Roma 4 - Testamenta Áre 1983 (Toaripi PNG)

Abrahama ve fari

¹ Iuda karu ve maeasarōva papa Abrahama vei ereita o leafeare moi roi ei?

² Abrahama areve leita mai sa Ualare ita haura leipe lōfeare oria, are hiva arita ore. A—, are Ualare ve omopa voa hiva arita ore kasirau.

³ Safu Buka ve o meha, Abrahama Ualare la sukaerereōpe, aea Ualare haura o are vei lea vei ōpe.

⁴ Soka tivi leitita karu la tava miaraita soa, areve moni la rare meru rare ari sore, a—, tava rare la aritore.

⁵ A—, are tivi leiti auke voa, kaiae karu la lei haura leiti o moita lea Ualare la sukaerereait’ oria, areve lea sukaerereaita haiiri sa lei haura o arita reha.

⁶ Leita mai sesearai auke ita, a—, Ualare sa arero haura o arita lea karu vei Davida ta maeati o mei mō ōpe,

⁷ Mai maealolo sasaukōpe aeata mai kaiae la aierōpe lea karu lareva ia.

⁸ Papuvita sa kaiae o omoi auke ita meita lea karu.

⁹ Soka Davida sa moipe lea lareva, peritome karu vei haria ei? Kasirau, lea lareva peritome leiti auke karu vei ta reha. Ereitave o meha, Abrahama Ualare la sukaerereōpe, aea Ualare haura o are vei lea vei ōpe.

¹⁰ O lōri ōpe soa leasauka? Are sa peritome lei meiape soa voa ei, ō are sa peritome leiti auke lei meiape soa voa ei? Are sa peritome lei meiape soa voa kao, a—, are peritome leiti auke lei meiape lea soa voa.

¹¹ Are sa peritome lei mei auke soa voa, are sa sukaerereōpe lea vei are Ualare ita haura lei meiape. Are peritome aite voa leipe, aea lea peritome are sukaerereaiape lea vei areve haura ve serare peise leipe. Lōfeare voa peritome ovai auke lei, a—, Ualare la sukaererea aea lea vei haura lei roroaita karu foromai ve oa are reha.

¹² Peritome ovaita karu ve oa ta areo, ipi ereve peritome mai vei kasirau, a—, ipi ere sa sukaererea vovo roroaita lea vei, usoso ereitave oa Abrahama ve mai feare, are peritome leiti auke lei meiape lea soa.

¹³ Ualare sa Abrahama la otoare ōpe are aea areve meavumōla ita sa mearovaeka la aite ovai roi. Lea otoare ukōpe Safu sa lei ari kasirau, a—, ipi Abrahama sa Ualare la sukaererea are ita haura lōfeare leipe eavia.

¹⁴ Ipi ukōpe Safu ve Mai la sesearaita karu ere Ualare sa ōpe otoare etau la ovait’ oria, sukaerereaita karu ve sukaerereai eite auke loita reha, aea Ualare ve otoare ta eite kao.

¹⁵ Ipi Ualare ve kitou ukōpe Safu sa lei forera vovea; a—, Safu auke leitit’ oria, Safu la miroapaita mai ta kasirau.

¹⁶ Ualare ve otoare ve ipi Abrahama sa arero sukaerereaiape eavia. Lea vei lea otoare au miaraita meru feare, ukōpe Safu la sesearaita lea karu vei haria kasirau, a—, Abrahama feare sukaerereaita lea karu vei ta reha.

¹⁷ Usoso Safu Buka voa ukōpe o feare, Ara toruipi‐ipi sitavu sitavu ve papa oa aro lei la mea. Lea otoare Ualare ve soso voa eite ia, ipi Abrahama sa Ualare la sukaerereaiape, opōpe karu la lei makuri lei, aea are o sa mei pei auke etau la lōri lei foreraita lea Ualare.

¹⁸ Abrahama atute ovai soa veverapi kaleipe, a—, are otoare la sukaererea aea toruipi‐ipi sitavu sitavu ve papa oa lōri leipe; usoso Safu Buka voa ukōpe o feare, Ave meavumōla turitovi puarosari roi.

¹⁹ Are sisoro one hundred haekao leipe, aea areve maea ta opai feare, Sara ve karōvu ta are seseōvai auke lei, areve sukaerereaita haiiri ta oai auke leipe.

²⁰ Are Ualare ve otoare la haifarisea, areve haiiri rofo lei, are sukaererea, Ualare la maeatiape,

²¹ ipi are ore kofa Ualare areve otoare etau la lei foreraita ore.

²² Lōfeare vei Abrahama areve sukaerereai voa Ualare sa haura o are vei lea vei ōpe.

²³ Haura o are vei lea vei ōpe, lea o are haria vei ukai kao.

²⁴ A—, ereita vei ta reha. Iesu ereitave Papuvita la opai voa moravōpe lea Ualare la ereita sa sukaerereaita lea vei, haura o ereita vei ta lōri ari roi.

²⁵ Arero ereitave iri kaiae vei Ualare sa opai voa miōri, aea ereitaro lei are ita haura leiti vei arero makuri voa moravōpe.