Mataio 27 - Testamenta Áre 1983 (Toaripi PNG)

Iudasi Isakariota ve opai

¹ Miori soa forerōpe lea mea, maso harofave karu foromai aea karikara ve opasora‐sora karu ita Iesu la paeai vei laua seseōvōpe.

² Ere Iesu la fasi, arero lariōvi te gavana karu Pilato la miarōpe.

³ Soka Iudasi, kivaia lei Iesu la paeai vei miarōpe lea vita, arero paeai vei o la mapōpe lea mea, are haiiri kerori lei, lea silva moni koru thirty la maso harofave karu aea opasora‐sora karu ita tai ata oviti mō ōpe,

⁴ Ara kaiae loi, ipi ara kivaia lei kaiae auke ovo la lei sisapai vei miaraia eavia. A—, ere mō ōpe, Lea etau ela vei larelekōru? A haria lea la ofae eavaia.

⁵ Soka are lea silva moni Maso Uvi voa toapi, maria voa te porokitaipe.

⁶ Soka maso harofave karu lea silva moni la maravi mō ōpe, Mea silva moni la maso uvi ve meru moni voa paraeaita lea safu, ipi are ovo ve tava moni eavia.

⁷ Soka ere laua seseōvi roroka lei, ere elōela pisosita karu ve oti la itaea lei ovōpe, ipi merava karu la viopaita oti vei.

⁸ Lea vei lea oti rare Ovo ve Oti rare aravi eaei vovea itiiti iso sare voa.

⁹ Lōfeare voa Ieremia peroveta vita sa mō moipe lea o la okofa leipe, Ara silva moni korukoru thirty la maravi, Israela karu hea sa seseōvi moipe lea vita ve lea tava la maravi,

¹⁰ aea ara elōela pisosita vita ve oti vei erero miarōpe, usoso Papuvita sa araro satiriaraita lōfeare.

Iesu Pilato ve omopa voa

¹¹ Soka Iesu Roma gavana ve soso voa soi pōvi, gavana arero lalasi mō leipe, A Iuda karu ve king ei? Aea Iesu mō ōpe, O a sa la moipea reha.

¹² A—, maso harofave karu aea opasora‐sora karu sa arero paraeaiape lea havara ve tava o are omoi kasirau.

¹³ Soka Pilato arero mō ōpe, Ere aro paraeaipeta havara rauapo a mapaia kao ei?

¹⁴ A—, are tava o omoi kao, o farakeka ta arero omoi kao, lea vei Pilato haihava leipe.

Pilato Iesu la seseōvi tava paeai o moipe

¹⁵ Soka sosoka soasoa voa Pilato dibura karu farafarapo, ere haikaeaiape lea karu la karikara karu tai paraea foreraiape.

¹⁶ Lea soa ere fari rovaea dibura karu farakeka ia, areve rare Iesu Barabasi.

¹⁷ Soka ere kokorukōpe lea mea, Pilato erero lalasi mō leipe, E paraeai vei haikaeaipeta karu leisa? Iesu Barabasi ei? ō Iesu Keriso la aravaita lea vita ei?

¹⁸ Ipi Pilato ore kofa ere hilisi lei Iesu la are sa arero seseōvai vei miarōpe.

¹⁹ Pilato seseōvaita oti voa aiseseiape lea mea, areve ua karu arero tai itapi mō ōpe, Lea haura vita la etau farakeka aeata levi leitia, ipi iso sare voa ara are vei auka paea, lea auka voa haisora rovaea sa araro lei hehea loi.

²⁰ Soka maso harofave karu aea opasora‐sora ita ere karu sitavu la kureōpe, ere Barabasi la paraea aea Iesu la paeai vei loki leiti vei.

²¹ Soka gavana tava o erero mōri leipe, Mea karu oraka voa, ara e vei leiro paraeai roi ei? Ere mō ōpe, Barabasi.

²² Pilato erero mō ōpe, Aita! Iesu, Keriso la aravaita lea vita la ara leafeare leiti roi? Ere foromai mō moi puavōpe, Arero satauro voa vitei paeaia!

