Roma 11 - Testamenta Áre 1983 (Toaripi PNG)

Ualare ve maeaforoe Israela vei

¹ Soka arave lalasi o meha, Ualare areve karu la sukavutea mea ei? Kakaeite! Ara ta Israela karu, Abrahama ve meavo, Beniamina toruipi karu farakeka aea.

² Ualare are evera soa voa ore leipe lea toruipi karu la sukavuteaia kasirau. Safu Buka ve o Elia ve fari voa e lea la ore kao ei? Are Ualare ve omopa voa o serea ita havara Israela la paraea mō ōpe,

³ Papuvita e, ere ave peroveta karu la paea paea, ave alitara la toa foforuka foforuka, arao, ara hariakao laipea, aea ere arave makuri ta la elipea araro paeai vei.

⁴ Soka Ualare arero tava o leafeare moipe? Are mō ōpe, Ara karu 7,000 ara elore vei kiva lei mea, ere lea apeva ualare Baali la maso toai sore.

⁵ Mea faitora soa ta lōfeare, Ualare ve maeaforoe sa haikaeai maravaita karu hohoi la roroa.

⁶ Are karu la haikaeai maravaita mai ve ipi maeaforoe, ere sa leita lea etau hariaharia vei kasirau. Lōfeare auke oria, areve maeaforoe ta eite kasirau.

⁷ Aita leafeare? Israela karu sa elita lea etau la ere sukaeai kasirau. Ualare sa haikaea maravōpe lea karu fafareso sa sukaeōpe; a—, lea karu ta haria ere ōvafae kere lei roroaiape.

⁸ Usoso Safu Buka voa uka siseita o fefeare. Ualare erero ofae hoeaita ove erero miaraiape, ofae eavai auke leita ofae, aea mapai auke leita ōvauta ta reha itiiti iso sare voa.

⁹ Davida ve o ta mōfeare, Ereve safu sosoka la lei fitōva aeata saro ere vei miavaia, aea ferovi putoita etau aeata kaiae tava etau ta reha.

¹⁰ Ereve ofae murumuru leitia, ere etau levi eavai vei, aea ereve avasa pakokoa ae peava.

¹¹ A—, arave lalasi o meha, Iuda karu ere safosafoa putoi kofa leipe ei? Kasirau. Ere safosafoa mai kaiae leipe lea vei, makuri leita siahu toru hariaharia karu voa forerōpe reha, Iuda karu la lei hilisi leiti vei.

¹² Iuda karu sa leipe mai kaiae voa etau lareva lareva mearovaeka voa lea vei foreri sisea, aea ere merava leipe lea vei toru hariaharia karu etau rauapo maravi la roroa. A—, Iuda karu foromai sa topiaraita, a—, lareva soa foromai rovaea kofa leiti roi.

Toru hariaharia karu la fareōvi makuri lei la roroa

¹³ Soka ara faitora ero toru hariaharia karu la ovoro la moipea. Ara toru hariaharia karu ve aposetolo karu lei meita lea vei, ara arave tivi vei maeamarōva lei vovea.

¹⁴ Ara arave toruipi karu la lei hilisi leita varo, aea erero hea la lei makuri lōri leiti vei.

¹⁵ Ipi erero sukavuteōpe lea mea, mearovaeka Ualare ita totoeōpe reha; a—, erero ata ovaita soa, leafeare leiti roi? Makuri soa opai karu voa forerai roi.

¹⁶ Toare faloa koru la Ualare la omopa posaseaita, a—, faloa maeamakora ta areve loita reha; aea tola ve likilea la safu leitita, tola lakai ta safu loita reha.

¹⁷ Olive tola lakai hea la saerea mutatapaita, aea eo toru hariaharia karu e, e ta olive merava feare ereve saereaita tao voa mopi, Iuda karu ita fareho olive kofa feare ve opu lareva la larita;

¹⁸ a—, e maeamarōva lei tola lakai kofa la hiva o levi aria. Mea la haikaeaia, likilea ve makuri e voa kao, a—, eve makuri ve ipi likilea voa.

