Roma 3 - Testamenta Áre 1983 (Toaripi PNG)

Ereita foromai elore elore kaiae ia

¹ Iuda karu sa ovaita lareva larelekōru? Peritome mai ve lareva ta larelekōru?

² Lareva ve rovaea etau foromai voa. Omopa etau meha, Ualare areve o Iuda karu sa kiva leiti vei miaraiape.

³ Ereve karu hea lea o la mapai auke ita roroaiape. Aita, ereve mapai auke mai vei Ualare ve otoare merava leiti roi ei?

⁴ Kakaeite kofa! Ualare are okofa, karu foromai ere apeva; usoso Safu Buka voa uka siseita o fefeare: A o omoita lea mea a haura ia; aea aro seseōvi tava miaraita soa, a sapataita reha.

⁵ Ipi ereitave mai maealolo sa Ualare ve haura mai la pisiri voa muiait’ oria, ereita o leafeare moi roi? Ualare ereitaro kitou tava miarait’ oria, are kaiae ei? Eite ara karu feare laua merava la sukavaipea.

⁶ Kao, Ualare kaiae kasirau. Lōfeare oria, are mearovaeka la leafeare seseōvi tava miarai roi ei?

⁷ Ipi arave apeva sa Ualare ve okofa aea sosorusosoru ita la lei rovaea leitit’ oria, arave kaiae ve tava araro miaraita ipi levea?

⁸ O mōri moita leafeare, Ereita kaiae leitia, lareva la lei forerai vei? Eite karu hea araro havara apeva paraea mō aritore, ara o lōfeare moi vovea. Erero apeva ve tava miaraita haura reha.

⁹ Soka leafeare? Ela Iuda karu Ualare ve omopa voa topiaraita lareva ia, toru hariaharia karu lōfeare kao ei? Foromai kasirau kofa. Ipi ara omopa omoita reha, karu foromai, Iuda karu aeata Helene karu ita ere kaiae ve siahu ve ora voa roroa vovea.

¹⁰ Usoso Safu Buka voa uka siseita o fefeare: Mai haura leita karu farakeka kasirau kofa,

¹¹ haiiri fapi meita karu ta kasirau, aea Ualare la elita karu kasirau.

¹² Ere foromai otiharo kiripi huapi roroa vovea; ere farehoria maealolo kofa. Mai lareva leita karu kasirau, farakeka kakaeite kofa.

¹³ Ereve kōvōrehau usoso sofa toru feare; ere ereve uri sa apeva vutea vovea; ereve ape poe voa misu ve paeaita muramura la eaea.

¹⁴ Ereve ape kisari maealolo aeata ivara o ita sa soa’ laisisea.

¹⁵ Ereve mora maealolo la leiti vei soea vo tera vovea,

¹⁶ ere teraita lea otiharo voa hasiōvi saroroapaita mai laisisea.

¹⁷ Tairu ve otiharo ere ore kao.

¹⁸ Ere Ualare la taivotei tore leita mai haveva.

¹⁹ Soka ereita ore Safu sa moita lea o foromai, Safu ve ora voa roroaita lea karu foromai vei moitore; lōfeare vei karu ve ape foromai la sasauka, mearovaeka karu foromai la lei Ualare sa seseōvi tava miaraita soa ve siahu ve ora voa lei roroai veia.

²⁰ Safu ve Mai la kakeva leita lea vei, karu farakeka Ualare ve soso voa haura o are vei levi moi roi; a—, lea Safu O sa karu la lei are sa leita kaiae la lei ore loita reha.

Makuri ve otiharo farakeka

²¹ Faitora Ualare sa karu la lei haura leita otiharo pisiri muiaita meha, mea otiharo are safu ve mai sa leita lōvoa kasirau, eite Mose ve Safu aea peroveta karu ve o lea otiharo vei moiape.

²² Ualare ita haura leita mai la karu sa Iesu Keriso la sukaererea lōri ovai vei. Karu foromai Ualare ve haura lōri ova vovea. Mai hariaharia voa kasirau,

²³ ipi karu foromai kaiae aea Ualare sa miaraita sosorusosoru la ovai vei mai muia harua lei vovea.

²⁴ A—, Ualare sa au miaraita meru sa erero are ita lei haura leititore Keriso Iesu voa, erero paraea lei makuri leita lea vita.

²⁵ Ualare arero itapōpe areve ovo sa karu ve kaiae la sasuka mutapai vei, ere arero sukaerereaita lea vei. Ualare mai lōfeare leipe ipi areve haura la lei muiai vei. Evera soa are karu sa leiape lea kaiae la au morari, ereve kaiae la seseōvai auke lei meiape.

²⁶ A—, mea faitora soa voa areve elore haura leita mai la pisiri muiai vei, are Iesu la sukaerereaita lea karu ta are ita lei haura leititore.

²⁷ Soka hiva arita eite leavoa? Arero sasaukaita reha. Arero leafeare sa sasaukai, Safu Mai voa ō leita mai voa? Kasirau. Sukaerereaita haiiri sa sasaukai.

²⁸ Ipi ereitave kekese leita haiiri mōfeare, karu la Ualare ita lei haura leita mai, are Safu Mai voa sesearaita lea vei kao, a—, ipi are sa sukaerereaita lea vei.

²⁹ Ualare are Iuda karu ve haria Ualare ei? Are toru hariaharia karu ve Ualare kao ei? Okofa, are toru hariaharia karu ve Ualare ta reha,

³⁰ ipi Ualare are farakeka. Are Iuda karu la lei are ita haura leiti vei ipi ere sa sukaerereaita lea vei, aea toru hariaharia ta lōfeare ere sa sukaerereaita lea vei.

³¹ Soka lea o ve eite ereita mea sukaerereaita sa Safu la lei mutapai vei ei? Kakaeite kofa; ereita lea Safu la taupi kere ita pavai vei.