²³ A—, are mō ōpe, Ipi levea? Are kaiae lekōru la loloi? Soka ere i rovaea foromai ata mō isa moi puavōpe, Arero satauro voa vitei paeaia!

²⁴ Soka Pilato areve o rofo auke lei, a—, ereve kitou hohororo ita au asaiape, lea la ofae eovi, are ma la ovi, mai la karu ve soso voa mauka mō ōpe, Ara mea haura vita ve ovo vei kaiae kasirau; e haria sa ofae eavaia.

²⁵ Lō mei karu foromai tava o mō moi puavōpe, Areve ovo elave arori voa, aeata elave atutemori ve arori voa miavaia.

²⁶ Lea mea are Barabasi erero tai paraea itapi forerōpe, a—, Iesu la teavi sa’ are arero satauro voa vitei paeai vei miarōpe.

Maola karu opasea lei Iesu la area sa vutea leipe

²⁷ Soka maola karu ere Iesu la gavana karu ve uvi rovaea voa lariōvi, aea ereve firu karu arero tai kokorukōpe.

²⁸ Kokoruka ere areve puta la fōovi puta mohari arero mopi,

²⁹ aea ere kekeva kiri marekeke sa sa’ areve harofave voa topi, aea sirivu areve mai toare voa arōpe; aea ere areve omopa voa sukakoka avi eapo o apeva ita mō moiape, Iuda karu ve King e, a eapo meha!

³⁰ Ere arero pea sa soea soea, aea sirivu la ovi areve harofave la teavi sōpe.

³¹ Ere arero lohalai taivotei roroka lei, ere lea arori puta la fōovi, areve elore puta kofa arero ata mopōpe. Aite ere arero satauro voa vitei paeai vei lariōvi kavōpe.

Iesu la satauro voa vitei paeōpe

³² Ere maria voa forerōpe soa, ere Kurene soa ve karu aea rare Simona la sukaea, arero irori ita haisa are areve satauro la taiovai vei.

³³ Ere oti rare Gologota voa forerōpe, lea rare ve eite harofave kōkuharo ve oti.

³⁴ Foreri ere mirupa eokere sa sisōvi kapekapeōpe uaina are lari vei miarōpe, a—, lea uaina la ape sa tarapi are lari vei haiarara leipe.

³⁵ Soka ere arero satauro voa vitei, aea ere areve maea puta la feai fasi faeafaea ōpe.

³⁶ Ere lōvoa avi arero kiva leiape.

³⁷ Aea areve harofave ve arori voa arero paeai ve ipi o mōfeare la uka vitaipe: Iesu meha Iuda Karu ve King.

³⁸ Ere are ita fareho torea karu oraka ta elore elore satauro voa vitaipe, farakeka areve mai toare voa, farakeku aea areve mai ava voa.

³⁹ Foapa vovo roroaiape karu ere arero o maealolo meimei, ereve harofave kaeakaea a’

⁴⁰ mō ōpe, Maso Uvi la toa foforuka sare oroisoria voa ata turai o oita vita e, ave elore maea la lei makuri leitia! A Ualare ve Atute oria, satauro voa faukaia.

⁴¹ Lōfeare mai ita maso harofave karu ta arero area sa vutea a’, aea Safu Karoro ore karu ita aea opasora‐sora karu ita mō ōpe,

⁴² Are karu hariaharia la lei makuri leiape; a—, are areve elore maea la lei makuri leitita ore kao. Are Israela karu ve king, are faitora satauro voa faukait’ oria, a—, ela arero sukaerereai roi.

⁴³ Are Ualare la sukaererea vovo mea vōvea, Ualare arero haikaeait’ oria, are arero faitora lei makuri leitia, ipi areve o meha, Ara Ualare ve Atute.

⁴⁴ Lōfeare mai ita are ita farehoria ereukave elore elore satauro voa vitaipe lea torea karu oraka ta arero o kaiae ōpe.

Iesu ve opai

⁴⁵ Sare koko leipe soa mea foromai la murumuru sa aierōpe; aieri eaea soa ora oroisoria kaleipe soa voa.

