1 Corintios 10 - Triqui de San Juan Copala

Ta̱dó uxrá níꞌ se vaa se̱ caráj gue̱e̱ níꞌ rihaan yaꞌanj quiꞌyaj maꞌa̱n yuvii̱ á

¹ Me raj xca̱j nij soj cuentá cheꞌé xi̱i núj si̱j israelitá nij síí cumán ga̱a naá, tinu̱j, nocoj, se vaa caráán ngaa rihaan güii xráá cunuda̱nj nij soꞌ, quiꞌyaj Yaꞌanj, ne̱ cachén sa̱ꞌ nij soꞌ tanu̱u̱ na yaꞌa̱nj, quiꞌyaj Yaꞌanj,

² ne̱ ga̱a cachén nij yuvii̱ israelitá rej caráán ngaa rihaan güii xráá nij soꞌ do̱ꞌ, ga̱a cachén sa̱ꞌ nij soꞌ nda̱a rej xco̱ na yaꞌa̱nj do̱ꞌ, ne̱ yoꞌ me cataꞌ ne nij soꞌ ga̱ síí cuꞌna̱j Moisés vaa a.

³ Ne̱ vaa se rqué Cristó rihaan nij soꞌ chá cunuda̱nj nij soꞌ,

⁴ ne̱ vaa na rqué Cristó rihaan nij soꞌ coꞌo cunuda̱nj nij soꞌ ado̱nj. Dan me se cachéé Cristó ga̱ nij soꞌ me rej maꞌa̱n va̱j nij soꞌ, ne̱ ase vaa yuvej quixraꞌ cavii na coꞌo nij yuvii̱ israelitá roꞌ, da̱nj vaa Cristó rihaan nimán nij soꞌ, rqué Cristó nu̱ꞌ se vaa cachiin man nimán nij soꞌ ado̱nj.

⁵ Tza̱j ne̱ ne cara̱nꞌ rá Yaꞌanj ni̱ꞌyaj Yaꞌanj man taꞌa̱j doj nij soꞌ maꞌ. Do̱j tzínꞌ tuviꞌ nij soꞌ me síí sa̱ꞌ rihaan Yaꞌanj, ne̱ cheꞌé dan caviꞌ nu̱ꞌ ꞌó taꞌa̱j nij soꞌ rej tacaan, quiꞌyaj Yaꞌanj na̱nj á.

⁶ Xca̱j ra̱a̱ níꞌ da̱j quiꞌyaj nij yuvii̱ israelitá ga̱a naá, ne̱ xca̱j níꞌ cuentá da̱j quiꞌya̱j níꞌ ya̱j á. Dan me se guun ndoꞌo rá nij yuvii̱ israelitá quiꞌya̱j nij soꞌ se nij, ga̱a ne̱ quiranꞌ nij soꞌ sayuun, ne̱ cheꞌé dan xca̱j níꞌ cuentá se vaa ne nó xcúún níꞌ gu̱un rá níꞌ quiꞌya̱j níꞌ se nij maꞌ.

⁷ Dan me se caráj gue̱e̱ taꞌa̱j nij soꞌ rihaan yaꞌanj quiꞌyaj maꞌa̱n yuvii̱, ne̱ dan me se caꞌanj ca̱yáán nij yuvii̱ israelitá rej rihaan nij yaꞌanj yoꞌ, ga̱a ne̱ chá nij soꞌ ne̱ coꞌo nij soꞌ, ga̱a ne̱ canicunꞌ nij soꞌ, ga̱a ne̱ qui̱j tico tuviꞌ nij soꞌ ga̱ tuviꞌ nij soꞌ rihaan yaꞌanj yoꞌ, taj Danj Yaꞌanj a. Dan me se xca̱j níꞌ cuentá se vaa se̱ caráj gue̱e̱ níꞌ rihaan yaꞌanj quiꞌyaj maꞌa̱n yuvii̱ maꞌ.

⁸ ꞌO̱ se quiꞌyaj ꞌó taꞌa̱j nij yuvii̱ israelitá cacunꞌ otoj nij soꞌ ga̱ ꞌó yuvii̱ né ni̱ca̱ nij soꞌ me, ne̱ dan me se caviꞌ ico̱ vaꞌnu̱j míj (23,000) tuviꞌ nij soꞌ rque ꞌo̱ güii yoꞌ, quiꞌyaj cacunꞌ yoꞌ a. Cheꞌé dan xca̱j níꞌ cuentá, ne̱ se̱ quiꞌyaj níꞌ da̱nj maꞌ.