¹⁹ Eve o mōfeare varo, Tola lakai saerea mutatapōpe elaro ipaisa lakai feare iri voa mopai vei.

²⁰ Okofa reha; a—, erero saerea mutatapōpe ipi ere sukaerereai auke leipe lea vei, a—, eo, eve sukarereaita haiiri sa lei mopi fofoeaitore. E haiiri maeamarōva lea vei levi leitia; a—, tore leitia.

²¹ Ualare lakai kofa, lea ve eite Iuda karu la maeaforoe auke leitita, a—, are ero ta maeaforoe levi leiti roi.

²² Ualare ve maeaforoe, aea areve haiiri kere ita la ofae eovi ore leitia. Putoita lea karu voa areve haiiri kere la eavaia; a—, e voa areve maeaforoe la ofae eavaia, e areve maeaforoe voa pepeit’ oria. Lōfeare auke leit’ oria, ero ta saerea mutatapai roi.

²³ Iuda karu ta reha, ere haiiri kerori sukaerereai vei haiiri kakeva leit’ oria, erero ta iri voa ata mopai roi; ipi Ualare erero ata mopaita ore.

²⁴ E toru hariaharia karu, e olive merava feare olive tola kofa voa mopaita, a—, Ualare sa mea saerea faraita lakai kofa, lea ve eite Iuda karu la ereve olive tola kofa voa ata mopai vei heafo levi leiti roi.

Ualare karu foromai la maeaforoe lei vovea

²⁵ Paumarehari e, ara haikaeai kao e mea hohore etau la haveva leiti vei, e eve elore haiore vei haiarori leiti ave. Etau meha, Israela karu hea ere ōvafae kere lei roroava roi, lei lei soa toru hariaharia karu ve rauapo usoso Ualare sa kekese leita feare areve basaleia voa oropai ao.

²⁶ Israela foromai la fareōvi makuri lōri leiti roi. Usoso Safu Buka voa mō uka siseita o feare, Fareōvi makuri leita Vita Siona voa koti forerai roi; aea mai maealolo foromai la Iakobo ve meavumōla voa fareōvi kaleiti vei.

²⁷ Ara ere ita otoare lōfeare ari roi, ara ereve iri kaiae la fareōvi mutapaita lea mea.

²⁸ Iuda karu ere Ovoro Lareva la sukavuteaita lea vei ere Ualare ve ote karu, aea e lareva soa lōri ovai; a—, ipi Ualare ereve papa la haikaea maravōpe lea vei are erero haikakare araitore.

²⁹ Ipi Ualare areve maeaforoe ve meru aeata are haikaea maravōpe lea karu vei haiiri haria leiti sore.

³⁰ E evera soa Ualare la kakeva auke lei roroaiape, a—, faitora Iuda karu ve kaeava vei e Ualare ve maeaforoe la sukaeaita meha;

³¹ lōfeare mai ita, ere faitora ōvafae kere lei roroaita, a—, e Ualare ve maeaforoe ovi roroaita lea vei, ere ta areve maeaforoe la eavai vei.

³² Ipi Ualare ereitaro karu foromai la sasaukōpe, ereitave mapai auke mai vei, eite are ereitaro foromai la maeaforoe leiti vei.

³³ Ualare sa ovi meita etau, haiovoro ita haiore ita ve toru ve karera leafeare ei! Are seseōvi kekese leita haiiri leisa ore? Are sa leita lea mai ve eite ta leisa seseōvaita ore ei?

³⁴ Usoso Safu Buka ve o fefeare, Papuvita ve haiiri leisa ore? Arero kurea ovoro omei lei ore leita karu leisa?

³⁵ Etau arero miōri ore leita karu leisa ipi tava are voa ata ovai vei?

³⁶ Ipi etau foromai areve, are voa foreri aea are sa leiape. Sosorusosoru are voa lei peava! Amene.