Tito 3 - Testamenta Áre 1983 (Toaripi PNG)

Ekalesia ve mai kofa la lei mei vei

¹ Karu la lei haikaeaia, ere karikara papukaru aea gavana ve siahu karu ita la mapi kakeva leiti vei, aeata kekese ita popōvi tivi lareva foromai la leiti vei.

² Ere karu aea vei o maealolo levi ari vei, ere ape sosori ta levi ari vei; a—, haimafu lei, karu foromai voa haiiri‐ipi ita lei vovo roroai vei.

³ Ipi ereita ta evera soa voa maeakakare lei, kaeava a’, aeata karu sa ereitaro apeva vuteaiape; ereita haikaeaita mai maealolo aea hailareva leita etau hariaharia voa malasa lei, hasiavaita haiiri ita aea hilisi ita, karu sa ereitaro kaifa lei, ereita ta elore elore kaifa lei pepeiape.

⁴ A—, ereitaro fareōvi makuri leita Ualare areve maeaforoe aea are sa karu la lei liri arita lea haiiri la pisiri muiōpe lea mea,

⁵ are ereitaro fareōvi makuri leipe, ipi ereita sa haura leiape lea etau vei kasirau, a—, ipi are sa ereitaro maeaforoe leipe lea vei, mi áre arita soa ve sukoita ma voa aea Safu Arahoha sa lei áre leitita lea mai voa.

⁶ Lea Safu Arahoha la are ereita voa au sisōvōpe, ereitaro fareōvi lei makuri leita Vita Iesu Keriso voa.

⁷ Lea vei areve haiforoe leita meru sa ereitaro lei haura leipe, ereita Ualare sa ōpe otoare etau la au tai vei, peita makuri reha.

⁸ Lea o are okofa. Arave haiiri meha, a lea etau la o kere ita moi vei, Ualare la sukaerereaita karu ere haisukafori lei, leita mai lareva la lei vovo roroai vei. Lōfeare leita mai lareva kofa, aea eite ta ia karu foromai vei.

⁹ A—, ava’ o meakakare, aea papa‐ita ve rare rare ve laua, aea o serea elore elore, aea Safu O vei sosori arita mai ita la haiarara lei kōutoaia; ipi lea etau ere eite kao aeata etau merava.

¹⁰ Eve karu aea satiriaraita o haria sa lei ero lei faeafaea arita, a—, soa farakeka ō orakoria voa arero kurea kurea roroka lei, arero haiarara lei kōu lōfeare toaia.

¹¹ A ore leitia, lōfeare karu are ōvafae kere aeata kaiae; are elore mai sa lei areve kaiae pisiri voa muiaitore.

Sisa o

¹² Ara Aretema varo Tukiko varo aro tai itapaita lea mea, araro tai Nikopoli voa fosi vei haiiri rofo leitia, ipi arave haiiri kekese ara lōvoa vevekoko pisahu ve soa voa pavai vei.

¹³ Senasa, safu ore leita vita, auke Apolosi ita la ereukave sariva soa voa toari la lōri itapaia ereuka sa haikaeaita etau aea la ovai auke ita maea levi leiti vei.

¹⁴ Ereitave karu la lei ere tivi lareva la malasa lei, haikaeaita etau maeamaea la lei lōri maravai roi, ere eite auke ita levi roroai vei.

¹⁵ Ara ita fareho roroaipeta karu foromai maeaforoe o aro la moipea. Papuvita la sukaereaita haiiri voa elaro haikakare araita lea karu la maeaforoe o ta moia. Haiforoe leita meru e foromai ita farehoria lea peava.