⁹ Ne̱ guun rá nij soꞌ queneꞌe̱n nij soꞌ sese ya̱ ya̱ quiꞌya̱j Yaꞌanj sayuun man nij soꞌ cheꞌé cacunꞌ tumé nij soꞌ a. Doj a̱ quiꞌyaj nij soꞌ cacunꞌ, tza̱j ne̱ ri̱i̱ nij soꞌ caviꞌ, quiꞌyaj xcuáá, ne̱ cheꞌé dan xca̱j níꞌ cuentá, ne̱ se̱ quiꞌyaj níꞌ da̱nj maꞌ.

¹⁰ Ne̱ caꞌmii taꞌa̱j nij soꞌ nana̱ nij cheꞌé síí cuꞌna̱j Moisés ga̱ Aarón, se vaa ne veꞌé quiꞌyaj ro̱j soꞌ a. Ne̱ cheꞌé dan caviꞌ ꞌó taꞌa̱j nij soꞌ, quiꞌyaj se‑mo̱zó Yaꞌanj síí caꞌnéé Yaꞌanj rihaan nij soꞌ, ne̱ cheꞌé dan xca̱j níꞌ cuentá, ne̱ se̱ quiꞌyaj níꞌ da̱nj maꞌ.

¹¹ Ina̱nj da̱nj quiranꞌ nij yuvii̱ israelitá nij síí cumán ga̱a naá, ga̱a ne̱ cachrón nii nana̱ nihánj cheꞌé nij soꞌ rihaan yanj, cheꞌé yan xca̱j níꞌ cuentá da̱j quiꞌya̱j níꞌ tiempó ya̱j, cheꞌé se nichrunꞌ quisi̱j ya̱ nu̱ꞌ se vaa ataꞌ tuꞌva Yaꞌanj cheꞌé chumii̱ a.

¹² Sese sa̱ꞌ uxrá nocoꞌ ꞌo̱ soꞌ man Cristó rá soꞌ, ne̱ tu̱mé uxrá soꞌ man soꞌ se̱ gaa na̱nj caꞌa̱nj yaníj soꞌ ne̱ quiri̱ꞌ soꞌ a.

¹³ Xca̱j soj cuentá se vaa ga̱a avii raa̱ soj quiꞌya̱j soj me maꞌa̱n se chiꞌi̱i̱, ne̱ cuya̱a̱n ranꞌ ꞌó da̱nj yuvii̱ uún na̱nj á. Tza̱j ne̱ vaa cheꞌé ga̱a̱ nucua̱j rá soj man Yaꞌanj, cheꞌé se asa̱ꞌ cavii raa̱ soj quiꞌya̱j soj se chiꞌi̱i̱, ne̱ ra̱cuíj Yaꞌanj man soj da̱j ga̱a̱ quiꞌya̱j soj, ga̱a ne̱ nani̱i̱ soj rihaan se chiꞌi̱i̱, ne̱ se̱ quiꞌyaj soj cacunꞌ maꞌ. Dan ga̱a ne̱ se̱ guun nucua̱j se chiꞌi̱i̱ yoꞌ quiꞌya̱j canaán yoꞌ rihaan soj maꞌ.

¹⁴ Cheꞌé dan tu̱mé uxrá soj man soj si̱j ꞌe̱e̱ ndoꞌo raj man chugua̱nj. Se̱ caráj gue̱e̱ soj rihaan yaꞌanj quiꞌyaj maꞌa̱n yuvii̱ maꞌ.

¹⁵ Síí a̱j acaj cuentá me soj, raj, ne̱ cheꞌé dan me nuchru̱j ra̱a̱ soj nana̱ aꞌmij á.

¹⁶ Dan me se ga̱a nuu chre̱ꞌ níꞌ rihaan Yaꞌanj, ne̱ vaa ꞌo̱ tazá na vinó rihaan níꞌ, ne̱ taj níꞌ guun niꞌya̱j níꞌ rihaan Yaꞌanj cheꞌé tazá, ne̱ ase vaa ton cavii man Cristó roꞌ, da̱nj vaa na vinó yoꞌ rihaan níꞌ a. Ne̱ da̱nj tihaa̱n níꞌ se vaa uun rcuaꞌa̱a̱n níꞌ ga̱ Cristó cheꞌé ton cavii man soꞌ chugua̱nj. Ga̱a ne̱ uxraꞌ taꞌa̱j níꞌ rachrúún, ga̱a ne̱ chá ta̱ranꞌ níꞌ do̱j rachrúún yoꞌ, ne̱ ase vaa nee̱ man Cristó roꞌ, da̱nj vaa rachrúún yoꞌ rihaan níꞌ a. Ne̱ da̱nj tihaa̱n níꞌ se vaa uun rcuaꞌa̱a̱n níꞌ ga̱ Cristó cheꞌé se caviꞌ Cristó cheꞌé níꞌ chugua̱nj.

