Roma 10 - Testamenta Áre 1983 (Toaripi PNG)

¹ Paumarehari e, ara haikakare leita etau, aea ara Israela karu vei Ualare la loki leita o meha, erero lei makuri leiti vei.

² Ere Ualare vei haihahari lei vovo roroa vovea, lea ara ore lei okofa moita ore, etau farakeka lea ve ipi ere haiiri ovava kofa kao.

³ Ere Ualare ita haura leita mai la haveva lei, ere ereve elore mai la seseōva vovo roroa, a—, ere Ualare sa karu la lei are ita haura leita mai la ovaia kao.

⁴ Ipi Keriso are Mose ve Safu O ve eite la lei kaleipe, sukaerereaita karu foromai la Ualare ita lei haura leiti vei.

Fareōvi lei makuri leita siahu karu foromai vei

⁵ Safu O la kakeva lei Ualare ita haura lōri leita mai vei, Mose sa ukōpe o mōfeare, Safu Mai la kakeva leitita lea karu makuri leiti roi.

⁶ A—, sukaerereaita haiiri voa foreraita haura vei o mō uka laisisea, A ave haiiri voa o mō levi aria, Kauri voa patai karu leisa? (lea ve eite Keriso la ovi faukai vei).

⁷ Aeata mōfeare o ta levi aria, Toru karera iri voa faukai karu leisa? (lea ve eite Keriso la opai voa ovi patai vei).

⁸ A—, are o leafeare moi? Ualare ve ovoro a ita la eaea, ave ape voa aeata ave haiiri voa, ela sukaerereaita haiiri vei itoro oita ovoro reha.

⁹ Ipi Iesu are Papuvita lea o la ave ape sa vavavai oria, aea Ualare arero opai voa moravōpe lea la ave haiiri voa sukaerereai oria, a—, aro lōri lei makuri leiti roi.

¹⁰ Ipi karu areve haiiri sa sukaerereaita, a—, are Ualare ita haura lei, aea are ape sa vavavaita, a—, arero fareōvi makuri loita reha.

¹¹ Safu Buka ve o meha, Arero sukaerereaita karu foromai erero lei maeamariti levi leiti roi.

¹² Karu foromai ve eite, Iuda karu aeata toru hariaharia karu, ere usoso kofa mea etau voa; Ualare are karu foromai ve Papuvita farakeka reha, aea arero isa loki leitita lea karu foromai la meru rauapo aiorai vovea.

¹³ Usoso Safu Buka ve o feare, Papuvita ve rare la isaita lea karu foromai la lei makuri leiti roi.

¹⁴ A—, ere sukaerereai auke leita lea Ualare la ere leafeare isa loki leiti roi ei? Ere mapai auke leita lea ovoro la ere leafeare sukaerereai roi ei? Itoro karu auke leitita, a—, ere ovoro la leafeare mapai roi?

¹⁵ Aea ovoro ta leafeare itoro ari roi, meu karu la itapai auke leitit’ oria? Usoso Safu Buka ve o feare. Fari lareva la mei foreraita karu fororoe ere reha.

¹⁶ A—, ere foromai Ovoro Lareva la mapaia kao. Ipi Isaia ve o meha. Papuvita e, ela voa mapōpe fari la leisa sukaerereōpe?

¹⁷ Soka sukaerereaita haiiri ovoro la mapaita voa forera vovea, aea Keriso vei itoro arita lea soa voa karu ovoro mapaita reha.

¹⁸ A—, arave lalasi o meha. Ere ovoro mapaia kao ei? Kasirau, ere mapaiape. Usoso Safu Buka ve o feare, Ereve i mearovaeka foromai voa, aeata ereve o mearovaeka ve itua‐tao itua‐tao voa fafarapi la mea.

¹⁹ Arave lalasi o aeata meha, Israela karu ere mapi ore leiti kao ei? Ere ore, omopa o meha Ualare ve o Mose sa moi, Ara eite auke toruipi sa ero lei hilisi lei, aea toruipi karu maeakakare sa ero lei kitou leiti roi.

²⁰ Aea Isaia ape karōva ita mō auai, Araro eli auke leiape lea karu sa araro sukaeōpe, Ara vei lalasi auke leiape lea karu la ara elore maea la muiōpe.

²¹ A—, Israela vei areve o meha, Ara sare savori voa ara arave mai oraka kaeava aea araro sukavutea roroaita karu la sosoropi muiaiape.