Roma 7 - Testamenta Áre 1983 (Toaripi PNG)

Ukōpe Safu voa Keriso sa ereitaro lei paraeōpe

¹ Paumarehari e, ara omoi vei leipeta mea etau ve eite e ovava, ipi e foromai ukōpe Safu O la ore. Karu ve makuri soa voa haria, ukōpe Safu sa are voa harofave siahu ia.

² Usoso mōfeare, vita ve siahu voa peita ua, areve vita ve makuri soa voa, Safu sa fasa vovea; a—, vita opaita, a—, are lea vita ve fasaita Safu voa kaloita reha.

³ Soka vita sa makuri meita lea soa voa, are vita haria sa laeaita, a—, arero rare vita torea ua rare aravai roi. A—, vita sa opaita soa arero vita ve Safu voa felaukeaita reha; arero vita haria sa laeaita, a—, are vita torea ua levi leiti roi.

⁴ Arave paumarehari e, e ta lōfeare, e ukōpe Safu voa opōpe Keriso ve maea voa, aea faitora e areve karu, opi ata itoipe lea vita sa ereitaro lei, fare Ualare vei tai veia.

⁵ Ipi ereita maeasarōva sa haikaeaita mai ita roroaiape lea mea, kaiae sa kureaita mai la lei Safu voa foreri, ereitave maea voa toepi siseita etau voa rofo leiape, fare opai vei tai veia.

⁶ A—, ipi evera soa voa ereitaro fasōpe etau voa ereita opai feare leipe, faitora ereitaro Safu voa paraea foreri la roroa; lea vei ereita mai áre Arahoha voa Ualare ve sarufa leititore, ukōpe Safu ve evera mai voa kasirau.

⁷ Aita, ereita o leafeare moi roi? Safu O kaiae ei? Kakaeite kofa! Ara Safu O la ore auke leitita, a—, ara mai kaiae ve eite haiiri levi fapai lare. Karu haria ve etau la ovai vei haikakare levi araia, lea o la Safu sa omoi auke leitit’ oria, ara lōfeare kaiae ta ore levi leiti lare.

⁸ A—, mai kaiae sa Safu voa soa ovi, araro lei ara karu ve etau maeamaea maravai vei haikakare araiape. Ipi Safu O auke leitita, a—, kaiae ta siahu kao.

⁹ Evera soa voa ara Safu auke ita lei meiape, a—, Safu sa forerōpe lea soa, kaiae ta rofo leipe, lea vei ara opai feare leipe reha.

¹⁰ Ualare ve Safu O ve eite makuri lei forerai vei, a—, ara voa opai sa forerōpe.

¹¹ Iri kaiae sa areve soa la ovi Safu Mai voa araro apeva vutea lōri paeōpe.

¹² Safu ve o are taivotaita etau lareva reha, aea leiti vei moita o are Safu etau lareva, etau haura, aeata ereitaro lei lareva leita etau.

¹³ Soka lareva leita lea etau sa araro paeaita etau feare leipe ei? Kakaeite kofa! Iri kaiae sa leipe etau reha. Are lareva leita lea etau la ovi ara voa paeaita etau feare leipe, kaiae ve eite la pisiri muia, Ualare sa moita lea o la lei iri kaiae ve mai maealolo kofa la muiaita reha.

¹⁴ Ereita ore Safu O are Arahoha etau; a—, ara sarōva maea ita mea, iri kaiae sa araro itaea lei ovi, ara areve sarufa leiti vei.

¹⁵ Ara sa leitita lea etau ve eite ara ovava kasirau; ipi ara sa leiti haikaeaita lea etau la ara leiti sore, a—, ara sa kaifa leita lea etau la ara lei vovea.

¹⁶ Soka ara leiti haikaeai auke leita lea etau la leitita, a—, ara Safu O are haura lōfeare la muiaita reha.

¹⁷ Soka lōfeare mai la leita karu ara kao, a—, arave iri voa peita lea kaiae sa leititore.

¹⁸ Ara ore arave iri voa, lea ve eite arave sarōva maea, mai lareva pei sore. Lareva la leiti haikaeaita lea mai arave iri voa pea vovea, a—, lea lareva la leiti vei ara usoso kao.

¹⁹ Ara leiti vei haikaeaita lea lareva la ara leiti sore; ara leiti haikaeai auke leita lea kaiae la ara lei vovea.

²⁰ Soka ara leiti haikaeai auke leita lea etau la ara leitita, a—, lea etau la leita karu ara kao, a—, arave iri voa peita kaiae sa leititore.

²¹ Lōfeare vei ara au leita mai mōfeare la eavaitore, ara haura etau la leiti vei haikaeaita lea mea, kaiae arave iri voa eaea vovea.

²² Arave haiiri kofa voa ara Ualare ve safu mai voa hailareva leititore.

²³ A—, arave maea voa toepi siseita etau voa ara au leita mai haria la eavaitore, arave haiiri sa haikaea leita mai ita marehauka vovea. Lōfeare vei arave maea voa toepi siseita etau voa peita lea kaiae sa au leita mai voa araro fasi lariōva vovea.

²⁴ Ahai‐e ara vei! Ara haieae foromai ita pea. Opai sa saforaita mea maea voa araro fareōvi makuri leiti vei vita leisa?

²⁵ Ualare sa leita ore, ereitave Papuvita Iesu Keriso voa; Ualare la maeatia! Soka ara sa lei meita mai meha, ara arave haiiri kofa voa Ualare ve safu mai la taivotei mea vovea, a—, arave maea voa toepi siseita etau voa ara kaiae ve leita mai ve sarufa lei mea vovea.