌya̱j se vaa ꞌyaj soj maꞌ. Ma̱an se nij doj cavi̱i̱ soj ado̱nj.

¹⁸ Asino ya̱a̱n cata̱j xnaꞌanj ꞌu̱nj rihaan soj cheꞌé se vaa ne cuya̱a̱n vaa rá ta̱ranꞌ soj a̱ maan chugua̱nj. Dan me se caꞌnaꞌ nana̱ rihanj se vaa ga̱a nuu chre̱ꞌ xꞌneꞌ nij soj, ne̱ uun yaníj taꞌa̱j soj rihaan tuviꞌ soj, ne̱ ino̱ vaa rá taꞌa̱j ꞌo̱ ꞌo̱ soj, ne̱ xa̱ꞌ nana̱ yoꞌ, tza̱j ne̱ nana̱ ya̱ me nana̱ yoꞌ, raj na̱nj á.

¹⁹ ꞌO̱ se cuna̱j uxrá vaa cuxraꞌ taꞌa̱j soj man maꞌa̱n soj a̱ xe̱e̱. Ne̱ ya̱j me se xca̱j níꞌ cuentá ni̱ꞌyaj níꞌ me tuviꞌ soj me síí noco̱ꞌ ya̱ man Cristó raj ado̱nj.

²⁰ Dan me se ga̱a nuu chre̱ꞌ soj, navij rá soj chá xtiꞌno̱ soj cheꞌé Síí ꞌNi̱j Raꞌa man níꞌ, rá soj, tza̱j ne̱ ino̱ uxrá ꞌyaj soj, ne̱ né cheꞌe̱ ya̱ Síí ꞌNi̱j Raꞌa man níꞌ chá xtiꞌno̱ soj ga̱ tinúú soj a̱ maꞌ.

²¹ Ma̱an se cheꞌé maꞌa̱n soj chá xtiꞌno̱ ꞌo̱ ꞌo̱ soj, ne̱ dan me se taꞌaa ꞌo̱ ꞌo̱ soj chá maꞌa̱n soj, ne̱ naꞌvej rá soj rque̱ soj se chá cha̱ tinúú soj maꞌ. Cheꞌé dan naꞌaan rque ꞌo̱ taꞌa̱j tinúú soj, ꞌyaj soj ado̱nj. Ne̱ ꞌó taꞌa̱j soj me se uun xno̱ uún a.

²² Sese ina̱nj me rá soj cha̱ soj do̱ꞌ, coꞌo̱ soj do̱ꞌ, ne̱ me cheꞌé ne quina̱nꞌ soj tucuá soj cha̱ soj do̱ꞌ, coꞌo̱ soj do̱ꞌ ga̱. Taj va̱j tucuá soj vaa, dan ꞌyaj soj da̱nj naꞌ. Nachriꞌ soj niꞌya̱j soj man xꞌneꞌ tinúú soj síí noco̱ꞌ man Yaꞌanj, dan ꞌyaj soj da̱nj naꞌ. Me cheꞌé me rá soj gu̱un naꞌa̱j nij tinúú soj nij síí nique̱ ga̱. Da̱j cata̱j ꞌu̱nj rihaan soj, rá soj ga̱. Caꞌve̱e cata̱j ꞌu̱nj se vaa sa̱ꞌ uxrá ꞌyaj soj, rá soj a̱ xe̱e̱.

Da̱j quiꞌya̱j níꞌ ga̱a cha̱ níꞌ rachrúún do̱ꞌ, ga̱a coꞌo̱ níꞌ na vinó do̱ꞌ, cheꞌé Síí ꞌNi̱j Raꞌa man níꞌ a

²³ Dan me se cataj xnaꞌanj Síí ꞌNi̱j Raꞌa man níꞌ rihanj da̱j quiꞌya̱j níꞌ ga̱a cha̱ xtiꞌno̱ níꞌ cheꞌé soꞌ, ne̱ a̱j cataj xnaꞌanj ꞌu̱nj nana̱ yoꞌ rihaan soj á. Dan me se ga̱a quisíj güii tacuachén síí cuꞌna̱j Judas man Jesús Si̱j ꞌNi̱j Raꞌa man níꞌ rihaan nij síí ta̱j riꞌyunj man Jesús, ga̱a ne̱ ma̱an tiꞌnuu dan roꞌ, nica̱j Síí ꞌNi̱j Raꞌa man níꞌ rachrúún,

²⁴ ne̱ cataj soꞌ guun niꞌya̱j níꞌ rihaan Yaꞌanj cheꞌé rachrúún yoꞌ, ne̱ guun cheꞌe̱ soꞌ cuxraꞌ taꞌa̱j soꞌ man rachrúún yoꞌ, ga̱a ne̱ cataj soꞌ a: “Nihánj me nee̱ manj, ne̱ ina̱nj cheꞌé soj vaa nihánj ado̱nj. Cha̱ soj man nihánj, ga̱a ne̱ nanu̱j rá soj manj á”, taj Jesús rihaan nij síí noco̱ꞌ man soꞌ a.