¹⁷ Dan me se o̱rúnꞌ rachrúún vaa rihaan níꞌ chá cunuda̱nj níꞌ a. Cheꞌé dan me ase vaa o̱rúnꞌ yuvii̱ roꞌ, da̱nj vaa cunuda̱nj nij tinu̱j níꞌ a.

¹⁸ Ne̱ xca̱j soj cuentá se vaa ase vaa ꞌyaj níꞌ cuano̱ roꞌ, da̱nj quiꞌyaj nij yuvii̱ israelitá nij síí ma̱n ga̱a naá, chá cunuda̱nj nij soꞌ nee̱ rqué nij soꞌ rihaan Yaꞌanj, ne̱ cheꞌé dan ase vaa o̱rúnꞌ yuvii̱ roꞌ, da̱nj vaa cunuda̱nj nij soꞌ rihaan Yaꞌanj a.

¹⁹ Xca̱j nij soj cuentá ni̱ꞌyaj nij soj nana̱ aꞌmij á. Yuꞌva̱ꞌ cha̱ꞌ nee̱ utaꞌ nii rihaan yaꞌanj quiꞌyaj maꞌa̱n yuvii̱ naꞌ. Taj maꞌ. Ya̱ yaꞌanj me nij yaꞌanj quiꞌyaj maꞌa̱n yuvii̱ naꞌ. Taj maꞌ.

²⁰ Ina̱nj me rá ꞌu̱nj cata̱j ꞌu̱nj se vaa nee̱ utaꞌ nii rihaan yaꞌanj quiꞌyaj maꞌa̱n yuvii̱ roꞌ, né Yaꞌa̱nj me síí rqué nii nee̱ yoꞌ rihaan maꞌ. Ma̱an se rihaan nana̱ chre̱e rqué nii nee̱ yoꞌ na̱nj ado̱nj. Ne̱ naꞌvej raj gu̱un tuvi̱ꞌ soj ga̱ nij nana̱ chre̱e maꞌ.

²¹ Sese coꞌo̱ soj na vinó cheꞌé Síí ꞌNi̱j Raꞌa man níꞌ, ne̱ se̱ caꞌvee ca̱nica̱j soj coꞌo̱ soj na vinó cheꞌé nij nana̱ chre̱e maꞌ. Sese cha̱ soj rihaan Síí ꞌNi̱j Raꞌa man níꞌ, ne̱ se̱ caꞌvee ca̱nica̱j soj cha̱ soj rihaan nij nana̱ chre̱e maꞌ.

²² Cheꞌé se síí sa̱ꞌ me Yaꞌanj, ne̱ nano̱ꞌ níꞌ da̱j quiꞌya̱j níꞌ, ga̱a ne̱ caꞌma̱an rá Yaꞌanj ni̱ꞌyaj Yaꞌanj man níꞌ naꞌ. Taj maꞌ. Sese da̱nj quiꞌya̱j níꞌ, ne̱ se̱ guun nucua̱j níꞌ nani̱i̱ níꞌ rihaan soꞌ a̱ maꞌ.

²³ “Caꞌve̱e qui̱ꞌyáj na̱j guun se me raj á”, taj taꞌa̱j yuvii̱, ne̱ ya̱ vaa nana̱ aꞌmii nij soꞌ, tza̱j ne̱ se̱ cavii sa̱ꞌ níꞌ a̱ doj, quiꞌya̱j taꞌa̱j se ꞌyaj níꞌ maꞌ. Se̱ cunuu sa̱ꞌ níꞌ, quiꞌya̱j taꞌa̱j se ꞌyaj níꞌ maan chugua̱nj.

²⁴ Se̱ guun nano̱ꞌ níꞌ se sa̱ꞌ ga̱a̱ rihaan maꞌa̱n ina̱nj níꞌ maꞌ. Tana̱nj no̱ xcúún níꞌ nano̱ꞌ níꞌ se sa̱ꞌ ga̱a̱ rihaan ꞌó yuvii̱ ado̱nj.

²⁵ Caꞌve̱e cha̱ soj na̱j guun nee̱ aneꞌ rihaan yuꞌvee, ne̱ se̱ nanó rá soj sese nee̱ cutaꞌ nii rihaan yaꞌanj quiꞌyaj maꞌa̱n yuvii̱ me nee̱ yoꞌ maꞌ. Ma̱an se cha̱ u̱u̱n soj na̱nj á.

²⁶ Danj Yaꞌanj taj se vaa nu̱ꞌ cachra̱ꞌ chumii̱ do̱ꞌ, cunuda̱nj rasu̱u̱n ma̱n rihaan chumii̱ do̱ꞌ, me siꞌyaj Yaꞌanj Si̱j ꞌNi̱j Raꞌa man níꞌ a. Da̱nj taj Danj Yaꞌanj, ne̱ taj cheꞌé cuchuꞌvi̱ꞌ níꞌ cha̱ níꞌ man siꞌyaj Síí ꞌNi̱j Raꞌa man níꞌ maꞌ.

