Mataio 28 - Testamenta Áre 1983 (Toaripi PNG)

Iesu opi ata itoipe

¹ Soka Sabati sare kaleipe, hebedoma ve omopa sare ve miori kofa, sare pataipe soa, Maria Magadala karikara ua, lea Maria aea ita auka kavōpe viopaita oti la ofae eavai vei.

² Lea soa pupuiōvu rovaeka pataipe; ipi Papuvita ve aneru aea kauri voa fauka foreri, fave aroruka maria voa miavi arori voa avōpe eavia.

³ Areve soso kevaro feare, aea areve maea puta sea kofa, oro ve sea feare leipe.

⁴ Lea kiva leipe maola karu arero tore lei, maea oriri a’ opaita karu ve maea feare leipe.

⁵ A—, aneru lea uamori oraka la laua sukōvi mō ōpe, Auka tore levi leitia, ipi ara ore euka Iesu, satauro voa paea opaia lea vita la elipea.

⁶ Are mōvoa kao; ipi are itoi, usoso are moivota lea o feare. Kotia, arero viopaia oti la ofae eavaia.

⁷ Soka euka lavelave te isei, aea areve satiriaraita karu la omoia, are opi ata itoi, aea mapaia, are eve omopa voa Galilea voa la kavai, e arero lōvoa ofae eavai roi. Mapaia, ara eukaro o omoita meha.

⁸ Soka ereuka tapu oti tore ita hailareva ita utohoa kiripi, areve satiriaraita karu la omoi vei soeōpe.

⁹ Soka otiharo voa Iesu sa ereukaro utohoa sukaea mō ōpe, Euka foforoe oraka meha! Ereuka arero haekao lei, areve mora mai sa paea auka arero taivotaipe.

¹⁰ Iesu ereukaro mō ōpe, Tore levi leitia. Isaia, arave maraiosu la Galilea voa kavai vei omoia; ere araro lōvoa ofae eavai roi.

Maola kiva karu sa fafarapōpe o

¹¹ Soka ereuka auka isaiape soa, maola kiva karu hea ta karikara voa isei foreri, lea leipe etau foromai maso harofave la omoipe.

¹² Lō mei ere opasora‐sora karu ita kokoruka, laua seseōvi roroka lei, ere moni pirori maea maola karu la miōri

¹³ mō ōpe, E o mō aria, Areve satiriaraita karu faita soa voa foreri, arero torea lei fareovaita ela sa ivutu iroropaia lea soa voa.

¹⁴ Soka gavana karu sa mea o la mapai oria, ela arero kurea areve kitou la lei safefeapai roi, are ero kaiae ve tava levi miarai vei.

¹⁵ Soka ere moni la ovi, aea erero satiriarōpe lea mai feare la leipe. Lōfeare vei mea fari Iuda karu voa fafarapaiape itiiti faitora.

Iesu areve satiriaraita karu tai forerōpe

¹⁶ Soka satiriaraita karu eleven ere Galilea voa kavōpe, Iesu sa erero o moipe lea raepa voa.

¹⁷ Ere arero ofae eovi, sukakoka hiopi arero maso toōpe. A—, karu hea horahora leipe.

¹⁸ Iesu erero tai koti erero o mei mō ōpe, Siahu foromai kauri voa aea mearovaeka ita voa araro miōri mea.

¹⁹ Lea vei teraia, torutoru karu foromai voa karu la lei ere ta satiriaraita karu leitia. Erero Oa ve rare aea Atute ve rare aea Safu Arahoha Lareva ve rare voa bapatiso leitia.

²⁰ Ara ero omoiape lea etau foromai ere leiti vei erero satiriaraia, aea mapaia, ara e ita lei peava roi, pepepepe mea ve soa kaleiti roi.