Roma 13 - Testamenta Áre 1983 (Toaripi PNG)

Harofave karu vei

¹ Karu foromai gavana ve siahu karu la kakeva leitia; ipi siahu haria eaeia kao, a—, Ualare sa miaraita lea siahu haria; harofave karu foromai ve siahu Ualare sa miaraitore.

² Lea vei gavana ve siahu la sukavuteaita lea vita, Ualare sa leita etau la sukavuteaitore; aea lea sukavuteaita karu kaiae o arita tava elore maea voa lei forerai roi.

³ Ipi gavana karu ere karu lareva la lei tore leita karu kao, a—, mai kaiae leita karu vei. Soka ave haiiri a harofave karu la tore levi leiti vei ei? A mai lareva la leitia, aea are aro maeati roi;

⁴ ipi are Ualare ve toaraita tivi vita, aro lei lareva leiti vei. Soka a kaiae leitita, a tore leitia, ipi are kaiae tava miaraita siahu eite rovaea ia. Are Ualare ve toaraita tivi vita, areve kitou ve tava miaraita vita kaiae leita karu vei.

⁵ Lea vei kakeva leitita, mai haura reha, Ualare ve kitou ve tore lea haria vei kao, a—, mai haura la haikaeaita lea vei ta reha.

⁶ E takis moni lea vei miara vovea, ipi harofave karu ere Ualare ve tivi karu, ere ereve tivi mai kofa ita leitita lea mea.

⁷ Ere ovaita haura moni mōfeare erero miaraia, maea ve takis maea ve takis karu vei, etauroro ve takis etauroro ve takis karu vei; tore, tore leita karu vei, taivotaita karu ta taivotai vei.

⁸ E etau abitorea lei karu voa levi ovaia, a—, elore elore haikakare arai vei lea la haria leitia. Karu haria la haikakare araita lea karu, Safu foromai kakeva loita reha.

⁹ Ipi mea ukōpe Safu, A ua torea levi leitia, aea a karu la levi paeaia, aea a etau torea levi leitia, aea a karu ve etau la ovai vei haikakare levi araia, aea Safu haria foromai ita ve eite meha, a ave haekao peita karu la ave elore maea feare haikakare araia.

¹⁰ Haikakare leita mai haekao peita karu la maealolo leiti sore; lōfeare vei haikakare leita lea mai Safu O foromai la kakeva leita mai reha.

¹¹ E soa ta ore; e ivutu iavi itoteaita hora kofa foreraita meha. Ipi ereita oarehōva sukaerereōpe lea soa ereitaro fareōvi makuri leita sare areapo; faitora lea sare haekao loi.

¹² Faita muru mea savori loita meha, sare haekao loi. Ereita faita muru ve mai fareōvi, ovava ve marehaukaita etau la maravaia.

¹³ Sare ovava voa leita mai kofa feare ereita roroava; e havohu maealolo mai, uaina la’ la’ maeakakare leita mai ita, herei, ua ita vita ita la ofae fofoisaita mai, o serea elore elore, karu ve etau la ovai vei haikakare leita mai voa levi roroava.

¹⁴ A—, e Papuvita Iesu Keriso puta feare mopaia, maeasarōva sa haikaeaita lea etau vei hai levi kaeaia.