Roma 12 - Testamenta Áre 1983 (Toaripi PNG)

Ualare ve tivi leita siahu hariaharia

¹ Paumarehari e, ipi Ualare ve maeaforoe rauapo vei ara ero la kureaipea, e eve maea la makuri leita safu maso etau aea Ualare sa maeatita meru feare ovi, Ualare la omopa posaseaia, eve iri karu sa maso toaita mai kofa reha.

² E usoso mea mearovaeka sa leita mai feare levi leitia; a—, e haiiri toarōrisa mai áre leitia. Lōfeare e Ualare sa haikaeaita mai la seseōvi ore leiti vei, lareva kofa, aea maeatita, aea haura kofa ita mai.

³ Araro miarōpe lea meru vei, ara eve karu formai la o la moi, e maeamarōva lei, elore maea haiarori levi leitia; a—, haisukafori kaeaia, usoso Ualare sa ero lei sukaerereaita lōfeare.

⁴ Ipi maea farakeka voa toepi siseita etau rauapo ia, a—, lea etau foromai tivi usoso leiti sore.

⁵ Ereita ta lōfeare; ereita rauapo, a—, Keriso voa maea farakeka lei, ereita foromai elore elore ve maea voa toepi siseita etau feare lei roroaitore.

⁶ Ereita meru siahu hariaharia ovaitore usoso ereitaro miarōpe lea maeaforoe feare; Ualare ve ovoro fafarapaita meru ovaita varo, a—, lea la ereitave sukaerereaita haiiri ve soa feare usoso leitia;

⁷ karu la toaraita tivi varo, a—, ereita lōri leitia; karu la satiriaraita varo, a—, satiriaraita tivi leitia;

⁸ karu la kureaita varo, a—, are kureaita tivi leitia; meru miaraita varo, a—, are lōfoa lōfoa lei miaraia; karu la kiva harofave vita tivi leita varo, a—, are haihahari ita leitia; karu la maeaforoe lei toaraita lea karu, are haiiri lareva ita leitia.

⁹ Eve haikakare okofa ita leitia. Maealolo la kaifa leitia, lareva la mai kere paeaia.

¹⁰ E elore elore usoso paumarehari feare haikakare lei vovo roroava; aea karu haria ve fari la lei moravai haikaeaia.

¹¹ Tivi maea tivutivu ita levi leitia, a—, eve iri arahoha voa haihahari lei, Papuvita ve tivi lōri leitia.

¹² E Ualare voa taita haiiri ita lea vei hailareva leitia; haisora soasoa voa haiiri kere leitia; e Ualare la loki taupi leitia.

¹³ Eve maeapavora karu ekalesia voa ere sa haikaeaita etau voa toaraia. Oti haria karu la maeafukapaia.

¹⁴ Ero haisora leiti vei aitetaita lea karu la o sa lei lareva leitia; karu la o lareva ae peava, aea o maealolo levi aria.

¹⁵ Hailareva leita lea karu ita fareho hailareva leitia; fi arita lea karu ita fi aria.

¹⁶ E foromai voa haiiri farakeka leitia. Haiarori levi leitia; tivi merava la haiiri kakeva ita leitia; maeamarōva levi leitia.

¹⁷ Karu sa leita maealolo vei, a tava maealolo levi miaraia. Karu foromai ve omopa voa leita mai lareva la haikaea peava.

¹⁸ A ore leitit’ oria, a karu foromai ita tairu ita pepeava.

¹⁹ Haikakare e, ero kaiae leita lea ve tava la miarai vei hai levi kaeaia; ipi o mō uka sisea, Kaiae ve tava miaraita arave etau reha; lea tava ara miarai roi. Papuvita o lō auai.

²⁰ A—, ave ote karu eroa sarita, a—, larietau arero miaraia; are kōvōre‐tolo leitita, ma arero miaraia; lōri mai leitita, a—, a akoela a ita feare areve harofave voa toeai roi.

²¹ Kaiae aro levi ovi aieraia, a—, a kaiae la lareva sa ovi aieraia.