Mataio 8 - Testamenta Áre 1983 (Toaripi PNG)

Iesu pokea eka la lei ovava leipe

¹ Are raepa voa faukōpe lea mea, karu sitavu rovaea arero aitetei roroaiape.

² Soka pokea eka karu aea erero tai foreri arero hiopi, mō ōpe, A haikaeai oria, a araro lei ovava leitita ore.

³ Iesu areve mai sosoropi, arero mopi mō ōpe, Ara hai la kaeaipea, a ovava leitia. Soka areve pokea eka utohoa ovava leipe reha.

⁴ Iesu arero mō ōpe, Mapaia, a o karu farakeka aeata levi moia; te ave maea maso tivi karu la muia, Mose sa moipe lea etau la omopa posaseaia, karu la lei ore leiti vei.

Maola kapena vita ve sarufa atute

⁵ Are Kaperanauma voa isei oropōpe lea mea, maola kapena vita arero tai foreri arero loki o ita mō ōpe,

⁶ Papuvita e, arave sarufa atute arave uvi voa maea susuru eka lei la eaea, hehea‐hehea‐eite.

⁷ Are arero mō ōpe, Ara te arero lei lareva leiti vei.

⁸ A—, lea maola kapena vita arero mō ōpe, Papuvita e, a arave uvi iri voa oropaita, ara lareva kasirau. O sa haria moia, aea a arave sarufa atute la lōri lei lareva leiti vei.

⁹ Ara ta harofave karu ve ipi voa meita vita, aeata arave ipi voa maola karu hea ta ia. Ara karu farakeka aea la mō aritōva, Teraia; are terai roi; aeata karu aea la koti o moita soa, are ta koti roi; aea arave sarufa karu aea la mō aritōva, Mea la leitia, aea are leiti roi.

¹⁰ Soka Iesu lea o la mapi, are haihava lei, arero aitetei roroaiape karu la mō ōpe, Okofa ara ero o la moi, ara Israela karu voa mōfeare sukaerereaita haiiri la eavai sore.

¹¹ Ara ero o mō la moi, Mairimairi soa voa aeata avora soa voa pepeita karu rauapo aite foreri, aea Abrahama ita Isako ita Iakobo ita kauri ve basileia voa farehoria avai roi;

¹² a—, basileia ve atutemori la maria murumuru voa sukavuteai roi; karu lōvoa fi a’ a’, tao ta karekare ari roi.

¹³ Soka Iesu maola kapena vita la mō ōpe, Eapo teraia, ave sukaerereaita haiiri lōfeare a vei leitia. Soka lea ora kofa voa areve sarufa la lei lareva leipe.

Petero ve ōvalou aeata eka hariaharia karu

¹⁴ Soka Iesu Petero ve uvi voa oropōpe lea mea, are Petero ve ōvalou vevekoko eka sa lei posa voa eaeiape la ofae eavōpe.

¹⁵ Eovi are areve mai la paea, aea vevekoko eka arero paraea, aea are itei maeafukapaita tivi la are vei leipe reha.

¹⁶ Mea viriviri leipe soa ere harisu sa toaiape karu rauapo la arero tai lariōvi foreri, are lea arahoha la o a’ larivatei, aea eka karu foromai la lei lareva leiape.

¹⁷ Lōfeare voa peroveta Isaia sa mō moipe lea o la okofa leiti vei: Are kofa ereitave eka hariaharia aeata ereitave hehea hariaharia la taiovi meiape.

Iesu la aitetei roroaita mai

¹⁸ Soka Iesu arero eakoa toepōpe karu sitavu rovaea la ofae eovi, sitoi itai voa ufai vei o moipe.

¹⁹ Aea Safu Karoro ore vita farakeka aea arero tai foreri mō ōpe, Satiriaraita Papuvita e, a sa meita lea otioti foromai voa ara aro aitetei meava roi.

²⁰ A—, Iesu arero mō ōpe, Furuka ave merava merava ereve iroropaita uta‐uta ia, aea fufukaita ori ta ereve orea avaita tōvu ta ia; a—, Karu ve Atute areve harofave miavaita oti kasirau.

²¹ Satiriaraita karu farakeka aea arero mō ōpe, Papuvita e, ara rapi te arave oa viopai ao.

²² A—, Iesu arero mō ōpe, Araro aitetaia; opai karu ereve haria opai karu la viopaia.

Iesu karivaripu la o erere ōpe

²³ Soka are oroti aea voa forea, aea areve satiriaraita karu are ita farehoria foreōpe.

²⁴ Soka sitoi voa karivaripu fareōvi aea aroaro oroti voa suka sisōvaiape; a—, are ivutu eaeiape.

²⁵ Ere arero tai foreri arero sukitapi mō ōpe, Papuvita e, ereitaro lei makuri leitia, ereita ma isosea opai vei la roi.

²⁶ A—, are erero mō ōpe, Eve tore ipi lekōru, sukaerereai seika karu e? Lō mei are itei mea ita makaikara ita la o erere a’, mea akoka foromai leipe.

²⁷ Ere haihava lei mō ōpe, Mea lekōru karu, mea ita ma ita areve o la mapai!

Iesu aea harisu rauapo ita karu oraka

²⁸ Are ufi Gadarene karu ve mea voa forerōpe lea mea, harisu rauapo sa toaiape karu oraka arero sukaeōpe. Ereuka tapu oti la kiripi forerōpe. Ereuka ivara eokere ita karu la toaiape karu oraka, lea vei lea otiharo voa karu aea isaia kotia leita ore kao.

²⁹ Soka ereuka i rovaea ita mō isa moipe, Elaka a ita leati roi, Ualare ve Atute e? Elaka ve soa kofa areapo, a—, a elakaro lei hehea leiti vei koti mea ei?

³⁰ Soka erero ára‐ita voa, ita sitavu rovaea kavuru la lalō vovo roroaiape.

³¹ Lea harisu rauapo arero loki mō leipe, A elaro maria voa larivatai oria, a elaro lea ita sitavu ve iri voa itapaia.

³² Lō mei Iesu mō ōpe, Oroaia! Soka ere lea karu oraka la kiripi maria voa foreri ita ve iri voa oropi, aea lea ita sitavu foromai tatava voa oroa, sitoi voa foforea fafuka ma isoseōpe.

³³ Soka ita sitavu kiva karu oroa, karikara voa foreri, ita ve lea fari foromai la vavavōpe, aeata harisu rauapo sa toōpe lea karu oraka ve fari ta reha.

³⁴ Soka karikara karu foromai Iesu la sukaeai vei koti forerōpe. Ere arero ofae eavōpe lea mea, ere arero loki leipe are ereve mea la kiripai vei.