Tito 1 - Testamenta Áre 1983 (Toaripi PNG)

¹ Paulo, Ualare ve fasaita sarufa aea Iesu Keriso ve aposetolo sa itapaita karoro meha. Ualare araro lei aposetolo leipe, are sa haikaea maravaita karu ve sukaerereaita haiiri la toari, aea areve haikaeaita mai la lei foreraita lea okofa la ere voa lei fafarapi,

² ere peita makuri la ovai vei au tai vovo roroai vei. Mearovaeka forerai auke soa voa, apeva o ari auke leitita lea Ualare peita makuri vei otoare ōpe;

³ itiiti soa kofa voa are areve otoare ve eite la areve ovoro voa lei pisiri muiōpe. Lea ovoro la ereitaro fareōvi makuri leita Ualare sa araro miōri, ara itoro ari vei moipe.

⁴ Mea karoro Tito veia, arave atute kofa ereita sa sukaerereaita lea haiiri farakeka voa: Oa Ualare aea Keriso Iesu ereitaro fareōvi makuri leita Vita sa haiforoe leita meru aea tairu ita aro miarai peava.

Tito ve tivi Kerete voa

⁵ Ara aro Kerete voa kiripōpe ve ipi meha: a roroka auke etau la lei haura leiti vei, aea usoso ara aro moipe o feare opasora‐sora tivi karu la karikara haroharo foromai voa lei vipai vei.

⁶ Kaiae auke roroaita karu, ere farafarapo ua farafarapo ve vita heaea, ereve atutemori Keriso la sukaererea, a—, maeakakare mai lei aeata kaeava fari foreraita atutemori kao, lōfeare karu la vipaia.

⁷ Ipi ekalesia la lariōvaita karu rovaea are Ualare ve tivi la kiva leita karu, aea are kaiae auke ita meita lōfeare sa lareva. Are ivara eokere karu kao, heohea leita karu kao, ma maealolo la la’ la’ maeakakare leita karu kao, sosori muru karu kao, aea moni la haikakare araita karu kao.

⁸ A—, are karu la sasauka maeafukapaita karu, mai lareva la haikakare araita karu, haiiri metakao seseōvaita karu, areve leita mai haura, are Ualare la taivotaita karu, aeata haisukafori meita karu.

⁹ Usoso arero satiriōri lei ore leita lea ovoro feare, are okofa la haiiri kere ita seseari meava; lōfeare voa are karu haria la ovoro ve okofa la satiriarai vei usoso leitita ore, aeata lea ovoro la sukavuteaita karu ve kaiae ta muiaita ore.

¹⁰ Ipi keava arita karu rauapo ia; ere ape laua merava aeata apeva vuteaita karu. Lōfeare karu rauapo ere eite Iuda ekalesia karu.

¹¹ Erero lei ere ape sasaukai vei; ipi ere tava moni la ovai vei satiriarai vei usoso auke leita lea etau la satiriōri, maiape karu hea ve haiiri la lei la lavukakaeaipea.

¹² Kerete karu aea, ereve elore peroveta karu farakeka, o mōfeare moipe, Kerete karu ere soa foromai apeva, furuka animala maealolo fefeare, tivi lohalai leititore aeata lealea eokere karu.

¹³ Lea o okofa. Lea vei erero o kere ita o erere aria, lōfeare vei ere Ovoro Lareva la haiiri haura ita sukaerereai vei,

¹⁴ aeata ere Iuda karu ve lea fari merava, aea okofa o la sukavuteaita lea karu ve ovoro la levi mapai vei.

¹⁵ Haiiri ovava lei vovo roroaita lea karu vei, etau foromai ovava ia. A—, haiiri sirisiri lei, sukaerereai auke lei vovo roroaita lea karu vei, etau farakeka aeata ovava kasirau; ereve haikaeai aea ereve seseōvi ore leitita haiiri ita sirisiri.

¹⁶ Ere Ualare la ore o ō vovea, a—, eite ere ereve leita mai sa arero avoa ō vovea; ere mu eokere, ōvafae kere, aea mai lareva la leiti vei usoso kakaeite kofa.