⁴⁶ Sare sōsi soa feare leipe lea mea, Iesu maea fi rovaea ita mō isōpe, Eloi Eloi, lama sabaktani, lea ve eite, Arave Ualare e, arave Ualare e, a araro kiripaita ipi levea?

⁴⁷ Haekao soi pepeiape karu hea lea o la mapi mō ōpe, Are Elia la la isaipea!

⁴⁸ Soka karu farakeka aea utohoa soea, fave soase ovi, uaina peroro sisōvi soa’, sirivo voa vifei, are sosoai vei muiōpe.

⁴⁹ A—, karu hea mō ōpe, Aupavaia! ereita ofae eavai ao, Elia koti arero lei makuri leita varo.

⁵⁰ A—, Iesu maea fi rovaea ata a’ areve ove la paraea soeōpe.

⁵¹ Lea soa kofa voa Maso Uvi la sasaukaita puta tavaea lōva aru voa torerapi itai itai leipe, soa arori peto fauka soa ipi peto voa. Mearovaeka oriri a’, raepa ve fave ta tofei,

⁵² sofa oti ve uta‐uta ta fapafapa a’, aea ivutu iroropōpe safu karu rauapo ve maea itoteōpe.

⁵³ Ere sofa otioti kiripi, aea Iesu sa opi ata itoipe soa ve aite voa ere Safu Karikara voa oropi, karu rauapo ve soso voa forerōpe.

⁵⁴ Soka Iesu la kiva maola kapena vita areve maola karu firu ita pupuiōvu aea lea leipe etau la ofae eavōpe lea mea, ere tore foromai lei mō ōpe, Okofa mea vita are Ualare ve Atute.

⁵⁵ Uamori rauapo ta ára‐ita popōvi fofoisaiape; ere Galilea kiripi Iesu la aitetei toara vovo roroaiape lea uamori.

⁵⁶ Ere voa Maria, Magadala karikara ua, aea Maria, Iakobo auka Iose ita ve lou, aeata Sebede ve atute oraka ve lou ta reha.

Iesu la viopōpe

⁵⁷ Soka mea aeai vei leipe soa, Arimatea voa peita pisoso vita aea Jerusalema voa forerōpe; areve rare Iosefa, aea are ta Iesu ve satiriaraita karu aea.

⁵⁸ Mea vita Pilato tai te Iesu ve maea la fareovai vei loki leipe. Lea mea Pilato miarai vei o moipe reha.

⁵⁹ Iosefa Iesu ve maea la ovi fauka, puta kere ovava sa ilafisa,

⁶⁰ aea areve elore tapu oti áre, are fave voa isōpe lea uta iri voa arero viopi, aea fave rovaea viopaita uta ve ape voa aroruka sasauka roroka lei, are terōpe reha.

⁶¹ Soka Maria Magadala karikara ua aea lea Maria aea ita lōvoa tapu oti ve omopa voa auka aipepeiape.

⁶² Miori soa, sosoka etau roroka leipe lea aite sare voa, maso harofave karu aea Farisea karu ita Pilato tai kokoruka,

⁶³ mō ōpe, Papuvita e, ela hai la kaeaipea, ipi lea apeva vuteaita vita areve makuri ve soa voa o mō ōvota, Sare oroisoria aite voa ara ata itoi roi.

⁶⁴ Lea vei eapo o haisa moia, areve tapu oti la kiva kofa leiti vei, sare oroisoria kaleiti ao, areve satiriaraita karu koti arero torea lei fareōvi, aea karu la apeva mō ari ave, Are opi ata itoi. Lōri leitit’ oria, omopa apeva taheka, a—, aite apeva foromai rovaea kofa leiti roi.

⁶⁵ Lō mei, Pilato erero mō ōpe, Kiva leita maola karu la lariōvi kei, e arero sasaukai haikaea ore leita lea mai feare e haria lōri sasaukaia.

⁶⁶ Soka ere kei, tapu oti ve utape la sasauka kere lei, sasaraita peise ta uka, kiva leita maola karu ta vipōpe reha.