Mataio 7 - Testamenta Áre 1983 (Toaripi PNG)

Karu ve kaiae la seseōvi tava levi miaraia

¹ E karu ve kaiae la seseōvi tava miarai auke leitita, a—, Ualare ta eve kaiae la seseōvi tava levi miarai roi.

² Ipi e seseōvi kaiae o karu vei omoita, a—, lōfeare seseōvi kaiae o feare Ualare sa ero ta omoi roi. E sa karu haria la seseōvaita mai feare, Ualare sa ero lōfeare seseōvai roi.

³ A ave marehari ve ofae voa eaeipeta lea tola eloe la eavaita, a—, ave elore ofae kofa voa eaeipeta lea tola hōru la ore leiti auke leipeta ipi levea?

⁴ Aeata a ave marehari la o mō leafeare moitore, Ara ave ofae voa lea tola eloe la hopa fareovai ao, a—, eite tola hōru ave elore ofae kofa voa la eaea.

⁵ Aiera‐aiera karu e, lea tola hōru la ave elore ofae kofa voa fareovai ao, aea aite ave marehari ve ofae voa eaeita lea tola eloe la fareovai vei a ofae ovava ita lōri eavai roi.

⁶ Taivotaita etau ave la levi miaraia, aea eve isave fare ita ve omopa voa levi toapaia, ere erero mora sa patei, kerori ero kea sa titai ave.

⁷ Loki leitia, soka ero miarai roi; elia, soka e eavai roi; utape totoaia, soka are e vei fapai roi.

⁸ Ipi loki leita lea karu foromai ovaitore; aea elita lea karu ta eavaitore; aea utape la totoaita lea karu vei ta fapaitore.

⁹ E voa karu leisa, areve atute arero poi vei loki leitita, a—, are fave arero miarai roi ei?

¹⁰ Aea are arero ekaka vei loki leitita, a—, are ikaroa arero miarai roi ei?

¹¹ Soka e karu maealolo, a—, e meru etau lareva eve atutemori la miaraita ore, lōfeare mai ve arori voa eve kauri voa peita Oa sa etau lareva‐lareva arero loki leita lea karu la aiorai roi.

¹² Soka karu sa ero leiti vei haikaeaita lea etau foromai, lōfeare erero ta leitia; ipi Mose ve Safu O aeata peroveta o ita ve eite kofa reha.

Otiharo kofa

¹³ Otiape koko voa oropaia, ipi saroroapaita soa voa teraita lea otiharo are pisasa aea lōvoa oropi teraita karu rauapo.

¹⁴ A—, makuri soa voa teraita otiape are koko aeata otiharo ta tero; lōvoa oropi teraita karu ere fafareso reha.

¹⁵ E apeva peroveta karu vei kiva lei vovo roroava; ere pisiri voa mamoe ve maea feare lei, ero tai forerai roi, a—, iri voa ere ero la’ haroavaita furuka ave ve maea feare.

¹⁶ E erero ereve fare voa ore leiti roi. Karu vine fare la makaisa voa sarapi fareovai roi ei, ō haue fare la kiriraua voa itōvai roi ei?

¹⁷ Soka tola tepa lareva foromai fare lareva tai vovea. A—, tola tepa maealolo fare maealolo tai vovea.

¹⁸ Tola tepa lareva fare maealolo tai sore, aeata tola tepa maealolo fare lareva tai sore.

¹⁹ Fare lareva tai auke leita tola foromai la fei fei a voa sukapai roi.

²⁰ Soka e erero ereve fare voa ore leiti roi.

²¹ Papuvita e, Papuvita e, o lōri arita karu foromai kauri ve basileia voa levi oropai roi; a—, arave kauri voa peita Oa sa haikaeaita mai la leita lea karu sa haria.

²² Lea sare voa karu rauapo araro o mō ari roi, Papuvita e, Papuvita e, ela ave rare ita peroveta o itoro ari kao ei? Ela ave rare ita harisu rauapo la maria voa larivati oroai kao ei? Ela ave rare ita haihava leita etau rauapo la leiti kao ei?

²³ A—, ara tava o erero mō ari roi, Ara ero ore leiti sore; araro kiripi oroaia, e mai maealolo leita karu e.

²⁴ Lea vei arave mea o la mapi aea leitita lea karu foromai, ara ere farafarapo vei mōfeare ari roi; are areve uvi la fave kere arori voa turōpe haiore karu feare.

²⁵ Soka lai a’ a’, lorara ve ma farea, mea fareōvi aea uvi la toaiape; a—, are marukapi foforukai kasirau, ipi areve ipi la fave kere ve arori voa turōpe eavia.

²⁶ A—, arave mea o la mapi leiti auke leitita lea karu foromai, ara ere farafarapo vei mō ari roi: are areve uvi la miri‐folo arori voa turōpe haiivavu karu feare.

²⁷ Soka lai a’ a’, lorara ve ma farea, mea fareōvi aea uvi la toaiape; soka are marukapi foforukōpe, aea areve marukapaita hohororo rovaeka reha.

²⁸ Soka Iesu lea o mei mei kaleipe lea mea, lea karu sitavu are sa satiriaraiape lea o vei haihava leipe.

²⁹ Ipi are erero o siahu ita satiriaraiape, Safu Karoro ore karu ve mai lōfeare kao.