²⁵ Ga̱a ne̱ quisíj chá xtiꞌno̱ nij soꞌ, ga̱a ne̱ nica̱j Jesús ꞌo̱ tazá nu̱u̱ na vinó, ga̱a ne̱ cataj uún soꞌ a: “Na vinó nihánj roꞌ, me ton manj, ne̱ cheꞌé ton manj roꞌ, uchruj Yaꞌanj ꞌo̱ tucuáán naca̱ rihaan soj da̱j quiꞌya̱j Yaꞌanj ga̱ soj, ne̱ me maꞌa̱n güii coꞌo̱ soj na nihánj, ne̱ nanu̱j rá soj manj á”, taj Jesús rihaan nij síí noco̱ꞌ man soꞌ a.

²⁶ Dan me se me maꞌa̱n güii cha̱ soj rachrúún yoꞌ do̱ꞌ, coꞌo̱ nij soj na vinó yoꞌ do̱ꞌ, ne̱ ti̱haa̱n soj rihaan ꞌó yuvii̱ se vaa caviꞌ Síí ꞌNi̱j Raꞌa man níꞌ cheꞌé soj, ne̱ ina̱nj da̱nj quiꞌya̱j soj nda̱a se quisi̱j güii caꞌna̱ꞌ uún soꞌ rihaan chumii̱ nihánj a.

²⁷ Cheꞌé dan me sese nij ꞌyaj ꞌo̱ tinúú níꞌ ga̱a chá soꞌ rachrúún do̱ꞌ, ga̱a ꞌo soꞌ na vinó do̱ꞌ, cheꞌé Síí ꞌNi̱j Raꞌa man níꞌ, ne̱ tumé soꞌ cacunꞌ, cheꞌé yan ꞌyaj soꞌ da̱nj ado̱nj. Tumé soꞌ cacunꞌ rihaan nee̱ man Síí ꞌNi̱j Raꞌa man níꞌ do̱ꞌ, rihaan ton man Síí ꞌNi̱j Raꞌa man níꞌ do̱ꞌ na̱nj ado̱nj.

²⁸ Cheꞌé dan xca̱j ꞌo̱ ꞌo̱ nij soj cuentá da̱j quiꞌya̱j ꞌo̱ ꞌo̱ soj, ga̱a ne̱ veꞌé cha̱ soj rachrúún do̱ꞌ, veꞌé coꞌo̱ soj na vinó do̱ꞌ á.

²⁹ Sese ne acaj soj cuentá sese nee̱ man Síí ꞌNi̱j Raꞌa man níꞌ me se chá soj, ne̱ quira̱nꞌ soj sayuun, ne̱ sese ne acaj soj cuentá sese ton man Síí ꞌNi̱j Raꞌa man níꞌ me se ꞌo soj, ne̱ quira̱nꞌ soj sayuun ado̱nj.

³⁰ Dan me se ma̱an cheꞌé se nij ꞌyaj taꞌa̱j soj rihaan Síí ꞌNi̱j Raꞌa man níꞌ roꞌ, cheꞌé dan a̱j ranꞌ queꞌe̱e̱ soj sayuun chugua̱nj. Dan me se taꞌa̱j soj anó chiꞌii̱ man, ne̱ ꞌó taꞌa̱j soj ꞌo̱ ninaj, ne̱ ꞌó taꞌa̱j soj a̱j caviꞌ na̱nj á.

³¹ Sese naquiꞌya̱j cu̱u níꞌ cheꞌé maꞌa̱n níꞌ da̱j vaa níꞌ, ga̱a ne̱ se̱ quiꞌyaj Síí ꞌNi̱j Raꞌa man níꞌ sayuun man níꞌ maꞌ.

³² Tza̱j ne̱ ma̱an cheꞌé se nij ꞌyaj níꞌ, rá Síí ꞌNi̱j Raꞌa man níꞌ, ne̱ cheꞌé dan ꞌyaj soꞌ sayuun man níꞌ, cheꞌé rej nari̱ꞌ níꞌ da̱j quiꞌya̱j níꞌ cavi̱i̱ sa̱ꞌ níꞌ ado̱nj. Sese nari̱ꞌ sa̱ꞌ níꞌ chrej sa̱ꞌ, ga̱a ne̱ se̱ quiranꞌ níꞌ sayuun quiꞌya̱j Yaꞌanj, asa̱ꞌ quiꞌyaj soꞌ sayuun man cunuda̱nj yuvii̱ ma̱n rihaan chumii̱ nihánj maꞌ.

³³ Cheꞌé dan, ga̱a nuu chre̱ꞌ soj cha̱ soj, ga̱a ne̱ na̱ꞌvi̱j soj caꞌna̱ꞌ cunuda̱nj tinúú soj, tinu̱j, nocoj.

³⁴ Sese naꞌaan ndoꞌo rque ꞌo̱ tuviꞌ soj ta̱ꞌ asuun, ne̱ cha̱ soꞌ tucuá soꞌ, ga̱a ne̱ se̱ quiranꞌ soj sayuun cheꞌé se vaa ꞌyaj soj ga̱a nuu chre̱ꞌ soj maꞌ. Ne̱ ꞌó nana̱ xnáꞌanj soj manj roꞌ, cata̱j xnaꞌanj ꞌu̱nj nana̱ yoꞌ rihaan soj asa̱ꞌ cuchij chiháán soj ado̱nj.