²⁷ Sese nacúún ꞌo̱ síí ne nocoꞌ man Cristó man soj cha̱ soj ga̱ soꞌ, ne̱ caꞌve̱e caꞌa̱nj soj cha̱ soj ga̱ soꞌ, sese da̱nj me rá soj, ne̱ caꞌve̱e cha̱ soj na̱j guun rasu̱u̱n rque̱ soꞌ cha̱ soj na̱nj á. Se̱ xnáꞌanj soj sese nee̱ cutaꞌ nii rihaan yaꞌanj quiꞌyaj maꞌa̱n yuvii̱ me nee̱ yoꞌ maꞌ. Ma̱an se cha̱ u̱u̱n soj na̱nj á.

²⁸ Tza̱j ne̱ sese cata̱j xnaꞌanj ꞌo̱ soꞌ rihaan soj se vaa nee̱ utaꞌ nii rihaan yaꞌanj quiꞌyaj maꞌa̱n yuvii̱ me nee̱ yoꞌ, ne̱ se̱ chá soj man nee̱ yoꞌ a̱ maꞌ. ꞌO̱ se síí cataj xnaꞌanj rihaan soj roꞌ, ne gu̱un ya̱ rá soꞌ se vaa caꞌve̱e cha̱ soj nee̱ yoꞌ, ne̱ cheꞌé dan me se̱ guun cha̱ soj a̱ maꞌ.

^29-30 Dan me se neꞌen maꞌa̱n soj se vaa né cacu̱nꞌ me cha̱ soj nee̱ yoꞌ maꞌ. Tza̱j ne̱ tinúú soj síí cataj xnaꞌanj rihaan soj roꞌ, cacunꞌ me cha̱ꞌ nee̱ yoꞌ, rá soꞌ, ne̱ cheꞌé dan me se táá a̱ se se̱ chá soj nee̱ yoꞌ a̱ maan ado̱nj. Caꞌve̱e cha̱ ꞌu̱nj nee̱ yoꞌ, raj, tza̱j ne̱ sese cha̱ ꞌu̱nj nee̱ yoꞌ, ga̱a ne̱ cuta̱ꞌ tinúú ꞌu̱nj cacunꞌ xráj, ne̱ nda̱ꞌ se taj ꞌu̱nj guun niꞌya̱j níꞌ rihaan Yaꞌanj cheꞌé nee̱ yoꞌ, tza̱j ne̱ cata̱j tinúj se vaa chiꞌi̱i̱ vaa nimanj, ne̱ naꞌvej uxrá raj caꞌmi̱i̱ tinúj da̱nj a̱ maꞌ. Cheꞌé dan me taj cheꞌé cha̱j nee̱ yoꞌ maꞌ.

³¹ Dan me se nu̱ꞌ se cha̱ soj do̱ꞌ, nu̱ꞌ se coꞌo̱ soj do̱ꞌ, na̱j guun se quiꞌya̱j soj do̱ꞌ, ina̱nj cheꞌé Yaꞌanj quiꞌya̱j soj cunuda̱nj nij rasu̱u̱n yoꞌ, ga̱a ne̱ veꞌé doj caꞌmi̱i̱ yuvii̱ cheꞌé Yaꞌanj, quiꞌya̱j soj chugua̱nj.

³² Da̱nj na̱nj uún, ne̱ se̱ quiꞌyaj soj se vaa gu̱un vi̱j rá nij yuvii̱ israelitá do̱ꞌ, nij yuvii̱ yaníj do̱ꞌ, xꞌneꞌ cunuda̱nj nij síí noco̱ꞌ man Yaꞌanj do̱ꞌ maꞌ.

³³ Ina̱nj da̱nj ꞌyaj ma̱ꞌanj, ne̱ nu̱ꞌ se vaa me rá ꞌo̱ ꞌo̱ taꞌa̱j yuvii̱ qui̱ꞌyáá ꞌu̱nj roꞌ, ꞌyáá ꞌu̱nj, ne̱ ne ꞌyáá ꞌu̱nj ina̱nj se me raj ma̱ꞌanj qui̱ꞌyáj maꞌ. ꞌO̱ se ꞌyáá ꞌu̱nj nda̱a vaa me rá nij yuvii̱ na̱nj ado̱nj. ꞌO̱ se nanóꞌ ꞌu̱nj chrej cavi̱i̱ sa̱ꞌ cunuda̱nj nij yuvii̱ doj, ga̱a ne̱ nani̱i̱ nij soꞌ rihaan sayuun cheꞌé se sa̱ꞌ yoꞌ ado̱nj. Ina̱nj da̱nj quiꞌya̱j soj á.