Roma 2 - Testamenta Áre 1983 (Toaripi PNG)

Iuda karu la seseōvi miaraita tava

¹ Soka, karu e, a karu haria la seseōvi kaiae o ari vei a otiharo kasirau; ipi a karu haria la seseōvi kaiae o arita soa, a elore mai ta seseōvi kaiae o arita reha, ipi ave elore leita mai ta lōfeare lei vovea.

² Ereita mea ta ore, Ualare lea mai la leita karu la seseōvi kaiae miaraita soa are haura ia.

³ Karu e, ave haiiri mōfeare ei, a Ualare sa seseōvaita soa safauka, aea are sa miaraita kaiae tava levi ovai roi ei? A lōfeare mai la leita karu la kaiae o moi vovea; eite a elore maea sa lōfeare leititore.

⁴ A Ualare la tore auke leita varo, ipi areve maeaforoe rovaea, areve morarita mai aea areve haimafu ita vei. A ore kao ei? Ualare ve maeaforoe ve eite aro kurea haiiri kerorita otiharo voa aro lariōvai vei.

⁵ A—, a ōvafae kere eavia, a kitou la a vei toea miava vovea, miavi miavi kitou rovaea ve sare voa, Ualare sa seseōvi tava miaraita mai haura la pisiri voa muiaita lea soa.

⁶ Ipi are tava karu foromai la miarai roi, usoso ere elore elore leiape lea mai fefeare.

⁷ Karu hea haiiri lula auke ita mai lareva lei lei, Ualare voa sosorusosoru aea marase o aea peita makuri la eli vovea; lōfefeare karu la Ualare sa peita makuri miarai roi.

⁸ A—, karu hea ereve haria etau vei irori ita lei, mai haura la sukavutea, mai maealolo la haihahari lei vovea; lōfefeare karu ve tava kitou aea heohea ita la maravai roi.

⁹ Haieae aea haisora ita sa kaiae leita lea karu foromai tai forerai roi; Iuda karu omopa, aea aite toru hariaharia karu ta reha.

¹⁰ A—, sosorusosoru aea maeati aea tairu ita la Ualare sa lareva la lei vovo roroaita lea karu foromai la aiorai roi, Iuda karu omopa aea toru hariaharia ta reha.

¹¹ Ipi Ualare ve omopa voa karu foromai ere usoso.

¹² Toru hariaharia karu ere Mose ve Safu O auke ita roroaitore; ere mai kaiae lei, lea Safu Mai auke voa veverapaita reha. Iuda karu ere Mose ve Safu O ia; ere mai kaiae lei, lea Safu O sa erero seseōvi kaiae o ō vovea.

¹³ Ere Safu O la mapaita lea haria vei, karu Ualare ita haura levi leiti roi, a—, haura mai mōfeare ipi ere sa Safu ve Mai la leitita lea vei.

¹⁴ Toru hariaharia karu ere Mose ve Safu Mai kasirau; a—, ere ereve haria haiiri sa safu mai la leitita, a—, ere ereve elore maea sa Safu Mai la muiaita reha; eite ukōpe Safu O ere vei kasirau.

¹⁵ Safu O ereve haiiri voa uka siseita, ereve leita mai sa muiaitore. Ereve seseōvaita haiiri sa Safu Mai la lei okofa leititore, ipi soa hea ereve haiiri sa erero kaiae o aritore, aea soa hea haura o aritore.

¹⁶ Ualare karu ve murufa etau la Iesu Keriso sa seseōvi tava miaraita sare voa mai lōfeare leiti roi, usoso ara sa itoro arita lea Ovoro Lareva feare.

¹⁷ Lōfeare vei Iuda karu e, Iuda karu rare aravi meita, aea a Safu ve Mai voa seseari, aea a Ualare ve karu lea vei hiva ō vovea;

¹⁸ a areve haikaeaita haiiri la ore, Safu O sa aro satiriaraita lea vei, a haura ita kaiae ita ve aru voa seseōvaita ore.

¹⁹ Lōfeare vei a elore maea vei hai mō kaeai vovea, a ofae kuku karu la lariōvaita ore kofa, aea murumuru voa roroaita karu ve ovava leita karu;

²⁰ a haiivavu karu ve satiriaraita papuvita, atutemori la lei ore leita karu, ipi a haiore okofa ita ve eite kofa Safu O voa ovaita eavia.

²¹ A—, ao, karu haria la satiriaraita vita e, a ave elore maea la satiriaraita leafeare? A karu ve etau la torea levi leiti vei lea o la itoro ō vovea; aita, a karu ve etau la torea leiti sore ei?

²² A o mō aritore, vita ita ua ita leipe karu la torea levi leitia; aita, a torea leiti sore ei? A apeva ualare ve ove la kaifa lei vovea; aita, a ereve maso uvi ve etau ta torea leiti sore ei?

²³ A Ualare ve Safu Mai vei hiva ō vovea; aita, a lea Safu Mai la miroapi Ualare ve rare la hasiavai sore ei?

²⁴ O mō uka laisisea, Ualare ve rare vei toru hariaharia karu sa maeamariti o moi vovea ipi eve mai vei.

²⁵ Okofa, a Safu Mai la kiva leitit’ oria, a—, peritome mai eite ia; a—, a Safu Mai la leiti auke leitit’ oria, ave peritome mai eite kasirau.

²⁶ Peritome auke karu are Safu ve Mai haura la kiva lei vovo meit’ oria, a—, are usoso peritome ita karu feare loita reha, ei?

²⁷ Lōfeare voa e Iuda karu la toru hariaharia karu sa seseōvi kaiae o ta ari roi, ipi e ukōpe Safu O aeata peritome mai ta ia, a—, lea Safu O la miroapai vovea, a—, ere peritome mai auke ita Safu O la kiva lei vovea.

²⁸ Ipi areve maeasarōva voa haria Iuda ve peise la ovaita lea karu, are Iuda karu kofa kao; sarōva voa haria ovaita lea peritome, are peritome kofa kao.

²⁹ A—, Iuda ve mai haiiri voa leitita, Iuda karu kofa reha, aea peritome kofa haiiri voa leitita etau reha, Arahoha sa leititore, ukōpe Safu O sa leiti sore. Lōfeare karu la maeatita o karu voa forerai sore, a—, Ualare voa.