Tito 2 - Testamenta Áre 1983 (Toaripi PNG)

Satiriaraita o haura

¹ Soka ao, a satiriaraita o haura karu la lei ore leitia.

² Opasora‐sora heavita la o mei ere haiovoro lei, haiiri sora aeata haisukafori leiti vei, ere sukaerereaita haiiri voa aea haikakare voa aea lula auke haiiri kere voa haiiri rofo ita roroai vei.

³ Opasora‐sora uamori ta o mei, ere ereve leita mai voa Ualare la taivotei roroai vei. Ere karu la hasiavaita fari la lei levi fafarapai vei, ma maealolo ve sarufa levi leiti vei; a—, ere mai lareva la muiaita karu lei, lei vovo roroai vei.

⁴ Ere uamori áre áre la lōri satiriōri ereve vita heaea aea ereve atutemori ita la haikakare arai vei;

⁵ ere haisukafori ita, uamori ve mai kofa haura lei roroai vei; ereve uvi la kiva lei, aeata maeaforoe ita, ereve elore elore vita heaea la kakeva lei, lei vovo roroai vei, Ualare ve o la lei kaiae levi leiti vei.

⁶ Heavita áre áre ta lōfeare kureaia, ere haisukafori roroai vei.

⁷ Ave elore leita mai voa lareva la muiaia, ere ta lōri leiti vei; ave satiriaraita o voa o kaiae auke ita, haiiri sora ita muiaia.

⁸ Lōfeare ave o sa haura kofa leitita lea vei, karu aro kaiae o arita ore auke lei, ereitaro sukavuteaita lea karu ere maeamariti leiti roi, ipi ere sa fari maealolo ereita vei fafarapaita ore auke leitita lea vei.

⁹ Fasaita tivi voa roroaita sarufa karu ta kureaia, ere ereve papukaru la kakeva lei, etau foromai voa erero lei hailareva leiti vei; o tui levi ari vei;

¹⁰ etau la lō ova lō ova lei torea levi leiti vei; a—, sukaerereaita mai lareva la muia vovo roroai vei; ere etau foromai voa ereitaro fareōvi makuri leita Ualare ve satiriaraita o la moupa lareva feare arai vei.

¹¹ Ipi Ualare ve haiforoe leita meru foreri roroka, karu foromai la fareōvi makuri leiti vei;

¹² aea ereitaro mōfeare satiriarai vei, ereita Ualare auke lei roroaita mai aea mea mearovaeka sa haikaeaita haiiri la haiarara lei mutapi, ereita mea mearovaeka voa haisukafori, haura mai ita aea Ualare la taivotaita mai ita lei vovo roroai vei.

¹³ Ereita lea Sare lareva la la taipea, lea mea ereitave Ualare rovaekapo aea ereitaro fareōvi makuri leita Vita, Iesu Keriso ita ve sosorusosoru pisiri lei forerai roi.

¹⁴ Are areve maea la ereita vei miarōpe, kaiae foromai voa ereitaro fari maravi, lei ovava lei, ereitaro lei areve elore karu kofa lei roroai vei, ereita haihahari ita mai lareva la leiti vei.

¹⁵ Lea etau foromai la omoia; siahu ita karu la kurea, o erere ita erero aria. Karu farakeka aea aro haiarara lei levi kōutoaia.