Roma 6 - Testamenta Áre 1983 (Toaripi PNG)

Ereita makuri Keriso voa

¹ Soka ereita leafeare moi roi? Ereita kaiae voa pōvi lei lei, Ualare ve maeaforoe la lei rovaea leiti vei ei?

² Kakaeite kofa! Kaiae leita mai vei ereita opai feare lei, ereita are voa leafeare makuri lei roroava roi?

³ E mea etau la etakofa ore ei? Ereitaro Keriso Iesu ve rare voa bapatiso leiape lea mea, ereita areve opai voa ta bapatiso leiape.

⁴ Lōfeare vei bapatiso soa voa ereitaro ta are ita opi aeata viopōpe, ipi usoso Ualare areve haihava leita siahu sa Keriso la opai voa moravōpe, lōfeare are sa ereitaro ta makuri áre ita lei roroai vei.

⁵ Ipi ereita are ita fareho areve opai voa mai farakeka leitita, a—, ereita are ita fareho areve opi ata itoi voa mai farakeka ta leiti roi.

⁶ Ipi ereita ore ereitave evera roroaiape maea la are ita fareho satauro voa paeōpe iri kaiae ve maea la fareōvi mutapai vei, ereita iri kaiae ve sarufa ata levi leiti vei.

⁷ Ipi karu opaita lea mea, arero iri kaiae ve siahu voa paraea fareovaita reha.

⁸ Soka ereita Keriso ita fareho opaita, a—, ereitave sukaerereita haiiri meha, ereita are ita fareho makuri leiti roi.

⁹ Ereita ore Keriso opi ata itoipe lea vei, are ata levi opai roi; opai sa harofave siahu areve arori voa ata levi leiti roi.

¹⁰ Ipi are opōpe lea mea, are iri kaiae vei soa farakeka opōpe reha, aea are sa lei meipeta lea makuri are Ualare voa lei vovo mea vovea.

¹¹ E ta lōfeare, e hai mō kaeaia, e kaiae voa opi kaleipe, a—, Keriso vei e makuri Ualare voa lei vovo la roroa.

¹² Soka iri kaiae sa eve opaita maea voa harofave siahu levi leitia, eve sarōva sa haikaeaita mai la kakeva leiti vei.

¹³ Eve maea voa toepi siseita etau aea la maealolo leiti vei iri kaiae la levi miaraia. A—, ero opai voa pepea fari, makuri lei roroaita karu feare, eve maea la maea makora ita mai haura leiti vei Ualare la miaraia.

¹⁴ Iri kaiae sa harofave siahu e voa levi leitia, ipi e ukōpe Safu ve ora voa roroai kasirau, a—, e Ualare ve maeaforoe ve ora voa roroa vovea.

¹⁵ Aita leafeare? Ereita ukōpe Safu ve ora voa roroai auke lei, a—, Ualare ve maeaforoe ve ora voa roroaita, a—, ereita kaiae la leiti roi ei? Kakaeite kofa!

¹⁶ E mea la ore kofa, e areve o la mapaita lea papuvita e areve sarufa loita reha, iri kaiae ve sarufa lei opai vei miaraita varo, ō Ualare la kakeva lei haura leiti vei miaraita varo.

¹⁷ Ereita Ualare la maeatia, ipi e evera soa voa mai kaiae ve sarufa lei roroaiape, a—, aite voa ero satiriaraiape lea o la e eve haiiri foromai ita mapi kakeva lei roroa.

¹⁸ Ero mai kaiae voa pepea fari, mai haura voa fasaita sarufa lei la roroa.

¹⁹ Ara karu ve laua merava sa eve sarōva ve rofo auke vei la sukavaipea. Ipi evera soa voa e eve maea voa toepi siseita etau mai kaiae aea safu auke mai ita ve sarufa leiti vei miarōpe, mai kaiae leiti vei; lōfeare eve maea voa toepi siseita etau haura mai ve sarufa leiti vei faitora miaraia, e Ualare ve karu kofa lōri leiti vei.

²⁰ E kaiae ve sarufa lei roroaiape lea soa voa, e haura leita mai la au paraea roroaiape.

²¹ E lea soa voa etau lareva lekōru la ovōpe? E sa faitora maeamariti leipeta lea etau, aea lea etau voa foreraita sisa etau opai reha.

²² Soka faitora e kaiae voa felaukea paraea Ualare ve sarufa lei la roroa meha; e sa ovaita etau mōfeare, ovava lei arero taivotaita mai, aea lea mai voa foreraita sisa etau peita makuri reha.

²³ Ipi iri kaiae ve tava opai, a—, Ualare ve maeaforoe ve meru, ereitave Papuvita Iesu Keriso voa, peita makuri reha.