Roma 15 - Testamenta Áre 1983 (Toaripi PNG)

Karu hariaharia la toaraia

¹ Soka ereita rofo karu, rofo auke karu ve pasou etau la toari taiovai vei, leita mai kofa reha. Ereita ereitave elore haiiri lareva la haria levi elia.

² A—, ereita foromai elore elore haekao peita lea karu la lei hailareva leiti vei, areve sukaerereaita haiiri la lei rofo topiarai vei.

³ Ipi Keriso ta areve elore haria haiiri ve lareva la eli kasirau. A—, usoso Safu Buka ve mea o feare, Aro o ruruku arita karu ve o ruruku araro ta ape.

⁴ Evera ukaiape lea Safu O foromai, ereitaro satiriarai vei ukaiape, ereitaro kurea, ereitaro lei lula auke haiiri kere ita, aite soa ve lareva la tai vei.

⁵ Soka lula auke haiiri lei haiiri la lei rofo leiti vei kureaita lea Ualare sa eve haiiri la lei farakeka leitia Keriso Iesu voa,

⁶ e farehoria ape farakeka ita, Papuvita Iesu Keriso ve Oa Ualare la maeati o a’ sosorusosoru leiti veia.

⁷ Soka elore elore maeafukapaia, Keriso, Ualare la lei sosorusosoru leiti vei ero ta maeafukapōpe lōfeare.

⁸ Arave o ve eite meha, Keriso are Israela vei toaraita tivi vita leipe ipi Ualare sa ereve papa la ōpe otoare la lei okofa leiti vei,

⁹ aeata toru hariaharia karu ta lei ere Ualare la areve maeaforoe vei maeati vei. Usoso Safu Buka voa uka siseita o fefeare, Lea vei ara torutoru karu voa aro maeati roi; ara maeati fara ave rare vei ferai roi.

¹⁰ O aeata meha, Toru hariaharia karu e, Iehova ve toruipi karu ita fareho hailareva leitia.

¹¹ O aeata meha, Iehova la maeati puavaia, torutoru karu foromai e; arero marase ari puavaia, e toruipi‐ipi karu foromai e.

¹² Aeata Isaia ve o meha, Iese ve tola tepa voa haiauru forerai roi; are toru hariaharia voa harofave vita leiti vei itei, aea ere arero haikaea vovo roroava roi.

¹³ Au tai vovo roroaita haiiri la miaraita lea Ualare, e sa sukaerereaita lea vei hailareva foromai tairu ita ero miōri miōri soaria, aea lea au taita haiiri la Safu Arahoha sa lei asi rovaea leitia.

Paulo ve tivi aea areve sariva laua

¹⁴ Paumarehari e, ara ore aea arave haiiri ta mōfeare kekese e vei, e lareva ita sa soa’ aea haiore foromai ita lei roroa lea vei e elore elore la satiriaraita ore.

¹⁵ A—, ara o maeamaea maea karōva ita ero ukaita meha ero ata lei haikaeai vei. Arave maea karōva ve ipi Ualare sa araro miarōpe mea meru vei,

¹⁶ ara Keriso Iesu ve tivi toaraita vita toru hariaharia karu vei tivi leiti vei. Ara maso tivi karu feare lei, Ualare ve Ovoro Lareva la itoro ari vei, toru hariaharia karu la maravi erero lei, Safu Arahoha sa lei ovava leita meru feare Ualare ve omopa voa omopa posaseai vei.

¹⁷ Lea vei ara Keriso Iesu voa arave tivi Ualare vei hiva arita ore.

¹⁸ Ara laua etau haria vei levi sukavai roi, Keriso sa araro ovi leiape lea etau haria, toru hariaharia karu la o sa aea leita mai ita sa lei sukaerereai vei.

¹⁹ Siahu ve peise aeata haihava leita etau ita la Ualare ve Arahoha ve siahu sa leiape; lōfeare vei soa Ierusalema soa isei isei Ilurikuma voa, ara Keriso vei lea Ovoro Lareva la itoro ōvovo isei isei roroka lei mea.

²⁰ Arave haikaeai rovaea Keriso ve rare la mapai auke leita lea otioti voa Ovoro Lareva la itoro ari vei, ara karu haria sa vipaita lea ipi ve arori voa turai feare leiti ave.

²¹ Usoso Safu Buka voa uka siseita o fefeare, Areve fari la erero satiriarai auke leita lea karu ere ofae eovi, aea mapai auke leita lea karu ore leiti roi.

²² Ara sariva lei ero tai forerai vei, lōfeare haiiri sa soa rauapo araro sukelapaiape.

²³ A—, ara faitora mea otioti voa arave tivi lei lei roroka loi, aea sisoro rauapo voa arave haiiri ero tai patai vei.

²⁴ Lea vei arave haiiri rovaea ara Spania voa isaita lea mea, ara ero otiharo voa ofae eavai vei, ara soa taheka ero tai hailareva ita pōvi, aea e ara ita maea favi toari isaita varo.

²⁵ A—, mea faitora soa ara Ualare ve karu la toari Ierusalema voa sariva lei patai vei la roi.

²⁶ Ipi Makedonia aea Akaia karu ita ere moni hea toea. Ierusalema voa pepeita ekalesia karu merava la maeaforoe lei miarai vei.

²⁷ Ere maeaforoe lōfeare haikaeai; eite ereve abitorea, ipi toru hariaharia karu ere luda karu ve Arahoha etau la ovaita, a—, ere abitorea vei lōri lei, maeasarōva etau voa luda karu la toari aiorai vei.

²⁸ Ara mea tivi roroka lei, mea meru moni ere voa muti miōri roroka leita soa, ara maea lei Spania voa isei otiharo voa ero ofae eavai roi.

²⁹ Soka ara ore ara ero tai foreraita lea mea, ara Keriso ve lei lareva leita siahu ita forerai roi.

³⁰ Soka paumarehari e, ereitave Papuvita Iesu Keriso vei aea Arahoha sa miaraita lea maeaforoe vei, e ara ita farehoria Ualare la ara vei loki taupai puavaia,

³¹ sukaerereai auke leita Iuda karu voa araro fareōvi, aea ara Ierusalema voa patai vei leipeta lea tivi voa lōvoa pepeita Ualare ve karu sa haiiri lareva ita araro maeafukapai vei.

³² Ualare sa haikaeai oria, ara hailareva ita ero tai forerai roi e ita farehoria haiorai vei.

³³ Tairu ereitaro miaraita Ualare, e ita farehoria pepe peava. Amene.